Mwanzo 23
23
Ofwa wa Suhura
1Suhura eekhaliye nyaakha miiya na eshiriini na sapa. 2Khufwa Kiriyati Aarapa oniittheliwaawo Heporooni tuniya ya Kanaani. Eburahiima khusala alila na ojiliza ofwa wa Suhura.
3Ye khunlikha muukhaawe ari woofwa, khulawa ottakhulana ahiiti yoori: 4“Miiyo ki mmalapo na ki nletto mmuti mphu; ila kinuuvekelani okinkha ruhusa ya wiiyana vilalo yaka mmuti mweenu mphu, yoori kinzikhemo muukhaaka.”
5Ahiiti apale khunjipu Eburahiima yoori: 6“Osiileze Mbwana eetthu, fweeyo niniwinkha hishima nkhama mfwalume wa Nluku. Apho olawe wanzikhe muukhaawo wakhula vilalo etile enuufwayaaye. Khaavo mmote wa fweeyo antakhaaye wuukhattaza khapuri yonzikhavo muukhaawo.”
7Aphano Eburahiima khulankha khwiinama omaasho wa ahiiti, ennyewe nti opule. 8Khuwuuza yoori: “Nkhama khweele mwinaaye niiya yookikhupalela onzikha muukhaaka, mwikivekelele Eforoni, mwaana wa Zohaari, 9yoori akuuzanyeze likurakuza la Makhipeela liriiye mmwiinano wa nshapa lawe. Miiyo kininripha hisapu yoolikana mooshi moonaka, yoori likurakuza laya nttho liiye vilalo yoowaazikhamo ajamaazaku.”
10Eforoni nhiiti, aarettiye eekhaliye vamote na attunkhulu a sitati ethiitile, ye khunjipu Eburahiima vakatthi wa ahiiti ooshi aari vanlako wa sitati ethiitile yoori: 11“Wala mbwanaaka! Okisiileze, miiyo kiniwinkha nshapa na likurakuza liriiye nttumpho, kiniwinkha atthu ooshi apa ariiye apha eettaka woona. Olawe wanzikhe muukha awo.”
12Eburahiima khwiinama swaafu ya phiiri, omaasho wa atthu apale a mmuti mphule. 13Ye khumuuza Eforoni atthu ooshi eettaka osiila yoori: “Safwatali mwikisiileze, kintta oripha hisapu la nshapa ntthile. Okhupalele yoori kiwahi onzikhamo muukhaaka.”
14Eforoni khunjipu Eburahiima yoori: 15“Okisiileze mbwanaaka! Nti aya opo pu wa nzurukhu wa feeta miiya nne. Eto yaya niini miiyo na weeyo? Wanzikhemo muukha awo.”
16Hisapu etile aalupiyeeyo Eforoni atthu ooshi asiilaka, Eburahiima khukhupalela. Khuphima miphimo miiya nne za nzurukhu wa feeta khumwinkha, nkhama etthiipo aari ophimakaazo anamuuzanyisa.
17Attaaphale, Eburahiima khwiiya mweenyewe nshapa la Eforoni laari Makhipeela mwiinano na Manre, na likurakuza laariimo na miitthi zooshi. 18Ahiiti ooshi apale aari vanlako wa sitati etile khwiiya mashaahiti. 19Wakathi enkhiweevo nti aya opule, khunthuula muukhaawe Suhura khulawa khunzikha nlikurakuza la Makhipeela kharipu na Manre eriiye Heporooni, tuniya ya Kanaani. 20Khwa etthiipo, khuhakikhiwa nshapa ntthile na likurakuza laya pi Ahiiti wiiya vilalo ya Eburahiima.
Okuqokiwe okwamanje:
Mwanzo 23: eko
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2020, Wycliffe Bible Translators, Inc. All rights reserved.