Tin Deic Douh 13
13
Apc^laam Caux Lotv Bun Nqoi
1Apc^laam dorh jienv ninh nyei auv caux ninh maaih nyei nyungc-nyungc ga'naaiv cuotv I^yipv Deic-Bung mingh taux Negepc. Lotv yaac caux jienv ninh mingh. 2Apc^laam butv zoih haic, maaih saeng-kuv, maaih jiem, maaih nyaanh camv haic.
3Ninh yiem Negepc, yietc kang suiv jiex yietc kang, mingh taux Mbetc^en Zingh, aengx nzuonx taux Mbetc^en caux Ai Zingh mbu'ndongx, 4dongh zinh ndaangc corng ndopv-liuh yaac ceix jiez ziec-dorngh wuov norm dorngx. Apc^laam aengx yiem wuov gorngv cuotv Ziouv nyei mbuox zaangc Ziouv.
5Lotv gan jienv Apc^laam mingh. Ninh yaac maaih ba'gi yungh maaih yungh guanh, maaih ngongh guanh, maaih ninh ganh nyei hmuangv doic caux bou.#13:5 Hipv^lu waac gorngv maaih ndopv-liuh. Eix leiz se “maaih ninh ganh nyei mienh camv”. 6Yiem wuov norm dorngx nyei ndau maiv jangv, maiv gaux ninh mbuo i dauh yiem. I dauh zungv maaih saeng-kuv camv haic. Juangc jienv yiem maiv njiec. 7Apc^laam nyei goux saeng-kuv bou caux Lotv nyei goux saeng-kuv bou ziouc da'hauv aqv. (Wuov zanc Kaa^naa^an Mienh caux Be^litv^si Mienh corc yiem jienv wuov norm deic-bung.)
8Apc^laam ziouc gorngv mbuox Lotv, “Mbuo maiv dungx da'hauv. Mbuo nyei goux saeng-kuv bou yaac maiv dungx da'hauv weic zuqc mbuo se cien nyei. 9Ndau yietc zungv yiem meih wuov ndaangc maengx. Mbuo oix zuqc bun nqoi doic yiem. Se gorngv meih mingh zaaix bung, yie ziouc mingh mbiaauc bung. Se gorngv meih mingh mbiaauc bung, yie ziouc mingh zaaix bung.”
10Lotv cau hmien samx mangc, buatc Jor^ndaen Horngc nyei ndau-baengh, cuotv So^aa Zingh wuov bung, maaih wuom-suiv longx hnangv Ziouv nyei huingx#13:10 Ziouv nyei huingx gorngv zuqc E^nden Huingx.#Tin Deic Douh 2:8,10 yaac hnangv I^yipv Deic-Bung nor. (Wuov zanc Ziouv maiv gaengh mietc So^ndom caux Go^mo^laa Zingh.) 11Lotv ziouc ginv Jor^ndaen Horngc nyei ndau-baengh yietc zungv benx ninh nyei buonc, ziouc cuotv jauv yangh dong bung mingh. Ninh mbuo i baeqv-fun ziouc bun nqoi doic mi'aqv. 12Apc^laam corc yiem Kaa^naa^an Deic-Bung. Lotv aeqv, yiem Jor^ndaen Horngc nyei ndau-baengh nyei zingh yaac corng ninh nyei ndopv-liuh nitv So^ndom. 13So^ndom Mienh waaic haic, baamz zuiz dorngc Ziouv camv.
Apc^laam Suiv Mingh Yiem He^mbo^lon
14Lotv caux Apc^laam bun nqoi doic liuz, Ziouv mbuox Apc^laam, “Cau hmien mangc gaax dong naamh fai baqv, da'faanh meih yiem naaiv mangc buatc nyei dorngx. 15Yie bun nzengc meih caux meih nyei zeiv-fun yietc liuz yiem.#Gong-Zoh 7:5; Gaa^laa^tie 3:16 16Yie oix bun meih nyei zeiv-fun hiaangx daaih hnangv nie-mbung nor camv. Haaix dauh haih saauv duqv nzengc nie-mbung cingx daaih haih saauv duqv nzengc meih nyei zeiv-fun. 17Meih mingh aqv. Mingh youh zueih ndaauv zueih jangv mangc gormx nzengc naaiv norm deic-bung weic zuqc yie oix jiu bun meih.”
18Apc^laam ziouc suiv ninh nyei ndopv-liuh mingh corng jienv yiem He^mbo^lon Horngc nitv Mamle nyei domh mba'ong zuei ndiangx-lomc. Yiem wuov ninh aengx ceix norm ziec-dorngh zaangc Ziouv.
Okuqokiwe okwamanje:
Tin Deic Douh 13: IuMiNR
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
ฉบับอักษรโรมันใหม่ © Thailand Bible Society, 2007.