Traducción bíblica: Toba © Sociedad Bíblica de Argentina, 2012 Grabación de Toba ℗ 2017 Hosanna

Toba Qom - 2012 Edition (NT) Non Drama

Toba Qom - 2012 Edition (NT) Drama

Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.

Qaq saxanaqcaua caua seis na'axa'te da iviteuga so naponaxac maye le'enaxat Lapascua. Nache So Jesús taỹa ye Betania yem netaña so Lázaro som qaltaq nca'alaxatec co'ollaxa Somaye. Nache qaỹo'ot so nallec da qaique'elec So Jesús. Nache aso Marta huetac, qaq so Lázaro ỹalectauo da lquia'axaua So Jesús. Nache aso María maye lqaỹa't soomaye, asomaye ndouo so ivi' na medio litro na coraxat maye le'enaxat nardo. Somaye ỹataqta late'erai añi lasheue, nache icoreleguete naua lapia'ate So Jesús. Ime, nache deqaxaỹaqtaxana na laue. Qaq 'enauac se'eso nỹec ỹataqta ỹe'eguelaxaigui na laita so coraxat. Nache so Judas Iscariote, som 'oonolec soua lapaxaguenataqa So Jesús maye taỹa'a da ỹaneuo So Jesús somaye, 'eeta':
–¿Ta'ainco' ye sa qaimeno' de'era coraxat da ivi' qanqa'en da lashiichiỹaxac caua trescientos na'axa'te da lo'onataxanaxac ca shiỹaxaua, da yaqto' ishet da qaitauan na choxoraqpi?
Qaq so Judas saishet da 'enapec de'era, da souaxat da huo'otaq ichoxoreetac na choxoraqpi, cha'aye somaye choche cachaxaic. Qataq nacheso som ilotague' aso nme anom So Jesús qataq soua lapaxaguenataqa, qalaxaye somaye decachetega naxa anamaye. Nache So Jesús 'enapega so Judas, 'eeta':
–'Aua'axaỹa'a aramaye. Cha'aye aramaye ỹaỹamaxattac co'ollaxa de'era coraxat, da yaqto' lhuotta qom iviteuga ca na'a'q da Aỹem qailareñi. Qami' nache 'eetai' da qoviita'aguet na choxoraqpi; Aỹem, qalaxaye saishet da nache 'eetai' da Aỹem qoviita'aguet.

Qaq ỹataqta qalota na judiopi maye lma' ye Jerusalén, da la'axaỹaxac So Jesús da hueta'a ye Betania. Nache nqo'ona yemaye. Qaq saishet da nachaqsota So Jesús da qaỹauotaique da qanauane', cha'aye nataqa'en so Lázaro som qaltaq nca'alaxatec co'ollaxa Somaye. Nache nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, namayepi detaxaỹapigui co'ollaxa nataqa'en da ỹauotaique da ỹalauat so Lázaro, cha'aye lasouaxashet qanqa'en da chegoqchigui somaye da ỹataqta qalota na judiopi na ca'ai somayepi, nache ỹa'amaqten So Jesús.


Qaq ỹataqta qalota na shiỹaxauapi na mashe nvita ye Jerusalén da ỹalegueua'alo soua na'axa'te maye laloxoqui' da qaiuennate so na'a'q le'enaxat Lapascua. Qaq se'eso lỹa na'a'q, nache qaỹaỹaten So Jesús da mashe nayeetaua'a ye Jerusalén. Nache so shiỹaxauapi, iquesoq ana laue ana chaic, nache qata'aguet So Jesús. Nache ỹa'alaqtalec, 'eeta':
–¡Sho'oxorenaq Ñim Lo'onatac 'Enauacna! ¡Ỹataqta ỹo'oxoraq da llecỹaxac, nam nactaigui da lamaxasoxonaxac Ñim Nataxala'! ¡Ỹataqta ỹo'oxoraq da llecỹaxac nam Lta'a na Israel le'ecpi!
Qaq So Jesús natenalec so 'ashenolec, nache nelec somaye. Qaq 'era da 'eetec da ipacchiguilo dam 'ena'ape naua nanettrañi la'aqtaqa Ñim Lo'onatac 'Enauacna, 'eeta':

Saishet da qayi'i, qami' maye
qoñiitaigui na nỹecpi na Jerusalén;
ña 'aulo'oguet na 'Arta'a,
'ena cha'aguet,
netalec na 'ashena.

Qaq co'ollaq cheta'ague, nache soua lapaxaguenataqa saishet da ỹaỹate'n ca llec de'era. Qalaxaye co'ollaq qaỹata'ague de'era, co'ollaq mashe ime da ileu qataq da nca'alec So Jesús, nache cheta'ague da tachiguilo ye lauel da 'enauac nam qaỹo'otec So Jesús, mashe ỹa'axata'alo co'ollaxa naua nanettrañi la'aqtaqa Ñim Lo'onatac 'Enauacna.
Nache so shiỹaxauapi maye hueta'aguet So Jesús co'ollaq iỹaxaneua'a so Lázaro co'ollaq huetaigui aso huachiqui da nca'alec naqa'en, namayepi ỹa'axattac dam lauanaqchec. Qaq ỹoqo'oye so shiỹaxauapi huaqata'aguet So Jesús, cha'aye ỹaỹaten dam ỹo'ot na'anec maye sa qaỹauanapega. Qalaxaye nam fariseopi maiche detaqtega't, 'eeta':
–Ña qauloỹa Namaye, 'enauac na shiỹaxauapi ca'attague'. Qaq qomi' nagui sa sañoxotaq da huo'o ca so'otaq.

Qaq huo'oi soua ỹalectrauo griego som huetra'a ye Jerusalén da ỹo'oxoren Ñim Lo'onatac 'Enauacna se'esoua na'axa'te maye naponaxaqui' maye le'enaxat Lapascua. Soomaye nqocheneua'a so Felipe, maye lma' ye Betsaida yem huaigui ye 'alhua Galilea. Nache nachoxoreetracot somaye, 'eetra':
–Qomi' 'anqouagueque, qomi' sauoqtaique da ñauanaxai' ca Jesús.
Nache so Felipe jec da da'aqtaxanem so Andrés, nache soomaye je'c da da'aqtaxaarem So Jesús. Nache So Jesús 'enapegalo soomaye, 'eeta':
–Nagui mashe ivita ye laloqo' da 'enauac qaỹaỹaten da negue't cam ỹoqta Shiỹaxaua Llalec. Qaq ỹataqta 'eesa de'era qami' sa'axatema, da aca ala na trigo, da huo'otaq saishet da taigui qanqa'en na 'alhua da yaqto' ileu, nache acamaye qaca aca ala. Qalaxaye acamaye da huo'otaq ileu, nache ỹataqta qalota ana ala da qanqat. Ca ndotec da ỹauotec da maiche nachaalataxac, nache camaye ishet da deqat, qaq cam sa ỹauotec da nachaalataxac nagui da ñaq hueta'a ana 'alhua, nache camaye qaỹaỹamaxat da nachaalataxac da yaqto' chochaq tatec. Qaq da huo'o ca nshetaique da Aỹem do'onataxanot, qaq no'on da Aỹem quegue, qaq ca Aỹem soota'ague, nache camaye nataqa'en hueta'a. Da huo'o ca Aỹem do'onataxanot, nache Ñim Ita'a ỹauo'o qome da llo'oxoyec camaye.

Qaq nagui ỹataqta lta'araic da ñeque'eenaxac, qataq sa saỹaten ca sheetec. Qaq Aỹem huo'o da iyaxa da shenapega Ñim Ita'a da saishet da Aỹem ỹasheneguet de'era ñeque'eenaxac. Qalaxaye Aỹem saishet da sheetec de'era, cha'aye Aỹem ñanaỹa ana 'alhua da so'ot ca 'eetapeguec Ñimaye. Nachaqrata da shenapega Ñimaye, sheeta': «'Am Ita'a ñaq 'auachaxana na shiỹaxauapi da 'ara'añaxac.»
Huaña, nache qaỹa'axaỹa so nvilỹaxac, chemaqot na piguem, 'eeta':
–Mashe sogote da sachaxan da ỹa'añaxac, qalaxaye nagui qaltaq she'eguelaxalec da sachaxan.
Nache nam shiỹaxauapi maye na'axaỹaxaatac, namayepi 'eetega da hua'aqchigui ca nalataxa, qataq huo'o na 'eeta':
–Namaxashec piguem le'ec so ntaxaỹapiguiña Damaye.
Nache So Jesús 'enapego' somayepi, 'eeta':
–Da huo'omshe qaua'aqaỹa se'eso nvilỹaxac; huotaique da qami' itaua'n da yaqto' Aỹem qaua'amaqchiñi. Nagui mashe ivita ye laloqo' da Ñim Lo'onatac 'Enauacna nmit na huetalec ana 'alhua, qataq da ỹamaqauec som damaxasoxonapec ana 'alhua. Qaq qom ivita da Aỹem qaiuaxaneguet ca ñepe'enaxaqui, nache huaña qome, nache so'otec da 'enauac Aỹem qaỹa'amaqten.
Qaq So Jesús co'ollaq 'eetega da qaiuaxaneguet ca npe'enaxaqui, nache ỹa'axattac da 'eetec qome ca l-leuaxa Somaye. Nache na shiỹaxauapi 'enapega Somaye, 'eeta':
–Qomi' saỹatenaq chegoqchigui ana nere maye huetalec na la'aqtacpi Ñim Lo'onatac 'Enauacna da que'eca Lca'aguishec Ñimaye maye qaiuattaique, nache 'eetai' da nca'altauec. Qalaq ¿ta'ainco' ye 'am qonetega da que'eca Shiỹaxaua Llalec, qaiuaxaneguet qome ca npe'enaxaqui? Qaq ¿chaq negue'to' que'eca Shiỹaxaua Llalec?
Nache So Jesús 'enapega somayepi, 'eeta':
–Ñaq cara'acolec da qami' hueta'agueta nam lcoỹaraqte ana 'alhua, qalaxaye sa qaỹaraue'c caua na'axa'te da qami' hueta'agueta. Qaq ỹoqo'oye qauqueuoitapigui' nagui da ñaq huo'o na yo'oqchiguiñi, yaqto' saishet da qami' ique'elaxa't ca napalaxa. Cha'aye cam queuotapigui na napalaxa, camaye saishet da ỹaỹaten cam tata'ague. Qaq nagui da ña qami' hueta'agueta nam chegoqchigui nam yo'oqchiguiñi, nache qaua'amaqchiñi Namaye, yaqto' qami' ishet da qoñiita'am na yo'oqchiguiñi.
Qaq co'ollaq ime de'era 'enapec So Jesús, nache jec da nqañoxocheesop somayepi.

Qaq na'aictaxa da So Jesús ỹataqta qalota na ỹo'ot na'anec maye sa qaỹauanapega da ỹauaachigui naqa'en somayepi, qalaxaye ñaqaiyeta saishet da qaỹa'amaqten Somaye. Qaq ỹataqta ipacchigui dam la'aqtaxanaxac som la'aqtaxanaxanec Ñim Lo'onatac 'Enauacna, le'enaxat Isaías maye, 'eeta':

'Am Ỹataxala',
¿negue'tom ca ishet da ỹa'amaqten da qara'aqtaxanaxac?
Qataq ¿negue'tom ca ỹachaxana da
la'añaxac Ñim Nataxala'?

Qaq ỹoqo'oye nache saishet da huo'o ca da'amqaanataxan. Cha'aye so Isaías nataqa'en ỹiyiñi co'ollaxa da 'eeta':

Ñim Lo'onatac 'Enauacna
ỹo'otec naqa'en namayepi da
sanauaañi qataq ỹataqta qaramchiguilo
naqa'en naua lquiyaqtel,
yaqto' namayepi saishet da
nauaayiñi naua yo'oqchiguilo la'ai'te,
qataq qaica ca ỹaỹaten da lquiyaqteỹaxac,
qataq da saishet da Aỹem ñe'eguelaxa,
da yaqto' ñataren.

Qaq so Isaías 'enapec co'ollaxa de'era, cha'aye souaxat da ỹauaachigui da llo'oxoyec So Jesús. Huaña, nache ỹa'axattac Somaye.
Qalaxaye ñaqaiyeta ỹataqta qalota na judiopi na ỹa'amaqten So Jesús, ivira'a nam ỹataqta 'amaqtaqaicpi. Qalaxaye namayepi saishet da ỹataqta nachaxaata, souaxat da ñe'etega na fariseopi da huo'otaq ỹamaqauec namayepi da huaigui ana napaxaguenaxaquipi, qataq souaxat da namayepi nqopita da maiche ỹo'oxoreetac na 'eeta'am shiỹaxauapi, qaq saishet da ipacapegue' cam llo'oxoyec maye ỹanem Ñim Lo'onatac 'Enauacna.

Nache So Jesús ỹataqta nlamaxaren da detaqa, 'eeta':
–Ca Aỹem ỹa'amaqten, camaye saishet da Nachaqaỹemta da Aỹem ỹa'amaqten, cha'aye nataqa'en Ñim Ita'a maye Aỹem namaq. Qataq ca Aỹem ila'a, camaye nataqa'en ila'a ñim Aỹem namaq. Aỹem maye Aỹem lcoỹaraqte ana 'alhua. Ñanaỹa anamaye, da yaqto' ca Aỹem ỹa'amaqten, nache camaye saishet da huetaigui na napalaxa. Qalaxaye da huo'o ca choche na'axaỹaxaategalo naua ỹa'aqtaqa qalaq saishet da ỹo'o't, qaq saishet da Nachaỹem da so'ot ca nhuaxanaguec camaye, cha'aye Aỹem saishet da ñanaỹa ana 'alhua da sauo'o ca nhuaxanaguec na shiỹaxauapi, nachaqrata da Aỹem ñanac, da yaqto' ñeca'alaxatec namayepi. Qaq ca Aỹem ỹo'otan, qataq saishet da ỹo'o't naua ỹa'aqtaqa, camaye sogote da huo'o qome ñim ỹo'ot ca nhuaxanaguec. Cha'aye naua ỹa'aqtaqa maye ñasaxarec, nachenaua qome naua ỹo'o't ca nhuaxanaguec na shiỹaxauapi ca pa'atec na'a'q. Cha'aye Aỹem nam ỹa'aqtaqa saishet da maiche ñallegoxottela't; cha'aye Ñim Ita'a maye Aỹem namaq, Ñimaye chegoqtot cam ỹa'aqtac qataq cam sapaxaguenataxanec. Qaq Aỹem saỹaten da lamaxasoxonaxac Ñim Ita'a, damaye chegaqaigui da nca'alaxa maye chochaq tatec. Qaq 'era da 'eetec da cam ñasaxauec qalaq nacheca ca Aỹem ỹamaxalec Ñim Ita'a.

Lalela Juan 12