Amavesi eBhayibheli adumile avela kokuthi ULÚKU 14

Dlulisela

“Ɔ̄cɛ dúúmā nōo wā ɛgiyí um í gáā wɛ ɔyíkpó kú um glá ŋ́, ń táafú ŋ́ n he ɔ́ ɔtū fíyɛ́ ádā nū mɛ́mla ɛ́nɛ́ nū, mɛ́mla ɔnyā nū mɛ́mla ayí nū mɛ́mla ayínɛ́ nū nɔ̄nyīlɔ mɛ́mla anú abɔ̄yī nū dúú.

Ɔ̄cɛ dúúmā nōó je ɔcóōnyɔ́kpá kú nū ce ɔkɔ kóō yɛce um ŋ́, í gáā wɛ ɔyíkpó kú um glá ŋ́.

Ohígbū ka ɔ̄cɛ dúúmā nōo lɛ iyī nū je gicō nɛ̄hi, Ɔwɔicō géē tá ɔ̄ wāajɛ. Ɛjɛ̄ɛ̄jī ācɛ dóódu nēe tá iyī uwā wāajɛ ā, Ɔwɔicō géē lɛ uwá pīya ācɛ ocɛgba nɛ̄hi.”

Ujísɔ̄si le ɛlā kú nū ŋmɛ́yí yɔ̄ ī ka kahíníī, “Ɔ̄cɛ dúúmā ká aá í gáā wɛ ɔyíkpó kú um glá ŋ́, ń taafu ŋ́ ó habɔ̄ odúúdú ɔdā nōó lɛ ā tá.

Ɔ́dāŋ ka ɔ̄cɛ dúúmā gáā gwó inu, ó gē má cīce cɛ́ɛ́ ó gē lɛ ɔdā nōó gáā ŋmó tū ɔ̄ ā jé gbɔbū, ó yá ɛ́ɛ́ kóō le jé ɔ́dāŋ ka ije nōó lɛ ā gwó inu ā glá. Ɔ́dāŋ ka ó yá lɛ ā ŋ́, ekōhī ŋ́ ó géē lɔfú lɛ ikpínu ā táajɛ anɔ́ɔ ó le má ka anúɔ í gwó inu ā kwɛyí glá gɛ ŋ́ má. Ɔ́dāŋ ka ɛnyā í yá lɛ ā, ɛjɛ̄ɛ̄jī ācɛ nēe má ɔdā nōó yá ā géē yá ɔ̄cɛ ɔ́ɔmā okónu. ‘Ācɛ géē ka kahíníī, ‘Ɔnyīlɔ nyā gbɔɔ́ ō gwó inu, amáŋ ó gwó ɔ̄ gaajɛ glá gɛ ŋ́.’

Eko nɛ̄ aá lɛ ucɛ yá klɛ́ɛcɛ, lɛ ācogbɛhá, ācodɔgwu ajɛ, aócīkpó mɛ́mla aópeyī hīgwú. Cɛ́ɛ́ eko nɛ̄ Ɔwɔicō géē je ācɛ nēe lɛyítáajɛ lɛ ɔ́ ā héyī ŋmá olekwu, ó géē hɔ́hā ce uwɔ ohígbū ka aá lɛ óluma tū ācɛ nēé má ɔdā dúúmā le cíla óluma nɛ̄ aá tū uwā ā ŋ́ mā ā.

Ɔmā lɔhi amáŋ ɔ́dāŋ nɛ̄ ɔmā í lɔnyɛ ɔmā gɛ ŋ́, ó lɛ ɔwɛ dúúmā nɛ̄ ɔ̄cɛ lɔfú yá ɔ̄ kóō lɔnyɛ ɔmā ɔhá ɛ́ɛ́ gɛ ŋ́. Ó lɔhi nɛ̄ ɔ̄cɛ ī pīya tū ipú ajɛ ɛhɔ̄ ŋ́ mā ā, ɛ́ɛ́ nōó kē tīile ō cē klá ɛyétutulu ŋ́. Ācɛ í cē ɔ̄ bónū icííci. Aá jāhɔ̄, ɔ́dāŋ ka aá lɛ ahɔ̄ ō bī pó ɛlā.