Matthew 3
3
John Baptist di nirausi rena ago
(Mk 1.1–8; Lk 3.1–20; Jn 1.19–28)
1Mirona ituari#3.1 Mirona ituari: Iesu bi ini nono babasa Nazareth ri amegamori. John Baptist yaku Judea di gagani autu sanari okisi ago nirausi resi niyo, 2“Yi vegu no feresi moi etagae rifa, adina Sei ini vava nufa omari ourefeidena amena sana bi negau niyo!”#Mt 4.17; Mk 1.15 3Mina bi amiye kaere Sei di ago niyo amiye Isaiah yaku ina rofu makai niyo:#Is 40.3
“Amiye yokoi di goroka bi gagani autu sanari raka nido,
‘Varika amiye di ida dogo resi
ini dibo ida moi rorobo rifa!’ ”
4Ye John di varuka bi kamelo di ueta ma ini gagaba ukita maena bi boromakau di ro. Ini iruku bi kaufa ma kaoro di ona.#2 Kgs 1.8 5Kamini Jerusalem vene ma Judea gagani tora noibanu vene ma Jordan koru adinari gagani tau vakoi vene tau ina rofu baegamadi. 6Ye ini vegu no niogau regamadi ma Jordan koruri babatiso regamo.
7Idu John yaku Pharisee vene ma Sadducee vene tau ina rofu babatiso reyainedi baegamadi mina vegasa ina vene rofu niyo, “Ya bi aruma di mida mida kana—kaere yaku ya niyo, ‘Sei di gubuyo baego mina rofu ori diyaganedi’?#Mt 12.34; 23.33 8Mina dada vegu no feresi moi etagae rina vegu iniye yabo meko rama rena kana moi ogau rifa. 9Ma ya kaya nigi ga mokefa, ‘Abraham bi uni tutubena.’ Adina ya vene rofu nida, Sei ina diba mina fore dudu Abraham di tutubena rigo!#Jn 8.33 10Sei bi yabo meko buni de varededi bi nu makusi ita fafau you bogo. Viro bi yabo daruri sena aeyadi ma yabo neinei meko buni de varededi bi nu makusi ita fafau you bogedi.#Mt 7.19 11Na yaku yi vegu no feresi moi etagae rigi koru dudu ya babatiso reida, idu na usi baego amiye ini vava yaku nai vava ebu reyo, ye na bi rorobo de ini yuka ro nurugida. Ina bi Vima kikifa ma ita dudu ya babatiso rego. 12Ini witi fotaka utei resi koka rena di fodiya bi ini vanari moi gira resi ini rama bi dobeka gutuna makusi yareyo mina ini yavari aego, idu ini sanika bi kafena de itari ori kamu rego.”#3.12 Mina bi muro amiye yaku ini witi butu regasa moimai regamo kana.
Iesu babatiso reyo
(Mk 1.9–11; Lk 3.21–22)
13Mirona ituari Iesu Galilee gutuna Jordan koruri baeyo John yaku babatiso marainedi. 14John nivaigika niyo, “Ya yaku na babatiso regiya bi buni, idu ya bi na rofu baeyo!”
15Idu Iesu yaku nikabai reyo, “Ya eyouneida ye gua bi ya nida kana re. Mina ida dudu Sei di mokena rorobo tau gade bi moi rama aegifa.” Ye John yaku yo niyo.
16Iesu babatiso maro ma evade koru ideri gutuna bae iruruka resi ne reyori, bi oma ekeyo ma Sei di Vima bi pune erena kana desi ina fafau rou riyo mina veyo. 17Ma goroka yokoi oma gutuna degasa niyo, “Mina bi nai uka maida mida, kaere bi ina rofu ada tora gade reida.”#Gen 22.2; Ps 2.7; Is 42.1; Mt 12.18; 17.5; Mk 1.11; Lk 9.35
Okuqokiwe okwamanje:
Matthew 3: kqc
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2016, Wycliffe Bible Translators, Inc. All rights reserved.
