Matyu 9
9
Yisu gilgum amol ti ebe gigas gimat be va tis bage dubi giru bingbleng ok be vie vukuri
1Yisu tis ane singamolomb-gen ile ipil as ei-vovo vukuri be ilumul ile ipil bui tavlu ane vukuri, be ile imbielk ve ei ate ane nam roro. 2Be amolmol nangge nam dabe etok inggas amol ti ebe gigas gimat be va tis bage dubi giru bingbleng ok giwei ane yemb be itangi Yisu ile. Yisu gili eisir as aplos givin ei, beti ginei gitangi amol gimat nok be ginei, “Natum. Aplom bunam bwaya, ve miam gen tiate ebe gulgum ok ande ayeu gasin gikwai.” 3Be gidung subu ebe emb Mose ane yaun dabin ok iute be inei ve isate, “Amol etenik wat ve nilgum molok nile Pomate me?” 4Bemem Yisu ande gitpweng yaun ete eisir tas gitung be inei ve is ate ok are gikwai beti ginei gitangi eisir be ginei; 5“Ginei ayeu nanei ve yaun ge nitangi amol gimat etenik be nanei, ‘Umdil be uvwat am yemb be uvang,’ bemem awangg yaun etok ano ma, atob ayeu mai-mayangg ano-ngge. Bemem ginei ayeu nanei; ‘Ande ayeu gasin miam gen tiate gikwai,’ be awangg yaun etok ano gile ite, okob atob ayeu mai-mayangg ite. Ve amolmol gitangi ebe atob indi gen etok ane ano be inatpweng are ok ite ma. 6Bemem ayeu tangg givin ganei yem unatpweng yaun eteik are vevie kob. Pomate Natu ayeu ebe meng-gahland weik amolmol ok angg gwangne gitangi ebe ve nasin amolmol as tiate nikwai nangge nalk etenik ok.” Bekob Yisu ginei gitangi amol gimat etok be ginei, “Umdil be uvwat am yem be uvang am nam ane.” 7Amol gimat etok gimdil be givwat ane yemb be givang ane nam ane. 8Amolmol ili gen etok be ikuri vunungge love yaun ok ma be avos givwat Pomate are ve ebe geb ane gwangne dang dang-etok gitangi amolmol.
Yisu gital Matai
9Yisu tis ane singamolomb-gen ikwai taku etok be ivang ve ile be Yisu gili amol ti ebe geb kulkul takes ane ok, are Matai gibweg ane nam aplo kulk ane. Be Yisu ginei gitangi ei, “Unme be uvang mul ve ayeu.” Matai gimdil be gitau gile Yisu.
10Givin sawa ti Yisu tis ane singamolomb-gen en ben nangge Matai nok ane nam be amolmol subu ebe emb kulkul takes ane be iyo iyo amolmol be inggas as mone subu sinsin-ge givin ok be tis amolmol tiate ane subu ile be en ben ivin Yisu tis ane singamolomb-gen. 11Be amolmol subu nangge Parisai ili be ile iutani Yisu ane singamolomb-gen be inei, “Nam-nambed be yem aim gidung gen ben givin amolmol ebe emb kulkul takes ane be iyo iyo amolmol be inggas as mone subu singsin-ge givin ok, be tis eisir tiate ane bambamo etok?” 12Yisu giute Parisai as yaun etok be giwel eisir avos be ginei, “Amolmol ebe utlas vie ok itangi amol marasin ane ile ite ma, eisir ebe tis gimat ok ge ete ivang itangi amol marasin ane ile. 13Unde be unatlo Pomate ane yaun (ebe warik ane amol ebe ginei ei avo ok, ginei ok vevie be undi kob). Ayeu tag givin ve ganei yem unemb da ge nitangi ayeu ite, bemem ayeu tag givin ganei yem tangg-aim viti ve aim ate be unambweg vie-ngge. Ayeu ganme ve amolmol vie ane ge ite ma, ayeu ganme ve amolmol tiate ane givin.
Yaun ebe ve tan-yamar ben ve miengk ane ok
14Be givin sawa etok ge Jon ane singamolomb-gen itangi Yisu ile be iutani ei be inei; “Nam-nambed be amei tis parisai ayamar ben givin as-mate subu be as miengk be miam singamolomb-gen ilgum ite. 15Yisu giwel eisir avos be ginei, “Ginei ayeu nambweg navin angg amolmol-gen atob eisir aplos bunam ite bemem ginei ayeu navang nakwai eisir, kob atob aplos bunam be atob inen ben ite. 16Amol ti gitangi ebe nivwat waingg mwanggane ti be nidgin ane ei-vovo vaku ti ok ite. Ginei ei nilgum, atob ngal niyuki ei-vovo nok okob atob waingg niti-titip kob atob ei-vovo nile nitav gielk. 17Be amol ti gitav nam vaku ti be gitak ark mwanggane gireu ane nam vaku etok ite. Ginei ei nilgum dang etok okob atob ur tis wavin nilgum be ark muanggane etok niti-titip kob atob ur nisov nam aplo. Tanemb gen vaku isgabu kob atob isgabu ge niengk vie.”
Yisu gilgum Juda as amol bamo ti are Jairus natu avie be tis avie ebe bage gile Yisu ane kup ge ok, be utlas vie vukuri
18Yisu ginei yaun gitangi amolmol givang, be amol ti ebe geb lum mateu ane dabin ok ginme be giro vandubi supwe gisov nalk gitangi Ei be ginei, “Ayeu natungg avie ande gimat vunu gikwai bemem ayeu tag givin ganei mie nunme be nutak bagem niwei ei veik matawe vukuri.” 19Yisu tis ane singamolomb-gen imdil be itau ile amol bamo nok be tepwe ile. 20Be avie ti ebe gigas avie as gimat be giengk dang etok gitangi Sonda bamo 12 ok, gile gibloblo Yisu dume be bage gile Yisu ane kup ge, 21be ta gitung dang etok ginei, “Ginei ayeu baingg niwei Yisu utle ulis me ane kup ge, okob etok gitangi ebe atob nilgum be ayeu utlangg vie vukuri ok.” 22Yisu giro na vukir be gili avie nok bekob ginei, “Avie natu. Aplom bunam bwaya, mie aplom givin beti gilgum be utlem vie vukuri.” Be seukie-ngge avie nok utle vie vukuri.
23Yisu tis ane singamolomb-gen imbielk ve amol bamo galkok ane nam be Yisu gili ebe amolmol ilgum tangir be es uye be avos bambamo-ngge ok, 24be ginei, “Unde unahlang unkwai! Avie natu etnok gimat vunu ite, etenok ei matano giengk beti giengk.” Be amolmol tepwengge imalk be inei yaun ungglus ungglus gipil Yisu.
25Amolmol tepwengge ile ihlang ikwai kob Yisu gisov nam aplo gile be geb avie natu nok gibweg bage be seukie-ngge avie natu matawe be gimdil vukuri. 26Be gen etok ane binge givang geb taku walang ok avut.
Yisu gilgum amol ailu ebe matanos bop ok be vie
27Yisu gikwai taku etok be givang ve gile be amol ailu itau ile ei, sulu ailu nok matanos bop ge isgabu. Be gabu ital yaun avos bamo-ngge gitangi Yisu, be inei, “Devit ane dani mie, tam viti ve eilu ma.” 28Yisu gisov nam aplo gile gibweg bekob ete amolmol subu inggas matanos bop ailu nok itangi ei ile. Be Yisu ginei gitangi sulu be ginei, “Yemlu aplongg-aim givin unei atob ayeu nalgum yemlu matanongg-aim be vie vukuri me ma?” Be sulu inei, “Amol Bamo, eilu aplongg-amei givin.” 29Beti Yisu gitak bage giwei sulu matanos be ginei; “Yemlu aplongg-aim givin ayeu beti atob gen ebe gabu tangg-aim givin ve un-gas ok atob ano nile.” 30Beti gabu matanos ponge be ili taku. Be Yisu geb yaun gwangne molge gitangi sulu be gine, “Gabu undi ge! Unei gen etenik ginge nitangi amolmol be inaute bwaya.” 31Bemem sulu ile be inei Yisu ane binge gitangi amolmol nangge taku etok be nangge taku subu givin.
Yisu gilgum amol avo ma ti ebe ginei yaun ite ok be ginei yaun vusa
32Yisu tis ane singamolomb-gen ivang ve ile be amolmol subu inggas amol ti ebe ngalau tiate gilgum be gitangi ve ninei yaun ite ok, itangi Yisu ile. 33Yisu gitin ngalau tiate etok be gile gihlang gikwai amol nok bekob ete ginei yaun vusa. Amolmol tepwengge ili be ilat bais be inei, “Eitit tali gen bamo ti dang etenik nangge Israel ite molge.” 34Bemem amolmol subu nangge Parisai inei, “Ei gitin ngalau tiate etok ve ngalau tiates as amol bamo ebe geb eisir dabin ok ane gwangen.”
Yisu ta viti ve amolmol
35Yisu givang geb taku etok avut, be gibul amolmol nangge as lum mateu ane aplo gitang-tangi ge, be ginei yaun ebe Pomate ve nemb amolmol dabin ok lavo lavo gitangi eisir. 36Be gilgum amolmol ebe inggas gimat walang ano ok utlas vie vukuri, be ta viti ve eisir ano-ngge ve gili ebe eisir aplos bunam be imbweg vie ite molge, weik bwelk ebe tivie ma ok. 37Be ginei gitangi ane singamolomb-gen be ginei, “Um etenik ande ane ben gipasang ate gikwai bemem amolmol ebe ve inro ben sut ok aitol ge. 38Dang etok be yem unes miengk be unau-tani um tivie veik nihlin ane amolmol kulkul ane subu inme be inro ane ben ano sut nisov ane nam ben ano ane nile.”
Okuqokiwe okwamanje:
Matyu 9: kbm
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1984, Wycliffe Bible Translators, Inc. All rights reserved.
