Matayu 3
3
Yohane Doku Tau Tauŋo Kisi Maep Urata Kiyeke Make
1Naso yewao Yohane doku tau tau eŋe sari more, Yuda kepe yaup papaino kiyeke kisi maep edane geke. 2Paki rake, “Borikine ŋine ŋadek kau paki, wetŋine maingeu, onoka wane qeli gege togon wane ŋei Waom mo osop sarimaike!” 3Yohane weku eŋane propet Isaiyaŋo don iwa yale rake,
“Ŋei mane kepe yaup papaino bokamaike, ‘Waom wane numa ma wesakeu, eŋe sariyakane numa makoboe birakau!’ ” 4Yohane takotine kamel zouneŋo mamaine ma geke, eŋe waroine osom solaineŋo mamaine, eyaŋo kebaŋino ramu geke, so ŋaraine yemo sila so begok zubaine, eya ne geke. 5Ŋei ŋerep eŋano sari warekoi, yemo Yerusalem matko ŋine, Yuda kepeo ŋine korop, so Yordan Doku loli lolik mat pa arike, eya ŋine. 6Eŋe borikine-ene ra wakone qeligeu, Yordan Dokuwo tauwonge. 7Yohane eŋe Parisi ŋei so Sadusi ŋei tego loutneŋo doku tau oniyakane sariu, ongi paki edane rake, “Ŋine koma qotkoinane dokoine, maŋo ŋidangi Kaisale wane busu ŋado sariyakane okanmaike, eya kakakka more ŋadekka ariu rap? 8Wetŋine maingeu paki, tanik manik maine okane mau, eyaŋo baŋ Borikine ŋine ŋadek kamami, eya wane welewa eyamo sikan-ŋuniyake. 9So wetŋineŋo iwa yale maine mi wetke rakei, ‘Abraham eŋe ŋenane ŋaboze.’ Na ŋidanmaile, yemo Kaisale eŋe maine wesi iwaŋo maki paki, eyaŋo Abraham wane ŋabokoune tego mane koso maine ebuki wakongei! 10Naka mo eki kino kitatki ketkei wane eweke pamaike, eki korop wele maine mi qekei, yemo baŋ kitatki ketpi biraongi, gerepko wau ezoyake. 11Na dokurop tau-ŋunmaile, eyaŋo kine iwa yale sikan-ŋunmaike. Ŋine wetŋine mo maingekoi, ŋo ŋei mane naŋane ŋadeno baŋ sariyake, eŋe yemo zonomine togogole, eŋe naŋane zonom yuwan kamaike, na ŋei maine mida, noŋo eŋane kiye tabine maine tewek-kalane rokop midakaka, oŋo yemo baŋ Asu Koboboine so gerep weneŋ tau-ŋuniyake. 12Eŋe wano wanok urata ma gemaike, kito wanok maki wele eŋineka, ŋo sinoine eŋe eŋineke baŋ wakoniyake ŋo eŋe witine wele eyamo baŋ peikki urumino wayake, ŋo solaine eyamo gerep koma komaine midaine banine ze papaine, eyao qakki wa ezo-wareyake.”
Yohaneŋo Yesu Doku Taukake
13Naso yewao Yesu eŋe Galili kepeo ŋine Yordan dokuwo Yohane wano sarike, oŋo doku tau-kayakane. 14Ŋo Yohaneŋo yemo Yesu eŋe wetinane kine eya ra qelaŋangi desiyakane ra liwekka more rake, “Goŋo yemo na maine tau-nanikene, ŋo siluŋ noŋo ge tau-ganikalane naŋano sarimaine me?” 15Pakiso Yesuŋo mainge olale rake, “Yeine qeligenom paki, noŋo ramaile, yale iwa okannom, numa iwa eya yale oken okanikete, eya yemo ŋere mo maine Kaisaleŋo detmaike, eya wane kop okanikete.” 16Eso Yohane eŋe Yesu wane don eya dere, so eyaka doku taukake. Taukaki Yesu eŋe dokuwo ŋine saki saki, eyaka qeli aŋaŋge, pakiso eŋe kaki, Kaisale wane Asuŋo naŋi baluse yale okane ketki paki, Yesu eŋine kutno kitoke. 17Eso qeliwo ŋine don mane iwa yale raki ketke, “Iwa eŋe nae Gipon maepne, na eŋane zok manerop simile-nanokanmaike.”
Okuqokiwe okwamanje:
Matayu 3: onsNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2012, Wycliffe Bible Translators, Inc. All rights reserved.
