Génesis 20
20
Sarata Abimelec pushatsinqan
1Tsaypita Abraham Neguevpa päsarmi Cadespita Shurman päsana desiertuchö täkurqan. Tsaypitanam Gerar markapa aywar tsaychö täkurqan. 2Tsaychö täkuykarmi Abrahamqa warmin Sarapaq nirqan: <<Payqa panïmi>>.#Gén. 12.13; 26.7. Tsaynöpam Gerar markapa mandakuqnin rey Abimelec Sarata pushatsirqan warmin kananpaq.
3Pushatsinqan paqasmi Abimelecta sueñuyninchö Dios Yaya nirqan: <<Ollquyuq warmita warmiki kananpaq pushatsimunqaykipitam kanan wañunki>>.
4Abimelecqa manaraqmi Sarawan puñurqanraqtsu. Tsaymi nirqan: <<Dios Yayallä, manaraq puñuykaptïqa ¿imanirtan wañutsimayta munanki? 5Kikin Abrahammi panin kanqanta nimarqan. Tsaynöllam Sarapis nimashqa turin kanqanta. Tsaynö niyämaptinmi allipa musyaykur pushatsimur ni ima mana allitatsu rurashkä>>.
6Tsaynö niptinnam sueñuyninchö Dios Yaya nirqan: <<Aw, musyämi imatapis lluta mana ruranqaykita. Tsaynöpam jutsata mana ruranaykipaq tsay warmiwan puñunaykita dëjashkaqtsu. 7Tsay warmita ollqunman kutitsiy. Ollqunmi willakuq profëta. Warminta kutitsiptikim mañakamunqa mana wañunaykipaq. Peru mana kutitsirqa rasunpa musyay qamta y wajikichö llapan täkuqkunata ushakätsinäpaq kanqanta>>.
8Patsa waraskiptinnam Abimelec llapan mandäsiqninkunata qayaskatsir imata sueñunqanta willarqan. Tsaynö willakuptinmi paykuna alläpa mantsakäyarqan. 9Tsaynam Abrahamta qayaskatsimur Abimelec nirqan: <<¿Imanirtan tsaynö llullatsimashkanki? ¿Imachötan piñatsishkaq noqatawan yanapamaqnïkunatapis mana alli jutsaman qarpayämänaykipaq? Tsaytaqa mana allitam rurashkanki. 10¿Imata yarpartan <Saraqa panïmi> nimarqayki?>>
11Tsaynö niptinnam Abraham nirqan: <<Noqam yarparqä kay markachö runakuna Dios Yayapita mana mantsakur warmï rayku wañutsiyämänanpaq kanqanta. 12Panï kaytaqa panïmi, peru taytällapitam. Tsaynöpam paywan churakashkä. 13Taytäpa wajinpita aywakunäpaq Dios Yaya nimaptinmi Sarawan willanakuyarqä mayman chäyaptïpis <turïmi> nimänanpaq>>.
14Tsaynö niptinmi Abrahampa warmin Sarata kutitsirnin Abimelec entregarqan. Kutiykatsirnam Abrahamta qararqan üshakunata, cabrakunata, wäkakunata y serviqnin warmikunatawan serviqnin runakunatapis. 15Tsaypitanam Abrahamta nirqan: <<Musyanqaykinöpis podernïchömi kay nación. Munanqaykichö täkunaykipaq akrakuy>>.
16Tsaynöllam Saratapis nirqan: <<Turikitam waranqa (1,000) siclo qellayta#20.16 Juk siclo qellayqa juk killa arur gänanqannömi karqan. entregashkä tsaynö päsashunqayki honraykipita pipis manana parlaykänanpaq>>.
17-18Sarata apanqanpitam Abimelecpa warminta y warminpa serviqninkunatapis llapanta Dios Yaya qolluqyätsirqan. Tsaymi Sarata qoriskir Abrahamqa Abimelecpaq Dios Yayata mañakurqan. Mañakuptinmi Abimelecta, warminta y warminpa serviqninkunatapis kutikätsirqan wawayuq kayänanpaq.
Okuqokiwe okwamanje:
Génesis 20: qxn
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2011, Wycliffe Bible Translators, Inc. All rights reserved.