Mat 4
4
Satan momse Jesus
(Mak 1.12-13; Luk 4.1-13)
1Keyioy ə Feyine me liɛ Jesus è ndu nɛ̀ wen se əbkwak ge Satan momse. 2Jesus yese se jeŋ è chii se jeŋ se əbchii əmmkɛɛk, jeŋ me se yafe wen. 3Satan gwiy è suuy se wen ge: Lòò è yɛ lu ge wɛ lu wán ə Feyin, wɛ̀ bense ɛtiy ghin se keban.
4Jesus fise ge: Ke lu kenyaken ɛ ŋwaale-Feyin ge, wele báà se chii kɛn se əbfua-əbyíɛ́ne, wele chii se giɛ sejim sɛ se fəyen ɛ Feyine əbchio.
5Satan me liɛ wen, è ndu so se Jolesalem, dii ntɛk ɛylanen, è kokse wen se kegwɛs ə ndaa-ɛykokse, 6è suuy se wen ge: Loo lu ge wɛ̀ lu Wán ə Feyin, wɛ̀ chak se ntiɛ; bek ge ke lu kenyaken ɛ ŋwaale Feyin ge:
“Feyine náà lam é nchiyse-ndaa nə wene yɛ chiye wɛ̀.
Ghene náà koo wɛ̀ nɛ̀ ɛghoo ə ghene
fɛ wɛ̀ fɛy è kfən kevəə ə kiɛ se ɛytiy.”
7Jesus suuy se wen ge: Ke ko gese lu kenyaken ɛ ŋwaale Feyin ge: “Wɛ̀ báà se lu se momse Báàba wɛ Feyin ə fiɛ.”
8Satan gese liɛ Jesus è kok so se ketuu kfən ɛydia ɛylee è din telak tejim ɛ ketuu ntiɛ se wen nɛ̀ əbjuŋ wɛ əb luun ɛ ten, 9è suuy se wen ge: Wɛ̀ təm ɛləy è kokse mɛ, é mɛ fó ketuu ntiɛ nɛ̂ kin se wɛ̀ kejim.
10Jesus me suuy se Satan ge: Loo se mɛ ɛybee. Ke lu kenyaken ɛ ŋwaale Feyine ge: “Wɛ̀ lu se yɛ kokse kɛn Báàba wɛ Feyin ə fiɛ gese fɛle kɛn se wen.”
11Satan me lòò, è vəse Jesus se fo, nchiyse-ndaa nə Feyine gwiy è giamten wen.
Jesus kɛɛte ɛyfɛl ə wen ɛ Galilee
(Mak 1.14-15; Luk 4.14-15)
12Jesus nɛy yio ge ɛ́ viimen Joon se nchak, è me lòò è ndu ɛ Galilee. 13Əb ndu, è jia se chii ɛ Nazalet, dî è se chii nɛ lu ɛ Kabanaum wɛ luun ntɛk ɛ əbghune kechəm keghuye kɛ́ Galilee, nɛ lu ngvən Zebulun ghene Naftali. 14Ke nè gan dì se nɛɛy ge kenəə kɛ wele ntum nə Feyine wɛ Ezaya nè suuyen kwɛn.
15Əb nè suuy ge:
“Ngvən ə Zebulun ghene ngvən ə Naftali,
ɛylak yɛ ɛy luun ɛ əbghune kechəm keghuye
ɛ njine jio Joldan,
Galilee bene fɛ ghel əbtume chiin,
16Ghel ghɛ ɛ́ chiin ɛ nfiine
nɛ̂y yɛn nɛ ɛybane gwiye se ghene naa se ŋaŋ.
Ɛybane nɛ̂y gwiy,
se ghel ghɛ ɛ́ nè chiin ɛ nfiine gese chii ɛ məme ɛykuo.”
17Se kɛ̀ɛ̀tè se əbliy fo, Jesus kɛɛte se yɛ fekte kenəə ə Feyin ge: Ghɛn kubsen tetem ə tɛn bek ge ɛysak əbfon ɛyyio shi ɛ keghoo.
Jesus liɛ ghon-ɛyfɛl nə wene ghɛ́ mbiye
(Mak 1.16-20; Luk 5.1-11)
18Nɛy se lu ka Jesus nè ghanlen ɛ əbghune kechəm keghuye kɛ́ Galilee, əb yɛn ghone-nyii ɛbaa, Simon wɛ ɛ́ toŋten ge Bita ghene wan-no ə wene Andole, nɛ ghene make felam ɛ jio, bek ka ghene nè luun ghel ɛykoo səəse. 19Jesus suuy se ghene ge: Ghɛn gwiy ɛ́ loo, é mɛ nɛɛy é ghɛn yɛ koo nɛ lu ghel. 20Ghene me vəse əmlam mə ghen kaŋ ɛymok è se jumte nduu nɛ̀ wen.
21Jesus loo ndu, è yɛn ghone-nyii ɛlee ɛbaa nɛ lu Jɛms ghene wan-no ə wene Joon ghon ə Zebedee. Ghene nè lu ɛ kenək ghene ghe ba ə ghene Zebedee siyse əmlam mə ghen. Jesus jaŋ ghene, 22ghene me vəse kenək, nɛ̀ ba ə ghen kɛn se əbliy, è me se jumte nduu nɛ̀ Jesus.
Jesus se dintee, fekte gese chuke ghel
(Mak 6.17-19)
23Jesus me lòò è se ghane Galilee əbjim, dinte əbnəə se ghele ɛ ghene ngayse ɛyjem, fekte sakghɛ əbjuŋ wɛ kum ɛysak ə Feyin, gese chuke naa tenkii teyaf tejim, nɛ̀ ɛynkii əbnəə əbjim wɛ əb fóon ngɛk se əbghune. 24Ɛ́ saaken nə sakghɛ wɛ kum wen Silia əbjim, ghele me se gwiye nɛ̀ ghel ɛyafkene se wen ge əb yɛ chuk. Ɛlee nè lu nɛ ɛyghune chɛfe chɛfen, nɛ ɛlee lu ghel ɛyfim, nɛ ɛlee yafe nɛ̀ kenguo, nɛ ɛlee lu ɛləmmene. Əb chuk ghene ghel ɛjim. 25Feliɛ wele se nduu ɛ wen ɛybam nɛ fe loo ɛ Galilee, nɛ̀ Ntɛk-Sɛ-Ɛyvəm, nɛ̀ se Jolesalem, nɛ̀ se Judea, gese nɛ̀ se ɛybee njine jio Joldan.
Okuqokiwe okwamanje:
Mat 4: oku
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
©CABTAL, 2012
