Zapotec, Aloápam

Atti deobali cue yies lo yu-ni nna chila do Benni anque tisa-na. Benni anque tisaha nna len Tata Do Iyyabaahaba doe, la tisahaba Benniha anque Tata Do Iyyabaaha. Labe Benniha doe len Tata Do Iyyabaaha atti deobali cue yies lo yu-ni. Len Benni anque tisaha beni Tata Do Iyyabaaha iyáxea nu seꞌe. Ttirca lä Benni anque tisaha nna ni ttu nu seꞌe bittu ucana. Leni Benni anque tisa te elha nabani. Elha nabaniha nna anque xieni gue Tata Do Iyyabaaha ridí ca benni seꞌe yies lo yu-ni. Xianiha nna riguꞌe xieni atta anca chulha, chulhaha nna läga udána udheana lo xieniha.
Tata Do Iyyabaaha udhelhe yies lo yu-ni ttu unbiyuu lábi Juan. Biꞌiniha bitabi utixxiꞌabi gue xieniha, qui iyáxea benni tsia lecani Benni anca xieniha. Läga Juan anca xieni, suna bitaba biꞌiniha utixxiꞌabi gue Benni anca xieniha. Benni gualíga anca xieni rudani lhiꞌu lheꞌe lastoo iyáxea benni chi dee yies lo yu-ni.
Yies lo yu-niba chi doe. Len labe beni Tata Do Iyyabaaha yies lo yu-ni, ttiaca ca benni seꞌe yies lo yu-ni nna läga beon biacana Benniha. Len benni guebe bisíe, lacana nna läga belabicana Benniha. Ttiaca iyába ca benni ca nu belabicana Benniha lhe güia lecanie lhe, lee nna benie gapacana derechu acacana xiꞌini Tata Do Iyyabaaha. Beꞌeyucana ucacana xiꞌini Tata Do Iyyabaaha, läga anía ancacana ulcana, niguaba ca tata nan guecani uca lecani lhe, ucacana xiꞌini Tata Do Iyyabaaha cumu lee nna aníaba uca lee.
La tisaba Benniha beaque benni, udoe len riꞌi. De nu guate Benniha, besiꞌin Tata Do Iyyabaaha ri, ruleꞌenie ri nu gualí lhe. Begüiari elha ra xxen le guee bete Tata Do Iyyabaaha de tturba Benniha anque xiꞌinie. Juan utixxiꞌabi gue Benniha atti unnebi rábi:
—Gue Ben-ni nua rinnea atti ria: “Benni isía dequide neti nna Benniha anque Benni ra xxeniru lee atti neti, cumu primerla Benniha chi doe atti antisla dhoa.”
De chi anque Benni te iyá guee nna iyábari chi uxíri lhe ridíri lhe adí elha tsee rute len riꞌi. Cumu ca ley gue Tata Do Iyyabaaha nna Moisésba betebi Benniha len riꞌi. Ttiaca elha siꞌi le gue Tata Do Iyyabaaha lhe nu anca gualí lhe, Jesús Benni anque Cristu beleꞌe loe Ben-na len riꞌi. Tsa läganu chi bilenna Tata Do Iyyabaaha. Benni anque tturbe xiꞌinie, ancaguabe Dios, doe cuitta tata guee, Ben-na beleꞌe loe gaxasná anca Benniha len riꞌi.


Aní becabi Juan gue ca bixxudi lhe gue ca benni datía Leví runcana sina gue yotu udhelha ca nu lo gue ca benni Israel. Cunní nna lheꞌe yiesi Jerusalén li udácana diacana güennaba tisa Juan rácan bi:
—Lu nna ¿núnna ancalu?
Biꞌiniha nna lägabi bedhea lebi, utixxiꞌababi nu ancaba. Labi nna rábi cana:
—Läga neti nua Cristu Benni chi gaꞌanani Tata Do Iyyabaaha isía odile ri.
Lacana nna bedennaba tisa dacabacana biꞌiniha redeácan bi:
—¿Núla ancalu ganna? ¿Si luba nua profeta Elías?
Juan becabibi rábi:
—¡Dica!
Nianna, redeácan bi:
—¿Si luba nua profeta chi gaꞌana isía aca?
Labi nna becabibi rábi:
—¡Dica!
Lacana nna redeácan bi:
—¿Núla ancalu gannaxa? Qui anáchu quixxiꞌentu ca nu udhelhacana riꞌitu. Lu nna ¿núla rálu ancalu?
Labi nna rábi:
—Neti anca ttu benni requi ribesiꞌa lo yu bisi rinnea ria attiba rá profeta Isaías: “Lhatsiru gualodú lele attiba ttu neda relixxana qui chi seꞌe tseele esále Benni bananie ri-na gansi chi bisíe.”
Ca nu güia güennaba tisaha nna ancacana benni sela ca nu fariseo. Lacana nna unnaba tisattebacan bi rácanbi:
—¿Biacala nna rugadilu benni inda gansi läba lu nua Cristuha, bittuguaba lu nua Elías lhe bittuguaba ancalu profeta lhe?
Juan becabibi guecani rábi cana:
—Neti nna suntteba inda rugadia benni, ttiaca lagüi guebale requi ttu benni bittu anca bienle. Benniha nua daa dequide neti. Neti nna nibala bi elha ralha idhasia lo guaracha guee.
Unní uca lo yu lá Betania, nu re ttu ladu gue yoo Jordán atta rugadi Juan ca benni inda.

Betteyú sá nna biláni Juan Jesús dee atta dubiha, nianna rábi:
—¡Gualgüiarga! Ni benni anque carneꞌe udhelha Tata Do Iyyabaaha qui cue ca tulha gue ca benni seꞌe yies lo yu-ni. Gue Ben-ni nua rixxiꞌatia le atti ria: “Benni daa dequide neti nna anque Benni ra xxeni ru lee atti neti. Cumu anque Benni udo primero atti neti.” Ni neti bittu yua nuxa anque lania. Qui un biaba ca benni Israel-na nuxa anque, nuarca delha rugadia cana inda.
Utixxiꞌaguaba Juan rábi:
—Bilátia Espíritu gue Tata Do Iyyabaaha dee guadie iyyabaaha attiba ttu becha bisíe udoe iqui Benniha. Neti nna läga chi yua nuxa anque lania, ttiaca Benni udhelhe neti ugadia benni inda Benniha re neti: “Benni ilenlu chadi Espíritu quia dhoe iquie, Benniha nua ugadie ca benni inda leni Espíritu quiaha.” Neti nna chi bilátie. Nuarcala rixxiꞌaya ria: Lee Benni xiꞌini Tata Do Iyyabaaha.

Betteyú sá nna níaba dedhú Juan leni chupa ca biꞌini rudheti ca tisa ruleꞌebiha. Atti biláni Juan ute Jesús atta seꞌecabiha nna ráttebabi:
—¡Gualgüiarga! Ni benni anque carneꞌe udhelha Tata Do Iyyabaaha dia-na.
Irupaba ca biꞌini rudheti ca tisa ruleꞌe Juan seꞌe lenbi nía, atti bienquinbi nu rá biꞌiniha nna diattebacabi denocabi Benniha. Jesús bodequitteba loe, atti bilánie ca biꞌiniha denocabi nna unnaba tisattebe ca biꞌiniha re cabi:
—¿Bi reguilale?
Ca biꞌiniha nna becabicabi rácabi:
—Rabí, ¿gala dolu? (Tisa rabí dienna innána maestru.)
Jesús becabie re:
—Gualtá gualgüia.
Nianna, güiattebacabi guagüiacabi atta do Benniha attiba tu retin ttapa nua. Lacabi nna níaba useꞌecabi len Benniha itúba ulhaha.
Andrés betsi Simón biꞌini láguaba Pedro, biꞌiniha nua ttu ca nu chupa bienini ca tisa rixxiꞌa Juan, dia deno Jesús. Andrés nna primertteba betsibi Simón guatilabi, nianna rábi biꞌiniha:
—Guattiꞌabatu Mesías. (Mesías ancana tisa hebreo dienna innána Cristu len tisa griego.)
Andrés nna uchettebabi Simón atta du Jesús. Atti biláni Jesús biꞌiniha nna ráttebe:
—Lu nua lá Simóni xiꞌini Juan. Nnanna nna Cefasba gatta lálu. (Cefas ancana tisa arameo dienna innána Pedro leni tisa griego.)

Betteyú sá nna bebequi le Jesús tsie daca lo yu gue Galilea. Nía nua guattiꞌe Felipe, atti ráttebe biꞌiniha:
—Utá betteno neti.
Felipe beaca lasbi yiesi Betsaida, attaguaba beaca lasi Andrés lenbi Pedro. Felipe nna güiattebabi guatilabi Natanael, nianna rábi biꞌiniha:
—Chi guattiꞌatu Jesús gue Nazaret xiꞌini José. Gue Benni nua rixxiꞌa Moisés lo ca ley bocaꞌanbi lenri, gue Benni guaba nua beni ca profeta lo sitsi lhe.
Natanael nna rábi:
—¿Si güiría tsa ttu benni tsee lheꞌesi Nazaret?
Felipe nna rábi:
—Utárga begüia xa.
Atti biláni Jesús Natanael chi dabi ribigabi gaxxaba atta due nna ráttebe:
—Benni da-ni nna gualíga ancana benni Israel, lana nna bittu run leni.
Natanael nna rábi:
—¿Tti uca ben bialu neti?
Jesús nna becabie re:
—Atti antisla gaxi Felipe-na lu, neti nna chi bilátia lu atti dolu xan ya iguha.
Natanael nna becabibi rábi Benniha:
—Maestro, lu ancalu xiꞌini Tata Do Iyyabaaha, luguaba nua anca lu Benni rinnabia riꞌitu ca benni Israel-ni lhe.
Jesús becabie re:
—¿Si de rpea lu chi bilátia lu dolu xan yaga gue iguha nuarca ria lelu? Xxenirla anca nu chi ilenlu.
Ráguaba Jesús:
—Neti gualíbatia ria le, lebiꞌi nna ilenle iyyabaaha du yalie. Iláguabinle ca ingeli gue Tata Do Iyyabaaha chadique lhe eyopique lhe xequia, neti Benni unbiyuu daa iyyabaaha.

Lalela San Juan 1