ᐊᑈᔅᑕᓇᒡ 9
9
ᓴᓪ ᑲ ᒋᒋ ᑕᑈᔭᔨᒪᑦ ᒋᓴᓴ
Acts 9.1-6 (Easter-3 Year C)
1ᓴᓪ ᒪᒃ ᐎᔾ ᐊᔅᒄ ᐊᐅᑯᓐ ᑲ ᐃᑎᑦ ᐊ ᐎ ᓯᓴᒋᐊᑦ ᐊᓂᔭ ᐊᐛᔪᐛ ᐅᑎᐸᔨᒋᒐᐛ ᒋᓴᓴ ᑲ ᑕᑈᔭᔨᒪᔨᒋ ᐊ ᐃᑕᑦ ᒐ ᓂᐸᐊᑭᓄᔨᒋ᙮ ᒋ ᓂᑐᐛᐱᒪᐤ ᒪᒃ ᒋᓴᐊᔭᒥᐊᐅᒋᒪᐛ, 2ᒂ ᓂᑐᑎᒧᐛᑦ ᒐᒋ ᒥᔨᑯᑦ ᒥᓯᓇᐃᑭᓂᔪᐤ ᒐᒋ ᐛᐸᑎᔭᑦ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᒍᐤ ᐊᔭᒥᐊᐅᒋᒪᐛ ᐊᓐᑕ ᑕᒪᔅᑲᓯᒡ ᑲ ᑕᔨᒋ ᐊ ᐎᑕᑭᓄᐎᒡ ᐊᓐᑕ ᐊ ᒥᔭᑭᓄᐅᑦ ᒐᒋ ᒪᑯᓇᑦ ᐃᔎᐛ ᑭᔭ ᓇᐸᐛ ᑲ ᑕᑈᔭᔨᒪᔨᒋ ᒋᓴᓴ, ᑭᔭ ᑲᐤ ᒐᒋ ᒋᐛᑕᐊᑦ ᐊᓐᑕ ᒋᕈᓯᓕᒥᒡ᙮
3ᒋ ᐃᑐᑕᐤ ᒪᒃ ᐊᓐᑕ ᑕᒪᔅᑲᓯᒡ, ᐃᔅᐱ ᒪᒃ ᐊ ᐊᑎ ᐸᔄᐸᑕᐧᒃ, ᓯᔅᒋᑯᒡ ᒋ ᐅᒋ ᒥᔅᑎ ᐛᔅᑕᔪᐤ ᐊᓐᑕ ᐛᔅᑲ ᐊ ᑕᑦ ᒋᒋᒋᓯᑯᒡ ᐊ ᐅᒋ ᐛᔅᑕᔨᒡ᙮ 4ᒋ ᐸᒋᓯᓄᐤ ᐊᔅᒋᒡ, ᐊᑯ ᒂ ᐸᑐᐛᑦ ᐊᐛᔪᐛ ᐊ ᐃᑎᑯᑦ, “ᓴᓪ, ᓴᓪ, ᒐᒂᓐ ᐛᒋ ᑯᒂᒋᐃᔨᓐ ?”
5ᐊᑯ ᓴᓪ ᒂ ᐃᔅᒋᔄᑦ, “ᐊᐛᓐ ᒪᒃ ᒋᔾ, ᐅᑎᐸᔨᒋᒐᐤ ?”
ᐊᑯ ᑲ ᐃᑎᑯᑦ ᐊᓂᔭ ᐊᐛᔪᐛ, “ᐊᐅᒄ ᓂᔾ ᒋᓴᔅ, ᐊᓐ ᐊᐛᓐ ᑲ ᑯᒂᒋᐃᑦ᙮ 6ᐱᓯᑯ ᒪᒃ, ᒐ ᐃᑐᑕᔨᓐ ᐊᓐᑕ ᐅᑕᓇᒡ ᐊᑯᑕ ᒐ ᐎᑎᒪᑯᐎᓐ ᑕᓐ ᒐ ᐃᑎᔨᓐ᙮”
7ᐊᓐᒡ ᒪᒃ ᓇᐸᐅᒡ ᑲ ᐎᒐᐛᒡ ᓴᓚ ᒋ ᒋᐱᒋᑲᐳᐅᒡ ᐊ ᐊᑲ ᓇᔅᒡ ᒋᔅᑐᒡ᙮ ᒋ ᐸᑐᐛᐅᒡ ᐊᓂᔭ ᐊᐛᔪᐛ ᒥᒄ ᓇᒪ ᐅᒋ ᐛᐱᒪᐅᒡ᙮ 8ᐊᑯ ᓴᓪ ᒂ ᐱᓯᑯᑦ, ᐃᔅᐱ ᒪᒃ ᑲ ᑐᐧᑲᐱᑦ, ᓇᒪ ᐅᒋ ᐛᐸᑎᒻ᙮ ᐊᑯ ᐊᓐᒡ ᓇᐸᐅᒡ ᑲ ᓯᒋᓂᔅᒐᑕᐊᒡ ᐊ ᐃᑐᑕᐊᒡ ᐊᓐᑕ ᑕᒪᔅᑲᓯᒡ᙮ 9ᓂᔅᑐ ᒋᓯᑲᐛ ᒪᒃ ᓇᒪ ᐅᒋ ᐛᐸᑎᒻ, ᐊᔪᐤ ᒪᒃ ᓇᒪ ᐅᒋ ᒥᒋᓱᐤ ᑭᔭ ᓇᒪ ᐅᒋ ᒥᓄᐤ᙮
10ᐊᓐᑕ ᒪᒃ ᑕᒪᔅᑲᓯᒡ ᒋ ᑕᐤ ᓇᐸᐤ ᐊ ᑕᑈᔭᔨᒪᑦ ᒋᓴᓴ, ᐊᓇᓇᔭᔅ ᒋ ᐃᓯᓂᐧᑲᓱᐤ᙮ ᒋ ᐛᐸᑎᔭᑭᓄᐤ ᐛᐸᑎᔨᐛᐅᓂᔪᐤ, ᐊᑯᑕ ᒪᒃ ᑲ ᐃᔨᒥᐃᑯᑦ ᐅᑎᐸᔨᒋᒐᐛ ᐊ ᐃᑎᑯᑦ, “ᐊᓇᓇᔭᔅ᙮”
ᐊᑯ ᒂ ᐃᑕᑦ, “ᒐᒂᓐ ᑎᐸᔨᒋᒐᓱᐤ ?”
11ᐊᑯ ᒂ ᐃᑎᑯᑦ ᐅᑎᐸᔨᒋᒐᐛ, “ᐱᓯᑯᐤ, ᒐ ᐃᑐᑕᔨᓐ ᓇᑕ ᒪᔅᑭᓄᐤ ᑲ ᑯᐃᔅᑯᒧᒡ ᑲ ᐃᓯᓂᐧᑲᑕᒡ᙮ ᐊᑯᑕ ᐊᓐᑕ ᒍᑎᔅ ᐎᒋᒡ ᒐ ᑯᒂᒋᒐᒧᔨᓐ ᐊᑕᒂ ᓇᐸᐤ ᓴᓪ ᐊ ᐃᓯᓂᐧᑲᓱᑦ ᐊᓐᑕ ᑕᕐᓯᔅ ᐊ ᐅᒋᑦ᙮ ᐊᐅᒄ ᓴᓪ ᒪᒂᒡ ᐊᔭᒥᐊᐤ᙮ 12ᒋ ᐃᓯᓂᒻ ᑭᔭ ᐊ ᐸᒋ ᐱᒐᔨᒋ ᓇᐸᐛ ᐊᓇᓇᔭᔅ ᐊ ᐃᓯᓂᐧᑲᓱᔨᒋ, ᐊ ᑕᒋᓂᑯᑦ ᒥᓐ ᑲᐤ ᒐᒋ ᐛᐸᑕᐧᒃ᙮”
13ᐊᑯ ᐊᓇᓇᔭᔅ ᒂ ᐎᑎᒧᐛᑦ ᐅᑎᐸᔨᒋᒐᐛ ᐊ ᐃᑕᑦ, “ᐅᑎᐸᔨᒋᒐᐤ, ᒥᒐᑦ ᐃᔪᒡ ᓂᒋ ᐎᑎᒪᑯᒡ ᐅᔭ ᓇᐸᐛ ᑕᓐ ᐊᔅᐱᔅ ᓂᓇᐧᑲᒋᐊᑦ ᐊᓂᔭ ᑲ ᑕᑈᑎᒥᔨᒋ ᐊᓐᑕ ᒋᕈᓯᓕᒥᒡ ᑲ ᑕᔨᒋ᙮ 14ᑭᔭ ᒋ ᐸᒋ ᐃᑐᑕᐤ ᓴᓪ ᐅᑕ ᑕᒪᔅᑲᓯᒡ, ᐊᒋ ᒥᔨᑯᑦ ᑲ ᓂᑲᓂᔅᑯᐛᔨᒋ ᐊᔭᒥᐊᐅᒋᒪᐛ ᒐᒋ ᒪᑯᓇᑦ ᒥᓯᐛ ᐊᓂᔭ ᐊᐛᔪᐛ ᑲ ᑕᑈᔭᔨᒥᔅᒋᔨᔅᒋ᙮”
15ᐊᑯ ᐊᓇᓇᔭᔅ ᒂ ᐃᑎᑯᑦ ᐅᑎᐸᔨᒋᒐᐛ, “ᐃᑐᑕ ᐃᔭᐱᒡ, ᐛᔅ ᓂᒋ ᐅᑎᓇᐤ ᓴᓪ ᒐᒋ ᐸᒋ ᐊᑐᔅᑯᐅᑦ, ᑭᔭ ᒐᒋ ᐸᒋ ᒋᔅᒐᔨᑕᑯᐃᑦ ᐊᓐᑕ ᒍᐤ ᐃᔪᐛ ᐊ ᑕᔨᒋ ᑭᔭ ᐊᓐᑕ ᐊ ᐊᑲ ᒍᐤ ᐃᑎᔅᑲᓇᓯᔨᒋ ᐃᔪᐛ, ᑭᔭ ᒋᓴᐅᒋᒪᐛ ᐊ ᑕᔨᒋ᙮ 16ᐛᔅ ᓂᔾ ᓂᑭ ᐛᐸᑎᔭᐤ ᑕᓐ ᒐ ᐃᓯ ᓂᓇᐧᑲᑕᔨᒧᑦ ᓂᔾ ᐅᒋ᙮”
17ᐊᓇᓇᔭᔅ ᒪᒃ ᒋ ᐃᑐᑕᐤ ᐊᓐᑕ, ᒂ ᐱᒐᑦ ᐊᓂᔭ ᒥᒋᐛᐱᔪᐤ ᐊᓐᑕ ᑲ ᐃᑎᓴᐛᑭᓄᐅᑦ᙮ ᐃᔅᐱ ᒪᒃ ᐎᔭᐱᒪᑦ ᐊᓂᔭ ᓴᓚ, ᐊᑯ ᒂ ᑕᒋᓇᑦ ᐊ ᐃᑕᑦ, “ᓂᐧᑲᓂᔅ ᓴᓪ, ᐅᑎᐸᔨᒋᒐᐤ ᒋᓴᔅ ᓂᒋ ᐸᒋ ᐃᑎᓴᐅᒄ, ᐊᓐ ᑲ ᓂᒋᔅᑲᔅᒃ ᓇᑕ ᒪᔅᑭᓇᒡ ᒪᒂᒡ ᑲ ᐸᒋ ᐃᑐᑕᔨᓐ ᐅᑕ᙮ ᓂᒋ ᐸᒋ ᐃᑎᓴᐅᒄ ᒥᓐ ᑲᐤ ᒐᒋ ᐛᐸᑎᒥᓐ, ᑭᔭ ᒐᒋ ᓴᑭᔅᒋᓇᔅᑲᔅᒃ ᑲ ᐸᔭᒋᓯᑦ ᐊᒐᐧᒄ᙮”
18ᑎᐛᒡ ᒪᒃ ᒧᔭᒻ ᓂᒪᔅ ᐅᓯᑭᔭ ᐊ ᐃᓯᓇᑯᓂᔨᒋ ᒐᒂᔪᐛ ᒋ ᐅᒋ ᐸᐸᒋᑎᓂᔪᐛ ᐊᓐᑕ ᐅᒋ ᓴᓪ ᐅᔅᒋᓯᑯᒡ, ᐊᑯᑕ ᒪᒃ ᒥᓐ ᑲᐤ ᑲ ᐅᒋ ᐛᐸᑕᐧᒃ᙮ ᒋ ᐱᓯᑯᐤ ᐊᑯ ᑲ ᓯᑲᐃᑐᐛᑭᓄᐅᑦ᙮ 19ᐃᔅᐱ ᒪᒃ ᑲᒋ ᒥᒋᓱᑦ, ᐊᑯ ᒥᓐ ᑲ ᐊᑎ ᒥᔪᐱᒪᑎᓯᑦ᙮ ᐛᐃᐱᔅᒋᔅ ᒋ ᐎᒋᒪᐤ ᓴᓪ ᐊᓂᔭ ᒋᔅᒋᓄᐊᒧᐛᑭᓇ ᐊᓐᑕ ᑕᒪᔅᑲᓯᒡ ᑲ ᑕᔨᒋ᙮
ᓴᓪ ᑲ ᑭᒐᔅᒋᒧᑦ ᐊᓐᑕ ᑕᒪᔅᑲᔅ
20ᑎᐛᒡ ᒪᒃ ᒋ ᐃᑐᑕᐤ ᐊᓐᑕ ᓂᓇᐧᑯᐤ ᒍᐤ ᐊᔭᒥᐊᐅᒋᐛᐱᒡ, ᐊ ᑭᒐᔅᒋᒧᑦ ᐊ ᐃᔅᒋᔄᑦ, “ᒋᓴᔅ, ᐊᐅᒄ ᒋᓴᒪᓂᑐᐤ ᐅᑯᓴ᙮”
21ᐊᓐᒡ ᑲ ᐸᑐᐛᒡ, ᒋ ᒪᒥᔅᑲᑕᔨᑎᒥᐃᑯᐅᒡ ᐅᔭ ᐊ ᐃᔅᒋᔄᔨᒋ ᐊᑯ ᒂ ᐃᔅᒋᔄᒡ, “ᓇᒪᐎᔾ ᐊ ᐊᐅᒄ ᐅ ᓇᐸᐤ ᑲ ᓂᓱᐅᓇᒋᐊᑦ ᐊᓂᔭ ᑲ ᑕᑈᔭᔨᒪᔨᒋ ᒋᓴᓴ ᐊᓐᑕ ᒋᕈᓯᓕᒥᒡ ᑲ ᑕᔨᒋ ? ᓇᒪᐎᔾ ᐊ ᐊᐅᒄ ᐅ ᐛᒋ ᐸᒋ ᑎᑯᓯᐧᒃ ᐊ ᐎ ᐸᒋ ᓂᑐᐛᐱᒪᑦ ᐊᓂᔭ ᑲ ᑕᑈᔭᔨᒪᔨᒋ ᒋᓴᓴ, ᒐᒋ ᒪᑯᓇᑦ ᑭᔭ ᒐᒋ ᐃᑐᑕᐊᑦ ᐊᓐᑕ ᑲ ᓂᑲᓂᐱᔅᑐᐛᔨᒋ ᐊᔭᒥᐊᐅᒋᒪᐛ ᐊ ᑕᔨᒋ ?”
22ᓴᓪ ᒪᒃ ᐊᑐᐎᔅ ᒋ ᓱᐧᑲᑎᓯᐤ ᑕᓐ ᐊᓂᔭ ᑲ ᐃᓯ ᑭᒐᔅᒋᒧᑦ ᐊ ᐊᔨᒧᒪᑦ ᒋᓴᔅ ᑕᑈ ᐊ ᐊᐎᔨᒋ ᙭ᑕ ᐊᓂᔭᔪᐛ ᑲ ᐅᑎᓇᔨᒋ ᒋᓴᒪᓂᑐᐛ᙮ ᐊᓐᒡ ᒪᒃ ᒍᐤ ᐃᔪᒡ ᐊᓐᑕ ᑕᒪᔅᑲᓯᒡ ᑲ ᑕᒡ ᒋ ᐛᐛᓇᔨᑎᒥᐃᑯᐅᒡ, ᓇᒪ ᓇᔅᒡ ᒐᒂᔪᐤ ᒋ ᓇᓂᔎᐅᓴᐊᐅᒡ᙮
23ᐃᔅᐱ ᒪᒃ ᒥᒐᑐᐤ ᒋᓯᑲᐛ ᐛᑎᒋᐱᔨᒡ ᐊᑯ ᐊᓐᒡ ᒍᐤ ᐃᔪᒡ ᒂ ᒪᒧᐎᒡ, ᒂ ᐎᔭᔨᑕᒡ ᒐᒋ ᓂᐸᐊᒡ ᓴᓚ᙮ 24ᒥᒄ ᒪᒃ ᓴᓪ ᒋ ᒋᔅᒐᔨᑎᒪᐊᑭᓄᐤ ᑕᓐ ᒐ ᐃᑐᑐᐛᑭᓄᐅᑦ᙮ ᐊᓯᑯᒻ ᒋᓯᑲᐛ ᑭᔭ ᐊᓯᑯᒻ ᑎᐱᔅᑲᐛ ᒋ ᓂᓇᑭᑐᐛᔨᑎᒧᒡ ᐊᓐᑕ ᐊ ᐅᒋ ᐱᒐᓄᐎᒡ ᐊᓂᔭ ᐅᑕᓇᔪᐤ, ᒐᒋ ᓂᐸᐊᒡ ᐃᔅᐱ ᑎᑯᓯᓂᔨᒐᓂ᙮ 25ᐸᐃᒂᐤ ᒪᒃ ᐊ ᑎᐱᔅᑲᔨᒡ ᓴᓪ ᐎᒐᐛᑭᓇ ᒋ ᐎᒋᐃᑯᐤ ᒐᒋ ᒋᑎᓯᒧᑦ ᐊᓐᑕ ᐅᒋ ᑕᒪᔅᑲᓯᒡ᙮ ᐊ ᐱᑯᓇᔭᔨᒡ ᐅᐱᒪᑎᒡ ᒋ ᐅᒋ ᐱᔅᑕᐱᒐᓇᑭᓄᐤ ᐅᑎᐱᐅᑎᔪᐤ ᐊ ᐊᐱᒋᑕᒡ᙮
ᓴᓪ ᑲᐤ ᑲ ᐃᑐᑕᑦ ᒋᕈᓯᓕᒥᒡ
26ᓴᓪ ᒪᒃ ᑲᐤ ᒋ ᒋᐛᐤ ᐊᓐᑕ ᒋᕈᓯᓕᒥᒡ᙮ ᐊᑯ ᑲ ᐎ ᐸᐸᐎᒐᐛᑦ ᐊᓂᔭ ᒋᔅᒋᓄᐊᒧᐛᑭᓇ ᐊ ᓂᑐᐛᔨᒪᑦ ᒐᒋ ᑕᑈᑎᒥᔨᒋ ᑭᔭ ᐎᔾ ᐊ ᑕᑈᔭᔨᒪᑦ ᒋᓴᓴ᙮ ᒥᒄ ᒪᒃ ᓇᒪ ᐅᒋ ᑕᑈᑎᒥᔪᐛ ᐊ ᑕᑈᔭᔨᒪᑦ ᒋᓴᓴ, ᒥᓯᐛ ᒋ ᑯᔅᑎᑯᐤ᙮ 27ᐸᕐᓇᐸᔅ ᒪᒃ ᒋ ᐎᒐᐛᐤ ᐊᓂᔭᔪᐛ ᓴᓚ, ᒂ ᐃᑐᑕᐊᑦ ᐊᓐᑕ ᐊᓂᔭᔪᐛ ᐊᑈᔅᑕᓇ ᐊ ᑕᔨᒋ᙮ ᑲ ᐎᑎᒧᐛᑦ ᑕᓐ ᑲ ᐃᓯ ᓄᑯᓯᔅᑕᑯᔨᒋ ᓴᓚ ᐅᑎᐸᔨᒋᒐᐛ ᐊᓐᑕ ᒪᔅᑭᓇᒡ, ᑭᔭ ᐊᒋ ᐃᔨᒥᐃᑯᔨᒋ᙮ ᑭᔭ ᒋ ᐎᑎᒧᐛᐤ ᑕᓐ ᑲ ᐃᓯ ᑭᒐᔅᒋᒧᔨᒋ ᓴᓪ ᐊᓐᑕ ᑕᒪᔅᑲᓯᒡ ᒋᓴᓴ ᐊ ᐊᔨᒧᒪᔨᒋ ᐊ ᐊᑲ ᓇᔅᒡ ᐅᒋ ᑯᔅᑕᒋᔨᒋ᙮ 28ᐊᑯ ᒪᒃ ᒂ ᑕᑦ ᓴᓪ ᐊᓐᑕ ᐊᓂᔭᔪᐛ ᐊᑈᔅᑕᓇ ᐊ ᑕᔨᒋ᙮ ᒥᓯᐛ ᑲ ᐃᑐᑕᑦ ᐊᓐᑕ ᒋᕈᓯᓕᒥᒡ ᐊ ᑭᒐᔅᒋᒧᑦ ᐊ ᐊᔨᒧᒪᑦ ᐅᑎᐸᔨᒋᒐᐤ, ᐊ ᐊᑲ ᑯᔅᑕᒋᑦ᙮ 29ᒋ ᐃᔨᒪᐊᐤ ᑭᔭ ᒋ ᓂᓇᔅᑯᐊᓯᐊᐤ ᐊᓂᔭᔪᐛ ᒍᐤ ᐃᔪᐛ ᒐᒋ ᑕᑈᔭᔨᒪᔨᒋ ᐅᑎᐸᔨᒋᒐᐤ ᒋᓴᓴ ᒥᒄ ᒪᒃ ᒋ ᐎ ᓂᐸᐃᑯᐤ᙮ 30ᐃᔅᐱ ᒪᒃ ᐊᓐᒡ ᐎᐧᑲᓂᓯᒪᐅᒡ ᐱᔭᑕᒡ ᐅᔭ ᐊᓐᑕ ᓯᓴᕆᔭ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᒋ ᐃᑐᑕᐊᐎᒡ ᐊᓂᔭ ᓴᓚ, ᐊᑯ ᐊᓐᑕ ᑕᕐᓯᔅ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᑲ ᐃᑎᓴᐛᒡ᙮
31ᐊᓐᒡ ᒪᒃ ᑲᒪᒧᐊᔭᒥᐊᐛᑎᓯᒡ ᒥᓯᐛ ᐊᓐᑕ ᐊᓂᔭ ᐊᔅᒋᒡ ᑲ ᑕᒡ ᒍᑎᔭ ᑭᔭ ᑲᓕᓕ ᑭᔭ ᓴᒪᕆᔭ ᑲ ᐃᓯᓂᐧᑲᑕᔨᒋ, ᐛᐃᐱᔅᒋᔅ ᓇᒪ ᐅᒋ ᓂᓇᐧᑲᒋᐊᑭᓄᐅᒡ᙮ ᒋ ᒋᔅᑕᔨᒪᐅᒡ ᐅᑎᐸᔨᒋᒐᐛ ᐅᒡ ᐃᔪᒡ ᑭᔭ ᐊᔭᔅᒃ ᒋ ᐊᑎ ᐊᔨᒋᑲᐳᐅᒡ ᑭᔭ ᐊᔭᔅᒃ ᒋ ᐊᑎ ᒥᒐᑐᐅᒡ ᐛᔅ ᑲ ᐸᔭᒋᓯᔨᒋ ᐊᒐᒂ ᒋ ᐎᒋᐃᑯᐅᒡ᙮
ᐱᑕᕐ ᑲ ᒪᒥᔅᑲᒡ ᐃᑎᑦ ᐊᓐᑕ ᓕᑕᒡ ᑭᔭ ᒍᐸᒡ
32ᐱᑕᕐ ᓂᓇᐧᑯᐤ ᐅᑕᓇᒡ ᒋ ᐱᐸᔨᑐᑕᐤ᙮ ᐊᑯ ᒪᒃ ᐸᐃᒂᐤ ᓂᔭᒋᒧᐱᔅᑐᐛᑦ ᐊᓂᔭᔪᐛ ᑲ ᑕᑈᑎᒥᔨᒋ ᐊᓐᑕ ᓕᑕᒡ ᑲ ᑕᔨᒋ, 33ᐊᑯᑕ ᑲ ᐛᐱᒪᑦ ᓇᐸᐛ ᐊᓂᔭᔅ ᐊ ᐃᓯᓂᐧᑲᓱᔨᒋ, ᐊ ᐊᑲ ᓂᔅᑐᓯᔨᒋ, ᔭᓇᐤ ᑕᑐᐳᓇ ᐊ ᐊᑲ ᐅᒋ ᐊᒥᔨᒋ ᐅᓂᐸᐅᓂᔨᒡ᙮ 34ᐊᑯ ᐱᑕᕐ ᒂ ᐃᑕᑦ, “ᐊᓂᔭᔅ, ᒋᓴᔅ ᙭ ᒋ ᒥᓏᒋᐃᒄ, ᐅᓂᔾ, ᒐ ᐅᑎᓂᒥᓐ ᒋᑦ ᐊᔅᐱᓯᒧᐅᓐ᙮” ᑎᐛᒡ ᒪᒃ ᒋ ᐅᓂᐤ ᐊᓂᔭᔅ᙮ 35ᒥᓯᐛ ᒪᒃ ᐃᔪᐛ ᑲ ᑕᑎᓯᔨᒋ ᐊᓐᑕ ᓕᑕᒡ ᑭᔭ ᓴᕈᓂᒡ ᒋ ᐛᐱᒪᑯᐤ ᐊ ᐱᐸᒧᑕᑦ, ᐊᑯ ᒪᒃ ᑲ ᐊᑎ ᑕᑈᔭᔨᒪᔨᒋ ᐅᑎᐸᔨᒋᒐᐛ᙮
ᑕᐸᑕ ᒥᓐ ᑲᐤ ᑲ ᐱᒪᑎᓯᑦ
Acts 9.36-43 (Easter-4 Year C)
36ᐊᓐᑕ ᐃᑕᐅᓂᒡ ᒍᐸ ᑲ ᐃᓯᓂᐧᑲᑕᒡ ᒋ ᑕᐤ ᐃᔎᐤ ᐊ ᑕᑈᔭᔨᒪᑦ ᒋᓴᓴ, ᑕᐸᑕ ᐊᒋ ᐃᓯᓂᐧᑲᓱᑦ, ᒪᒃ ᑐᕐᑲᔅ ᐊᒋ ᐃᓯᓂᐧᑲᓱᑦ, ᐅ ᒪᒃ ᐃᓯᓂᐧᑲᓱᐅᓐ ᐊ ᐱᔭᑭᔅᒋᑕᑯᑕᑭᓄᐅᒡ ᐊᑎᐧᒄ ᐃᔅᒋᔄᓄᐤ᙮ ᒧᔅ ᒋ ᒥᔪᑐᑕᒧᐛᐤ ᐊᐛᔪᐛ ᐊᓐ ᐃᔎᐤ ᑭᔭ ᒋ ᐎᒋᐊᐤ ᑲ ᒋᔅᑎᒪᑎᓯᔨᒋ ᐊᐛᔪᐛ᙮ 37ᒪᒂᒡ ᒪᒃ ᐱᑕᕐ ᐊ ᑕᑦ ᐊᓐᑕ ᓕᑕᒡ, ᒋ ᒥᔅᑎ ᐊᐧᑯᓱᐤ ᐊᓐ ᐃᔎᐤ, ᒐᒃ ᒪᒃ ᒋ ᓂᐳᐤ᙮ ᐎᔪᐤ ᒪᒃ ᒋ ᒋᔅᑕᐸᐅᑕᑭᓄᐎᔪᐤ, ᐊᑯ ᐃᔅᐱᒥᑎᑯᒡ ᑲ ᐊᔅᑕᑭᓄᐎᒡ᙮ 38ᒋ ᐸᓱᓇᑯᓐ ᒪᒃ ᒍᐸ ᐊᓐᑕ ᓕᑕᒡ ᐅᒡ᙮ ᐃᔅᐱ ᒪᒃ ᐱᔭᑕᒡ ᐊᓐᒡ ᑲ ᑕᑈᔭᔨᒪᒡ ᒋᓴᓴ ᐊ ᑕᔨᒋ ᐱᑕᕋ ᐊᓐᑕ ᓕᑕᒡ, ᓂᓱ ᓇᐸᐛ ᒋ ᐃᑎᓴᐛᐅᒡ ᐊᓐᑕ ᒐᒋ ᐎᓴᒪᒡ ᐱᑕᕋ ᑎᐛᒡ ᒐᒋ ᐸᒋ ᑎᑯᓯᓂᔨᒋ᙮
39ᐱᑕᕐ ᒂ ᐱᓯᑯᑦ, ᒂ ᐎᒐᐛᑦ ᐊᓂᔭ ᓇᐸᐛ᙮ ᐃᔅᐱ ᒪᒃ ᑕᑯᓯᒡ ᓇᑕ, ᒋ ᐃᑐᑕᐊᑭᓄᐤ ᐊᓐᑕ ᐃᔅᐱᒥᑎᑯᒡ ᐊᓐᑕ ᐊ ᑎᑯᓂᔨᒡ ᐊᓂᔭ ᒥᔭᔪᐤ᙮ ᒋ ᑕᐅᒡ ᐊᓐᑕ ᑲ ᐸᐃᑯᓯᒡ ᐃᔎᐅᒡ, ᒋ ᑕᐱᑐᑲᐳᔅᑐᐛᐅᒡ ᐱᑕᕋ ᐊ ᒪᒡ ᑭᔭ ᐊ ᐛᐸᑎᔭᒡ ᐱᒍᐎᔭᓇ ᑭᔭ ᐊᑯᐸ ᐊᒋ ᐅᓯᑕᒪᑯᒡ ᐊᓂᔭᔪᐛ ᐃᔎᐛ ᑕᐸᑕᔨᒋ᙮
40ᐱᑕᕐ ᒥᓯᐛ ᐊᐛᔪᐛ ᒋ ᐎᐎᑎᓴᐛᐤ ᐊᓐᑕ ᐊᓂᔭᔪᐤ ᑲᒋᐸᐃᑭᓄᓯᒡ ᑲ ᑕᔨᒋ, ᐊᑯ ᒂ ᓂᐱᔅᑯᐱᑦ ᐊ ᐊᔭᒥᐊᑦ, ᐊᑯ ᒂ ᑭᓄᐛᐸᑕᐧᒃ ᐊᓂᔭ ᒥᔭᔪᐤ ᐊ ᐃᔅᒋᔄᑦ, “ᑕᐸᑕ, ᐅᓂᔾ᙮” ᒋ ᓇᓂᑐᐛᐳᐤ ᒪᒃ ᐊᓐ ᐃᔎᐤ, ᐃᔅᐱ ᒪᒃ ᐎᔭᐱᒪᑦ ᐊᓂᔭ ᐱᑕᕋ, ᒋ ᐅᒋᓯᒥᑎᐳᐤ᙮ 41ᐱᑕᕐ ᒪᒃ ᒋ ᓱᐅᓂᔅᒐᔨᔅᑐᐛᐤ ᒂ ᐎᒋᐊᑦ ᐊ ᐅᓂᓂᑎᓱᔨᒋ᙮ ᐊᑯ ᒂ ᐎᓴᒪᑦ ᐊᓂᔭᔪᐛ ᑲ ᐸᐃᑯᓯᔨᒋ ᐃᔎᐛ ᑭᔭ ᒥᓯᐛ ᐊᓂᔭᔪᐛ ᑲ ᑕᑈᑎᒥᔨᒋ ᐊᐛᔪᐛ, ᒂ ᐛᐸᑎᔭᑦ ᒥᓐ ᐊ ᐱᒪᑎᓯᔨᒋ ᐊᓂᔭ ᑕᐸᑕᔨᒋ᙮ 42ᒥᓯᐛ ᒪᒃ ᐊᓐᑕ ᒍᐸᒡ ᒋ ᒥᓯᑕᐱᔪᐤ ᑎᐸᒋᒧᐅᓐ ᐅ ᑲ ᐃᔅᐱᔨᒡ᙮ ᒥᒐᑦ ᒪᒃ ᐊᐛᓐᒋ ᒋ ᑕᑈᔭᔨᒪᐅᒡ ᐅᑎᐸᔨᒋᒐᐛ ᒋᓴᓴ᙮ 43ᓇᐅᔅ ᒪᒃ ᒋ ᑕᐤ ᐱᑕᕐ ᐊᓐᑕ ᒍᐸᒡ, ᐊᓂᔭ ᒋ ᐎᒋᒪᐤ ᑲ ᒋᓯᓂᒐᔨᒋ ᓴᐃᒥᓐ ᑲ ᐃᓯᓂᐧᑲᓱᔨᒋ᙮
Okuqokiwe okwamanje:
ᐊᑈᔅᑕᓇᒡ 9: ᓇᔅᑲᐱ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada