ཉི་བདུད་ཀི་ བར་ཆད་ཕ་ལེ་དེན་གེ་ དམ་པའི་ཐུགས་ཉིད་གི་ ཡི་ཤུ་ས་ཏོང་པ་ག་ཏཱན་ རིག་ཉི་བསྣམས་པ༌ལ། ངམ་བི་ནང་ 40 སག་པུ་ སྨྱུང་གནས་བཞུགས་པ་ཨ་དེན་གེ་ ཡི་ཤུ་གསོལཝ་ཀིད་པ༌ལ། ཉི་བར་ཆད་ཕ་ཁཱན་ རོག་བཞུགས་ས་ག་ཨུན་ཐཱན་ ཞུ་ཝ་ལ་ ནཱན་དཀོན་མཆོག་ག་སྲས་གི་ནེ་ལ་ ཨོ་ཐ་ལུང་བ་ཀི་ ཀེབ་ཏང་རི་ཨ་ཉི་ བཀའ་གནང་ཤོ་དག༌ཉི། དག་པ་ཀབ་ཉི་ ཡི་ཤུ་གི་གསུངས་མ་ལ་

སོ་ངོ་ཤོ་ ཀེབ་ཏང་ཐུར་ག་ཤ་ ཏེན་ཉི་ཆོན་ཅ་མང་གི། དག་པ་ཀབ་ཉི་ དཀོན་མཆོག་ག་ཞལ་གེ་ཤོ་ཁཱན་ གསུང་ཐམས་ཅན་ག་ ཏེན་ཉི་བུ་ཆོན་ཅ་ ཨ་ཉི་

གསུང་རབ་ནང་ཀ་ འབྲི་བ་ཅ་དག༌ཉི།
ཉི་བདུད་ཀི་ ཡི་ཤུ་ ཡ་རུ་ཤ་ལེམ་ག་ མཆོད་ཁང་ག་ཆོ་ཁཱན་ ཐམས་ཅན་གེ་ ཅེན་མུ་ཐུང་ཀ་རིག་བུན་ཐཱན་ ཞུ་ཝ་ལ་ ནཱན་དཀོན་མཆོག་ག་སྲས་གི་ནེ་ལ་ ཨོ་ཐ་གེ་དོང་ལིན་ཅོ། ཧང་ཡ་དག་ནེ་ལ་ ན་ག་ཞབས་ལུང་ཐུང་ཀ་ མ་ཐུང་ཆེན་དག་པ་གི་ དཀོན་མཆོག་གི་ རོ་ཀ་ཞིང་ཁམས་ག་འཐེན་པ་བ་ཀ་ ན་ག་ཀོར་གེ་བཀའ་གནང༌མེ། ཉི་རོག་ཏེ་བ་ཀི་ ནཱན་རོག་ཏེ་བ་ཀ་ ག་དང་ག་དོག་པེ་ཨ་ཉི་ གསུང་རབ་ནང་ཀ་འབྲི་བ་ཅ་ དག༌ཉི།
ཡི་ཤུ་གི་ལན་གནང་ཉི་གསུངས་མ་ལ་ གསུང་རབ་ནང་ཀ་ ཨོ་ཐེན་བུ་འབྲི་བ་ཅ་

ན་ག་གཙོ་བོ་ དཀོན་མཆོག་ག་ ཚེ་མ་གོད་ཅོ་ དག༌ཉི།

ཨོ་ཉ་ཚི་ངེ་ བདུད་ཀི་ ཡི་ཤུ་ཕུ་ཅེན་མུ་ཐུང་ཀ་ རིག་བུན་ཐཱན་ འཛམ་གླིང་ག་རྒྱལ་སྲིད་བ་དང་ ཨོ་ཉ་རྒྱལ་སྲིད་བ་ཀ་ རྒྱུ་ནོར་ལོངས་སྤྱོད་ ཐམས་ཅན་རང་ གེན་མ༌ལ། ཉི་བདུད་ཀི་ རོ་ཀ་ཞུ་ཝ་ལ་ ནཱན་གི་ ཇ་ག་ཕྱག་འཚལ་ཐཱན་ གསོལ་ཝ་ཏབ་ནེ་ལ་ ཨོ་ཐ་བ་ ཐམས་ཅན་རང་ ཇི་གི་ ན་ག་བི་ལེ་དག༌ཉི། ཡི་ཤུ་གི་གསུངས་མ་ལ་ སེ་ཏཱན་ ནཱན་ཨོ་ཐ་གེ་མ་དི་ལམ། ཧང་ཡ་དག་ནེ་ལ་

ནཱན་གི་ ན་ག་གཙོ་བོ་ དཀོན་མཆོག་ག་ གསོལ་ཝ་ཏབ་ཉི་ རོག་ཐུར་ག་ཤ་ ཕྱག་ཞུ་ལེ་ཁེ་ལེ་ ཨ་ཉི་

གསུང་རབ་ག་འབྲི་བ་ཅ་དག༌ཉི།
ཉི་ཤ་ བདུད་ཀི་ ཡི་ཤུ་ཐུབ་ཐ་ཝ༌ལ། ཉི་ཞིང་ཁམས་ག་འཐེན་པ་བ་བྱོན་ཐཱན་ ཡི་ཤུ་ག་ཕྱག་ཞུ་ཝ༌ལ༎

ཡུ་ཧན་ན་ བཙོན་ག་ཙུག་པ་ཅ་དག་ཉི་ ཡི་ཤུ་གི་མཁྱེན་དེན་གེ་ རོ་ཀི་ཡ་ཧུ་དི་ཡ་ ཐུབ་ཐཱན་ཐཱན་ ག་ལིལ་ག་ཏཱན་ བྱོན་མ༌ལ། དག་པ་ཀབ་ཉི་ ནཱས་རཱད་ག་ཏཱན་ བྱོན་མེ་མང་གི་ཝ་ ས་ཆ་ཇ་བུ་ལུན་དང་ ནབ་ཏ་ལི་དག་ཁཱན་ག་ཆོ་ཁཱན་ ཁྲོམ་ཀ་ཕར་ན་ཧུམ་ག་ཏཱན་ བྱོན་མ༌ལ། ཀ་ཕར་ན་ཧུམ་ཤོ་ ག་ལིལ་ག་མཚོ་ར་ག་ཅ་གི་ཝ༌ལ། ལུང་བསྟན་པ་ ཡ་ཤའི་ཡ་གི་གསུངས་ཁཱན་ཁེ་པ་ དེན་ཐ་འགྲུབ་ཕེ་དེན་གེ་ ཇུང་མ་གི་ཝ༌ལ།

ཡར་དཱན་རི་དྲང་ཉ་ལོ་ཀ་ མཚོ་ར་ག་ཆོ་ཁཱན་ ས་ཆ་ཇ་བུ་ལུན་དང་ནབ་ཏ་ལི། ག་ལིལ་ག་ཆོ་ཁཱན་ ཡ་ཧུ་དི་པ་མང་གི་ཁཱན་ སོ་ངོ་བ། མེར་བུ་ནང་ཀ་ཆོ་ཁཱན་ སོ་ངོ་བ་ཀི་ འོད་ཟེར་ཆི་ལུ་ཁེ་པ་ མཇལ་བ༌ཅ། ཉི་ཤི་སྲོག་ག་ཡོང་ཕརའ་ཁ་ཆོ་ཁཱན་ སོ་ངོ་བ་ཀ་དེན་གེ་ འོད་ཟེར་ཤར་བ༌ཅ། དག༌ཉི།

ཨོ་ཉ་གེ་ག་ཏཱན་ ཡི་ཤུ་གི་ གསུང་བཤད་པེ་གོ་ཙུག་ཉི་ གསུངས་མ་ལ་ ན་ཧ་བ་ སྡིག་པ་གེ་ལོག་ཅོ། ཧང་ཡ་དག་ནེ་ལ་ ཞིང་ཁམས་ག་རྒྱལ་སྲིད་ ར་ག་ཏེམ་པ་ཅ་དག༌ཉི༎

ནོང་ཐུར་ ཡི་ཤུ་ ག་ལིལ་ག་ མཚོ་ནེ་མ་གེ་བྱོན་ཅ་ཨ་ཉི་ པ་ཏྲུས་དག་ཉི་ར་ཁཱན་ སི་མོན་དང་ རོ་ཀ་བོ་ཉིང་ ཨན་དྲི་ཡཱས་དག་ཁཱན་ མཚོ་ག་ང་ཅོང་ཚབ་ཉི་ཆོ་ཝ་ག་ རོ་ཀི་གཟིགས་པ༌ལ། ཧང་ཡ་དག་ནེ་ལ་ རོག་ཉིག་ཙིང་ཤོ་ ང་རོ་པ་གི་ཝ་ཆོ་ཝ༌ལ། ཡི་ཤུ་གི་ རོག་ཉིག་ཙིང་ག་གསུངས་མ་ལ་ ཇ་ག་ཚིང་ཚིང་ཨོ་དོ། ཉི་ཇི་གི་ ན་ཆིང་ག་ ང་མང་གི་ཝ་ དཀོན་མཆོག་ག་དེན་གེ་ སོ་ངོ་ཙུང་ཁཱན་ཅོད་པེ་དག༌ཉི། རོག་ཉིག་ཙིང་གི་ ཨོ་ཉ་ཐྲེ་ཀེ་རང་ ཅོང་ཐུབ་ཐཱན་ཐཱན་ ཡི་ཤུ་ག་ཕྱག་ཞུ་ཉི་ དི་ཝ༌ལ།
ཨོ་ཉ་གེ་ ད་སུར་ཇང་ཀིན་ག་བྱོན་དེན་གེ་ ཡ་ཀུབ་དང་ཡུ་ཧན་ན་དག་ཁཱན་ རོག་བོ་ཉིང་ཉིག་ཙིང་ ཨ་པ་ཇབ་དི་ཡ་ཀབ་ཉི་ གྲུ་ག་ལང་ཐཱན་ ཅོང་རེད་ཁཱན་བ་ ཚོག་ཉི་ཆོ་ཝ་ཨ་ཝ་ རོ་ཀི་གཟིགས་པ༌ལ། ཉི་རོ་ཀི་ རོག་ཉིག་ཙིང་རཱན་གནང་མ༌ལ། རོག་ཉིག་ཙིང་གི་ ཨོ་ཉ་ཐྲེ་ཀེ་རང་ ཨ་པ་དང་གྲུ་ཐུབ་ཐཱན་ཐཱན་ རོ་ཀ་ཕྱག་ཞུ་ཉི་ དི་ཝ༌ལ༎

ཡི་ཤུ་གི་ ག་ལིལ་ཐམས་ཅན་ག་ ཡ་ཧུ་དི་པ་ ཆོས་འཛོམས་ཁོན་ཡེ་ཉི་ ཉི་དཀོན་མཆོག་ག་རྒྱལ་སྲིད་ག་ འཐེན་ལེག་པུ་བཤད་ཉི་རང་ བྱོན་མ༌ལ། ཉི་ན་ཚ་མ་འདྲ་ཝ་ཁེ་ཁཱན་བ་དང་ མར་ཁཱན་བ་བུ་ དྲག་ཉི་གནང་མ༌ལ། རོ་ཀ་ཀོར་གེ་ཚང་ཟིང་ཉི་ རྒྱལ་ཁབ་སི་རི་ཡ་ ཐམས་ཅན་རང་ ཆ་པ༌ལ། ཨོ་ཉི་ཨ་དེན་གེ་ ན་ཚ་མ་འདྲ་ཝ་ཁེ་ཉི་མར་ཁཱན་བ་ དྲག་པེ་དེན་གེ་ རྒྱལ་ཁབ་སི་རི་ཡ་གེ་ རོ་ཀ་སྐུན་མདུན་ག་ ཕ་ཝ༌ལ། ལུས་པུ་ངམ་ཁཱན་བ་དང་ དོན་གི་ནོད་ཁཱན་བ་ ཤེན་ན་ཚ་ཁེ་ཁཱན་བ་དང་ ཟ་ན་ཚ་ཁེ་ཁཱན་བ་ ཐམས་ཅན་རང་ རོ་ཀི་དྲག་ཉི་གནང་མ༌ལ། ཨོ་ཉི་ཨ་དེན་གེ་ སོ་ངོ་མང་ཨ་ཉི་ རོ་ཀ་ཕྱག་ཞུ་ཉི་ དི་ཝ༌ལ། ག་ལིལ་ག་སོ་ངོ་བ་དང་ ཁྲོམ་ཆེན་སེ་ག་སོ་ངོ་བ་ ཡ་རུ་ཤ་ལེམ་དང་ ཡ་ཧུ་དི་ཡ་ག་སོ་ངོ་བ་ ཉི་ཡར་དཱན་རི་དྲང་ ཉ་ལོ་ཀ་ཆོ་ཁཱན་སོ་ངོ་བ་ ཆོ་ཝ་གི་ཝ༌ལ༎

Lalela མ་ཏི། 4