Zapotec, Miahuatlán New Testament (MX:zam:Zapotec, Miahuatlán)

Zapotec, Miahuatlán

Ngolo mdoodi's Jesús ryete di's co' mdoodi's Jesús, Jesús ngua que tee par ned le'n yèezya' che'n làaz mèn galile tac ya indlya'ste Jesús ya que tee Jesús par ned le'n yèezya' che'n làaz mèn jude. Non Jesús le' mèn co' nac mèn gulàaz che'n làaz mèn jude mblya's nguthxù' Jesús. Le'pe' le'n huiza nde zin gax lni co' ngòc thìb lni co' ndli mèn nación Israel. Lnia ngro' lèe lni che'n ramad. Sya, ndxab myen' huespe' Jesús loo Jesús:
―Gro' trè'. Más huen huàa par ned le'n rye yèezya' che'n làaz mèn jude par hui' mèn co' nqueltàa con lùu tya loo con' co' ndlil. Tac nec thìb mèn co' ndli thìb con', ne'lide mèn con'a xexte. Tac co'se' ndlya's mèn libe' taamas mèn mèna, ndxàal li mèn con' co' ndli mèna loo xnaa. Ya que ndlil chol yalguzye' co' nac yalguzye' roo yalguzye' xèn, huàa li yalguzye' co' ndlil loo xnaa par neda, ne, par ñèe mèna ñeene' ché' tala's mèn tya loo con' ndlil.
Tataa ndxab myen' huespe' Jesús loo Jesús tac axta ne' myen'a indxela'ste loo Jesús no loo con' ndli Jesús. Sya, ndxab Jesús loo myen' huespe' Jesús:
―Tarte zin huiz no tarte zin tiemp co'se' lu'pe'en daa chó nac daa loo mèn. Per part cón che'n gu', aa guneei coyora huenque' naca par gu' co'se' lu' gu' mod co' ndxàp gu' loo mèn. Part cón che'n gu', yende mod yòo xyàn lezo' mèn izlyo' ñèe mèn izlyo' gu'. Per ndxe'leque', part cón chenen, mèn izlyo' ndxòoque' xyàn lezo' ñèe mèn izlyo' daa tac daa nda cuent loo mèn izlyo' le' ryete con' ndli mèna nac con' ye'rsin'. Huàa gu' lni. Per daa ne'gade lni nalle' tac tarte tyaa huiz no tiemp co'se' lu'pe'en daa loo mèn chó nac daa.
Ngolo tataa ndxab Jesús di'sa loo myen' huespe' Jesús, mbyan' Jesús le'n yèezya' che'n làaz mèn galile.

Per co'se' ndale' myen' huespe' Jesús lnia, mxen Jesús ned. Nda Jesús lnia, ne. Per ne'nglu' loode Jesús loo mèn loo xnaa. Ndxe'leque', xexte mque tee Jesús làth mèn huiz lnia. Le' mèngool co' ñibe', no co' ndyoo ner, no co' ndyoo naa loo mèn nación Israel na, mèna mque tee cua'n Jesús làth mèn huiz lnia. No mbez mèna loo xtàa mèna:
―¿Pá ned ngue tee mbi'a, yey? ¿Chonon iñèede na' mbi'?
No làth rye mèn co' ngua lnia, anze'f thìb mèn mdoodi's cón che'n Jesús. Ndxep mèn mbez:
―Mbi'a nac mbi' ndac.
Per taandxep mèn mbez:
―Pà gàc mbi'a mbi' ndac. Ndxe'leque', nquedìi mbi'a mèn.
Per yende chó mèn ngli ryes ndoodi's cón che'n Jesús loo xnaaleque' tac nzyeb mèna ñèe mèna mèngool co' ñibe', no co' ndyoo ner, no co' ndyoo naa loo mèn nación Israel.
Co'se' ngrolthe ndxàc lnia, syare' ngòo Jesús le'n templ. Mtlo Jesús, mblu' Jesús mèn le'n templ. Sya, rye mèngool co' ñibe', no co' ndyoo ner, no co' ndyoo naa loo mèn nación Israel ante mbui' no ante gunaa cón che'n di's co' mblu' Jesús loo mèn le'n templ. No mbez mèna loo xtàa mèn:
―¿Xá mod ndxác mbi' ba' huax con' co' ndlu' mbi' ba' loo mèn? Non na' le' mbi' ba' thidtene ne'nglide stud. ¿Cón tub yác mbi' ba'?
Jesús mcàb loo mèna. Ndxab Jesús:
―Cón che'n con' co' ngue lu'en loo gu' ndxè', inacte con' ndxè' cón chenen. Ndxe'leque', nac con' ngue lu'en loo gu' ndxè' cón che'n xa' co' mtel' daa loo izlyo' ndxè'. Chele' chó mèn ndlya's li xal ndlya's Diox no xal nee lezo' Diox, leque mèn ta' cuent no ten' mèn le'n lezo' mèn ché' nac di's co' ngue lu'en ndxè' cón che'n Diox o ché' naca di's co' ndyoodizen co' alithe ndlin xtùuz xalque' ndye'th xtùuz yéquen. Le' mèn co' ndyoodi's xal ndye'th xtùuz yéc mèn, mèna tataa ndli par leque xtàa mèn li con' guryath no con' guryèn loo mèna. Per mbi' co' más ndxòo yéc gàc con' guryath no con' guryèn loo Diox co' mtel' mbi', mbi'a ndlu' di's co' nac lìcpe' no yende chó yalgutyè' gác mbi' li mbi'.
¿Ché' ilìcte naca le' Moisés mtan' di's co' nac ley loo gu', cà'? Mastale' mtan' Moisés di's co' nac ley loo gu', per nec thìb gu' indyubdi'ste xal mbez di's co' nac ley. Chele' di's co' ngue bezen loo gu' ndxè' ilìcte nac, ¿chonon ncua'n gu' mod guthxù' gu' daa, sya?
Sya, mcàb mèna loo Jesús. Ndxab mèna:
―Aa. Nquée mbii yécl, ndee. ¿Chó mèn ncua'n mod guthxù' mèn lùu, à'?
Jesús ndxab loo mèna:
―Por mblin thìb con' huiz sabd co' nac huiz descans, con'a ndli ante ngüi' gu' no ante ñaa gu' loon, ¿lé'? Lìcpe' ba'i, Moisés mda' yalnibe' che'n circuncisión loo gu' mastale' ne'ngàcte yub Moisés co' mtlo mbli circuncidar mèn. Ndxe'leque', xudgool Moisés nerleque' ngòc mèn co' mbli circuncidar mèn. Por cona, gu', ne, ndli circuncidar myen'bi' bix. No yende chó mport nzo lezo' gu' mastale' huiz sabd co' nac huiz descans ndli gu'i. Cona, ngue niin loo gu': Chele' xtàa gu' ndxàc circuncidar huiz sabd co' nac huiz descans par tyubdi's gu' loo ley co' mxo'f Moisés loo gu', ¿chonon ndxecloo gu' ñèe gu' daa tac mteyaquen thìb mbi' huiz sabd co' nac huiz descans, sya? Ne'tub rezte gu' cón chenen por cón che'n mbi' co' gunèe gu' mteyaquen huiz sabd co' nac huiz descans xal ndub rez gu' cón che'n thìb mèn co' ndli con' ye'rsin' huiz sabd. Más huen, nalì no nambìi li gu' xtùuz no bla's gu' loo ley co' mxo'f Moisés loo mèn par ñee gu' ñeene' ché' lé' nac co' mblin loo mbi' co' mteyaquen par ta' gu' cuent co' huenleque', huenque' mblin loo mbi'.

Látha ngo ndxep mèn co'te' ngo Jesús, mèn co' ngo ban le'n ciuda Jerusalén. Mtlo mèna, mnibdi's mèna loo xtàa mèn:
―¿Ché' inacte mbi' ba' mbi' co' ngue tee cua'n mèn par guth mèn mbi', cà'? Hui' gu' nexa. Mbi' ba' alanleque' ndyoodi's loo xnaa. No yende chó mbezte mèn loo mbi'. Ne'stolque', lìcque', no mèn co' ñibe' loo na', no co' ndyoo ner, no co' ndyoo naa loo na' ndxela's, ne, le' mbi' ba' nac Crist. Per na' nonque' no nanee na' pá mèn mbi' ba'. Per ndxe'leque', co'se' yi'th Crist, yende chó mèn ñee pá ned ryo' tee ryo' yáal Crist, ndyac na', ¿lé'?
Per co'se' mbìn Jesús tataa nzi nii mèna làth ngue lu' Jesús mèn le'n templ, cabii ndxab Jesús loo mèna:
―Aa. Lìcque', ndlibe' gu' daa. No ndyac gu' naneeque' gu' pá mèn daa. Daa ne'ngalte xal nee lezon. Ndxe'leque', daa ndal loo izlyo' ndxè' xalque' mtel' thìb xa' daa, xa' co' naban thidtene co' nac yub Diox. Per ¡pà libe' gu' xa'a! Per daa ndlibe'pe' xa' co' mtel' daa tac loo xa' ngro'en. No mtel' xa' daa.
Sya, mblya's mèna nghue' mèna Jesús xal ndxe' mèn thìb pres par guth mèn Jesús. Per nec thìb mèna ne'nglide ryes nden mèna Jesús tac tarte zin tiemp co'se' ta' Diox lugar tetìi mèn Jesús. Per mastale' tataa mblya's mèn li no mèn Jesús, huax mèn ngola's loo Jesús. Mèna ndxab loo xtàa mèn:
―¿Xá nee gu'? Co'se' yi'th Crist, ¿ché' tli Crist más yalguzye' leque co' ndli mbi' ba', cà'?

Mèn xley' farise mbìn xal nac di's co' nzi toodi's mèn xexte cón che'n Jesús. Sya, mqueltàa mèna con mèn co' nac jef che'n nguley' co' más ñibe' loo nguley' tiempa par mtel' mèna myen' nac zin' par ya myen' nac zin' le'n templ par ya tenxù' myen' Jesús par hue' myen' Jesús loo mèna. Sya, ndxab Jesús loo myen' nac zin' co' nde tenxù' Jesús:
―Be' go non gu' taapláte huiz. No yiloa beren, biin loo xa' co' mtel' daa. Gu' cua'n daa yiloa. Per ya ne'zyál'te gu' daa tac gu' ne'gácte yòo co'te' gòon.
Le' sya, mèn co' ñibe', no co' ndyoo ner, no co' ndyoo naa loo mèn nación Israel, mèna mnibdi's loo xtàa mèna:
―¿Pá ned ya mbi' ba'? ¿Chonon mbez mbi' ne'gácte na' zyál' na' mbi'? ¿Ché' ta mbi' loo mèn nación Israel co' nzi tee re's làth mèn nación Grieg par ya lu' mbi' mèn nación Israela tya no sanglu' mbi' mèn nación Grieg, ne, cà'? Pà yila's na'i. Lomisque' ne, ¿cón nee di's co' ngolo gunee mbi' loo na' ba' co' nee mbi': Gu' cua'n daa. Per ne'zyál'te gu' daa tac gu' ne'gácte yòo co'te' gòon?

Per huiz co' ngòc huiz merpe' huiz lni, huiza Jesús ngo too loo mèn. No mtetac Jesús thìb di's loo mèn. Cabii ndxab Jesús:
―Chele' chol gu' ndryo' ndlyen' lezo' yòo gu' loo cón chenen xal mèn co' ndxec lezo' par gu mèn nít, yi'th gu' loon no daa li yo nagàl lezo' gu' loo cón che'n Diox xal mèn co' mbyec tín' lezo' no ngu mèn nít par nagàl yo lezo' mèn. Mèn co' ndxela's loon xalque' mbez di's co' ndub loo libr co' nac xti's Diox, loo mèna li Xpii Natú' le' mèna li huax con' ndac loo xtàa mèna xal ndxàc con' ndac loo mèn co'se' ndli zin' mèn nít co' nzo'f thìb yó'be' par gàca le' xtàa mèna yòo ban noque' Diox thidtene, ne.
Tataa ndxab Jesús loo mèna par mda' Jesús cuent cón che'n Xpii Natú' co' yòo loo mèn co' yila's loo Jesús. Le'n huiza tarte lyàa Xpii Natú' loo mèn tac Jesús tarte yáp loo bé' par gàc con' roo no con' xèn loo Jesús loo bé'.

Le' sya, ndxep mèn co' ngo làth mèn co' ngure yòn di'sa ndxab:
―Lìcpe' ba'i, mbi' ba' nac thìb mbi' co' nde'th di's co' ndxab Diox co' ndxath yi'th.
Taandxep mèn mbez:
―Mbi' ba' nac Crist.
Per taandxep mèn mbez:
―¿Xá mod ndlya's gu' le' Crist nac mèn che'n thìb yèezya' che'n làaz mèn galile, yey? Loo libr co' nac xti's Diox mbez le' Crist gàc bin che'n David co' ngòc rey póla. No gàc Crist xa' yèezpe' Belén co' nac leque yèez co' ngòc liz no làaz David.
No ale por conate ngòc chop ned mèn. Làtha, ngo ndxep mèn co' mblya's ndenxù' Jesús. Per yende chó mèn co' nzo tya ngli ryes nden Jesús.

Co'se' mbere myen' nac zin' co' nquenap templ, ndye'th myen' ngua myen' loo Jesús, loo mèn xley' farise, no loo jef che'n nguley' co' más ñibe' loo nguley' tiempa, ndxab mèn xley' farise no mèn co' ngòc jef che'n nguley' co' más ñibe' loo nguley' loo myen':
―¿Chonon ne'ngye'th node gu' mbi'a, à'?
Myen' nac zin' mcàb loo mèna. Ndxab myen':
―Nu' ndyac thidteneque' yende chó mèn nzo co' ndyoodi's xal ndyoodi's mbi'a, cara.
Sya, mcàb mèn co' ngòc mèn xley' farise loo myen' nac zin'a:
―¿Ché' no gu' mbla' mquedìi mbi'a gu', ne, cà'? ¿Ché' yende pá ñee gu' ne'stolque' ngo ndxep mèn co' nac jef che'n nguley' no chol mèn co' nac mèn xley' farise co' ngola's di's co' ndyoodi's mbi'a, à'? Per mèn co' nziri' go co' inda'de cuent no co' ne'ñeede co' ndxab di's co' ndub loo ley co' mxo'f Moisés loo mèn, mandit mèn ba' too ze no too yál' tac ndxela's mèn ba' di's co' ndyoodi's mbi'.
Ndoole' Nicodem co' ngua loo Jesús thìb yál', co' ngòc mèn xley' farise, ndxab loo mèna:
―Hui' gu' nexa. Loo ley na' ndlu' indxàalte tetìi na' thìb mbi' co'se' tarte ñee na' no non na' xá nac xquin mbi' co' mbli mbi'.
Sya, mcàb mèna loo Nicodem. Ndxab mèna:
―¿Ché' no luu nac mèn yèezya' che'n làaz mèn galile, ne, cà'? Bral no bla's co' huen huen loo libr co' nac xti's Diox. Sya, ñeel no ta'l cuent le' le'n yèezya' co' nac ned làaz mèn galile, yende pá mbez loo libr ryo' tee ryo' yáal thìb mbi' co' nde'th di's co' ndxab Diox.

Ngoloa, thìb thìb mèna mxen ned, ndyàa mèna par liz mèn.

Lalela SAN JUAN 7