Ejagham - 1996 Edition (NT)

Ejagham New Testament © Bible Society of Nigeria and Bible Society of Cameroon, 1996.

Ntûfâm Tiyofirus,
Ane etî-etî á nok kpe-eji sê á sêŋ jə́t na jə́t nji é fábhe ka echəme ejə́ré ta ka éməné. Á seŋ iyîm mbi ane mba á rî ta ka eróghá-ndə́p á yéne na amə̂t, á səre êt. Ane mbá á chə́bhe ágbán ka otîp Obhasi. Ka obhô mbí, ń ko ebhú, ḿ kpi iyîm mbí ekpak nji í fábhe ta ka eróghá-ndə́p. Ń kere mân bəre é rî nono se ń séŋ fə́ne jə́t na jə́t ń túm mbâ eya. Ń woma bəre ó mə́ŋe se iyîm chénchén mbi á kpíi wâ í rî ka echî.

Ka ebhú ntûfâm nnyo á kamá se Erot a fiî otúi Judiya, nkara-agore Obhasi yót a ri a kamá se Sakariya. Sakariya a ri ka ekam akará-agore Obhasi nji á bhíŋa sê Abija. A fôn nkáé owe a kamá se Erisabet. Erisabet fə́ne a dʉ ka ndə́p-i-njû akará-agore Obhasi. Obhasi a kô ekpin í Sakariya na nkáé se é rî ka nnyen-i-mbá. Á kîk ebhín Obhasi, akôp á bhó fon. Kən kpe mmon á ká fon, ka Erisabet a ri ngum. Chénchén ábho fə́ne á kui kpe-eji.
Akará-agore Obhasi ebhú áji á rî ka nkam ka nkam. Á yíma etûm ábho ka ókʉ́rí achot Obhasi ka ebhú ka ebhú. Ebhú ekam í Sakariya é bhâ sî. Ka erû ábho, atem-akará-agore á kí tup ebháŋé kən á sáŋ nkara-agore yót sê a yo ejûm énoê egyʉ ka eji Obhasi. Nji á túbhi, é kam se Sakariya. Sakariya a jî gyê mân ka ókʉ́rí achot Obhasi se yê a yo ejûm egyʉ njí. Ekam ane Obhasi chénchén é kə̂t ngá ka éré ókʉ́rí mbí ka ebhú njí, á gorá Obhasi.
Nji Sakariya á yok ejûm egyʉ njí ka eji Obhasi, énjel a fâp chak, a gyími mkpe obhô-orûm eji njí. Ebhú Sakariya a yéne yê, a nîk, efup é súi yê biji. Kən énjel nnyó a sə́re yê se, “Sakariya, ka fûp, Obhasi a yûk agore amâ. Nkáé owa Erisabet tîk a kô oya a jî mmon i ndûm nnyo o kí kak yê mbiŋ se Jon. Tîk o gyébhe ḿbə́ŋé kpe-eji ebhú á ji mmon nnyó. Ane etî-etî fə́ne tîk á fôn ekpatə́m ogyebhá-ḿbə́ŋé. Mmon nnyó tîk a jóe ekpatə́m í nne ka ochî Ńtâ Obhasi. Ka ekpin ejê, deê yê a kâ gwô kpe aməm mát mma sonóm. Ta ka ofú mbi á kí ji yê, Ntʉgantʉ Obhasi tîk a jóe na yê. Tîk mmon nnyó a yîm ane Isrel etî-etî á chə́bhe njəm mbâ Ńtâ Obhasi ábho. Tîk yê a râŋ mbá na ikom mfi Ntʉgantʉ Obhasi, noŋ nkara-otîp Obhasi ebhú áji nnyo á kamá se Erayija. Ntûfâm tîk a bhák mbá-njəm. Ka obhô mmon nnyó, abhon na ásé tîk á kpô fon ekone. Tîk mmon nnyó a yîm ane mba á kí ku atûŋ ka nchot Obhasi, á kpî oməŋá-ejûm mbi ó kí toŋe ábho ekpin ka nnyen-i-mbá. Tîk mmon nnyó a sû ane Ńtâ Obhasi a kî se Ntûfâm a bhá ko ábho.”
Kən Sakariya a bhə̂p énjel nnyó se, “N kí yim nan ḿ mə́ŋe bəre nchot eya nnyí a ri ka echî? Ó məŋe se mme na nkáé omé é kui é chiŋ nji e kí kpo ji abhon.”
Énjel a táme yê se, “Mme a ri Gabriya nnyo ń kumá na Obhasi. Yê nâ a túmi ə̂m se ḿ bá sə́ré wâ otîp ogyebhá-ḿbə́ŋé mbí. Ebhú é si, nchot nnyí a kí fap ka ekpak nji n tíbhi nná. A ri ka eji ó ka kam na nchot amé, o kí gbo ochí ta ofú ó sî mbi nchot i nchane a kí fap.”
Nji achot mmá á fábha áno, ane mba á rî ngá ka éré á chighá, á kí bhəp ḿbə́ŋé echî nji Sakariya á kərá kpe-eji. Kən nji Sakariya a fábhe, nchot á ro kpó chot. Ane á mə́ŋe mân sê a yên ejûm ágo ka etím ókʉ́rí. Sakariya a kə̂t mân a chorá na abhô, na nnyo a nyə̂m ochot.
Nji Sakariya a jeghê etûm ejê ka ókʉ́rí achot Obhasi, a chə́bhe njəm ka njû eye. Kpe é ká ka, nkáé owe Erisabet a kô fə́ne oya. É kâ nnyam-ósô érôn, Erisabet á ka fáp éré. Nkáé owe a chôt se, “Ń kup Ńtâ Obhasi kpe-eji nji a nyáŋe ə̂m ka ekpak njí. A yíghi ə̂m eré ka amə̂t atem-ane.”

Nji Erisabet a ri na oya ka nnyam-ósô eságasá, Obhasi a tûm énjel owe Gabriya ka ebhat í Gariri ka eték nji é káma sê Nasaret. A túmi yê na otîp mbâ nsop yót a kamá Meri. Meri a ri nne-nkáé nnyo nne-ndûm yót a kamá Jusep a gyée a kó. Jusep a dʉ ndə́p-i-njû ńsé ane-atəm nnyo á bhíŋa sê Debhit.
Nji a bháe mbâ Meri, a kûp yê se, “N kí kup wâ. Obhasi a ri na we. A tóŋe wâ ekpatə́m onobhá-eji.”
Nji a chorê ejûm njí, Meri a chíri ka ḿbə́ŋé. A róghe ekérém echî ntʉ́ghi ekûp njí. Kən énjel nnyó a kpô chot na yê se, “Meri, ka fûp. Obhasi a tóŋe wâ onobhá-eji obhê. Tîk o kô oya, o jî mmon i ndûm. Mbiŋ eye a kí kam se Jisos. Mmon nnyó tîk a jóe ekpatə́m í nne, á bhiŋá yê sê Mmon Obhasi ósô. Ńtâ Obhasi a kí yim mmon nnyó a joé ekpatə́m í ntûfâm ekpak éməné ńsé owe Debhit a joê. Tîk mmon nnyó a jóe ekpatə́m í ntûfâm mbâ abhon í ndə́p-i-njû Jakop ta ótúm-ótúm. Tîk otúi obhê ó bhó fon ntə̂m.”
Meri a bhə̂p yê se, “Tîk nchot nnyí a yîm nan a jóe ka ekpak njí, mme nne-ndûm ń ka məŋé kpá?”
Énjel nnyó a táme se, “Obhasi Ebhare Ntʉgantʉ tîk a bhák mbâ eya, a bhúi wâ na ikom Obhasi ósô. Ka obhô mbí, tîk á bhîŋ mmon nnyo sê Mmon Obhasi. Yê á bhó fon ekpin akôp. Ane á səre sê mmon-i-nnyen owa, Erisabet, a rô kpó ji mmon. Kən məŋê se na okúí obhê, oya Erisabet ó sî nnyam-ósô eságasá, ka kpe ejûm jə́t nji Obhasi á bhó məŋé oyim cháŋ.”
Nji énjel nnyó a chorê áno, Meri a táme se, “Obhasi nâ a fonê ə̂m. Deê é fáp na mme ka ekpak nji o chorê áno.” Énjel a mághe mân a jak.

Ka ngyím ányi, Meri a tʉ́ri biji a yə̂p a jak ejen ebhat eték agúí-ágúi etat ebhat í Judiya. Nji a síi ágo, a sʉ́i ka njû Sakariya, a yên Erisabet, a kûp yê. Ebhú Erisabet a yúghi ekûp í Meri, mmon nnyo a ri yê ka oya a chêm ajaré, ikom Obhasi Ebhare Ntʉgantʉ í bhak Erisabet ka biji. Erisabet a gyʉ́i se, “Enare nji Obhasi a karê wâ é chiŋi nji ane-akáé chénchén. Deê enare njí é jóe fə́ne na mmon nnyo a ri wâ ka oya. É yími nan kən ejûm eyúp njí é kí fap na mme? Jen kən nnyen i Ńtâ Obhasi omé a kə́ bha ejen mbâ amé? Ta nji n yúghi ekûp ejâ, mmon nnyo a ri ə̂m ka oya a nyə̂p na ogyebhá-ḿbə́ŋé. Ka etʉri, ogyebhá-ḿbə́ŋé obhâ ó faŋ ó chiŋ, ka o kamê se otîp mbi Ńtâ Obhasi a sə́re wâ ó rî ka echî.”

Meri a fâk mân ekôn se,
“Ḿbə́ŋé amé a kí yubhí Obhasi,
Ntʉgantʉ omé a fôn ogyebhá-ḿbə́ŋé kpe-eji
ka obhô Obhasi nnyo a kí yim ə̂m n sêm ka obhí.
Echî aŋ? Obhasi a tît ə̂m ka ḿgbán owe,
ejûm ń ka fáp.
É róghé ka égyé,
ngun tîk á bhiŋá ə̂m sê
Ogyebhá-ḿbə́ŋé,
ka ekpatə́m ejûm nji Ńtâ Obhasi
a yimî a káre ə̂m.
Mbiŋ eye a fâŋ a chíŋi ochíŋ.
Ka nyâ na nyâ, Obhasi a kí righâ nsôn
mbâ ane mba á jígha yê.
Á tona ndûm obhô eye ka eji,
a chât ekam ane mba á yúŋa biji,
a bhíbhi nji-nji á tíma.
Á yighá akpatə́m atúi-ofâm ka bikumi ábho,
a kô ane mba kpe ejûm á ká fap a yîm atúi-ofâm.
Á kará onono mbâ ane mba á rî ka eket,
a tûm ane mba á fóne ofon á kʉra abhô-ábhô.
A yîm ejûm nji a chimî mbâ ásé abhə́ré éməné.
A bhâ nyáŋe abhon Isrel, ágbán abhê.
Á ka gyiní nsôn eriím mbâ Abraham
na biyábhé-abhon abhê ka ótúm-ótúm.”
Meri a kâ na Erisabet ejûm noŋ nnyam-ósô ésá a chə́bhe mân njəm.

Nji mfín a síi, Erisabet a bhâ jî fə́ne mmon i nne-ndûm. Nji ane Erisabet na akpírá-njû abhê á yúghi ekpatə́m onobhá-eji mbi Ńtâ Obhasi a tóŋe na yê, á gyébhe ḿbə́ŋé kpe-eji.
Ka osúí mfín eníganî nnyi Erisabet a jíi mmon owe, á kîm yê nkîm. Á síghi yê okak mbiŋ nnyi ńsé owe Sakariya, kən Erisabet a sə́re ábho se, “Ée, mbiŋ i mmon a ri Jon.”
Kən ane á bhə̂p yê sê, “Nnyi sê Jon a dʉ fə́ne fan? Ntʉ́ghi mbiŋ ányi kpe njəm eya, kpe njəm ndûm owa cháŋ.”
Á yîm eriŋ mbâ ńsé sê a sə́ré ekpak nji a kí bhiŋ mmon owe. Sakariya a chôt ka abhô se á kó ekpághé-nwet á bhá yê a séŋ. Á káre yê, a sêŋ se mbiŋ i mmon á kamá se Jon. Ane chénchén mba á rî áfo á kêt. Ka ngyím ányi, Sakariya a róghe nchot echoróm, a kará ekûp na ejík mbâ Obhasi. Efup é gyê akpírá-njû abhê kpe-eji. Esə́re njí é jên é jábhe nték agúí nnyi Judiya chénchén. Kpe énê nnyo a yúghi nchot nnyí, á kâm sê ikom Obhasi í rî na mmon ányo. Á bhəbha mân se, “Mmon nnyó á bhak ojoé bhaghé ekpak í nne ka nsi?”

Nji ikom Obhasi Ebhare Ntʉgantʉ í súi Sakariya nnyo ńsé Jon ka biji, a chôt noŋ nkara-otîp Obhasi se,
“Ane Isrel,
deê é káre ejík mbâ Ńtâ Obhasi owəré,
ka yê a bháe a bhá nyaŋe ane abhê á mân ka osʉ́ŋ.
A káre êt ekpatə́m í nne
se a bhá yim êt é sém.
Nne nnyó a dʉ ka ndə́p-i-njû
nnyi Debhit nnyo ḿgbán owe.
Éməné Obhasi a chôt ka nnyo akará-otîp abhê se,
‘Ń chimi bəre tîk n yîm ên o sêm
ka obhô ane-ebhan abhə́né,
o sêm ên fə́ne ka ikom ane
mba á ká wom sê á yén ên na amə̂t.’
A chorê se yê tîk a rî nsôn na ane-atəm abhə́ré.
Á bhó gyiní ńgyímí mfê eye na ábho.
A chími ńsé owəré Abraham se,
Tîk yê a yíghi êt ka obhô ane-ebhan abhə́ré,
a yîm e kâ fôn efup ebhú e kí tʉk yê.
Se ekpin ejə́ré é jóe ka nnyen-i-mbá,
kpe akôp e kâ fôn
ka ochî obhê ka ekpin ejə́ré ndə́m.
We mmon omé, Jon,
tîk á bhîŋ wâ sê nkara-otîp Obhasi ósô,
ka tîk o râŋ mbá o jî tʉ́ri mbá
nnyi Ńtâ Obhasi a kí chiŋ.
Mbá nnyí etʉrʉ́m a ri se, o kí səre ane abhê se
ntûfâm tîk a rî ábho nsôn ka obhí ábho,
a yîm ábho á sém.
Obhasi owəré a ri Obhasi nnyo nyamḿ, Obhasi nnyo nsôn,
tîk a yîm onono mbi ó rî ka esémém ka achot obhí
ó gbô êt noŋ ebhát.
Onono mbí tîk ó dʉ̂ ka ósô ó gbô mbâ ane chénchén
mba á rî ka ejírim nji ekʉ̂.
Onono mbí tîk ó tʉ̂ êt mbá e fôn enare Obhasi.”
Mfín a chíŋá a jak, mmon nnyó a kúá ka biji na ḿbə́ŋé. Ekumi ejê a ri ka etə́m, a chighá ofú mbi yê a kí toŋe biji mbâ ane Isrel.

Lalela Luk, echî 1