Zlr 28
28
Ghunafta Izak ta Yakubu da Lavaŋ
1Ka hgaftá Izak ta Yakubu, ka tfanaghatá tsi ta wi, mnanafha ta skwi ŋa magay ni kazlay na: « Yaha ka da klaftá makwa la Kanʼana. 2Sliʼaf sliʼa, da Padaŋ Aram da Betwel da ni ma ma gha. Makwa la hada dzaʼa ka klay ŋa marakw, makwa Lavaŋ zwaŋama ni ma ma gha. 3Ka tfaghagha tfa Lazglafta ta Mbruta ta wi, ka vlaghata tsi ta zwani nda ndəgha, ka nuta ka ka dzidza gwagwata ndəghata mndəra mnduha. 4Ka tfanaghata tsi ta wi ta zivira gha manda ŋa Abraham, ŋa nzakwa na haɗik ta nzakw ka mida ka mayəm na ka ŋa gha. Tsa haɗik ya vlaŋ Lazglafta ta Abraham ya, » kaʼa. 5Ka ghunaghatá Izak ta Yakubu da Padaŋ Aram da Lavaŋ zwaŋa Betwel mnda la Aram. Lavaŋ ná, zwaŋama ni ma Rebeka, ma ni ma i Yakubu nda Ghesav ya.
6Kəʼa ka Ghesav nghadapta tfanagha tfa Izak ta wi ta Yakubu, ka ghunaghatá tsi guli da Padaŋ Aram, ŋa klaftá marakw hada. Kəʼa kəʼa nghadapta ma tfanaghata ni ta wi guli, ka mnanaftá tsi kazlay na: « Yaha ka da klaftá makwa la Kanʼana, » kaʼa. 7Kəʼa kəʼa nghadapta guli, sna sna Yakubu ta gwaɗa i da ni nda ma ni, sliʼaf sliʼa Yakubu guli ka laghwi da Padaŋ Aram. 8Mantsa tama, ka nghadaptá Ghesav kazlay na, zɗəgana a kwagha la Kanʼana ta da ni Izak wu kəʼa. 9Ka sliʼaftá Ghesav ka laghu slanaghatá Yismaghel, zwaŋa Abraham. Ka klaftá tsi ta makwa ni Mahalat makuma ni ma Nevayut. Ka nzakw tsi ka markwa taŋ kawadaga nda tsaha ga taŋ ya.
Betel, həga Lazglafta
10Ka sliʼaftá Yakubu ma Bəʼerseva ŋa dzaʼa da Haraŋ. 11Ka ɓhadaghatá tsi da sana vli ka han tsi hada, kabga dɗanaghata fitik. Ka klaftá tsi ta sana pala ma tsa vli ya ka fata ŋa fa ghəŋa ni ka hanatá tsi hada. 12Ka fanaghata suni. Ka nghaŋtá tsi ta madzəɓara daga ta haɗik dikw ka lafi da ksaŋtá luwa. Ka nghaŋtá tsi ta duhwalha Lazglafta ta laf ya laha, ta saha ya laha tida. 13Ka sladanavatá Yawe ta vata ni, kaʼa nda tsi mantsa: « Iʼi Yawe, Lazglafta Abraham ta nzakway ka da gha, Lazglafta Izak. Nana haɗik hana ka tida na ná, dzaʼa vlagha vla yu ta kagha nda zivira gha tani. 14Manda tusakata rgitika haɗik dzaʼa nzakwa zivira gha. Dzaʼa ndəghanaf ndəgha ka ta vli sliʼafta ni nda təv dɗakwa fitik dikw nda ma mndəra luwa, sliʼafta ni nda ga mazlay dikw nda ga maghura. Nda ma kagha, nda ya ma zivira gha, dzaʼa tfanaghata yu ta wi ta inda mndəra mndu ta haɗik. 15Iʼi ná, kawadaga yu nda kagha. Dzaʼa nghay yu ta kagha ma inda vli ta dzaʼa ka. Dzaʼa vraghak vra yu ta na haɗik na, kabga haɗ yu dza zlaghata wu, katək na dzaʼa maga gha maga yu ta inda skwi ya taghaf yu ta imi ta sləməŋ, » kaʼa.
16Ka sliʼavatá Yakubu ta hani, kaʼa mantsa: « Kahwathwata, mamu Yawe hadna, si sna a yu wu! » kaʼa. 17Ka ksaftá zləŋ, kaʼa mantsa: « Vla ga zləŋ ŋa mndu na vli na, haɗ sana skwi wu, həga Lazglafta ya, wa tgha laf ta luwa ya, » kaʼa. 18Ka sliʼaftá Yakubu ta hani wrək sərɗək, ka klaftá tsa pala si kəl tsi ka faftá ghəŋa ni tida ya ka dzugwata, ka pghagatá rɗi ta bɗəma#28:18 Pghagatá rɗi ta bɗəma ni ná, tsaya fata ka vla tsəlɓu ŋa Lazglafta. ni. 19Ka hgə Yakubu ta tsa vli ya ka Betel#28:19 Betel nda gwaɗa Hebru ná, tsaya həga Lazglafta.. Ghalya ná, Luz si ta hga lu ta tsa vli ya. 20Ka waɗatá Yakubu, kaʼa mantsa: « Ka kawadaga Lazglafta nda iʼi, ka pghaf pgha tsi ta iʼi ɗughwana ma mbaɗa ɗa ta tvi, ka vliha vla tsi ta skwi ŋa zay, nda lgut ŋa suɗavata ɗa ta vgha, 21ka vradaghata yu ɗughwana da da ɗa katsi, mantsa tama, dzaʼa nzakway Yawe ka Lazglafta ɗa. 22Nana pala klaf yu ka dzugwata na ná, dzaʼa nzakway ka həga Lazglafta. Dzaʼa vlaŋ vla yu ta zaka inda skwi dzaʼa vlihata tsi, » kaʼa.
Okuqokiwe okwamanje:
Zlr 28: xed
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.