Matta 6
6
Shogar ɗyine shir Mu̱nki
1“Ku̱r ma vaanu ma ku̱ shi nu tlu̱nar jeembu ku̱me nar yiti nduk ɓa. Mbu̱ tun wa shi wanang, tun ɓu̱ gwa ɗye ɓi ɓaanu she Zhinonu nu̱ke a mbu̱ viɗi ɓa.
2“Ku̱me nang, mbu̱ tun a ma vu̱r tunu ye nu̱ song, ki nu khang ɓala ɗyinan ɓa, ba wa nu̱ke nu̱ mu̱narkwang ka shiki mbu̱ maa tabar ɓaanda, ndu̱ yiti njiv ku ma ku̱ nduki makhta wora. Zhire nga zu̱ran ye nu wa woɗa dlu̱ ɗye ɓi ɓaanda. 3Yang mbu̱ ta ma vu̱r tunu ye nu̱ song, njig na tu̱ njif nggur zu̱n ɗyi nu̱ke ta ma shiran ɓa. 4Ɗyi mbarkandi nu̱ke ta shiran mbu̱ tukarang, Zhinkir ɓa nu̱ke a mbu̱ viɗi nu̱ka naki ɗyi nu̱ke a shir mbu̱ tuka ka ɓiiki ro.
Shogar ɗyine Barari
(Luk 11:2-4)
5“Yang tu̱k, mbu̱ tun a ma bara, shi nu wa nu̱ mu̱nar ku nang ɓa. Wa ka shim shi bararku ye maa tabar ɓaanda chingndan ndu̱ yiti njivku ma ku̱ nduki na wora. Zhire nga zu̱ran ye nu, wa woɗa dlu̱ ɗye ɓi ɓaanda. 6Ɓa yang mbu̱ ta ma bara to vi nu̱ ku̱ba to za me virang nu̱ ɗyinoro, to shi barar ye Zhinkir ɓa nu̱ke a mbu̱ tuka, Zhinkir ɓa nu̱ka naki ɗyin mbu̱ tuka ka ɓiiro ro. 7Mbu̱ tun a barari, ki nu khang ɓalar wa nduki nu̱ke nu̱ zu̱n Magham ɓa, wa ka taman ku za khang ɓalar ɓaanda ka saki tu̱ Magham tu̱k wora. 8Shi nu wa wor ɓa, ku̱me Magham wa zu̱n ɗyi nu̱ke tun a gangndan fan khuɗ nu nda.
9“Ku̱ barar ɓaanu kha wanang:
‘Zhinerem nu̱ke a mbu̱ viɗi
ku̱ nduk sawa dlu̱moro,
10kwaaɗar ɓa ta ɓa,
ku̱ shimndi ɓa shi mbu̱ larji,
wa nu̱ke a san mbu̱ viɗi.
11To vu̱r ɗye zu̱mndi nu̱ piti
fu̱ɗar meeni yerem.
12To yaapa solar ɓaarem yerem,
wa nu̱ke chem a yaaparan ye nduki
nu̱ shiki solar yerem.
13Njig na rem chem nggu̱t nu̱ mbu̱ sola ɓa,
yang to shakh chele ɓaarem
ndu̱ Nu̱ mu̱narang.’
14“Ku̱me mbu̱ tun wa yaapa solar ɓu̱ nduki nu̱ shiki solar ye nu, Zhinonu nu̱ke a mbu̱ viɗi ka yaapa solar ɓaanu ye nu tu̱k. 15Yang mbu̱ nun yaapa solar ɓu̱ nduki ye wor ɓa, Zhinonu ɓu̱ yaapa solar ɓaanu ye nu tu̱k zum ɓa.
Shogar ɗyine Zhumti
16“Mbu̱ tun a zhumti, khanu ndu̱ mbu̱ yitonu zhum wa nu̱ke nu̱ mu̱narkwang ka shiki ɓa. Wa ka su̱bu̱r mbu̱ yiti wor nu̱gha ma ku̱ nduki zu̱n za wora zhumti. Zhire nga zu̱ran ye nu, wa woɗa dlu̱ ɗye ɓi ɓaanda. 17Yang mbu̱ ta zhumti, to shiɓ mbu̱ yitor nu̱gha, to pasha mor nu̱ mbu̱ ɗyinoro, 18ma ku̱ nduk zu̱n za ta zhumti ɓa. Zhu nu̱ke a mbu̱ tuka, nu̱ka naki ɗyin mbu̱ tukari, ka ɓiiro ro.
Shogar ɗyine tabar Gu̱nar nu̱ Viɗi
(Luk 12:33-34)
19“Taba nu gu̱nar ye vaanu nu̱ fan larji ye maa nu̱ke susuti ndu̱ nar loghos ka su̱bu̱rki nu̱gha ɓa, ye maa nu̱ke nu̱ muuriku ka viki tu̱ muura ɓar ɓa. 20Yang taba ma gu̱nar ye vaanu nu̱ viɗi, ye maa nu̱ke ɓu̱ na loghos ɓa yang susut ɓu̱ su̱bu̱r nu̱gha ɓa, nu̱ muuri ku tu̱k ɓu̱ vi tu̱ muura ɓar ɓa. 21Ku̱me ye maa nu̱ke gu̱nar ɓaaro a si nang ke ye maa nu̱ke kwaari ɓaaro a ye maaran.
Yarang ɓu̱ Manva
(Luk 11:34-36)
22“Yiti ke yarang ɓu̱ manva, mbu̱ yitor mbari manva kap ka kha yarang maɗyi. 23Yang mbu̱ yitor mbar ɓa, manva kap ka kha zhum. Mbu̱ yarang ɓu̱ manva wa gaɓ ma zhum maa, zhum maarang ka shi maɗyi shwat.
Khar Maava ye Magham ndu̱ Ghaari ghai ye Mu̱zhin
(Luk 16:13)
24“Sarda nduk ɓu̱ kha ma maavi ɓu̱ nu̱ rafti rap guma da ɓa, wa ku̱s ku̱ njig da to ku̱s da. Ka shi tlu̱nar zhirekandi ye dandang, tu̱ ndu̱m dandang. Sarda tom ɓu̱ ghar ghai ye Magham su̱yen ndu̱ shimndi mu̱zhin guma da ɓa.
Maitar Magham
(Luk 12:22-31)
25“Ku̱me nang nga zu̱ran ye nu, damta nu ndu̱ khar viti ɓaanu ɗyine ɗyi nu̱ke tun ka zu̱mki tun za, ndu̱ lukti nu̱ke tun ka saki ɓa. Alapa nyifi nu̱ duk ɗye zu̱m de? Yang ɗa, manva nu̱ duk lukti nu̱ke tun ka saki ɓa goma? 26Nggu̱t ma ɗyikhtiku nu̱ viɗi ɓa, nu̱ka shi kaɓtiku tu̱ shi ku̱mndi ku ɓa, yang nu̱ka taba nu̱ gatla zum ɓa. Kap ndu̱ nang, Zhinonu nu̱ke a mbu̱ viɗi wa ka zu̱m ndu̱ wora. Alapa nun duk wor ndu̱ zhaaji ɓa? 27Yang ɗa, ki chele ɓaanu ku̱me damtar ɓaran ka ɗu̱maki shaata sarchi da nu̱ ɗyine qaandi virkir ɓarana?
28“Yang tu̱k nu̱m saki tun ki damtar ɗyine lukti nu̱ke tun ka sakya na? Nggu̱t ma viiri qu̱farku nu̱ka gorki gar ɓa, nu̱ka tlu̱na aa nu̱m ku ɓa, yang nu̱ka shi shaka zum ɓa. 29Kap ndu̱ nang, nga zu̱ran ye nu, aa kuji Solomon ndu̱ pooni zhaaji nu̱ke a khanda, sar da nu̱ sa lukti mbarkandi tu̱ shi viri wa da chele wuzu̱ndiku nang ɓa. 30Yang mbu̱ Magham ka ɗoona wuzu̱ndi gar nu̱gha mbari wanang aa nu̱ke nu̱ka shoɓ ku ɓa, mbu̱ wa gorku meeni, wur ka va wor nu̱gha, yang tun ɗa, alapa ɓu̱ ɗoona nu dukti nang ɓa? Tun nu̱ song maito! 31Ku̱me nang damta nu tun ki zu̱ran za, ‘Chem ka zu̱mkya nu̱ma?’ Ndu̱ ‘Chem ka zakya nu̱ma?’ Ndu̱ ‘Chem ka sakya nu̱m kwa ɓa?’ 32Ku̱me nduki nu̱ke nu̱ zu̱n Magham ɓa kya laɓ poona ɗyiku nang. Yang Zhinonu nu̱ke a mbu̱ viɗi wa zu̱n tun a gang ɗyiku nang kap. 33Yang ɗyi gwaanji nu̱ gumapaali nang ke gang ma kwaaɗar ɓu̱ Magham ndu̱ shir shimndi ɓaran, ɓeena ɗyikunang kap ka shaata ye nu nu̱ si. 34Ku̱me nang, damta nu nu̱ ɗyin wur ɓa, wur a ɓar ndu̱ damtar ɓaran zum, damtar nu̱ meeni wa gama nu.
Okuqokiwe okwamanje:
Matta 6: ttrNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
