Génesis 22
22
Dios Yayata Abraham cäsunqan
1Tsaypita atska wata päsaskiptinnam Dios Yaya musyayta munarqan Abraham cäsukuq o mana cäsukuq kanqanta. Tsaymi qayar nirqan: <<¡Abraham!>>
Niptinnam Abraham nirqan: <<¿Imallatatan, Taytay?>>
2Tsaynam Dios Yaya nirqan: <<Japallan kuyay tsuriki Isaacta pusharkur Moriahman ayway. Rikätsinqaq jirkachömi sacrificiupaq tsurikita waykanki>>.
3Tsaymi Abrahamqa waränin alliq tsaka tsakalla yantata tseqtaskir ashnunman chaqnarqan. Tsaypitanam ishkay serviqninkunatawan tsurin Isaacta pusharkur aywarqan. 4Kimsa junaqna aywaykarmi Abraham rikarqan tsay jirka karuchö kaykaqta. 5Tsaymi pushanqan serviqninkunata nirqan: <<Wamralläwanna taqay jirkaman Dios Yayata adoraq aywayäshaq. Kutiyämunqäyaq kayllachö ashnuntsikta mitsipaykäyay>>.
6Tsaynö nirmi Abrahamqa sacrificiuta waykananpaq yantata aparitsirqan tsurin Isaacta. Tsaypitam ninatawan cutsilluta aparkur tsurinwan aywayarqan.
7Aywaykäyaptinnam taytanta Isaac nirqan: <<¡Taytay!>>
Abrahamnam nirqan: <<Hïju, ¿imatatan munanki?>>
Isaacnam nirqan: <<Ninatawan yantatam apaykantsik. Peru sacrificiuta waykanapaq ¿maychötan cordëruqa?>>
8Abrahamnam nirqan: <<Hïju, Dios Yayam cordërutaqa churamunqa>>.
Tsaynö parlarmi aywayarqan.
9Dios Yaya rikätsinqan jirkaman Abraham chaykurmi altarta perqarqan. Tsay altar jananman yantata churarkurmi tsurin Isaacta pankiykurnin churarkurqan.#Stg. 2.21. 10Cutsilluta aptarkur tsurinta wañutsinanpaq kaykaptinnam 11Dios Yayapa angelnin ciëlupita nimurqan: <<¡Abraham! ¡Abraham!>>
Abrahamnam nirqan: <<¿Imallatatan, Taytay?>>
12Angelnam nirqan: <<Tsurikita ama wañutsiytsu. Kananmi sïqa musyä Dios Yayapita mantsakunqaykita. Japallan kuyay tsuriki kaykaptinpis manam nëgamashkankitsu>>.
13Tsaypita tumaykurnam Abraham rikaykurqan juk carnëru shirakachö waqrapita watakashqa kaykaqta. Tsay carnërutam tsurinpa rantin sacrificiupaq waykarqan.#Heb. 11.17-19. 14Tsaynöpam Abraham tsay jirkapa shutin churar nirqan: <<Dios Yaya previnipan>>.#22.14 Hebreo idiömachömi tsay shuti kaykan Yahweh-yireh. Tsaymi kananyaqpis runakuna niyan: <<Jirkachömi Dios Yaya previnipämäshun>>.
15Tsaypitam Dios Yayapa angelnin ciëlupita Abrahamta yapay nimurqan: 16<<Dios Yayam nin: <Mandanqaqta cäsumarmi japallan kuyay tsurikitapis nëgamashkankitsu. Tsaymi kikïpa shutïchö jurar niq: 17Rasunpam bendicionnïta qamman churamushaq. Tsaynöllam maytsikaman mirayänanpaq qampita miraq aylluykikunata yanapashaq. Qoyllurkuna y lamar kuchunchö arenïlla mana yupaytapis puëdiypaq kanqannömi qampita miraq aylluykikuna maytsikaman mirayanqa.#Heb. 6.13-14; 11.12. Tsay aylluykikunam llapan chikiqninkunata venciyanqa. 18Qampita miraq raykum kay patsachö llapan nación runakunapis bendicionta chaskiyanqa.#Hech. 3.25; Gál. 3.8. Tsaynöqa kanqa mandanqaqta cäsumanqaykipitam> >>.
19Abrahamnam serviqninkunata jaqinqanman kutimurqan. Tsaypitanam Beersebaman serviqninkunawan kutikuyarqan.
Nacorpa tsurinkuna
20Tsaykuna päsaskiptinmi Abrahamta willayarqan wawqin Nacorpa tsurinkuna warmin Milcachö kayanqanta. 21Nacorpa qepa kaq tsurinpa shutinmi karqan Uz. Uzpa qepa kaq wawqinmi karqan Buz. Buzpa qepannam karqan Kemuel. Kemuelpitam Aram runakuna kayan. 22Nacorpa wakin kaq tsurinkunam kayarqan Quesed, Hazo, Pildas, Jidlaf y Betuel. 23Betuelqa karqan Rebecapa taytanmi. Tsay pusaq tsurinkunam kayarqan Nacorpa warmin Milcachö.
24Tsaynöllam concubïnan Reúmachöpis Nacorpa tsurinkuna kayarqan Teba, Gaham, Tahas y Maaca.
Okuqokiwe okwamanje:
Génesis 22: qxn
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2011, Wycliffe Bible Translators, Inc. All rights reserved.