Khamti Shan - WBT (NT) Non Drama

Khamti Shan - WBT (NT) Drama

ꩡ︀ဝ်ႛယ︀ေꩬ︀ု တ︀ပ︀ေးꩡ︀ဝ်ႛꩬ︀ိပ︀်ꩬ︀ွင︀်ပ︀ႃးမ︀ႆ︀ႛ လ︀ွင︀်ႈꩫ︀ႆ︀ႇၵ︀ဝ် ꩭူဝ်းꩰꩬ︀ွꩫ︀်ꩰယ︀ဝ်ႇက︀ီး လ︀ုက︀်ႉဢ︀မ︀ႂ်းမ︀ႆ︀ႛဢ︀ွက︀်ꩬ︀ီ ဝီင︀်းတ︀ီႈက︀ႂ်ႛꩫ︀ႆ︀ႇၵ︀ဝ်မ︀ႆ︀ႛ က︀ႃꩭူဝ်းတ︀ြႃးဢ︀ူ။ ဢ︀ꩫ︀်ႈꩡ︀ဝ်ႛၵ︀ရ︀ီတ︀်ꩭီတ︀်ꩫ︀ႆ︀ႇၵ︀ဝ်မ︀ႆ︀ႛ ꩬ︀ြႃယ︀ေႃးꩭၢꩫ︀် လ︀ုက︀်ႉက︀ꩫ︀်ႛꩫ︀ႂ်းထွင︀်မ︀ႆ︀ႛ ꩫ︀ႆ︀ႛꩥ︀ိꩫ︀်းက︀ီး တ︀ပ︀ေးမ︀ꩫ︀်းၵ︀ဝ်မ︀ႆ︀ႛꩡ︀ႂ်ႇꩬ︀ီ ꩡ︀ဝ်ႛယ︀ေꩬ︀ုမ︀ႆ︀ႛ ꩭႂ်ႛမ︀ႃးထၢမ︀်ဢ︀ူ။ ၵ︀ဝ်က︀ေႃႇ ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “ꩡ︀ဝ်ႛꩬ︀ြႃꩴ︀း မ︀ႂ်းꩡ︀ဝ်ႛယ︀ႃႇ ꩡ︀ဝ်ႛဢ︀ꩫ︀်ႈ ꩬ︀ြႃယ︀ေႃးꩭၢꩫ︀်ဝႃႈဝႆ︀ႇ ꩡ︀ဝ်ႛမ︀ေꩬ︀ိယ︀ ဢ︀ꩫ︀်ႈတ︀ီက︀ျွႃးမ︀ႃးꩫ︀ꩫ︀ႆ︀ႇတ︀ီၵ︀ႃႛက︀ျႃး။ ꩫ︀ႆ︀ႇမ︀ဝ်ꩡ︀ႂ်ႈက︀ီး တ︀ူႈၵ︀ႃႛ ꩡ︀ဝ်ႛတ︀ၢင︀်ပ︀ႃးမ︀ႆ︀ႛ ဝႃႈထႃႛဢ︀ိက︀်တ︀ီၵ︀ႃႛက︀ျႃး။ ꩫ︀ꩬ︀ီꩬ︀ွက︀်ႉဢ︀ူ။ ꩡ︀ဝ်ႛယ︀ေꩬ︀ုယ︀ႃႇ “ဢ︀ꩫ︀်ႈꩬ︀ူꩫ︀ႆ︀ႛꩥ︀ိꩫ︀်း၊ ဢ︀ꩫ︀်ႈꩬ︀ူꩭꩫ︀်ꩫ︀ႆ︀ႇၵ︀ဝ် ꩬ︀ြႃယ︀ေႃးꩭၢꩫ︀်မ︀ႆ︀ႛ က︀ႃၵ︀ႆ︀ႈပ︀ွက︀်ႉလ︀ႃး။ ၸ︀ူႛတ︀ႃႈမ︀ွတ︀်ꩫ︀ႆ︀ႇၵ︀ဝ် တ︀ႃႈꩭꩫ︀်က︀ꩫ︀်ႈယ︀ဝ်ႇ။ က︀ူꩫ︀်းဢ︀ꩫ︀်ႈတ︀ိꩫ︀်ႈတ︀ႆ︀ၢႈꩫ︀ႆ︀ႇၵ︀ဝ်က︀ေႃႇ ၸ︀ႆ︀ၢႛက︀ꩫ︀်ႈယ︀ဝ်ႇ။ ၸ︀ူႛပ︀ီꩫ︀်ႈတ︀ုတ︀်ႉꩫ︀ႆ︀ႇၵ︀ဝ်က︀ေႃႇ ꩫ︀ီႈꩬ︀ူဝ်းꩰက︀ꩫ︀်ႈယ︀ဝ်ႇ။ ၸ︀ူႛꩭူꩫ︀ႂ်ꩫ︀ႆ︀ႇၵ︀ဝ်က︀ေႃႇ ꩭူꩫ︀ႆ︀ႛꩥ︀ိꩫ︀်းက︀ꩫ︀်ႈယ︀ဝ်ႇ။ ၸ︀ူႛတ︀ႆ︀ၢႈꩫ︀ႆ︀ႇၵ︀ဝ်က︀ေႃႇ ꩫ︀ိပ︀်မ︀ႃးက︀ꩫ︀်ႈယ︀ဝ်ႇ။ ၸ︀ူႛၸ︀ၢꩫ︀်ꩫ︀ႆ︀ႇၵ︀ဝ်က︀ေႃႇ ၵ︀ၢဝ်ႈၵ︀ၢမ︀်းꩫ︀ီႈ ꩫ︀ႆ︀ႛꩥ︀ိꩫ︀်းက︀ꩫ︀်ႈယ︀ဝ်ႇ။ က︀ူဝ်ႇဢ︀ꩫ︀်ႈလ︀ႆ︀ၢးပ︀ိူဝ်ႈက︀ဝ်ႈꩬ︀ီ ꩡ︀ႂ်ႈမ︀ဝ်ၸ︀ုꩫ︀်ႇက︀ႃꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀က︀ိဝ်းပ︀ူင︀်ႈꩭႂ်ႛဢ︀ူ” ꩫ︀ဝꩫ︀်ႇ။ တ︀ပ︀ေးꩬ︀ြႃယ︀ေႃးꩭၢꩫ︀်ၵ︀ဝ်ဢ︀ွက︀်က︀ႃက︀ီး မ︀ꩫ︀်းꩡ︀ဝ်ႛက︀ၢပ︀်ꩬ︀ီ ၸ︀ုင︀်က︀ူꩫ︀်းမ︀ႆ︀ႛလ︀ွင︀်ႈ မ︀ꩫ︀်းဝႃႈꩫ︀ႆ︀ႇ “ꩬ︀ူ ပ︀ၢင︀်ꩭႅင︀်ႛမ︀ႆ︀ႛ က︀ႃလ︀ႅမ︀်းꩬ︀ြႃယ︀ေႃးꩭၢꩫ︀်ꩫ︀ႆ︀ႇ၊ မ︀ꩫ︀်းမ︀ႆ︀ႛ ၵ︀ꩫ︀်တ︀ႂ်းက︀ူꩫ︀်းꩫ︀င︀်ꩭိုဝ်ꩬ︀ီꩫ︀ႆ︀။ ၵ︀ꩫ︀်တ︀ႂ်းက︀ူꩫ︀်းဢ︀ꩫ︀်ႈမ︀ၢပ︀်ႉလ︀ုပ︀်ႉက︀ျႃး။ ꩫ︀ႆ︀ႇမ︀ဝ်ꩡ︀ႂ်ႈက︀ီး က︀ူꩫ︀်းဢ︀ꩫ︀်ႈꩫ︀ုင︀်ႈꩬ︀ိူဝ်ႛဢ︀ꩫ︀်ႈတ︀ွင︀်ꩭိမ︀်ႇꩰ မ︀ႆ︀ႛက︀ျႃး ꩬ︀ူက︀ႃလ︀ႅမ︀်းမ︀ႃးꩫ︀ႆ︀ႇ။ က︀ူꩫ︀်းဢ︀ꩫ︀်ႈꩫ︀ုင︀်ႈၵ︀ိူင︀်ႈၸ︀ꩫ︀်းဢ︀မ︀ႂ်းယ︀ႃႇ ꩭူဝ်ၵ︀မ︀်းမ︀ႆ︀ႛꩥ︀ႃဢ︀ူꩫ︀ႆ︀ႇ။ ꩬ︀ြႃယ︀ေႃးꩭၢꩫ︀်မ︀ႆ︀ႛ ၵ︀ꩫ︀်တ︀ႂ်းက︀ူꩫ︀်းꩫ︀င︀်ꩭိုဝ်ꩬ︀ီꩫ︀ႆ︀ ꩬ︀ူက︀ႃလ︀ႅမ︀်းꩫ︀ႆ︀ႇ။ ၵ︀ꩫ︀်တ︀ႂ်းပ︀ရ︀ေႃးၸ︀ႅတ︀်ႉက︀ျႃး။ ဢ︀ိူဝ်း။ ၵ︀ꩫ︀်တ︀ႂ်းပ︀ရ︀ေႃးၸ︀ႅတ︀်ႉꩫ︀က︀ီးꩡ︀ႂ်ႈဢ︀ူ။ ꩫ︀ႆ︀ႇꩫ︀က︀ေႃႇ မ︀ꩫ︀်းယ︀ႃႇ ပ︀ရ︀ေႃးၸ︀ႅတ︀်ႉတ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛꩬ︀ႃဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩬ︀ြႃယ︀ေႃးꩭၢꩫ︀်ယ︀ႃႇ က︀ူဝ်ႇဢ︀ꩫ︀်ႈ “ထွမ︀်တ︀ႃႉ။ ၸ︀ူႛꩡ︀ႂ်ႇက︀ဝ်ႈမ︀ႆ︀ႛ က︀ꩫ︀်ႛꩫ︀ႃႛမ︀ႂ်းမ︀ႆ︀ႛ က︀ဝ်ႈတ︀ီပ︀ွႆ︀ꩡ︀ႂ်ႇꩫ︀မ︀်။ မ︀ꩫ︀်းယ︀ႃႇ တ︀ၢင︀်းꩡ︀ႃႇမ︀ႂ်း တ︀ီꩭႅမ︀်းဝႆ︀ႇꩫ︀မ︀်” ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀ႆ︀ႇꩫ︀မ︀်။ က︀ဝ်ႈဝႃႈက︀ွတ︀်။ ꩬ︀ြႃယ︀ေႃးꩭၢꩫ︀်ယ︀ႃႇ က︀ူꩫ︀်းမ︀ိူင︀်းက︀ၢင︀်ႈတ︀င︀်းလ︀ုင︀်မ︀ႆ︀ႛ ယ︀ႂ်မ︀ႅတ︀်ႉꩬ︀ႃဢ︀ူ။ ꩫ︀ႆ︀ႇꩫ︀က︀ေႃႇ မ︀ိူင︀်းက︀ၢင︀်ႈꩭၢဝ်မ︀ႆ︀ႛ က︀ူဝ်ႇဢ︀ꩫ︀်ႈက︀ွႆ︀ႛလ︀ေႚလ︀ေႚꩫ︀ႆ︀ၢႈက︀ေႃႇ ꩬ︀ြႃယ︀ေႃးꩭၢꩫ︀်မ︀ႆ︀ႛ ယ︀ႂ်မ︀ႅတ︀်ႉꩬ︀ႃဢ︀ူ။ လ︀ုက︀်ႉမ︀ိူဝ်ႈꩬ︀ြႃယ︀ေႃးꩭၢꩫ︀် က︀ူဝ်ꩭူဝ်းတ︀ြႃးပ︀ုꩫ︀်ႛ တ︀ူဝ်ထိုင︀်င︀ႆ︀ႚ က︀ူꩫ︀်းꩭႆ︀ၢႇꩫ︀ႆ︀ႇၵ︀ဝ်ꩭီတ︀်ꩭႆ︀ၢႇꩬ︀ီ မ︀ိူင︀်းက︀ၢင︀်ႈꩭၢဝ်မ︀ႆ︀ႛ ၵ︀ႂ်ႈꩭူမ︀်းက︀ꩫ︀်ႈဢ︀ူ။ တ︀ူဝ်ထိုင︀်ꩡ︀ူဝ်ႈꩬ︀ြႃယ︀ေႃးꩭၢꩫ︀် က︀ျမ︀်းꩬ︀ိꩫ︀်မ︀ေႃꩬ︀ေင︀ႆ︀း က︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ လ︀ွင︀်ႈမ︀ိူင︀်းက︀ၢင︀်ႈꩭၢဝ်ꩫ︀ေပ︀ျႃးဝႆ︀ႇဢ︀ူ။ က︀ျမ︀်းဢ︀မ︀ႂ်းၵ︀ဝ်မ︀ႆ︀ႛ ꩬ︀ူယ︀ုမ︀်က︀ီး ꩬ︀ြႃယ︀ေႃးꩭၢꩫ︀်ယ︀ႃႇ ဢ︀ေလ︀ိယ︀ဢ︀ꩫ︀်ႈတ︀ီမ︀ႃးꩫ︀မ︀်ꩫ︀ꩬ︀ီ က︀ျမ︀်းဢ︀မ︀ႂ်းၵ︀ဝ်မ︀ႆ︀ႛ ဝႃႈဝႆ︀ႇꩫ︀ႆ︀ႇမ︀ႆ︀ႛက︀ေႃႇ ꩬ︀ူထုက︀်ꩫ︀ီႈယ︀ုမ︀်ဢ︀ူ။ ထွမ︀်ꩫ︀ီႈꩫ︀ီႈ၊ ၵ︀ႂ်ႈꩡ︀ႂ်ႈꩫ︀ီႈꩫ︀ီႈက︀ꩫ︀်ႈတ︀ႃႉ။
ꩬ︀ူက︀ူꩫ︀်းပ︀ၢꩫ︀်ႈင︀ႆ︀ႚ ꩫ︀ႆ︀ႇၵ︀ဝ်ယ︀ႃႇ က︀ꩬ︀င︀်မ︀ႆ︀ႛꩫ︀ႆ︀တ︀ူꩫ︀ႆ︀ႇꩫ︀က︀ီး ၸ︀ုင︀်လ︀ၵ︀ႃဢ︀ꩫ︀်ႈက︀တ︀်မ︀ႆ︀ႛ ꩫ︀င︀်က︀ꩫ︀်ႈꩬ︀ီ “ꩬ︀ူယ︀ႃႇ တ︀ူႈꩭႆ︀က︀ွင︀်ႈမ︀ွင︀်းယ︀ၢမ︀်းꩫ︀က︀ေႃႇ မ︀ဝ်က︀ႃႛ၊ ဢ︀ွေၵ︀ၢမ︀်းၵ︀ီꩫ︀က︀ေႃႇ မ︀ဝ်ꩭႆ︀ႛ” ꩫ︀ꩬ︀ီ ၸ︀ုင︀်လ︀ိူင︀်ႈမ︀ႆ︀ႛၸ︀ုင︀်လ︀ိူင︀်ႈ ဢ︀ိဝ်က︀ꩫ︀်ႈꩫ︀ႆ︀ႇၵ︀ဝ်ꩫ︀က︀ꩫ︀်ႈꩫ︀မ︀်။ လ︀ႆ︀ၢးပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩬ︀ူယ︀ႃႇ ꩬ︀ြႃယ︀ေႃးꩭၢꩫ︀်ꩭႅတ︀်ႉတ︀ွင︀်ႇင︀ႆ︀း င︀ိူင︀်ႇဝၢႆ︀မ︀က︀်ꩡ︀ပ︀ႅတ︀်ႉꩬ︀ီ မ︀ႃးက︀ီး “မ︀ꩫ︀်းမ︀ႆ︀ႛၸ︀ီꩭၢႆ︀ႇလ︀ွေႛဢ︀ူ” ꩫ︀ဝꩫ︀်ႇ။ ၵ︀ိုꩫ︀်းꩫ︀က︀ဝ် က︀ဝ်ႈၸ︀ူႛပ︀ီꩫ︀်ႈလ︀ုက︀်ႉက︀ူꩫ︀်းꩫ︀ႆ︀ႇ မ︀ဝ်ꩭႅတ︀်ႉတ︀ွင︀်ႇ၊ မ︀ဝ်င︀ိူင︀်ႇဝၢႆ︀မ︀က︀်ꩡ︀ပ︀ႅတ︀်ႉꩬ︀ီမ︀ႃးက︀ီးက︀ေႃႇ ꩬ︀ူယ︀ႃႇ “လ︀ႅမ︀်းလ︀ိူဝ်း မ︀ꩫ︀်းယ︀ႃႇ ၸ︀ူႛတ︀ွင︀်ႇလ︀ူင︀်ꩬ︀ႃး၊ ယ︀ႃလ︀ဝ်ႛꩬ︀ႃး၊ က︀ူဝ်ႇꩬ︀ေႛၸ︀ူႛက︀ီပ︀်ၵ︀ွꩫ︀်ꩫ︀ႆ︀ႇၵ︀ဝ်၊ က︀ူဝ်ႇꩬ︀ေႛက︀ူꩫ︀်းဢ︀ꩫ︀်ႈဢ︀ပ︀ႅတ︀်ႉꩫ︀ႃꩫ︀ႆ︀ႇၵ︀ဝ်ꩬ︀ႃး” ꩫ︀ဝꩫ︀်ႇ။ ဝႃႈꩭိုဝ်ꩫ︀က︀ေႃႇ က︀ူဝ်ႇဢ︀ꩫ︀်ႈ ꩫ︀င︀်ꩥ︀ႅꩫ︀်ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛပ︀ူင︀်ႈꩭႂ်ႛꩫ︀က︀ꩫ︀်ႈ ꩭီတ︀်ꩭႆ︀ꩫ︀ႆ︀ႇယ︀ႃႇ ꩬ︀ိုဝ်ႈꩡ︀ႂ်ႈဢ︀ူꩫ︀ꩫ︀ႆ︀ႇ ဢ︀ꩫ︀်ႈမ︀ꩫ︀်းꩭီတ︀်ꩫ︀ႆ︀ႇၵ︀ဝ် ꩬ︀ၢက︀်ႉꩬ︀ေပ︀ျႃးဢ︀ူ” ꩫ︀ဝꩫ︀်ႇ။


က︀ူꩫ︀်းဝီင︀်းဢ︀ꩫ︀်ႈꩡ︀ဝ်ႛယ︀ေꩬ︀ု ၵ︀ႅꩫ︀်းပ︀ျႃးဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်ယ︀ႃႇ လ︀ုက︀်ႉဢ︀ပ︀ႅတ︀်ႉၵ︀ဝ်မ︀ႆ︀ႛ ꩵ︀ႈꩬ︀ၢင︀်ဝွေ။ င︀ႆ︀းꩬ︀ီ မ︀ꩫ︀်းꩡ︀ဝ်ႛ က︀ူꩫ︀်းဝီင︀်းဢ︀မ︀ႂ်းၵ︀ဝ်မ︀ႆ︀ႛ တ︀ၢင︀်ဢ︀ပ︀ႅတ︀်ႉꩫ︀ႆ︀ႇ “က︀ူꩫ︀်းဝီင︀်းၵ︀ေႃရ︀ꩡ︀ိင︀်ၵ︀ဝ်ꩴ︀း ꩡ︀ႃႇꩬ︀ူယ︀ႃႇ ၵ︀ိူင︀်ႈꩫ︀ီႈက︀ူဝ်ႈလ︀ူင︀်ꩫ︀မ︀်။ က︀ူꩫ︀်းဝီင︀်းပ︀ႅတ︀်ꩡ︀ႄးတ︀ၵ︀ဝ်ꩴ︀း ꩡ︀ႃႇꩬ︀ူက︀ေႃႇ ၵ︀ိူင︀်ႈꩫ︀ီႈက︀ူဝ်ႈလ︀ူင︀်ꩫ︀မ︀်။ ꩬ︀င︀်ဝႃႈ ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်း ဢ︀ꩫ︀်ႈꩬ︀ူမ︀ႆ︀ႛပ︀ျႃးမ︀ႃးꩫ︀ႆ︀ႇၵ︀ဝ် ဝီင︀်းတ︀ုရ︀ု ꩫ︀ၵ︀ႃဝီင︀်းꩡ︀ိတ︀ုင︀်ဢ︀ꩫ︀်ႈဢ︀ပ︀ႅတ︀်ႉꩫ︀ႃꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် ပ︀ျႃးမ︀ႃးက︀ီး က︀ူꩫ︀်းဝီင︀်းဢ︀မ︀ႂ်းၵ︀ဝ်ယ︀ႃႇ ၸ︀ႃႛထွေးလ︀ႃꩫ︀ႆ︀ႇၵ︀ဝ်မ︀ႆ︀ႈင︀ႆ︀း က︀ုမ︀်ꩭူဝ်ၵ︀ဝ်မ︀ႆ︀ႛ တ︀ဝ်ႈ ꩫ︀ႆ︀ႇၵ︀ဝ်ၸ︀ၢဝ်ꩬ︀ီၵ︀ဝ်ꩬ︀ၢင︀်ဝွေဢ︀ူꩫ︀ꩫ︀ႆ︀ႇလ︀ုက︀်ႉမ︀ိူဝ်ႈင︀ႃးပ︀ုꩫ︀်ႛ တ︀ီပ︀ျႃးက︀ꩫ︀်ႈမ︀ႃးꩬ︀ႃး။ က︀ဝ်ႈဝႃႈက︀ွတ︀်။ ဝꩫ︀်းမ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛပ︀ႅတ︀်ႉတ︀ြႃးꩫ︀ႆ︀ႇ ဝီင︀်းတ︀ုရ︀ု ꩫ︀ၵ︀ႃဝီင︀်းꩡ︀ိတ︀ုင︀်မ︀ႆ︀ႛလ︀ိူမ︀်ꩬ︀ႃꩬ︀ီ ꩬ︀ူမ︀ႆ︀ႛတ︀ီၵ︀ႅꩫ︀်းပ︀ူင︀်ႈတ︀ၢမ︀်ꩬ︀ႃး။ က︀ူꩫ︀်ႈဝီင︀်းက︀ပ︀ေရ︀ꩫ︀ွင︀်ၵ︀ဝ်ꩴ︀း ꩬ︀ူၵ︀ႂ်ႈၵ︀ိုꩫ︀်ႛက︀ꩫ︀်ႛꩫ︀ိူဝ်က︀ၢင︀်ႈꩭၢဝ်ꩫ︀ႆ︀ႇ ꩬ︀ူမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ွႆ︀တ︀ူက︀်င︀ႃးလ︀ႆ︀ၢးꩬ︀ႃး။ ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်း ဢ︀ꩫ︀်ႈꩬ︀ူမ︀ႆ︀ႛပ︀ျႃးမ︀ႃးꩫ︀ႆ︀ႇၵ︀ဝ် က︀ူꩫ︀်ႈဝီင︀်းꩬ︀ေႃတ︀ုင︀်ဢ︀ꩫ︀်ႈဢ︀ပ︀ႅတ︀်ႉꩫ︀ႃꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် ပ︀ျႃးမ︀ႃးက︀ီး ဝီင︀်းဢ︀မ︀ႂ်းင︀ႆ︀ႚက︀ေႃႇ တ︀ီယ︀င︀်းဢ︀ူꩬ︀ႃး။ က︀ဝ်ႈဝႃႈက︀ွတ︀်။ ဝꩫ︀်းမ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛပ︀ႅတ︀်ႉတ︀ြႃးꩫ︀ႆ︀ႇ ဝီင︀်းဢ︀မ︀ႂ်းမ︀ႆ︀ႛလ︀ိူမ︀်ꩬ︀ႃꩬ︀ီ ဝီင︀်းꩬ︀ူမ︀ႆ︀ႛတ︀ီၵ︀ႅꩫ︀်းပ︀ူင︀်ႈတ︀ၢမ︀်ꩬ︀ႃး” ꩫ︀ဝꩫ︀်ႇ။


ယ︀ဝ်ႇက︀ီး ꩡ︀ဝ်ႛယ︀ေꩬ︀ုယ︀ွꩫ︀်းꩬ︀ူးꩫ︀ႆ︀ႇ “ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛက︀ၢင︀်ႈꩭၢဝ်ꩫ︀ၵ︀ႃမ︀ိူင︀်းက︀ၢင︀်ႈတ︀ီၵ︀ႃႛ လ︀ွင︀်ႈဢ︀ꩫ︀်ႈလ︀ိူက︀်ႉလ︀မ︀် ဢ︀ꩫ︀်ႈၸ︀ူႛပ︀ိင︀်ꩥ︀ႃယ︀င︀်းꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈမ︀ႅပ︀်ဝႆ︀ႇꩫ︀ႆ︀ႇ က︀ူꩫ︀်းဢ︀ꩫ︀်ႈပ︀ိင︀်ꩥ︀ႃမ︀ဝ်ယ︀င︀်းꩫ︀ႆ︀ႇၵ︀ဝ်မ︀ႆ︀ႛ ပ︀ုတ︀်ပ︀ျႃးꩭႂ်ႛꩬ︀ီ က︀ျေးꩡ︀ူးတ︀ၢင︀်လ︀ူင︀်တ︀ီၵ︀ႃႛꩫ︀မ︀်။ ဢ︀ꩫ︀်ႈꩫ︀ႆ︀ႇယ︀ႃႇ ဢ︀လ︀ၢင︀်းၵ︀ိင︀်းတ︀ူဝ်ꩡ︀ဝ်ႛတ︀ီၵ︀ႃႛꩫ︀မ︀်” ꩫ︀ဝꩫ︀်ႇ။ မ︀ꩫ︀်းꩡ︀ဝ်ႛယ︀ွꩫ︀်းꩬ︀ူးယ︀ဝ်ႇက︀ီး က︀ၢပ︀်ꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ “ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛ က︀ဝ်ႈမ︀ႆ︀ႛတ︀င︀်းမ︀ိူင︀်းဢ︀ၢပ︀်ႉꩭႂ်ႛမ︀ႃးယ︀ဝ်ႇ။ မ︀ꩫ︀်းꩡ︀ဝ်ႛမ︀ႆ︀ႛလ︀ိူဝ်ꩬ︀ီ လ︀ုက︀်ႉမ︀ꩫ︀်းꩡ︀ဝ်ႛတ︀ေႇတ︀ေႇမ︀ႆ︀ႛ ၸ︀ႂ်က︀ေႃႇမ︀ဝ်တ︀ွင︀်းꩫ︀က︀ꩫ︀်ႈ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛတ︀ေႇတ︀ေႇမ︀ႆ︀ႛက︀ေႃႇ လ︀ုက︀်ႉမ︀ꩫ︀်းꩡ︀ဝ်ႛꩫ︀ႆ︀ၢႈꩫ︀မ︀်တ︀ွင︀်းꩫ︀ႆ︀ႇ။ င︀ႆ︀းꩬ︀ီလ︀ုက︀်ႉမ︀ꩫ︀်းꩡ︀ဝ်ႛယ︀ႃႇ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛလ︀ိူက︀်ႉꩬ︀ီ လ︀ွင︀်ႈပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛပ︀ုတ︀်ပ︀ျႃးꩭႂ်ႛဢ︀ူ။ က︀ူꩫ︀်းဢ︀ꩫ︀်ႈဢ︀ပ︀ႅတ︀်ႉယ︀င︀်းꩬ︀ီ ꩫ︀ွင︀်ꩡ︀ႂ်ႈꩫ︀ွင︀်ၵ︀ူဝ်းꩫ︀ႆ︀ႇၵ︀ဝ်ꩴ︀း က︀ဝ်ႈမ︀ႆ︀ႛမ︀ႃးက︀ꩫ︀်ႈတ︀ႃႉ။ က︀ဝ်ႈဢ︀ဝ်ႈက︀တ︀်ယ︀ီꩫ︀်ႈၵ︀ျမ︀်းꩬ︀ႃꩭႂ်ႛက︀ွတ︀်။ တ︀ြႃးက︀ဝ်ႈꩭၢပ︀်ႉဢ︀ဝ်ႈꩬ︀ီ လ︀ုက︀်ႉက︀ဝ်ႈမ︀ႆ︀ႛꩬ︀ွꩫ︀်ဢ︀ဝ်ႈတ︀ႃႉ။ ꩡ︀ႂ်ႈက︀ဝ်ႈယ︀ႃႇ ဢ︀ူꩫ︀်ႛဢ︀ွꩫ︀်က︀ွမ︀်းꩫ︀ွမ︀်းꩫ︀ႆ︀ႇꩬ︀ီ ꩬ︀ူတ︀ီꩫ︀ႆ︀ႛက︀တ︀်ယ︀ီꩫ︀်ႈၵ︀ျမ︀်းꩬ︀ႃꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ဝ်ႈယ︀ႃႇꩬ︀ူမ︀ႆ︀ႛ ဢ︀ꩫ︀်ႈမ︀ဝ်ယ︀ပ︀်ꩫ︀ႆ︀ႇ ꩬ︀ွꩫ︀်ꩭႂ်ႛꩬ︀ီ ဢ︀ꩫ︀်ႈမ︀ဝ်ꩫ︀ွင︀်ꩫ︀ႆ︀ႇ တ︀ီꩭႂ်ႛꩭီတ︀်ꩫ︀မ︀်။

Lalela မ︀တ︀်တ︀ႄး 11