Nouveau Testament en langue Gabri Maja du Tchad

Kɔl gɨ da Kumu gɨ Hɨrwa / Gabri Maja

Tumɔ ɓɨragɨ gɨ cay gɨsəŋ laan̰ gusɨge naŋ ƴee le, ban gɨ kan teeyige Kɔl le woy nee ɨni. Ban som pɨna na dan̰ Kumu bɨ, Kɔl na Kumu bɨ. Tumɔ ɓɨragɨ kan somge pɨna na dan̰ Kumu. Hɨnga nɔm ɗe gusɨge na dan̰ gɨyəŋ gɨ da Kɔl bɨ, hɨnga pɨna ga Ban ɗe, dɨle ɗɔɔ dan̰ Kɔl, unɔ bɨ. Sɔmɛ-bɨra woy na boy Kɔl gɨŋ, sɔmɛ-bɨra, na kɨɗɨn̰ asɨn̰e gɨ da kalaŋ. Kɨɗɨn̰ asɨn̰e, asɨn̰ duroy dɨlɨm dɨŋ, ama dɨlɨm ƴa caa naŋ.
Gɨlmi gɨ pɨna wo̰ andaŋ. Kumu gɨygi, gusondi na Ja̰. Ban ɨrga na kɨya lɔɔ tɨmon̰ bɨ. Ban lee na tɨmon̰ da asɨn̰a, ɗe gɨ kalaŋ nɔm na bɨgan̰ge kuduroyge cay asɨn̰a gɨŋ, dan̰ gɨyəŋ gɨ da tɨmon̰ toyi. Ban na kɨɗɨn̰ asɨn̰e naŋ, ama ban ɨrga na kɨya lɔɔ tɨmon̰ bɨn̰ kɨɗɨn̰ asɨn̰e. Kɔl le, na kɨɗɨn̰ asɨn̰e gɨ cɨndi. Ban ɨrga a cay gɨsəŋ gaŋ, lee gɨ kɨɗɨn̰ asɨn̰ cay kalaŋ nɔm.
Kɔl le tumɔ ban som a cay gɨsəŋ gaŋ bɨ, Kumu lee hɨnga ga cay gɨsəŋ gaŋ nɔm, na dan̰ gɨyəŋ koyi ban bɨ. Ama kalaŋ ga cay gɨsəŋ gaŋ, sɨlage gɨ naa ban naŋ. Ban ɨrga na cay ƴaadi dɨŋ, ama kalaŋ ga a cay ƴaadi dɨŋ, ƴɨmayige gusɨge naŋ. Ama kalaŋ nɔm ga ba ƴomiige gusɨge bɨ, beege kuduroyge cay gusondi gɨŋ bɨ le, ban haŋgɨ gɨyəŋ bɨge ɗe gɨ kan na bɨləŋge karɨn̰ Kumu. Kan ga nee le, bɨləŋge karɨn̰ Kumu na dan̰ gɨyəŋ gɨ da kɨbar naŋ bɨ, dan̰ gɨyəŋ gɨ da kuyoŋdi-gusu naŋ bɨ. Ama na dan̰ gɨyəŋ gɨ da kuduroy geye gɨ da Kumu.
Kɔl le, bɨləŋ na ungo bɨ, som duroyni. Ni sol gɨmɨn̰aw toyi dan̰ cɨndɨni bɨ. Na gɨmɨn̰aw di da kuroŋ gɨ pɨna hayi kəɗ kəɗ, gɨ sayga gusi Bay. Ban le, ɗarwa dan̰ kɔl gɨ cɨndi, ƴee kuduroyi. Ja̰ lee tɨmon̰ kol cayi ye hɨn̰: «Sɨlagɨŋ, ungo gɨ ɨŋ ba ye koldi ye hɨn̰: A karɨnɨ, ungo gɨ pɨna wo̰ tɨlga nee, gɨ de tumonɨ. Kɨya wa ban som nee tumɔ pa dɨm ma wɔɔŋge ƴee.» Hɨnga wɔɔdi ga ɗɨn̰ cɨn̰-kɨɗɨn̰ le, ni-gandi nɔm ni way kani ga ojɨ cayni, na kɨya cay ɗarwa toyi di say cay mɨga dɨŋ nee nee bɨ. Kɨŋ sɨla gasɨn̰-kɔl le, kan bɨnige na dan̰ gɨyəŋ gɨ da Moyis. Ama ɗarwa bɨ kɔl gɨ cɨndi bɨ le, ɨrga na dan̰ gɨyəŋ gɨ da Jesu-Kɨris. Ungo wo̰, gɨ sol Kumu dan̰ cɨndi unɔ bɨrɨŋ. Ama na Kurɨn̰-Kumu gɨ pɨna hayi kəɗ kəɗ, gɨ som durdi Bay le. Na ban ba lɔɔ gɨ ɗe kalaŋ na sɨlan̰ge Kumu.


Kɔl gɨ Ja̰ ye ojɨn̰ cay gusi koyi, kɨɗɨn̰ ga Jubɨn̰əŋ ga Jerusalɛm ba gɨygɨge ka-bɔgɛ kɨbar ga pɨna wo̰ dan̰ karɨn̰ Lebi ga pɨna wo̰, ɗe gɨ kan na ɨre ɨngɨriige le, ba kɛ: «Ji na waŋ ga?» Ban kan̰a dɨbɨge cay nee naŋ, ama ban yege daa waŋ: «Ɨŋ na Kɨris ban gɨ Kumu dorii le naŋ.» Ama kan ɨngɨriige: «Kɛ ji na waŋ ɨni ga? Ji na Eli ga?» Ban dɨbɨge cay nee yege hɨn̰: «Ɨŋ na ban naŋ.» «Kɛ ji na ba-yɔɔ-kɔl-gɨ-Kumu-ba-yɔɔ gɨ ba kɨya caga le ga?» Ɨni na ban jɨga dɨbɨge cay nee yege hɨn̰: «Naŋ.» Ɨni na, kan jɨga yeyige hɨn̰: «Ji na waŋ ɨni ga? Yani, kɨya wa ni kɨya jɔgɛ gusi kalaŋ ga ba gɨygɨnige bɨ, ni kɨya yoge. Kɛ, na koldi wa ma man̰ kɨya yɔ ojɨn̰ cay gusɨn̰ kon̰ gaŋ ga?» Ɨni na, ban jɨga yege hɨn̰:
«Ɨŋ-bandi, ɨŋ na noy ungo gɨ ba tɔgɛ bɛrnɛ a duroy daldɨŋ:
“N̰anagɨŋ gɨyəŋ gɨ da Ba-gulɔŋ ɗe ɨre dan̰ durɔ ɗɨngar”
Hɨn̰ gɨ Ijay ba-yɔɔ-kɔl-gɨ-Kumu-ba-yɔɔ ba ye wo̰.»
Kalaŋ ga kan ba gɨygɨge gusi Ja̰ le, na kalaŋ ga a duroy te kalaŋ ga ni Parɨsɨn̰a. Kan ɨngɨrɨn̰ge Ja̰ kɔl cɨndɨge tumɔ tumɔ yeyige hɨn̰: «Hɨn̰ gɨ ji naa Kɨris ban gɨ Kumu dorii naŋ bɨ, Eli naŋ bɨ, ba-yɔɔ-kɔl-gɨ-Kumu-ba-yɔɔ gɨ ba kɨya caga naŋ bɨ na, na kɨya wa ma mɨn̰ leen̰ kalaŋ batɛm ga?» Ja̰ jɨga dɨbɨge cay nee yege hɨn̰: «Ɨŋ-bandi le, ɨŋ leen̰ kalaŋ batɛm na duroy kaŋ gaŋ, ama ungo gɨ pɨna wo̰ gɨ kɨŋ sɨlayi naŋ woy duroy gɨŋ. Ban tɨlga karɨnɨ nee, ban ɗəŋ ɓɨrɨŋ gɨ ɨŋ ɓala pɨndɨre gangɨdi gɨyabe ga tɨbayi naŋ.» Hɨnga ga nee le, lee gusɨge na a Betani, kardi kuray gɨ Jurdḛ kɨwa gɨ jɨn̰ nii gɨŋ, kɨɗɨn̰ ga Ja̰ ɨre leen̰ kalaŋ batɛm nee gaŋ le.

Wan̰dodo dɨŋ ɨni na, Ja̰ sol Jesu ɨrga jɨn̰ gusi, bɨ ban ye hɨn̰: «Sɨlagɨŋ kurɨn̰-dɨmangɨ gɨ da Kumu gɨ ba-dɔrɛ ɨsɨna gɨ da kalaŋ ga cay gɨsəŋ gaŋ. Ungo gɨ ɨŋ ba ye koldi hɨn̰: “Ungo gɨ pɨna wo̰ gɨ de tumonɨ tɨlga karɨnɨ nee. Kɨya wa ban som nee tumonɨ pa dɨm ma wɔɔŋge ƴee”.
«Ɨŋ-bandi kalɨn̰ ma, tumɔ ɨŋ sɨlayi naŋ. Ama ɨŋ ɨrga na kɨya loon̰ kalaŋ batɛm boy kaŋ gaŋ, aŋ na gɨlɨn̰ te wɨn̰je gɨ da Ɨsɨrayɛl ɗe na soliige.»
Kardi nee na Ja̰ lee tɨmon̰ ɗaŋ coŋ ƴee hɨn̰: «Ɨŋ sol Turnɔ di da Kumu sayga daa hɨn̰ guu di bɛrɛ kən̰jəŋ wo̰, ɨrga som cayi.» Tumɔ ɨŋ sɨla hɨn̰ gɨ naa ban ma, maŋ naa na ye koldi naŋ, ama ban gɨ ba gɨyigəŋ loon̰ kalaŋ batɛm boy kaŋ gaŋ le, yəŋ hɨn̰: «“Ungo gɨ ji na sɨla Turnɔ di da Kumu na se daa ɨre gɨsɨn sɨma cayi na, na ban gɨ ba-leen̰ kalaŋ batɛm dan̰ Turnɔ ɗe-kuduroy-bɛrɛ dɨŋ le”. Ɨŋ-bandi ɨŋ sol dan̰ cɨnɨ bɨ, ɨŋ lee tɨmon̰ kol cayi bɨ, gɨ ban na Kurɨn̰-Kumu.»
Wan̰dodo dɨŋ ɨni na, Ja̰ dan̰ ka-aye-cay-tɨbayi sɔɔ ɨrege danayi a kɨɗɨn̰ ga nee gaŋ ɗaŋ coŋ. Kɨɗɨn̰ ga Ja̰ sol Jesu pɨde ɨni na, ban ye hɨn̰: «Sɨlagɨŋ kurɨn̰-dɨmangɨ gɨ da Kumu!» Kɨɗɨn̰ ga ka-aye-cay-tɨbay Ja̰ ga sɔɔ ga nee le, jege kɔl gɨ ban ba ye le ɨni na, kan kobɨge kardi Jesu. «Jesu bɨle cɨndi ɨni na, solge gɨ kan kobɨ kardi ɨni na, ban yege hɨn̰: Kɨŋ mal na wa ga?» Kan jɨgage dɨbige cay nee yeyge hɨn̰: «Rabi, ji som na ani ga?» Rabi le, duroyi na «Ba-gɨlɨn̰ kalaŋ hɨnga» dan̰ kɨbɨ Aramɛn̰ɛ. Ɨni na, Jesu yege hɨn̰: «Ɨregɨŋ magɨŋ kɨya sɔlɛ.» Kɨɗɨn̰di ga nee gaŋ le, kan orge, lee gɨ kan solge kɨɗɨn̰ ga ban somɨn̰ nee le. Bɨ kan dɨɗɨn̰ge kɨbɨ wɔlɛdi gɨ nee le danayi. Kɨɗɨn̰di ga nee gaŋ le, tɨwa ɓal na hɨn̰ karɨn̰ tɨwa poɗɨn̰ dɨ ni borundo wo̰.
Duroy kalaŋ ga sɔɔ ga jege kɔl gɨ da Ja̰ bɨ, kobɨn̰ge kardi Jesu le, ban gɨ pɨna na Andɨre, Simo Pɨyɛr kurɨndi. Ungo gɨ Andɨre wayi cay wase le na Simo, ɨni na ban yen̰ kurɨndi le yen̰ hɨn̰: «Ni way Kɨris le ɨni!» Kɨris le, duroy na ban gɨ Kumu dorii. Ban orɨn̰ dan̰ Simo gusi Jesu. Jesu sol Simo ɗɛɛ ɨni na, yey hɨn̰: «Ji na Simo kurɨn̰ Ja̰, ama kan kɨya togɨn̰ na, Kepas» duroy na «Garma.»

Wan̰dodo dɨŋ ɨni na, Jesu ojɨ kuduroy gɨ ni ɔrɛ a cay gɨsəŋ ga Galile gaŋ. Ban wayi Pilib a te gɨyəŋ gɨŋ, bɨ ban yeyi hɨn̰: «Ɨre, kɨba karɨnɨ.» Pilib na ungo gɨ Bɛtsayda, cay ƴaa-di-gumu di da Andɨre dan̰ Pɨyɛr. Pilib way Natanɨyɛl bɨ, yeyi hɨn̰: «Ni way ban gɨ kan walge koldi, ɗe duroy magtubu Gasɨn̰-kɔl gɨ da Moyis gɨŋ bɨ, duroy magtubu da ka-yɔɔ-kɔl-gɨ-Kumu-ba-yɔɔ gɨŋ bɨ le. Na Jesu kurɨn̰ Jɨsɛb gɨ Najarɛt.» Ɨni na, Natanɨyɛl jɨga dɨbi cay nee yey hɨn̰: «Hay! Cay pɨna wo̰, hɨnga ga ɗari ga sayga Najarɛt woy nee hage ga?» Ɨni na, Pilib jɨga dɨbii cay nee yeyi hɨn̰: «Ɨre, sɨla.»
Jesu sol Natanɨyɛl ɨrga jɨn̰ gusi ɨni na, ban ye koldi ye hɨn̰: «Kɨye gɨ Ɨsɨrayɛl gɨ leen̰ cɨndi ba kɛ, ban na ba-nare-cɨn̰ ungo naŋ.» Ɨni na, Natanɨyɛl ɨngɨrii ye hɨn̰: «Ji sɔlɔŋ na kɨɗɨn̰ ga ani gaŋ ga?» Bɨ Jesu jɨga dɨbi cay nee yeyi hɨn̰: «Tumɔ pa dɨm ma Pilib kɨya teen̰, kɨɗɨn̰ ga ji ba somɨn̰ te tuguyɔŋ dɨŋ ƴee le, Ɨŋ solɨn̰ ɨni.» Ɨni na, Natanɨyɛl jɨga yey hɨn̰: «Ba-gɨlɨn̰ kalaŋ hɨnga, ji na Kurɨn̰-Kumu, ji na Kɨlma gɨ da karɨn̰ Ɨsɨrayɛl.» Jesu jɨga dɨbi cay nee yey hɨn̰: «Na kɨya yɔ gɨ ɨŋ yen̰ gɨ ɨŋ na solɨn̰ te tuguyɔŋ dɨŋ le ma, mɨn̰ been̰ kuduron̰ canɨ ga? Ayɨn̰ toy haw kɛ na, ji kɨya sɔlɛ-hɨnga ga gɨmdəŋ ɗɨn̰ ga nee le ƴee.» Jesu dɨbɨge cay nee coŋ yege hɨn̰: «Jagɨŋ, aŋ yəgɨŋ daa waŋ na cɨndi, kɨŋ kɨya sɔlɛ gɨɗɨgɨ-Kumu hangaŋ bɨ, ka-ƴɔbɛ ga da Kumu kɨya nɔɔge jɨn̰ daa bɨ, gɨsɨnege jɨn̰ dugo bɨ, canɨ ɨŋ-bandi Kurɨn̰-ungo le.»

Lalela Ja̰ 1