Genesis 10
10
Hay holag nadan imbabalen Noah
1Datuwey holag nadan tulun imbabalen Noah an hi Sem, hi Ham ya hi Japet handih nagibbuwan di nalbongan di luta. 2Hanadan holag Japet ya hi Gomer, hi Magog, hi Madai, hi Jaban, hi Tubal, hi Meshek ya hi Tiras. 3Hi Gomer ya nahlag ot wadada Askenas, hi Ripat ya hi Togarmah. 4Hi Jaban ya nahlag ot dadiye nan numpumbobled Elishah, Tarsis, Kittim, ya ad Rodes.#10:4 Hay Tarsis ya bobled Spain handi. Tibon yuy Jonah 1:3. 5Datuwen holag Japet di aammod nadan tatagun numpumbobleh nungkih-up ya nungkigawwah baybay. Datuwey holag Japet an nun-aappil di numboblayan da ya nunhihinnatkon di kalida.
6Nahlag hi Ham ya da Kush, hi Misraim, hi Put ya hi Kanaan. 7Hanadan holag Kush ya dadiye nadan tatagud Seba, Habilah, Sabtah, Raamah ya ad Sabteka. Ya nadan holag Raamah ya dadiye nadan tatagud Seba ya ad Dedan. 8Waday imbabalen Kush an hi Nimrod an numbalin hi ap-apun di makigubat. Hiyay namangulun nanganapput hi nakigubatanah kabobboble 9ya hiya ya nakala-ing an mun-anup gapuh baddang APU DIOS. Kinali kanan di tataguh ibbaday “Hana ot ta pumbalinon dakan APU DIOS an makangannup an umat ke Nimrod.” 10Hanadan boblen pun-ap-apuwana ya Babel, Erek, Akkad ya Kalneh. Datuwen boble ya sakup di Babilon. 11Inlagat na boy Assyria ot iphod na nadan boblen Nineveh, Rehobot Ir, Kalah 12ya Resen an numbattanan di Nineveh ya ad Kalah an ohan ongngaongngal an boble.
13Hanadan holag Misraim ya dadiye nadan bimmobled Lydia, Anam, Lehab, Naptuh, 14Patrus, Kasluh ya ad Crete an nahlagan nadan Pilistia.
15Hanadan holag Kanaan ya hi Sidon an panguluwan ot ahi hi Het. 16-18Nawaday udum hi imbabalen Kanaan ot dadiyen imbabalenay nahlagan nadan Jebusite, Amorite, Girgashite, Hibite, Arkite, Sinite, Arbadite, Semarite ya nadan Hamatite. Datuwen holag Kanaan ya nihinap da. 19Ta hay poppog di numboblayan da ya nipalpud Sidon ingganad Gerar an nih-up ad Gaza, nah nangappit hi timilan di algod Sodom, Gomorrah, Admah ya ad Seboim an nih-up ad Lasha. 20Datuwey holag Ham an nihinap hi kabobboble an waday oha on hinnatkon di kalida.
21Hi Sem an nihaynod an Japet ya hiyay nahlagan nadan Hebrew. 22Nahlag hi Sem ot wadada Elam, hi Assur, hi Arpachshad, hi Lud, ya hi Aram. 23Hay holag damdaman Aram ya dadiye nadan wadad Us, Hul, Gether ya Meshek. 24Hi Arpachshad ya nahlag ot hi Selah an aman Eber. 25Hi Eber ya duway imbabalenan linalaki. Hay ngadan nan oha ya hi Peleg te handih kataguna ya naganodwa day tatagu tuh luta. Ya nan oha ya hi Joktan. 26Hituwen hi Joktan di nahlagan nadan tatagun wadad Almodad, Selep, Hasarmabet, Jerah, 27Hadoram, Usal, Diklah, 28Obal, Abimael, Seba, 29Ophir, Habilah ya Jobab. Datuwen am-in di nahlag ke Joktan. 30Hay numboblayan da ya nipalpud Mesha ingganad Separ an mabilid an boble nah nangappit hi timilan di algo.
31Datuwey holag Sem an nihinap dah dakol an boble an waday oha on hinnatkon di kalina.
32Datuwen am-in di nahlag nadah imbabalen Noah nipalpu dih nagibbuwan di nalbongan di luta. Ot mihinap dah kabobboble mipuun hanadah nahlagan da.
Okuqokiwe okwamanje:
Genesis 10: ifkWB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2004, Wycliffe Bible Translators, Inc. All rights reserved.