Amavesi eBhayibheli adumile avela kokuthi Iruka 13

Dlulisela

Pyno waku ehãꞌãg kahato mekewat okenꞌypy hãpyk takat yt iwato i rakat puo eweihytꞌok. Tukupteꞌen wyti aru iꞌatu rakaria wehytꞌok neran haria maꞌato yt teꞌeruwehytꞌok kuap i katupono miꞌiria meiũran aru areke e haria motꞌi hawyi yt teꞌeruwehytꞌok kuap i okenꞌypy kaꞌiwat toꞌokenhypꞌok taꞌyn pote.

Miꞌi tote toineꞌen wẽtup ok haryporia ahiag ipiit piat rakat itote. Iꞌahuu kahato 18 anu raꞌyn. Tohoꞌopot kahato katupono ahiag mimoꞌahuu toineꞌen. Iꞌoktũꞌã kahato hap wywo tohoꞌopot ahiag minug. Iesui tehaꞌat miꞌi haryporia kape hawyi toikay kay tuwewawi. Miꞌi hawyi toꞌe tope -Mana atipok taꞌyn epoꞌi poꞌi hap ahiag minug e. Pyno mana e eꞌahuu hap epoꞌi poꞌi hap epoꞌi poꞌi hap atiporop taꞌyn e.

Miꞌi hawyi tuweponug hawyi iꞌoktũꞌã hap meremo tokosap taꞌyn. Waku hawyi haryporia toꞌe tehay wepiit kahato hap wywo -Waku kahato En Tupana e.

Uiꞌywania e eipe ti Tupana ehay kuap yian miat haria eweikupteꞌen maꞌato o iraniaꞌin ywania yt uwe mikuap mo i rakaria wyti aru tuwehytꞌok eheꞌyian me aikope Tupana toineꞌen morekuatno hap tote. Miꞌi hawyi iwatꞌyptia iꞌatuwatꞌypmo eweihytꞌok e Iesui toꞌywania Iuteuria pe.

Miꞌi hap eꞌat pe aru mekewaria -Ereꞌokenhypꞌok to Mimi ereꞌokenhypꞌok to Uhyt iꞌatuꞌe motꞌi kahato getap kaꞌiwat pe wen maꞌato miꞌi ti -U paĩ yt worohoꞌokuap i eipe aikope pyi eweiõꞌẽ e iꞌatuepe aru. Areꞌokenhypꞌok taꞌyn e Iesui.

Maꞌato pywo pe areꞌe ehepe miꞌiria yt poꞌog i Ierusarẽi yt naku i nug haria kai. Taꞌi eiperia iꞌewyte eweipap katupono yt paa eweiꞌe hin i eiminug saꞌag hap koꞌi kai. Miꞌi kaipyi ti eikuꞌuro hap topyhuꞌat yt uimohey i haria wo eweikupteꞌen pote e Iesui tomohey hap pun haria pe.

Miꞌi hawyi wyti aru toiꞌatuwesat -Pywo pe ti rat areꞌe yt atikuap hin i eiperia e. Eweiwat ro uiꞌyatypepyi paĩ katupono yt atikuap I aikope pyi eweiꞌõꞌẽ. Yt nakuaria i eiperia e okenꞌypy apykok hat wehytꞌok neran haria pe e Iesui.

Miꞌi hawyi poꞌog Iesui henoi teran iãꞌãkap wuo maꞌato saꞌawyꞌi apo e iꞌatuepe -Aikotã som Tupana topyhuꞌat Miitꞌin Porekuat no hap ete apo e. -Pyno ahetama pe toineꞌen iãꞌỹi kurin kahato rakat aimiꞌu mosẽꞌẽ hap Mutata iãꞌỹi watoꞌe. Miꞌi ti kurin kahato wen maꞌato wẽtup ok tikoi toko pe hawyi hẽtyt hawyi meiũran iꞌyp ywaiti kahato raꞌyn ariaꞌyp sese ewy wo raꞌyn toineꞌen. Miꞌi hawyi iꞌyp hãikupy pe weitaria teꞌeruwesoknug naꞌyn iꞌyhop koꞌi og muo. Miꞌi hap ewy ti Tupana topyhuꞌat Morekuat no mesuwat yi tote Mutata iãꞌỹi mikoi hap ewy e Iesui tomimuꞌeria pe.