Matyu 8
8
Yesus tebe tinum kaal mafak telela dosa uta ko
Mak 1:40-44; Luk 5:12-14
1Kale kota Yesus iyo amdu tigiin uyo kupkaa malaak abe abe-balata, tam unang tinum kwiin tagang iyo yak Yesus imi daang begebelip maagup unip ko. 2Tam tinum kaal mafak kesa maak ipkumal tebe fot tebelip yang sep kugol nuuba iyo Yesus imi finang tal-nala e, kamok king imi weng umka-emin umi kuguup uta ku-nala e, tal katuun duung fegela daak ton-nala e, bogola ko. “Kamogim kabaa. Kabo tii kale, dong dogopnelan o agelap umdii, nimi kaal mafak koyo telela kopne-namap o,” agela e bole, 3Yesus imi sagaal uyo kwep yak tinum bemi kaal diim uyo daa bogobe-nala e, “Aa. Niyo dong dogopkelan o ageta kale, kaa telela kamoli tambalanap o,” agela e, kota tinum bemi kaal mafak uyo maak fagaa binimanepmu tinum kasagim kela e, 4kota Yesus iyo bogobe-nala e, “Kabo koyo no tinum imi diim uyo ki nimi kanupkeli bomi sang uyo baga-emin ba kale, kupkaa unap ki no pris ko age tinum amem imi diim kal kapmi kaal uyo kafalebelapta, utam-nalata, bogopke, ‘Aafen boyo binimanepkelu o,’ agelata bole, kabo Moses imi sugayok weng kwep daasa uta ku waafu-nalapta, mufekmufek maak God iyo kobe-nalap, ‘Suguul o,’ agelapta, unang tinum iyo katamipta e, aafen ko tambalanap kalaa age-nilipta, asok kamdep meng daalin o,” agela ko.
Yesus imi tebe Rom kayaak imi ogok kemin tinum telela dosa uta ko
Luk 7:1-10
5Kale bole Yesus iyo no abiip Kapeneam kutam iinata; Rom kasel imi waasi dinan-kalin tinum imi kamok kugol nin iyo atam-nalata, bogobe-nala e, 6“Nugum kabaa. Niyo dong dogopne a. Nimi ogok kemin tinum iyo magal fagaa kubelu yaan kuso niil mo-nalata, kaal fuyap kup utam-nalata, am abiin kal alba o,” agela e, 7bole tam Yesus isiik bogobe-nala e, “Niyo kapsino no-nilita, telela dolan-temi o,” agela e minte, 8-9waasi dinan-kalin tinum imi kamok iyo bogobe-nala e, “Umbae. Niyo fengmin tinum kale, kamogim kabo kamtamo no nimi am uyo unon-temaali kale, nagal nalami dubom imi weng tinangkamin tinum e minte, niyo waasi dinan-kalin tinum ilimi kup wan handret (100) imi kamok tiin molin no kale, niyo tinum maak bogobe-nili, ‘Unaal o,’ agelan-temi uyo, unon-tema e minte, tinum maak bogobe-nili, ‘Talaal o,’ agelan-temi uyo, tolon-tema e minte, nalami ogok kemin tinum iyo bogobe-nili, ‘Kanupmin ogok bota kemal o,’ agelan-temi uyo, ogok boyo keman-tema no kale ulutap, kabo titil so kale, weng uta kup bogolapta, nimi ogok kemin tinum yang nimi am alba beyo tambalanak o,” agela ko.
10Kale Yesus iyo weng boyo tinangku-nala e, kumang mo fupkela katop fen unang tinum ilami miit tem albip iyo bogobe-nala e, “Niyo weng uyo dam bogobelan-temi kale, tinangku-silipta. Israel kasel ko age Juda kasel imi aget fugun-bom-nilip, ‘Nuyo God imi man iyo kalbup o,’ agan-nuubip kuta, niyo iyo maak atamita, beyo nitamata, Yesus iyo tii alugum kuguup uyo kanubelan-tema kalaa agan-be kalaa age atamsaali kale minte; Rom kayaak keta atin ki nitamata, Yesus beyo tii weng uta kup bogolata, nimi ogok kemin tinum mafak bom yang am alba beyo tambalanan-tema kalaa age-nalata, tal bogopnela kale, bemi nimi ilak dugamin uyo kwiin kiim keluta minte, alugum Juda kasel imi nimi ilak dugamin uyo kubaganu ko. 11Niyo weng maak bogobelan-temi kale, tinangku-silipta. Alugum kafin kaa kutufosu komi unang tinum kaal kaal kwiin tagang iyo tala tala ke-nilipta, (Juda kasel iip maak maak kup sino kwego dego ke-nilipta,) no God imi abiip kugol God ilami man aligaap ke-nilipta, yang numi afaligal Abraham sino imi man Aisak sino imi man ilop Jekop sino ton-nilipta, iman unan-bom deng tebeman-temip ko. 12Kale minte Juda kasel kwiin tagang, ‘Nuyo God imi man iyo kalbup o,’ agan-nuubip bilip iyo no God imi abiip unon agin kuta, iyo no God imi abiip uyo unon-temaalip kale, uk kugan ko-nilipta, utamipta e, God iyo tebe nuyo umik ugobe-nala e, imdala mitam sep katam kal albup kalaa age-nilipta, ‘Kwiin bo so kubo,’ agon-temip kale, bilip iyo kaal fuyap uyo utam ilimi kaal kalan uyo ameman-temip o,” age-nala e minte, 13fupkela waasi dinan-kalin tinum imi kamok imi bogobe-nala e, “Kabo utamapta e, aafen beyo telela dolan-tema kalaa nagebap kalaa age-nilita, telela doli kale, no-nalapta, am kal atamal o,” agela ko.
Kamaa weng uta baga-em-sala e, kota waasi dinan-kalin tinum imi kamok imi ogok kemin tinum iyo tambalana ko.
Yesus tebe Fita imi alol telela kola bam daasu uta ko
Mak 1:29-31; Luk 4:38-39
14Kale bole Yesus iyo daage no Fita imi am no abomu, Fita imi alol uyo kaal mimin tebebelu mafak umo-bom bet diim kal albu kalaa age-nala e, 15imi sagaal uyo kwep yak bomi sagaal diim melebelata, umi kaal mimin uyo binimanepmu e, fen mitam Yesus ninggil imi iman uyo telela kobelu ko.
Yesus imi unang tinum kwiin tagang telela imosa uta ko
Mak 1:32-34; Luk 4:40-41
16Kale ataan uyo, tem iinon o agan-sulu e, (God imi ifin am uyo binimanu kalaa age-nilipta,) abiip kasel iyo unang tinum kwiin tagang sinik mafak tebe ifak daasu iyo kulep Yesus imi finang tal tamip e, Yesus iyo tebe sinik mafak iyo weng kobe fot tebela yak iine-bilip e minte, unang tinum mafak ilin iyo alugum telela imola bam daga-bom no kema ko.
17Siin sugayok uyo Yesus iyo tilin-tem bom-balata, profet Aisaya iyo Yesus imi sang uyo God imi suuk kon tem uyo dola ko bogo-nala e, “Nuyo mafak umo betanupta, ita tebe-nalata, telela imola o,” age dola ko-se kale, Yesus iyo boyo kanubelata, tam Aisaya imi weng boyo tol mitam ti-suu ko.
Tinum maak tebe, Yesus imi okumop man kelum o agesip uta ko
Luk 9:57-60
18Kale Yesus iyo itamata e, unang tinum kwiin tagang iyo falala namolip kalaa age imi okumop man iyo bogobe-nala e, “Unip ninggil nuyo tam bot tem ton-nulupta, daage yak ok muk umi milii kutam iinum o,” agela e, 19unum o agan-silipta, tam ulo utamsa tinum maak iyo tal Yesus imi bogobe-nala e, “God imi weng kafalemin kabaa. Kabo dogap dogap tiinemap uyo, niyo kapsino tiineman-temi o,” agela e, 20Yesus iyo imi weng uyo yan kebe-nala e, bogola, “Sep kayaam ko age dungkiil iyo dungfil tem kal sina-bala e minte, uun yagal ilami um tem kal sina-bala no kem-nuubip kale minte, Mo Tibil imi Man nita fen nalami am sinamin am binim kale, kapkal aget uyo tele fugunolal a. Kabo niso kanube tiineman o agan-balap bele ki?” agela ko.
21Kale tam tinum maak Yesus imi umik tem talan-be iyo bogobela, “Kamogim kabaa. Kamaki uyo nimkalap no-nilita, nimi aatum iyo tiin mo-sili kaana kalaa age-nilita bole, dep no duba-nilita, kota talta kapso tiinemum o,” agela e, 22Yesus iyo imi weng uyo yan kebe-nala e, “Waago. Kabo unemin ba kale, kupkaa meng nimi okumop man ke-nalapta o ageta ko. Tinum dok ita, nimi daang begepnelaalup o agan-bilip bilip ita felepmuta, ipkumal kaanip iyo kulep no kubamin (kale minte, kapta no unang tinum iyo God imi weng uyo baga-e-balapta, iyo God imi ilak do-nilipta, mitam God imi man keta suun nin unang tinum kelin) o,” agela ko.
Yesus tebe dulul bogobela binimansu uta ko
Mak 4:35-41; Luk 8:22-25
23Kale Yesus so ilami okumop man so ninggil iyo tam bot tem ton-nilip e, daaginip ko. 24Kale ninggil iyo abe-bom-nilip e, ok muk afaligen kale, unanbu yak ok mat iip kuunip e, dulul kiim maak tebe maak fagaa mitam abuta, ok uyo fogo kulalu, te tam bot tem uyo dongenan o agan-bo kuta, Yesus iyo amin bom-balata, 25imi okumop man iyo no dufo-nilip e, bogobe-nilip e, “Kamogim kabaa. Nuyo mep so anolu kaanum o angbup kale, fen dong dogobelapta, waalanum o,” agelip e, 26Yesus isiik tebe bogobe-nala e, “Ibo utamipta e, kamogim beyo nusino alba koyo, nuyo abiin tambal tonbup kalaa age-nimip ba kale minte, ibo, intaben o age-nilipta, ok umi atul uyo finan-bilip o?” age-nala e, kota fen-nala e, dulul sino ok sino uyo bogobe-nala e, “Dulul sino ok sino kubo sining agelal o,” agela e, kota dulul sino ok sino uyo sining age binimanu ko.
27Ninggil alugum iyo utamipta e, dulul sino ok sino uyo imi weng uta kup tolong do sining agelu kalaa age-nilip e, kota kumang mo bogobina tala ke-bom-nilip e, tam bogolip, “Keyo dogonupmin tinum ita tebe-nalata, weng uta kup bagam-salata, dulul sino ok sino uyo imi weng uta kup tolong do binimanu o?” agelip ko.
Yesus tebe tinum alop maak sinik mafak tebe ifak daasip imi telela imosa uta ko
Mak 5:1-17; Luk 8:26-37
28Kale Yesus sino e minte ilami okumop man sino iyo bot tem ilep unanbu yak ok muk umi milii Gadara kasel imi anang kutam iinip ko. Kale ninggil iyo yak tamip e, tam tinum alop maak begel ilet tem ko age tuum tem kal nuubip kale, tal Yesus imi diim abu molip ko. Kale siin kota sinik mafak tebe tinum alop bilip iyo ifak daasip kale, alop bilip iyo atul kup taban-bilipta, unang tinum iyo imi atul uyo finan-bom-nilipta, begel ilet tem bomi mep sino ilep uyo unan-nuubaalip ko. 29Kale tinum alop bilip iyo Yesus iyo atam-nilip e, fomtuup atul faga-bom bogobe-nilip e, “God imi Man kabaa. Kabo, nuyo intaben nubelan o age-nalapta, talap a? God imi yegemin am uyo daan mitam tilin-tem bom-bulu talap koyo, nuyo kaal fuyap afek kobelan o ageta talap aga? Boyo kanu-emin ba o,” agelip ko.
30Kale minte ninggil ilimi mobip umi keng ilo boyo kong kwiin tagang maak buk fagan-bom albip kale, 31kota tam sinik mafak tinum alop bilip imi iibak tem albip iyo Yesus imi fomtuup daga-nilip e, “Nuyo fot tebelan o agelap umdii, fot tebelapta, tinum kalip iyo imka-nulupta, yak kong bilip imi tilin tem iinum o,” agelip e, 32Yesus iyo bogobela, “Kalo. Imkaa unin o,” agela e, kota sinik mafak iyo tinum alop iyo imka-nilip e, yak kong imi tilin tem unip e, kota kong iyo alugum ilum ilum ke-nilip e, yuut ilok dup-kalaak mo unanbu daak Galili kumun tem kulaak iinom-nilip e, ok tebe mimilepmu kaanip ko.
33Kale tam kong tiin molin tinum igil utamipta e, kong iyo kanube kaanip kalaa age-nilip e, yuut bilii no abiip miton no-nilip e, alugum unang tinum iyo kong sang uyo bogobe-nilip e minte, tinum alop siin sinik mafak tebe ifak daasip imi sang uyo bogobe no kelip e, 34kota unang tinum iyo weng uyo tinangku-nilip e, alugum iyo abiip uyo kupkaa daage Yesus imi finang no atamum o age no atam-nilip e, weng uyo fomtuup kobe-nilip e, “Gadara kasel numi anang koyo kupka-nalap daaginaal o,” agan-kalip ko.
Okuqokiwe okwamanje:
Matyu 8: tlf
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1988, Wycliffe Bible Translators, Inc. All rights reserved.
