Nouveau Testament en langue Gabri Maja du Tchad

Kɔl gɨ da Kumu gɨ Hɨrwa / Gabri Maja

Yen̰ge Parɨsɨn̰an̰əŋ gɨ Jesu na lee gɨ kalaŋ kondɨ na bɨlege ka-aye-cay-tɨbayi, ɗɨn̰ ka-aye-cay-tɨbay Ja̰. Kalaŋ ga ban leege batɛm kalɨn̰ ma, kondɨge ɗɨn̰ kan ga da Ja̰ nee bɨ. Ama leen̰ cɨndi na, Jesu gusi koyi laan̰ kalaŋ batɛm naŋ, na ka-aye-cay-tɨbayi ba leen̰ge kalaŋ batɛm dan̰ te tumɔ toyi. Kɨɗɨn̰ ga Jesu sol gɨ Parɨsɨn̰an̰əŋ jege kɔl gɨ nee le na, ban sayi ɗe cay gɨsəŋ ga Jude bɨ, bɨlgɨ jɨga a cay gɨsəŋ ga Galile gaŋ. Gɨ ni ɔrɛ Galile na, ojɨ gɨ ban kɨya gaye cay gɨsəŋ ga Samari. Na toy di hɨn̰ wo̰ ma, Ban bugoŋ a cay ƴaa-di-gumu di pɨna wo̰ dɨŋ, di woy a cay gɨsəŋ ga Samari di tooge Sikar, di woy mɨnde dan̰ yage gɨ Jagob bɨn̰ kurondi Jɨsɛb. Kɨlɨma gɨ da Jagob woy a kɨɗɨn̰ ga nee gaŋ le. Gɨlale gɨ da ɔrɛ tɨrga lee Jesu, lee gɨ ban som dugo jaŋ a kɨbɨ kɨlɨma gɨ nee gɨŋ le. Tɨwa ɨn ɗɨrɨj ɨni.
Tama di pɨna wo̰, di Samari ɨrga kɨya tale kaŋ kɨlɨman̰. Ɨni na, Jesu ɨngɨroo ye hɨn̰: «Bəŋ kaŋ aŋ si.» Ban yoo hɨn̰ wo̰, na kɨya gɨ ka-aye-cay-tɨbayi orge a cay ƴaa-di-gumu dɨŋ, kɨya kɨlege hɨnga ga ni dɔɔ. Tama di Samari le, dɨbii cay nee yeyi hɨn̰: «Hay! Ji-bandi gɨ ni Jubɨ le, kɛ na mɨna ma mɨn̰ ɨngɨrəŋ ɨŋ-hɨndi di ni tama di Samari kaŋ ga ni sɔɔ ga?» (Kɨya gɨ Jubɨn̰əŋ dan̰ kalaŋ ga Samari sɨlage cɨn̰-gusɨge naŋ). Jesu dɨboo cay nee yoo hɨn̰: «Hɨn̰ gɨ me ni na sɨla hɨnga ga Kumu bee bɨ, ban gɨ ba ɨngɨrne kaŋ kɛ le naa waŋ ga bɨ na, me-hɨndi ni ba kɨya ɨngɨrii kaŋ cay wase bɨ, ban kɨya bɨne dan̰ kaŋ ga ni somɨn̰-bɨra.» Tama le yeyi hɨn̰: «Ba-gulɔŋ, ji ɨran̰ dan̰ gangɨ jɨngale naŋ bɨ, kɨlɨma le kalɨn̰ ma, ɗige nee bɨ. Kɛ ji kɨya saygan̰ dan̰ kaŋ ga ungo gɨ somɨn̰-bɨra le na jɨn̰ ani ga? Mon̰dini Jagob ba bɨni dan̰ kɨlɨma gɨ kɛ le, bɨ ban-gusi si kaŋdi dan̰ karɨndi bɨ, kandi-page kayi bɨ, pa dɨm ma ɗege bɨni ƴee. Kɛ a boy ɨrɨme kon̰ gɨŋ na, ji gumu ɗɨn̰ Jagob ga?» Jesu dɨboo cay nee yoo hɨn̰: «Waŋ waŋ gɨ na saa kaŋ ga a boy kɨlɨma gɨŋ gɨ kɛ le, gɨmase kɨya jɨga doyi ɗaŋ coŋ.» Ama waŋ waŋ gɨ na saa kaŋ ga ɨŋ ba bii na, gɨmase kɨya jɔgɛ doyi ɗaŋ naŋ bɨrɨŋ. Kaŋ ga ɨŋ ba kɨya bii le, kɨya bɨle cɨn̰-kaŋ ga kɨya andaŋ gɨre a kuduroy bɨ, kɨya bii sɔmɛ-bɨra gɨ dan̰ cɨndi bɨ. Tama le yeyi hɨn̰: «Ba-gulɔŋ, bəŋ dan̰ kaŋ ga nee le, ɗe gɨ gɨmase jɨga dəŋ ɗaŋ naŋ ɨni, ɗe gɨ aŋ jɨga kɛ tal kaŋ naŋ ɨni.»
Jesu yoo hɨn̰: «Ɨra tɔgɛ kudurɛ bɨ jɨge kɛ.» Tama le dɨbii cay nee yeyi hɨn̰: «Kuduronɨ unɔ.» Bɨ Jesu yoo hɨn̰: «Kɔl kɛ na cɨndi, kudurɛ unɔ. Kɨya wa tumɔ me ƴee ban̰aŋ won̰ bay bɨ, ban gɨ me ba som danayi haw kɛ le, na kudurɛ naŋ bɨ. Me yəŋ na kɔl gɨ cɨndi hɛɛ.» Ɨni na, tama le yeyi hɨn̰: «Ba-gulɔŋ, ɨŋ sol gɨ ji na ba-yɔɔ-kɔl-gɨ-Kumu-ba-yɔɔ. Mon̰ini ga Samari na, n̰ɨrege Kumu na cay garma gɨ kɛ gɨŋ. Ama kɨŋ ga ni Jubɨ na, kɨŋ ye gɨ, kɨɗɨn̰ ga na ojɨ gɨ ni nɨrɨn̰ Kumu nee na, naa cay ƴaa-di-gumu di Jerusalɛm dɨŋ.» Jesu dɨboo cay nee yoo hɨn̰: «Tama, bɨga kudurɛɛ a cay kɔl hɨnge gɨŋ. Wɔlɛ caga gɨ kɨŋ kɨya n̰ɨre Bayna Kumu na a cay garma gɨ kɛ gɨŋ naŋ bɨ, a cay ƴaa-di-gumu di Jerusalɛm dɨŋ naŋ bɨ. Kɨŋ kalaŋ ga Samari le, kɨŋ n̰ɨre Kumu dɨle solii gɨ ban naa waŋ ga? Ama ni-gandi ga na Jubɨ na, ni n̰ɨrii bɨ, ni solii gɨ ban naa waŋ bɨ. Kɨya wa pɔɗɛ sayga na gusi Jubɨn̰əŋ. Ama wɔlɛ gɨ hɨrɨwa tɨlga nee bɨ, wɔlɛdi le ay toy ɨni bɨ. Boy wɔlɛdi gɨ nee le, ka-n̰ɨre Bayna Kumu ga cɨndi le kɨya n̰ɨriige dan̰ gɨyəŋ gɨ da Turnɔ bɨ, kɔl gɨ cɨndi bɨ. Kɨya wa na ka-n̰ɨre ga hɨn̰ wo̰ le ma Bayge Kumu geyge. Kumu na Turnɔ. Kuɗa gɨ ka-n̰ɨredi, n̰ɨriige dan̰ gɨyəŋ gɨ da Turnɔ bɨ, kɔl gɨ cɨndi bɨ.»
Tama le yeyi hɨn̰: «Ɨŋ sol gɨ Mesi kɨya caga, Mesi dan̰ kɨbɨ koge le, duroy na Kɨris ban gɨ Kumu dorii le. Kɨɗɨn̰ ga ban kɨya caga na, ban kɨya gɨlni hɨnga nɔm.» Jesu dɨboo cay nee yoo hɨn̰: «Na ɨŋ-bandi gusɨnɨ ba-yɔɔ kɔl dɛnɛɛ kɛ.»
Kɨɗɨn̰di ga nee gaŋ le bɨ, ka-aye-cay-tɨbay Jesu bugoŋge. Kɔl kayge yɔd, kɨya wa kan solge Jesu ar kɔl dan̰ tama. Kan ɨrɨmge ye hɨn̰: Kɛ, ban gey na wa ga? Bɨ kɨya wa ma ban ye kɔl danaa ga? Ama ungo pɨna kalɨn̰ ma ɨngɨrii koldi naŋ. Ɨni na, tama le ɗe ɓɨri kɔɔ kɨbɨ kɨlɨma gɨŋ bɨ, jogɨ boy cay ƴaa-di-gumu dɨŋ bɨ, yeŋ kalaŋ hɨn̰: «Ɨregɨŋ, sɨlagɨŋ gɨlmi gɨ pɨna wo̰ gɨ dor te gɨye-lɔɔnɨ gɨ tumɔ pɨna pɨna nɔm daa. Kɛ gɨlmi gɨ nee le gɨ lɔɔ na Kɨris ban gɨ Kumu dorii le naŋ ga?» Ɨni na, kalaŋ dege kɨɗɨn̰ andaŋge cay ƴaa-di-gumu dɨŋ bɨ, orɨn̰ge gusi Jesu.
Kɨɗɨn̰ ga hɨnga ga nee le ba lee gusɨge ƴee na, ka-aye-cay-tɨbay Jesu ɨrɨn̰ge danayi daa yeyige hɨn̰: «Ba-gɨlni hɨnga, daa hɨnga dḛ dɨm.» Ama Ban dɨbɨge cay nee yege hɨn̰: «Ɨŋ orɨn̰ dan̰ hɨnga ga ni dɔɔ ga ɨŋ kɨya dɔɔ ga kɨŋ sɨla naŋ.» Ɨni na ka-aye-cay-tɨbay Jesu ɨngɨrɨn̰ge gusɨge kɔl duroyge yege hɨn̰: «Kɛ ungo gɨ ɗaŋ da bii hɨnga ga ni dɔɔ ƴee ga?» Jesu yege hɨn̰: «Dɔɔ hɨnge na lɔɔ kuduroy-geye gɨ da ban gɨ gɨyigəŋ bɨ, dɨɗe kɨbɨ gɨye koyi bɨ.» Kɛ kɨŋ ya kɨradi-kɔl gɨ ye hɨn̰: «“Kɨdɨrɛ poɗɨn̰ bɨ, kardi nee ƴɔbɨ na, na wale gɨ da cay gasa naŋ ga?”» Ama ɨŋ-bandi na, ɨŋ yəgɨŋ hɨn̰: Dɨragɨŋ caygɨŋ daa sɨlan̰gɨŋ gasa ga boy yagen̰əŋ gaŋ, cɨndɨge won̰ gɨ ni wale ɨni. Ba-wale cay gasa way hɨnga ga ni cay kobi ɨni bɨ, ban day cɨn̰ gasa ga ɗari le daa kɨya cay sɔmɛ-bɨra gɨ dan̰ cɨndi le. Lee gɨ ba-gɨse bɨ, ba-wale gasa bɨ, leege gusi-mɔwa pɨna. Kɨradi-kɔl gɨ pɨna wo̰ gɨ ye hɨn̰: «Ungo gɨ pɨna gɨsɨ gasa bɨ, ungo gɨ ɗaŋ wal bɨ, na kɔl gɨ cɨndi.» Ɨŋ naa gɨygɨŋ wale gasa a boy yage gɨ kɨŋ naa laa gɨye boy nee naŋ. Na kalaŋ ga ɗaŋ ba lɔɔge gɨye tumoyigɨŋ boy nee bɨ, kɨŋ andaŋ na a boy gɨye gɨ kan ƴomge kɨjan̰e gɨɗaŋ nee gɨŋ ɨni bɨ.
Kalaŋ ga Samari ga somge a cay ƴaa-di-gumu di nee dɨŋ kondɨ, beege kuduroyge a cay Jesu, kɨya wa tama le lee tɨmon̰ toyi yen̰ hɨn̰: «Ban dor te hɨnga ga ɨŋ ba lee tumɔ le nɔm daa.» Na toy di wo̰ ma, kalaŋ ga Samari ɨrgage gusi ɨngɨriige gɨ ban na sɨma danage. Lee gɨ ban som danage wɔlɛ sɔɔ. Kalaŋ kondɨ beege kuduroyge cayi ɗɨn̰ gɨ tumɔ kɨya cay kɔl koyi. Bɨ kan yen̰ge tama le hɨn̰: «Haw kɛ na, ni-gandi ni bee kuduroyni cayi na kɨya cay kɔl kɛɛ gɨ me ye ƴɔbɨ naŋ. Ama na kɨya gɨ ni-gandi gusɨni, ni je kɔl koyi dan̰ sɨmayni bɨ, ni sol leen̰ cɨndi gɨ ban na ba-pɔɗɛ-kalaŋ nɔm ga cay gɨsəŋ gaŋ bɨ.»


Wɔlɛ sɔɔ kardi nee na, Jesu say ɗe kɨɗɨn̰ ga nee bɨ, or a cay gɨsəŋ ga Galile gaŋ. Kɨya wa Jesu gusi tumɔ yen̰ ka-aye-cay-tɨbayi, yege hɨn̰: «Ungo gɨ ba-dɨbe hurɔmɔ a cay ba-yɔɔ-kɔl-gɨ-Kumu-ba-yɔɔ, a cay ƴaadi dɨŋ unɔ.» Ama naa hɨn̰ wo̰ kalɨn̰ ma, kɨɗɨn̰ ga ban ɨrga bugoŋ a cay gɨsəŋ ga Galile gaŋ ɨni na, kalaŋ ga a cay gɨsəŋ ga Galile gaŋ ƴomiige a gusɨge kuɗa. Kɨya wa kan bagage Jerusalɛm lɔɔ kɨdɨrɛ gɨ ni Pakɨ gɨ da Jubɨn̰əŋ bɨ, kan solge hɨnga nɔm ga Jesu ba lee wɔlɛ gɨ kalaŋ ba leen̰ge kɨdɨrɛ a cay ƴaa-di-gumu di Jerusalɛm dɨŋ le. Kɨɗɨn̰di ga nee gaŋ le, Jesu bɨle jogɨ a cay ƴaa-di-gumu di Kana di woy a cay gɨsəŋ ga Galile gaŋ. Na a cay ƴaa-di-gumu di Kana le ma, Jesu lee gɨ kaŋ bɨləŋ cɛrɛ di suru le. Ba-gɨye gɨ gumu gɨ da kɨlma gɨ pɨna wo̰, som a cay ƴaa-di-gumu di Kapɛrnɔm dɨŋ. Kurondi gusi leeyi. Kɨɗɨn̰ ga ban je gɨ Jesu na sayga a cay ƴaa di Jude dɨŋ, ɨrga bugoŋ a cay gɨsəŋ ga Galile gaŋ na, ban ɨrga gusi olii, ɗe na or pɔɗɛ kurondi gɨ woy kɨbɨ tɨma dɨŋ. Jesu yeyi hɨn̰: «Hɨn̰ gɨ kɨŋ na sɨla hɨnga ga ɗɨn̰ cɨn̰-kɨɗɨn̰ dan̰ hɨnga ga ni belin̰əŋ bɨ naŋ na, kɨŋ kɨya bɔgɛ kuduroygɨŋ canɨ naŋ bɨrɨŋ.» Ba-sɔmɛ cay asɨgar nɔm ga da kɨlma le, dɨbii cay nee yeyi hɨn̰: «Ba-gulɔŋ ɨre pa dɨm ma kuronɨ hɨmbɨ ƴee.» Jesu yeyi hɨn̰: «Ɨra kurondɨn̰ som-bɨra ɨni.» Gɨlmi le bee kuduroyi cay kɔl gɨ Jesu ba yeyi gɨŋ le bɨ, say ba te gɨyəŋ gɨŋ or. Kɨɗɨn̰ ga ban ba jɨga te gɨyəŋ gɨŋ ƴee na, marɨne ka-lɔɔ gɨye kayi ɨrgage yalge cɨndi bɨ, yeyige hɨn̰: «Kurondɨn̰ som-bɨra ɨni.» Ban ɨngɨrge ye hɨn̰ na dan̰ tɨwa di mɨna ma kuronɨ le gusi woy lam ga? Kan dɨbiige cay nee yeyige hɨn̰: «Na nagɨni dan̰ tɨwa pɨna di ni borundo ma gusi gɨ ɨl cəŋ le, jɨga dobii.» Ɨni na kuroŋ le bay, sol gɨ na boy tɨwado di nee dɨŋ le ma Jesu yeyi hɨn̰: «Kurondɨn̰ le som-bɨra ɨni.» Ayɨn̰ toy a nee le, ban dan̰ ka-ƴaa kayi nɔm beege kuduroyge a cay Jesu. Na ban ma na hɨnga ga ɗɨn̰ cɨn̰-kɨɗɨn̰ ga ni sɔɔdɨge ga Jesu lee. Ban lee na a cay gɨsəŋ ga Galile gaŋ, kɨɗɨn̰ ga ban san̰ a te cay gɨsəŋ ga Jude gaŋ le.

Lalela Ja̰ 4