Genesis 2
2
1Isonga naboliw et nan batawa ya nan daya ya nan am-in ay wada isdi. 2Inmilleng si Apo Dios isnan maikapito ay agew tay nakwas nan oblana. 3Danat bindisyonan san maikapito ay agew ay mangwani en siya di nan kadayawan ay agew tay nakwas nan oblana et inmilleng isnan deey ay agew. 4Siya dadi nan naikkan isdin naboliwan di am-in ay wada.
Isnan Kad-an Di Ipogaw Id Eden
2:5-9, 15-25
Isdin nangsapowan nan apo ay Dios isnan am-in 5et maid molmola isnan batawa ya maid bonobon is tinmobo tay egayna pay laeng pinawada nan odan ya maiwed pay laeng mangkaykay isnan lota. 6Ngem binmala nan danom isnan daem di lota et opeena nan lota. 7Dat alaen nan apo nan lota et sapowena is ipogaw danat isip-oy nan leng-ag di biyag isnan eeng nan sinapona dat matago san lalaki.
8Sinapon nan apo ay Dios nan makwani en Galdin id Eden isnan batog nan balaan di agew et siya nan nangipateeana issan ipogaw ay sinapona. 9Inpatobona nan kak-aiw ay gawis nan kaiilaanda ya gawis ay makan nan begasda. Ngem isnan tengana et wada nan kaiw di biyag ya nan kaiw di nemnem ay gawis ya ngawi.
15Dat ipakaykay dapay ipabantay nan apo ay Dios nan Galdin id Eden issan ipogaw ay inpaeyna isdi. 16Danat ibaga isnan ipogaw, “Mabalin ay kanem nan natkenatken ay begas di kak-aiw 17ngem adim kankanen nan begas nan kaiw di nemnem ay gawis ya ngawi tay isnan agew ay mangkakanam isdi et mateyka.”
18Kinwanin pay nan apo ay Dios en, “Ngawi no maeesa nan lalaki isonga mensapowak is kabadangna ay maibagay ken siya.” 19Danat iyey issan ipogaw nan animalis ya nan koykoyat ay sinapona isnan lota ta ilaena no ngan nan pangwanin san ipogaw ken daida et san kinwanina isnan deeyda ay matmatago et siya di nan ngadanda.
20Ngem idi nginadnan san ipogaw am-in daida dat maiwed kayet maibagay is menkadwana 21isonga dat paseyepen nan Apo ay Dios siya danat alaen nan esay tadlangna danat omtan san nangkaanana. 22Et san tadlang ay kinaan nan apo ay Dios issan lalaki et sinapona is babai danat iyey issan lalaki. 23Dat kanan san lalaki, “Si tona nan maibagay ken sak-en tay nagapo isnan tadlangko ya nan begasko et makwani siya en babai tay nagapo isnan lalaki.” 24(Et siya di nan gapo ay taynan nan lalaki nan amana ya nan inana ta maitapi isnan asawana et menbalinda ay es-esa.) 25San lalaki ya san asawana et ninlalabosda ngem adida mabain.
Okuqokiwe okwamanje:
Genesis 2: xnn
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.