Olaatɛ baŋɛ tuki nɛɛkɛɛk lakɛɓa Pɛɛni. Pɛɛni nɛɛk arɓa sooy lak Waakoyok. Pɛɛni sini Waakoyoɓa. Sɛɛn a tukiɗi tuki nɛɛkɛ arɓa sooy lak Waakoyok. Riiɓeɓa Waakoyot ola baŋɛ sɛɛne. Olaatɛ sigaagɛɓa riiɓe Waakoyotuk baŋɛ kɛɛ any sinɔɓa riiɓɛɛ a kiiɗɛ sɛɛnik. Atuɓa wɛɛŋak sɛɛne, egeɓa wɛɛŋa sigi pɛɗɛrka joopoŋk. Tipeyɗi pɛɗɛrka nɛɛkɛ nyuugur tak, ki nyuugur nɛɛkɛ lɔsɛɛɗ pɛɗɛrka nɛɛk adaktan.
Lakɛɓa iɗit sinɔɓa wosɛykɛɛ sooy lak Waakoyok sinɔɓa riyɛ kɛ Yowanisik. Kusɓa kɛnɔ waasiɗi agut pɛɗɛrka, kɛnɔ joop baŋɛ ŋaadiɗi ɔɔtɛ nɛɛkɛɛk. Mokoɓa pɛɗɛrka nɛɛk sɛɛn ɔɗɔwa nɛɛka, maɓa kus kɛnɔ waasiɗi agut pɛɗɛrka. Ɛnyɛnyɛkiɓa pɛɗɛrka sinɔ eekerkank ɗooka sinɔ tipɛyɗi joopa baŋɛk.
Ɓɛɛlɛɓa pɛɗɛrka nɛɛkɛ ɗook raŋk, yakanaɓa ɗook ki sɛɛn ɗegerɔɔn kɛygunɓa riiɓkɛ sɛŋkiŋ. Kusɓa son lak tekaaneer gɛɛŋkik, yakanaɓa kir sɛɛn boŋiiɗ tekaaner gɛɛnɛɛk. Yakana joop sigɛ boŋurk a sigɛ ŋaadiɗi tiriyaakɛ Gɛɛnɛkik baŋɛ, gaɓɛɓa sɛɛga ɓaŋkawuka sinɔ sɛɛg tɔɔmɔk Waakoyotoŋkuk. Ɓartɛɛɓa sɛɛg Waakoyote, ma mokoɓa sɛɛg ɓartɛɛ komoy etoŋk maŋk barɛɛɗ taaroŋk ɗɛɛyaan etoŋk.
Nɛɓa gayɛ pɛɛnii a Iɗit nɛ enyɛɛri wookan a eekeer nɛ beeɗ eteŋkɛ kɔɔr. Nɛɓa dɛnii eemɛyɔn nɛɛkiŋ, oko eemɛyɔn Tɔɔn sinɔ omoŋɔŋk Ɛpɛneek, sinɛ ar sooy lak Ɛpɛnik.
Waasɛɓa Yowanis agut sɛɛn kɛ, "Ege sini Iɗit sinɛkan kɔna tona kɛ mɛlkikɔɔ eete baŋik kaalɛ sɛŋk eetiŋ, agut sinɔɓa ɓɛɛlɛɛɗ eete jeemɛk." Boŋiikɔ wookan wookaana raŋana eteŋk baŋɛ enyaakaat mɛyin nɛɛkik. Agut sinɔ gaɓɛɛɓa higi goy Muuseek, ma wookan a eekeer kurakɓa goy Yeeseek. Kɛɛ iɗit sinɔɓa dɛnɛ Waakoyok adaktan, mayakana yaaŋɛɓa eteŋka Tɔɔn nɛɛk sinɔ omoŋɔŋk dakɛɗa sinɛ ar sooy lak Ɛpɛn Waakoyok.


Saaɓa ɔɗɔweer Ayuuduk wosɛyɛrɗi tapa ŋaadiyɛɛkoŋk a joop Leewiik Yorsaleeme son lak Yowanisik kɛnɔ kaar kɔɔniyar kɛ sɛɛn wooɗuk, nɛɓa sɛŋk ki kaadɛɛt, maɓa tonu kɛ, "Moko eet Keresee."
Nɛɓa sɛɛk kɔɔniyar kɛ, "Anɛ iin wooɗ? Iin Eliyaas?"
Nɛ jumur sɛɛga kɛ, "Moko eet sɛɛn."
Nɛɓa tonurgeeɗ kɛ, "Iin iɗit Pɛrkaakoŋk sinɛɓa tonɛɛ kɛ mɛlkikoynɔŋɔŋk?"
Nɛ tonu kɛ, "Moko eet sɛɛn."
Nɛɓa sɛɛk tonurgeeɗ kɛ, "Anɛ iin wooɗ? Tonun agut ɛɛk nook ɛk kɛnɔ kɛɛɗii jumurii joopa sigaagakɔ tin wosɛyɛrkik?"
Nɛɓa Yowanis jumur pɛɛni iɗit pɛrkaakoŋk Isaayasik kɛ, "Eet koŋgoy iɗit sinɔ oo'oy sinɔɔnɛ paatoonoŋk kɛ, 'In isiisɛɛ gopan Suumiyoŋk."'
Wosɛykɛɛɓa joop gɛɛŋk sooy lak joop Paarisik Nɛɓa kɔɔniyar kɛ, "Nɛ ɔkɔn moko iin Keresee maŋk Eliyaas maŋk iɗit Pɛrkaakoŋk sinɛɓa tonɛɛ kɛ mɛlkikoynɔŋɔŋk, anɛ aadiɗiikin agut jikon?"
Nɛɓa Yowanis jumur sɛɛga kɛ, "Aada saak kɔnu maawɛ, mayakana iɗit sinɔ kiir ɗegerɔɔnuk ɛtɛ kɔne kɔɔr. Mɛlkikɔɔ sɛŋk eete baŋi, kaa saak oolɛ a woora melti saamɛyɛ gɛɛŋkikŋ." Arɓa any sini Bitaniyaake sinaanɛ ar ɗeesɔ Gɔrɔ Yordanoos sinɛɓa aadiɗiiɗ Yowanisik.

Alɛ nɛɛkɛɛk dɛnɛɓa Yowanis Yeesee a kus son lak sɛɛnik nɛ tonu kɛ, "In dɛnɛɛko! Jiŋkuy Waakoyotoŋk sinɛkɔɔ ɔɔyɛ tikiyɛ ɗookoŋkuk sɛɛn sini! Sɛɛn sinɛɓa kɔna tona kɛ, 'Iɗit sinɛkɔɔ mɛlki eete baŋik kaalɛ eet agut sinɔ ɓɛɛlɛɓa eete jeemɛk.' Kaaɓa ɓɔra sɛɛn ɗegerɔɔn, mayakana kusaakan a aadiɗiika maawɛ kɛnɔ sɛŋk yaaŋɛ ɛɛk joopa Israeelik."
Saadi waasɛɓa Yowanis kɛ, "Dɛnaakan Wɛɛŋa sigɔ Geetitaanakik a kurak sɛɛna raŋana dari a ito kulɓeer. Kaaɓa ɓɔra ɗegerɔɔn mayakana iɗit sinɛkanti wosɛyki kɛnɔ aadiɗiika maawɛɛk tonukanta sɛŋk kɛ, 'Dɛninkɔɔ Wɛɛŋa sigɔ Geetitaanakik a kurak nɛ dokur ete omalte raŋk, nɛ iɗit sinɛ sɛɛn sinɛkɔɔ aadiɗi Wɛɛŋakɛ sigɔɔgɛ Geetitaanakik.' Dɛnaakan ɓɔra siniŋ, nɛ waasa kɛ sɛɛn Tɔɔn Waakoyotoŋk."

Alɛ nɛɛkɛɛk ɛtɛrɓa Yowanis a nomtaanak gɛɛŋk sigɔ pɛɛyk saadi kɛkar. Dɛnɛɓa Yowanis Yeesee saa ɗoyiɗ sinaanɛk nɛɓa tonu kɛ, "In dɛnɛɛko, Jiŋkuy Waakoyotoŋk!"
Nomtaanak Yowanisik sigɛ pɛɛyk tiyɛrɓa saa toniiɗ Yowanis any sinik, nɛɓa nomɛrɗi Yeesee.
Nɛɓa Yeese kolɛɛnyɛ nɛ dɛnɛ sɛɛg saa nomɛrɗik, nɛ tonu sɛɛga kɛ, "Ɗɛyɛɛr jikon?"
Nɛɓa sɛɛk tonurgeeɗ kɛ, "Iin Rabi ɓɛɓɛlin eet?" See kɛ Rabik sigi kɛ rɔɔriytank.
Nɛɓa Yeese tonu sɛɛga kɛ, "In kusɛɛ dɛnɛɛ." Nɛɓa kaar a sɛɛn agut omoŋ nɛ kaar dɛnɛr kɛ ɓɛɓɛl eet, nɛɓa ɓeny sinaanɛ gaala a sɛɛn agut omoŋ. Maɓa ar ɔɔtɛ nɛɛkɛ sayitiyɛɛkɛ sigɔɔgɛ aarink.
Joop sigɛɓa tiyɛr pɛɛni sinɛɓa tonu Yowanisik nɔɓa nomɛr Yeeseek, egeɓa omaay Indiriyaas, manya Simion Petrosa. Tuki nɛɛkɛ kɛɛɓa Indiriyaas son lak manyaak Simionuk, nɛ tongeeɗ kɛ, "Laŋiikɔ Mɛsiiŋ." See kɛ Mɛsiik sigi kɛ Kereseek.
Saadi baŋiya ɗɔkuɓa Indiriyaas Simion son lak Yeeseek. Nɛɓa Yeese mermen jɛt, nɛ tongeeɗ kɛ, "Iin Simion, tɔɔn Yoonaak, mayakana a tukiɗi sisɔ riyɛni kɛ Keepaa." See kɛ Keepaak sigi kɛ Petros maŋk talaaɗɛk.

Alɛ nɛɛkɛ ɗɛyɛɓa Yeese ɛnyɛ Gɛlilaakaak. Nɛɓa laŋki Pilipoos nɛ tongeeɗ kɛ, "Nomate." Pilipoos iɗitɓa Beetɛ Saydaak, katamɛ wɛy Indiriyaas a Petrosuk.
Laŋkiɓa Pilipoos Naatinaeel nɛ tongeeɗ kɛ, "Laŋkiikɔ iɗit sinɛɓa taapɛ Muuse Wargatɛɛ Higiyoŋk maɓa ɓɔrɛ joop pɛrkaakoŋk taapɛr Wargatɛɛ Pɛrkaakoŋk agut sɛɛnik. Sɛɛn Yeesee Naajreetik tɔɔn Yoosepuk."
Nɛɓa Naatinael tonu Pilipoosa kɛ, "Oolɛ aasi a laŋɛɛ Naajireete any sinɔ mentanŋɔŋkuŋ?"
Nɛ Pilipoos tongeeɗ kɛ, "Waɗ dɛnik."
Saaɓa Yeese dɛnɛɛɗ Naatinaeel a kus son lak sɛɛnik, nɛɓa tonu agut sɛɛn kɛ, "Ege sini iɗit Israeelik sinɔ eekerkank, ɛ kiiɗɛ koɓi sinɔ ŋɛɛwɛnŋɔŋk."
Nɛɓa Naatinael tongeeɗ kɛ, "Ɗegerinti ɛk?"
Nɛɓa Yeese jumurgeeɗ kɛ, "Dɛnɛɛra kɔnu a arkin keet bɛlɛɛsik derɛ, a in kɔnu Pilipoos kiir tirii."
Ɔɔtɛ sinaanɛ tonuɓa Naatinael kɛ, "Rɔɔriytaano, iin Tɔɔn Waakoyotoŋk! Iin Suumi Israeelik!"
Nɛɓa Yeese tongeeɗ kɛ, "Ŋaadin agut sinɔ kɔna toniiɗa kɛ, 'Dɛnɛɛra kɔnu a arkin keet bɛlɛɛsik derɛk.' Dɛninkɔɔ ola sigɔ kaalɛr sinik. Nɛɓa tonu kɛ, "Eekeer tona kɔnaaŋ, dɛnɛɛrkɔɔ a tayɗi dari, nɛ ŋaararki wosɛytaanak Waakoyotoŋk nɛ kurak Tɔɔna Etoŋk."

Lalela Yowanis 1