Ala Kalɔ Buse 27
27
Isak Úte Ubidi Yakob Kusɛ Kusɛ
1Na uwi ɔmmɔ kemmo ni, Isak ɔ́ɔbi geen na nwuna anumi muedi asɔ alákana bɔnu. Na ɔ́lɔ ubidi unengudi ɔnii, “Ubi Esau.”
Na ubidi lɛnɔ ɔ́tuna ɔnini, “Ati, aanu-mi mɛni.”
2Amu na Isak ɔ́su-nwu ɔnini, “Ɔƒɛni amu líinwini unengu geen na lɛɛɛgyi limeyi lɛni na ndubo bukpi. 3Anwuɔsu ti ƒula kataminta na esie kabuinkɔ atáwia lɛna lɛdi eboku-mi. 4Na si ébo ni, na anwa adila abuni ani na mɔɔyɔ́ teetulo ƒui eboku-mi na lɛdi kalɛ na liti mina kusɛ kusɛ lite-ɔ asa na likpi.”
5Uwi ɔni na Isak ɔɔsu Esau ala amɛni ni, ulekudi Rebeka ɔkya uunú ala ani na ɔɔsu Esau. Na ka Esau ɔ́tɔlɔ úsie lɛku kemmo utábui ebuo ɔdi uboku ɔti ni, 6Rebeka úsie útásu ubidi Yakob ɔnini, “Nu, línu ka ƒ'ɔti ɔ́su ƒ'ɔnwani Esau ɔnini, 7‘Sie na atáwia lɛku kemmo ebuo ɔdi eboku-mi, na lite-ɔ mina kusɛ kusɛ na Katɔti anumi asa na mekpi.’ 8Ɔƒɛni ni, mina ubi, se atu na enu kaduɛ. Na abla lɛla lɛni masu-ɔ. 9Sie bula bebuo akɔ na atádu bese bakɔdi inyɔ eboku-mi. Na ndubuti-ma lɛnwa adila abuni ani udu na ƒula ɔti ɔɔyɔ́ lite-nwu kalɛ geen na ɔwia-nya. 10Na si lɛ́wɔlɔ ni, na eti-nya esienku ƒ'ɔti na ɔdi kalɛ na uti nwuna kusɛ kusɛ ute-ɔ asa na wekpi.”
11Mmɔ ni, Yakob úye uni Rebeka ɔnini, “Átanu ka Esau ubo linwini na lɛlɔ na ami mina ɔlɔna use suɛlɛ suɛlɛ? 12Si mina ɔti útuku-mi ɔ́nu na ɔ́ti ka ami na ɔdi na líbo mɔɔtɔlɔ-nwu ni, ɔɔɔdi buwida mmomu na ɔdubo-mi?”
13Amu na uni ɔ́su-nwu ɔnini, “Awɔ bla lɛla lɛni na lɛ́su-ɔ na ewida ammɔ ebo-mi lɛlɔ. Sie pla na etéti lɛna lɛmmɔ eboku-mi.”
14Ɔmmɔ ɔsu úsie na úti lɛna lɛmmɔ úboku uni na ɔ́nwa adila abuni ammɔ aani kalɛ na ɔti ɔɔyɔ́. 15Na ka ɔ́wɔlɔ ni, Rebeka úsie útéti ubidi unengudi Esau lɛwu lɛbuni geen lɛni nse-nwu kudɔ na úti-ni úboku úbakya Yakob. 16Na ɔmmɔ kama úti bese lɛku lɛmmɔ úbi nwuna enu ku limɔ kakɛ kesii kani na awu ɔmmɔ útebi. 17Na úti adila ani na ɔ́nwa ku bodobodo ɔni na úƒi mmɔ úte Yakob ɔnii usienku ɔti.
18Amu na úti adila ammɔ úsienku na ɔ́kpali ɔnini, “Ati.”
Mmɔ ni, ɔti lɛnɔ ɔ́tuna ɔnini, “Mina ubi, awɔ ɔma na ɔdi?”
19Na Yakob údie kenye ɔnini, “Ami, ƒula ubi unengudi Esau, na ɔdi. Na lɛla lɛni na anii mbla ni, lɛ́bla kalɛ kani na ásu-mi. Buvele, ta lie, na akun lɛna lɛni na ńtábui líboku-ɔ kalɛ na ete-mi ƒula kusɛ kusɛ.”
20Amu na Isak úye ubidi ɔnini, “Dɛ na ɔ́bla asa na ákɛ ebuo ádu pla lɛni?”
Mmɔ na Yakob údie kenye ɔnini, “Ƒula Unwoti Katɔti náya na lɛku lɛtɛnku-mi lɛni.”
21Amu na Isak ɔ́su Yakob ɔnini, “Sie bo-mi kudɔ na lituku-ɔ lɛnu si sɔsɔ na mina ubi Esau na adi.”
22Mmɔ ni, Yakob ɔ́ni úde ɔti Isak na útuku-nwu. Na ɔ́su ɔnini, “Yakob lɛdi na muunú, nsu enu ammɔ adi Esau enu.” 23Na útanu-nwu útati, ɔsika linwini liwi-nwu enu aani Esau kalɛ. Ɔmmɔ ɔsu úte-nwu kusɛ kusɛ. 24Ka ɔ́wɔlɔ ni, Isak ɔ́sɔ úye Yakob ɔnini, “Sɔsɔ na mina ubi unengudi Esau na adi?”
Amu na Yakob lɛnɔ údie kenye ɔnini, “Ami na ɔdi.”
25Mmɔ kani Isak ɔ́su-nwu ɔnini, “Mina ubi, ti lɛla lɛni na átádu mmɔ boku-mi na lɛkun na lite-ɔ mina kusɛ kusɛ.”
Amu na Yakob úti ala ammɔ úboku-nwu na ɔ́di. Na úti ntɛ mini mini bɔdi lɛnɔ úboku-nwu na ɔ́ni. 26Ɔmmɔ kama ni, Isak ɔ́su ubidi ɔnini, “Ɔƒɛni ni, bo na abakya-mi kɔgbu.”
27Anwuɔsu úsie na útákya-nwu kɔgbu.
Na ka Isak únu Yakob adala ani na ɔkya ɔnyi ni, ɔ́su ɔnini,
“Pɛ, mina ubi ɔnyi na ɔdi mɛni,
na use aani katumalɔ ɔnyi kalɛ
kani na Unwoti Katɔti úte-ka kusɛ kusɛ.
28Muuvele Unwoti Katɔti nnii nwuna katɔ kusɛ kusɛ
uwi-ɔ lɛlɔ aani amii,
na ute-ɔ kalɔ kani nélie lɛmwi.
Na akɛ edula pii ku ntɛ bɔwɔdi.
29Na kadi bekyuli ƒui benwini ƒula kabla bablane.
Na bekyuli ƒui bakya-a lili kalɔ
na adi ƒula banwani ƒui lɛlɔ.
Na ƒ'ini bebi bananabi ƒui bakya-a lili kalɔ.
Na bekyuli bani mewida-a ƒui ni, ewida asiaku-ma.
Na bani mete-ɔ kusɛ kusɛ ni, kusɛ kusɛ ɔsiaku-ma.”
30Uwi ɔni Isak úte Yakob kusɛ kusɛ ɔ́wɔlɔ na Yakob ɔ́vi ɔɔlɛ́ kani na Esau lɛnɔ ɔ́si lɛku kemmo úbeduo. 31Na adila ani na ɔ́nwa ni, úti-nya úboku ɔti. Na ɔ́su ɔti ɔnini, “Ati, buvele, ta lie kalɔ na akun lɛna lɛni na ńtádu na lɛ́nwa liboku-ɔ. Na ete-mi ƒula kusɛ kusɛ.”
32Amu na Isak úye-nwu ɔnini, “Awɔ, ɔma na ɔdi?”
Mmɔ na Esau údie kenye ɔnini, “Ƒula ubi unengudi Esau na ɔdi.”
33Amu na Isak ɔ́ta ku kɔnyi na lɛlɔ lɛɛtɔ́-nwu. Na úye ɔnini, “Na ɔma na ɔdi nésie útábui na úti lɛna úboku-mi na lɛ́kun? Ani na lɛ́kun mɔɔwɔlɔ mɛni asa na ébo, na líte-nwu mina kusɛ kusɛ. Na sɔsɔ ni, mina kusɛ kusɛ ɔdubo-nwu bɔsiaku!”
34Ka Esau únu lɛla lɛni na ɔti ɔ́su ni, úduo-nwu geen na úwulo keku momoomo. Na ɔ́su ɔti ɔnini, “Ati, te-mi ƒula kusɛ kusɛ, ami lɛnɔ!”
35Nsu ɔti ɔ́su-nwu ɔnini, “Ƒ'ɔnwani úbo úbatɔlɔ-mi na ɔ́ƒɔ ƒula kusɛ kusɛ.”
36Amu na Esau ɔ́su ɔnini, “Ɔɔɔdi keeke na baalɔ-nwu banii Yakob ɔni kalɔ ndi ala bukpeli taaƒɔ. Ɔ́tɔlɔ-mi kunyɔ kɔmɛni ƒui. Ɔ́ƒɔ-mi lɛwɔnengu. Na ɔ́sɔ ɔ́ƒɔ-mi kusɛ kusɛ.” Na ɔmmɔ kama ni, úye ɔti ɔnini, “Anwuɔsu étebu kusɛ kusɛ ɔmmɔ ɔdi étese ami anwu?”
37Mmɔ na Isak údie kenye na ɔ́su Esau ɔnini, “Kusɛ kusɛ ɔni na líte-nwu ni, ɔ́ya na únwini lɛlɔ ɔdine. Na nwuna ɔtɔ kemmo bekyuli ƒui badubo-nwu kabla bablane bunwini. Na nwuna kaduli ni, antabi ku ntɛ bɔwɔdi bulása kudii. Na bi lɛnɔ na aakali ka ndubɔsɔ lɛkana bɔbla ɔƒɛni?”
38Amu na Esau úye ɔti ɔnini, “Amu kunwi pɛ kani na adubɔkana ƒula kusɛ kusɛ bute? Ati, te ami lɛnɔ kusɛ kusɛ.” Ka ɔ́su ɔmɛni ɔ́wɔlɔ anwu kani na úse kalɔ uuwulo momoomo. 39Ka uuwulo lɛni ni, ɔti Isak ɔ́su-nwu ɔnini,
“Awɔ aaadubo lɛkɛ lɛdi bɔbla.
Na adubo bɔgyunku kalɔ kabuni kani lɛlɔ
na Katɔti kusɛ kusɛ ɔɔyu teewi aani amii kalɛ lɛlɔ.
40Na awɔ ɔlati ƒula ɔkɛɛ na adubo bɔda asa na akɛ adi.
Na ƒula ɔnwani kabla na adubo bɔbla.
Nsu si uwi ɔni na nwuna ala asɔ eleduku-ɔ ni,
adubɔlɛ nwuna kabla kalɔ aani kalɛ baada lɛla lɛni
nényimi-ɔ teedie limɔ.”
Yakob Úkeli Úsie Laban Kudɔ
41Na ala ani nálɛ ƒui ɔsu ni, Esau úti kɔnyi ɔ́kya Yakob geen, ɔsika ɔti Isak úti nwuna kusɛ kusɛ úte Yakob. Mmɔ na ɔ́su ɔnini, “Kébu blii na bula ɔti ukpi. Na si uwi ɔni na buuwulo-nwu ni, ndubo mina ɔnwani Yakob bɔdu.”
42Amu ɔni na básu Rebeka lɛla lɛni na ubidi unengudi ɔ́bla kasusu úse ka wabla ɔsu ni, ɔ́ya na bálɔ Yakob béte-nwu. Mmɔ na ɔ́su-nwu ɔnini, “Ƒula ɔnwani úuse lɛlɔ kayi ku kasusu ka wadu-ɔ. 43Ɔmɛni ɔsu ni, babla na ekeli eteesie mina ɔnwani Laban kudɔ na Haraan ɔma kemmo. 44Si ésie ni, na akya mmɔ blii wetédu uwi ɔni na ƒ'ɔnwani kɔnyi kɔ́yɔ-nwu. 45Na si ƒ'ɔnwani ɔ́yiƒala lɛla lɛni na ábla-nwu na nwuna kɔnyi kɔ́yɔ-nwu ni, ndubɔtala bekyuli na babalɔ-ɔ. Lɛɛɛdubo bunye bɔnu na bina inyɔ ƒui bikpi-mi limeyi linwi.”
46Ɔmmɔ kama ni, Rebeka úsie útásu ɔgyani Isak ɔnini, “Mina ngba bɔni na nli buukpóku-mi na Hetiƒuɔ beleku bamɛni ablala ɔsu. Na si Yakob lɛnɔ úti Hetiƒuɔ beleku bamɛni akɔ ɔdi ni, amu nsɔ lɛɛɛgyi kesii kani na mina ngba búsela.”
Okuqokiwe okwamanje:
Ala Kalɔ Buse 27: lef
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.