Yauhaas 13
13
Yexus Ntxuav Nwg Cov Thwjtim Kutaw
1Uantej nub ua kevcai Hlaa Dlhau, Yexus paub tas tub txug lub sijhawm kws Nwg yuav tawm huv lub nplajteb nuav rov moog cuag Leejtxiv lawm. Nwg yeej ibtxwm hlub Nwg cov tuabneeg kws nyob huv nplajteb nuav, Nwg yeej hlub puab kawg nkaus le.
2Thaus Yexus hab Nwg cov thwjtim taabtom noj mo, dlaab ntxwgnyoog tub lug tshoov Yudas kws yog Ximoos Ixakali-us tug tub lub sab, kuas nwg ntxeevsab rua Yexus lawm.#13:2: dlaab ntxwgnyoog … ntxeevsab rua Yexus lawm; lossis dlaab ntxwgnyoog tub txavtxim sab tau lawm has tas, Yudas kws yog Ximoos Ixakalius tug tub yuav ntxeevsab rua Yexus. 3Yexus paub tas Leejtxiv tub muab ibpuas tsaavyaam tso rua Nwg kaav lawm; hab paub tas Nwg lug ntawm Vaajtswv lug hab Nwg yuav rov moog cuag Vaajtswv. 4Yogle ntawd, Nwg txhajle sawv ntawm lub rooj mov, hle Nwg lub tsho ntev hab muab ib txuj phuam lug sa ntawm dluav. 5Tes Nwg txawm muab dlej laub rua huv lub taig phab hab pib ntxuav cov thwjtim kutaw hab muab txuj phuam kws Nwg sa ntawm dluav lug so. 6Thaus Yexus ntxuav lug txug ntawm Ximoos Petus, Ximoos Petus txawm has rua Yexus has tas, “Tug Tswv, Koj yuav ntxuav kuv le kutaw hab lov?”
7Yexus teb tas, “Taamsim nuav koj tseem tsi tau totaub qhov kws Kuv taabtom ua nuav, tabsis lwmnub koj yuav totaub.”
8Petus has tas, “Koj yuav ntxuav kuv kutaw tsi tau hlo le!”
Yexus teb tas, “Yog Kuv tsi ntxuav koj kutaw, koj yuav tsi muaj feem koom nrug Kuv.”
9Ximoos Petus teb tas, “Tug Tswv, yogle ntawd nua tsi xob yog ntxuav kuv kutaw xwb! Thov ntxuav kuv teg hab taubhau huv tuabsi!”
10Yexus has tas, “Tug kws tub dlaa dlej lawm, nwg lub cev yeej huv lawm, tsi taag yuav rov ntxuav dlua; tsuas yog ntxuav kutaw xwb tau lawm.#13:10: Tej phoo ntawv qub kws xuas teg sau, tsi muaj tsuas yog ntxuav kutaw xwb tau lawm. Mej txhua tug puavleej huv lawm, tsuas yog tshuav ib tug xwb.” ( 11Yexus tub paub lawm has tas tug twg yog tug kws yuav ntxeevsab rua Nwg; vimle ntawd Nwg txhaj has tas, “Mej txhua tug puavleej huv lawm, tsuas yog tshuav ib tug xwb.”)
12Tomqaab Yexus ntxuav puab kutaw taag lawm, Nwg rov muab Nwg lub tsho ntev lug naav hab rov lug nyob Nwg lub chaw ntawm rooj mov. Yexus nug cov thwjtim has tas, “Mej puas totaub txug qhov kws Kuv nyavnyuas ua rua mej nuav? 13Mej hu Kuv ua Xwbfwb hab tug Tswv, mej hu le ntawd yog lawm, ruaqhov Kuv yeej yogle ntawd. 14Kuv yog mej tug Tswv hab yog mej tug Xwbfwb, Kuv tub ntxuav mej le kutaw. Yogle ntawd, mej ib leeg yuavtsum ntxuav ib leeg kutaw hab. 15Kuv tub ua qauv rua mej lawm, kuas mej xyum ua lawvle Kuv tau ua rua mej ntawd. 16Kuv qha tseeb rua mej has tas, tug tubqhe yeej tsi luj dlua nwg tug tswv, hab tug tubkhai yeej tsi luj dlua tug kws khaiv nwg moog. 17Nwgnuav mej tub paub tej nuav lawm, yog mej coj ua lawvle ntawd, mej yuav tau kev kaajsab lug!
18“Kuv tsi yog has txug mej txhua tug; Kuv yeej paub cov kws Kuv xaiv ca lawm. Tabsis yuavtsum muaj lawvle Vaajtswv Txujlug kws has tas, ‘Tug kws koom nrug Kuv noj ib taig mov yuav ntxeevsab rua Kuv.’ 19Kuv xub qha rua mej uantej kws yuav muaj tej nuav, sub thaus muaj tej nuav tshwm tuaj, mej txhaj yuav ntseeg tas, ‘Kuv Yog tug kws Kuv has ntawd.’ 20Kuv qha tseeb rua mej has tas, leejtwg kws txais yuav tug kws Kuv khaiv moog, tug ntawd yeej txais yuav Kuv; hab leejtwg kws txais yuav Kuv, tug ntawd yeej txais yuav tug kws khaiv Kuv lug.”
Yexus Qha Txug Qhov Kws Yuav Muaj Tug Ntxeevsab Rua Nwg
(Mathais 26:20-25; Malakaus 14:17-21; Lukas 22:21-23)
21Tomqaab kws Yexus has le ntawd taag, Nwg nyuajsab heev, Nwg txhaj taabmeeg muab nthuav hlo qha has tas, “Kuv qha tseeb rua mej has tas, mej cov ko muaj ib tug yuav ntxeevsab rua Kuv.”
22Cov thwjtim ib leeg txawm saib ib leeg, puab tsi paub tas tug kws Yexus has ntawd yog leejtwg. 23Yexus ib tug thwjtim kws Yexus hlub heev, nwg nyob npuas Yexus. 24Ximoos Petus txawm ua laaj muag rua tug thwjtim ntawd hab has tas, “Koj nug Yexus seb tug kws Nwg has ntawd yog leejtwg?”
25Tes tug thwjtim ntawd txaav zog moog rua ntawd Yexus hab nug tas, “Tug Tswv, tug ntawd yog leejtwg?”
26Yexus teb tas, “Kuv muab ncuav ntsw hab cev rua leejtwg, tes yog tug ntawd ntaag.” Yogle ntawd, Yexus txawm muab ncuav ntsw hab cev rua Yudas kws yog Ximoos Ixakali-us tug tub. 27Thaus Yudas noj qhov ncuav ntawd, tes Xataas txawm nkaag kag lug rua huv nwg. Yexus has rua Yudas tas, “Koj yuav ua dlaabtsi los cale ua kawgkag!” 28Cov thwjtim kws nyob ntawm rooj mov, tsi muaj ib tug totaub has tas vim lecaag Yexus txhaj has le ntawd rua Yudas. 29Vim Yudas yog tug ceev lub naab nyaj, tes cov thwjtim qeeleej txhaj xaav tas yog Yexus khaiv kuas Yudas moog yuav tej yaam kws cheemtsum lug rua puab siv ua kevcai lossis kuas Yudas muab qeeyaam moog pub rua cov tuabneeg txomnyem.
30Yudas txais nkaus qhov ncuav ntawd hab txawm cale tawm plawg moog. Thaus ntawd tub tsausntuj lawm.
Txuj Kevcai Tshab
31Tomqaab kws Yudas tawm moog lawm, Yexus has tas, “Nwgnuav tub txug lub sijhawm kws Tuabneeg Leejtub tau koobmeej lawm; nwgnuav Nwg yuav ua rua Vaajtswv tau koobmeej. 32Yog Tuabneeg Leejtub ua rua Vaajtswv tau koobmeej lawm, Vaajtswv yuav ua rua Tuabneeg Leejtub tau koobmeej ib yaam nkaus hab, Vaajtswv yuav ua taamsim nuav ntaag. 33Kuv cov mivnyuas 'e, Kuv yuav nrug mej nyob tsi ntev lawm. Mej yuav nrhav Kuv, tabsis nwgnuav Kuv qha rua mej ib yaam le Kuv tub qha rua cov Yudais tej numtswv lawm has tas, ‘Qhov chaw kws Kuv yuav moog ntawd, mej moog tsi tau.’ 34Nwgnuav Kuv muab ib txuj kevcai tshab rua mej: mej ib leeg yuavtsum hlub ib leeg. Kuv hlub mej lecaag, mej ib leeg yuavtsum hlub ib leeg ib yaam le ntawd. 35Yog mej ib leeg hlub ib leeg, suavdlawg txhaj yuav paub tas mej yog Kuv cov thwjtim.”
Yexus Qha Uantej Txug Qhov Kws Petus Yuav Tsi Leeg Paub Nwg
(Mathais 26:31-35; Malakaus 14:27-31; Lukas 22:31-34)
36Ximoos Petus nug Yexus has tas, “Tug Tswv, Koj yuav moog qhovtwg?”
Yexus teb tas, “Qhov chaw kws Kuv yuav moog ntawd, nwgnuav koj yuav nrug Kuv moog tsi tau, tabsis lwmnub koj yuav lawv Kuv qaab lug.”
37Petus nug has tas, “Tug Tswv, uacaag nwgnuav kuv ho nrug Koj moog tsi tau? Kuv yeej txaussab tuag rua Koj!”
38Yexus teb tas, “Koj yeej txaussab tuag rua Kuv tag lov? Kuv qha tseeb rua koj has tas, uantej qab qua, koj yuav tsi leeg paub Kuv txug peb zag.”
Okuqokiwe okwamanje:
Yauhaas 13: HNJ2022
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2022 United Bible Societies. All rights reserved.
