Matiu 5
5
Yesu eau amur nkono sǝ kanigir
(Luka 6:20-23)
1Lang Yesu sǝn lakki mala ɓwabunda ka, kya eauwe do a bum nkono. Alaggana male yiu abani, 2sǝ tita kania wia gir ama:
3 Aɓwana mǝnana à sǝlǝ ama
yia ka amǝtǝr na
aɓa bangŋo ka,
à ndanǝ tsǝkbu mala Ɓakuli,
acemana Domurǝm mala
kuli ka malea na.
4 Amǝ bumkiɗikea ka
à ndanǝ tsǝkbu mala Ɓakuli,
acemǝnana à nǝ̀ kum
girikiban. # 5:4 Ɓalli gbal aɓa:
Isha 61:2
.
5 Amǝ nongsǝmuru ka
à ndanǝ tsǝkbu mala Ɓakuli,
acemǝnana à nǝ̀ li ɓanza. # 5:5 Ɓalli gbal aɓa:
Ang 37:11
.
6 Aɓwana mǝnana à
dum nǝ nzala
andǝ mǝsamur mala
cauɓoarna a bumia ka,
à ndanǝ tsǝkbu mala Ɓakuli,
acemǝnana à nǝ̀ kum
ɗǝmsǝban. # 5:6 Ɓalli gbal aɓa:
Isha 55:1,2.
7 Amǝ sǝn mǝsǝswatǝr ka
à ndanǝ tsǝkbu mala Ɓakuli,
acemǝnana à nǝ̀ sǝn
mǝsǝswatǝr malea.
8 Amǝ ɓabum mǝɓoarnsari ka
à ndanǝ tsǝkbu mala Ɓakuli,
acemǝnana à nǝ̀ sǝn Ɓakuli. # 5:8 Ɓalli gbal aɓa:
Ang 24:3,4.
9 Amǝ gilǝki dotarǝu ka
à ndanǝ tsǝkbu mala Ɓakuli,
acemǝnana à nǝ̀ duk
amuna mala Ɓakuli.
10 Aɓwana mǝnana à kǝ
pea wia tanni
ace cauɓoarna ka,
à ndanǝ tsǝkbu mala Ɓakuli,
acemǝnana Domurǝm
mala kuli ka malea na.
11 Wu ndanǝ tsǝkbu mala Ɓakuli yi mǝnana aɓwana kǝ sang wun, à kǝ pa wun tanni, à kǝ tsǝka wun acau ɗàngɗáng aɓa nyir, acemǝnana wu ndaka amǝkpatam ngga. 12Wu pak bumpwasǝa, ban ɓǝ ɓoara wun, acemǝnana tangnakusǝ wun ngga mǝgule na a kuli. Anggo sǝ à pe amǝ'ɓangna mala Ɓakuli mǝnana à aka wun dǝmbǝa ka tanni.#5:12 Ɓalli gbal aɓa: 2Kpa 36:16; Mat 23:37; Aturo 7:52; 1Tas 2:15; Jem 5:10.
Tuɓamur andǝ tǎlaban mala ɓanza
(Markus 9:50; Luka 14:34-35)
13 Wu ndaka tuɓamur mala ɓanza. Sǝ ɓǝ̀ tuɓamur ɗwanyi cyauwe male ka mana gir ni nǝ̀ tsǝi sǝ nǝ̀ cyau ɗǝm? Panǝ ɓoaro ɗǝm ɗang, à nǝ̀ sukki aɓwana nǝ̀ parki a ɓakusǝia. # 5:13 Ɓalli gbal aɓa:
Mar 9:50; Luk 14:34,35.
14 Wu ndaka tǎlaban mala ɓanza. Nggeala mǝnana à ɓe amur tali ka pà nǝ̀ sǝmbǝrǝ ɗang. # 5:14 Ɓalli gbal aɓa:
Yoh 8:12; 9:5. 15À pà nǝ̀ tsǝk bǝsa a pitǝla sǝ à nǝ̀ kumsǝi wi nkenye amuri ɗang. A kun mani ka à nǝ̀ tamsǝi amur gir tamsǝ pitǝla, aban mǝnana nǝ̀ pa tǎlaban aban aɓwana kat a ɓala ka.#5:15 Ɓalli gbal aɓa: Mar 4:21; Luk 8:18; 11:33. 16Anggo sǝ wu nǝ̀ nying tǎlaban ma'wun ɓǝ ta a ɓadǝmbǝ aɓwana ace mǝnana ɓǝa sǝn aturo ɓoarna ma'wun, sǝ ɓǝa gusǝlǝ Tar wun mana a kuli ka.#5:16 Ɓalli gbal aɓa: Ang 2:12.
Nggurcau mala Musa
17 Wu kǝa twali ama ǝn yiu ace tamsǝ Nggurcau mala Musa andǝ kanigir mala amǝ'ɓangna mala Ɓakuli ɗang; ǝn yiu ace tamsǝia ɗang. Nda ace lumsǝia. 18Ən nggǝ na wun mǝsǝcau, kǝ muna-cau pà kàm, sǝ ɓe kǝgir bǝti pà kàm aɓa Nggurcau mala Musa mǝnana à nǝ̀ pusǝì ka ɗang, she ɓǝ̀ kuli andǝ nzali ka tea malǝna ka.#5:18 Ɓalli gbal aɓa: Luk 16:17. 19Ɓǝ̀ yana kat sǝ yàllî nzong mǝkyauwe mwashat aɓalǝ amǝnia yì anzongcau, sǝ kǝ kani aɓwana ama ɓǝa pa kǝla yì ka, nǝ̀ ngga duk rítǎu aɓa Domurǝm mala kuli. Sǝ ɓwa mǝnana kǝ kpata amǝnia yì anzongcau sǝ kǝ kani aɓwana ama ɓǝa pa kǝla yì ka, nǝ̀ ngga duk ɓwamǝgule a Domurǝm mala kuli. 20Ən nggǝ na wun ama ɓǝ̀ ɓealɓoarna ma'wun kuti mala amǝ Farisi andǝ amǝkani Nggurcau mala Musa raka,#5:20 ɓǝ̀ ɓealɓoarna ma'wun kuti mala amǝ Farisi andǝ amǝkani Nggurcau mala Musa raka: Ko “ɓǝ̀ do mǝsǝcau ma'wun aɓa kpata gir mǝnana Ɓakuli earkiyi ce ka kuti mala amǝ Farisi andǝ amǝkani Nggurcau mala Musa raka.” wu pa wu nǝ̀ kum kutio aɓa Domurǝm mala kuli ɗang ko bǝti.
Yesu kanigir amur bumlulla
(Luka 12:57-59)
21 Wu ongŋǝna à banggi aɓwana mǝnana a pwaryan ngga ama, “A pà wu nǝ́ wal lú ɗang; ɓwa mǝnana wal lú ka à nǝ̀ pakki wi ɓashi.” # 5:21 Ɓalli gbal aɓa:
Pur 20:13; Nggur 5:17. 22Sǝ mim ngga ǝn nggǝ na wun ama ɓwa mǝnana bumi lullo arǝ ɓi ka à nǝ̀ pakki wi ɓashi. Sǝ ɗǝm ngga à bangŋa ama ɓwa mǝnana tunǝî ɓì ɓwaɓana ka à nǝ̀ ká nǝi aban amǝɓashi. Sǝ mim ngga ǝn nggǝ na wun ama ɓǝ̀ a ne ɓwa ama “We ɓwazalǝa” ka, a nda ɓa ká tanni mala ɓashi lu-bǝsa.
23 Ɓǝ̀ a ndarǝ pa ɓoro mo aban gyangŋan-peri sǝ ɓalǝo kasǝa ama ɓe kǝɓwa na kam ndanǝ cau a bumi a rǝo ka, 24nying ɓoro mo a ɓadǝm gyangŋan, nyare kya gilǝki ce wunǝ ɓwe peatu, sǝ wu yi pa ɓoro mo.
25 Ɓǝ̀ kǝɓwa wulio ka gbara gilǝki nre wun wunǝi peatu sǝ wu kya ndaɓashi. Ɓǝ̀ a na raka nǝ̀ ngga kpapio wunǝ mǝɓashi, sǝ mǝɓashi ka nǝ̀ tasǝo a bu amǝ'munagara, sǝ à nǝ̀ ngga oasǝo a ndàkurban. 26Ən nggǝ no mǝsǝcau a pa nǝ́ purî nggur ɗang she ɓǝ̀ a mbwena gir mǝnana kat à kasǝo ka.
Kanigir mala Yesu amur cauɓikea nongnǝban mǝnana pa aɓa doɓala raka
27 Wu ongŋǝna à bangŋa ama “A pà nǝ́ nongnǝ ɓwa mǝnana à kpapia wun doɓala wunǝi raka ɗang.” # 5:27 Ɓalli gbal aɓa:
Pur 20:13; Nggur 5:18.
28 Sǝ mim ngga ǝn nggǝ na wun ama ɓwa mana kat sǝn mɓwama nǝ sǝnban nshawari ka, angŋǝna dǝmbǝa nongŋǝna nǝi a ɓabumi. 29Ɓǝ̀ mǝsǝo mǝli kǝ tsǝo a kǝ pak cauɓikea ka, pusǝì turi. Kǝpǝna wu ɗwanyi ɓe kǝ bareo mwashat amur mǝnana ɓǝa tur nggūrǝo kat aɓa tuli-bǝsa ka.#5:29 Ɓalli gbal aɓa: Mat 18:9; Mar 9:47. 30Sǝ ɓǝ̀ buo mǝli kǝ tsǝo a kǝ pak cauɓikea ka, kasǝi turi. Kǝpǝna wu ɗwanyi ɓe kǝ bareo mwashat amur mǝnana ɓǝa tur nggūrǝo kat aɓa tuli-bǝsa ka.#5:30 Ɓalli gbal aɓa: Mat 18:8; Mar 9:43,44.
Yesu kanigir amur gau doɓala
(Matiu 19:9; Markus 10:11-12; Luka 16:18)
31 Ɗǝm ngga à bangŋa ama, “Ɓǝ̀ ɓwa nǝ̀ gau andǝ mami ka, dumǝna púp nǝ̀ pe wi takada gauwa.” # 5:31 Ɓalli gbal aɓa:
Nggur 24:1-4; Mat 19:7; Mar 10:4. 32Sǝ mim ngga ǝn nggǝ na wun ama ɓwa mǝnana pǝr mami, sǝ pa ace cauɓikea mala nongnǝban a nza nǝ́ doɓala raka, ndarǝ tsǝie aɓa cauɓikea mala mǝ'nongginǝban nǝ aɓea aburana a nza nǝ́ doɓala. Sǝ ɓwa mǝnana al mǝnia yì ɓwama mǝnana burri pǝri ka, ndarǝ pak cauɓikea mala nongnǝ mālá ɓeɓwa.
Kanigir mala Yesu amur Kángir
33 Sǝ ɗǝm ngga wu ongŋǝna à banggi aɓwana mǝnana a pwaryan ngga ama, “A pà nǝ́ kángir aɓa nyir ɗang. She a wu nǝ lumsǝ agir mǝnana a kana a ɓadǝm Mǝtalabangŋo ama a nǝ pea ka.” # 5:33 Ɓalli gbal aɓa:
Pǝris 19:12; Ɓal 30:2; Nggur 23:21. 34Sǝ mim ngga ǝn nggǝ na wun ama, wu kǝa kángir ɗang. Wu kǝa kángir nǝ kuli ɗang, acemǝnana nda bunomurǝm mala Ɓakuli.#5:34 Ɓalli gbal aɓa: Jem 5:12; Isha 66:1; Mat 23:22. 35Sǝ pa wu nǝ̀ kángir gbal nǝ nzali ɗang, acemǝnana ndà ban usǝlǝ kusǝu male. Sǝ wu kǝa kan gbal nǝ Urǝshalima ɗang, acemǝnana nda nggeala mala Murǝm Mǝgule kat.#5:35 Ɓalli gbal aɓa: Isha 66:1; Ang 48:2. 36Sǝ kǝa kan nǝ ɓamuro ɗang, acemǝnana a pà nǝ́ gandǝ pǝlǝ nyang muro mwashat ɓǝ̀ pwasǝo ko ɓǝ̀ pǝndǝ ka ɗang. 37Ɗeki “E” mo ɓǝ̀ duk “E,” sǝ “Awo” mo ɓǝ̀ duk “Awo”; ɓǝ̀ wori mǝnia ka pur nǝ ban Mǝɓealɓikea.
Yesu kanigir amur pegbal
(Luka 6:29-30)
38 Wu ongŋǝna à bangŋa ama, “Ar mǝsǝu a kun ar mǝsǝu, sǝ ɓun minǝu a kun ɓun minǝu.” # 5:38 Ɓalli gbal aɓa:
Pur 21:24; Pǝris 24:20; Nggur 19:19-21. 39Sǝ mim ngga ǝn nggǝ na wun ama, kǝa nyesǝ mǝɓane a kun mǝɓane mǝnana à pakko ka ɗang. Ɓǝ̀ ɓwa kweo a takiro mǝli ka, pǝlǝi wi ɓe takiro. 40Ɓǝ̀ ɓwa na ama nǝ̀ ngga wulio nǝ̀ ako daura mo ka, pe wi andǝ nggea-daura mo gbal. 41Ɓǝ̀ ɓwa tsǝo púp ama ɓǝ̀ wu o wunǝi mel mwashat ka, wu kyan wunǝi mel ɓari. 42Ɓǝ̀ ɓwa zǝmbǝo ka, pe wi, sǝ ɓwa mǝnana yiua ak tangna a buo ka, ce a girì nǝi ɗang.
Yesu kanigir amur earce aɓiomǝbura
(Luka 6:27-28,32-36)
43 Wu ongŋǝna à bangŋa ama, “Earce ɓio mǝ'murkala,” # 5:43 Ɓalli gbal aɓa:
Pǝris 19:18
. sǝ wu ɓinǝ ɓiomǝbura. 44Sǝ mim ngga ǝn nggǝ na wun ama: Wu earce aɓi wun amǝbura sǝ wu kǝ pak hiwi ace aɓwana mǝnana à ɓinǝ mǝsǝ wun sǝ à kǝ pa wun tanni ka. 45Ɓǝ̀ wu pa anggo ka wu nǝ̀ duk amuna mala Tar wun mǝnana a kuli ka. Acemǝnana yì ka, kǝ tsǝk pwari male kǝ ta amur aɓwana amǝɓane andǝ amǝɓoarne, sǝ kǝ nya mbulo amur amǝ pak cauɓoarna andǝ amǝ pak ɓealɓikea. 46Ɓǝ̀ earcearǝu ma'wun ngga nda ace amǝ'earce wun nǝmurǝia ka, ya tangnakusǝu na wu ndanǝi? Nggearǝ amǝ'cauɓikea ka anggo sǝ à pakkiyia. 47Sǝ ɓǝ̀ amǝ'eam wun na nǝmurǝia wu makkiyia kun ngga, nǝ man sǝ wu kuti acili aɓwana mǝnana amǝkpatam na raka? Nggearǝ amǝɓanza ka anggo sǝ à pakkiyia. 48Ace mǝno ka wu lumsǝ nǝ cauɓoarna kǝla mǝnana Tar wun mana a kuli ka lumsǝ nǝ cauɓoarna ka.#5:48 Ɓalli gbal aɓa: Pǝris 19:2.
Okuqokiwe okwamanje:
Matiu 5: mbu
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. and © The Nigeria Bible Translation Trust 2016
