साप्‍पन् निसुम्
तोलिङ्‌सोमु मे़प्‍मनाबा पान्‍छेःक्‌वाःल्‍ले़ कुबेन् “नावागे़न् चइःत् इग्र कुहेःक्‍सिङ्‌मा” पोङ्॥ कन् साप्‍पन्‍नो इक्‍सादिङ् खाम्‍बेःक्‍माल्‍ले़ नावागे़न् चइःत् पोःक्‍खे़बा, मे़न्‍छाम् याप्‍मिहाॽ नावागे़न् चइःत् मे़बोःक्‍खे़बा, लायो लासोःत्‍ले़ कुहेःक्‍सिङ्‌मा पोःक्‍खे़बा हे़क्‍क्‍याङ् इक्‍सादिङ् खाम्‍बेःक्‍मो तुक्‍खे लाक्‍खे नु तुक्‍मा सिमारे़ कुहेःक्‍सिङ्‌मा पोःक्‍खे़बा खे़ब्‍याङ् तागे़रा निङ्‌वाॽफुमाङ्‌ङिल्‍ले़ मे़न्‍छाम् याप्‍मिहाॽनु ओगाप् चोगु पाःत्तुबा पाःन्‍हाॽ पत्॥ तोलिङ्‌सोमु साप्‍पनिन् ने़त्‍छि कुलक्‍को हामा सुक्‍ते़त्—
१) १-११ नाःत्‍ला—इक्‍सादिङ् खाम्‍बेःक्‍मान् नावागे़न् चइःत् पोःक्‍खे़बा नु मे़न्‍छाम्‍दिङ् नाम्‌याप्‍मिरे़ कुहेःक्‍सिङ्‌मा पोःक्‍खे़बा साप्‍मुःन्‍धुम्॥ कॽयो आदम नु हब्‍बा, कयिन नु हाबिल, नुह नु वदप्‍मा हे़क्‍क्‍याङ् बाबेलबा चङ्‌हिम्‍मो पोःक्‍खे़बा पाःन्‍हाॽ साप्‍ते़आङ् पत्॥
२) १२-५० नाःत्‍ला—इस्राइलबा सुवाङ्‌हाॽरे़ खुनिॽ पाधे़बा, सुधे़बा नु ताक्‍थे़बाहाॽरे़न् साप्‍मुःन्‍धुम् पत्॥ खे़ङ्‌हाॽरे़ खुनिॽ के़रे़क्‍नुःल्‍ले़ तगिबा मना अब्राहाम्‍मिन् वये़, खे़ल्‍ले़ तागे़रा निङ्‌वाॽफुमाङ्‌ङिन् ताःक्‍पोगे़न् नसान् चोगुबा नु कुइङ्‌जाङ्‌हाॽ इःत्तु नाःत्तुबा पाःन्‍हाॽ साॽरिक् नुरिक् के़इङ्‌बा चोक्॥ खे़न् एगाङ् खे़ल्‍ले़ कुस्‍सा इसहाक्‍के़न् कुम्‍मे़न्‍छाॽ याकुब (खुने़ॽ “इस्राइल” आङ् मे़मे़त्तु), याकुबरे़ कुस्‍सा ये़म्‍बित्‍छा थिबोङ्‌ङाङ् ने़त्‍छि (१२) मे़वये़, खे़ङ्‌हाॽलाम् इस्राइलओ थिबोङ्‌ङाङ् ने़त्‍छि सुवाङ्‌हाॽ मे़बोःक्‍खे़, खे़ङ्‌हाॽरे़ खुनिॽ मुःन्‍धुम्‍हाॽ कॽयो खोदे़त्॥ खे़न् थिबोङ्‌ङाङ् ने़त्‍छि ये़म्‍बित्‍छा साहाॽओ लत्‍छा युसुफ हे़क्‍क्‍याङ् खुने़ॽनु के़बोङ्‌बा हिन्‍दोक्‍हाॽ पत्, खे़ल्‍ले़चोगुल्‍ले़ याकुब नु वेॽ कुस्‍साहाॽ खुनिॽ हिम्‍सयङ्‌नु सोरिक् मिस्र लाजेॽओ मे़बःन्‍दे़ मे़बे, खे़न् पाःन्‍हाॽ नुरिक्‍काङ् पोधक् पोःक्‍खे़आङ् पत्॥
कन् साप्‍पन्‍नो मे़न्‍छाम् याप्‍मिहाॽरे़ खुनिॽ खे़दाॽ पाःन्‍हाॽ पत्‍छाङ् कॽयो के़रे़क्‍नुःल्‍ले़ तगि तागे़रा निङ्‌वाॽफुमाङ्‌ङिल्‍ले़ थे़मा, थे, हे़न्‍हाॽ चोगु के़लॽबा पाःन्‍हाॽ नुरिक्‍काङ् चे़क्‍खे़ पाःत्ते़आङ् पत्॥ तागे़रा निङ्‌वाॽफुमाङ्‌ङिल्‍ले़ इक्‍सादिङ् खाम्‍बेःक्‍मान् से़क्‍खा, कुजे़क्‍पा, कुत्‍चाॽए नावागे़न् चइःत् ने़स्‍सुबा फाॽआङ् पाःत्तुर हेःक्‍सिङ् हे़क्‍क्‍याङ् निङ्‌वाॽफुमाङ्‌ङिल्‍ले़ खुने़ॽ के़दिम्‍बा के़नाःप्‍पाहाॽ चक्‍मे़ल्‍लॽए लुङ्‌माॽ तुक्‍तुसि के़लॽबा माङ्‌हुप्‍नु सोसोरिक् साप्‍पनिन् नुप्॥ कुहेःक्‍सिङ्‌माआङ्‌धो कुनुप्‍मा थारिक् कन् साप्‍पन्‍नोबा तुम् पाङ्‌लोबाग निङ्‌वाॽफुमाङ्‌ङिन्‍नेरो॥ खुने़ॽ ताप्‍फे़ःम्‍बा याःम्‍बक् के़जोःक्‍पाहाॽ खासे़न् चोगुसिआङ् साम्‍बान् खुम्‍दिङ् पिरुसि, आबाङे कुमनाहाॽ लाम्‍लोसुसिआङ् फाॽरुसि हे़क्‍क्‍याङ् खे़ङ्‌हाॽरे़ खुनिॽ साप्‍मुःन्‍धुम्‍हाॽ यारिप् चोगु॥ मे़न्‍छाम् याप्‍मिहाॽरे़ खुनिॽ नसाःन्‍निन् खारात् युक्‍खुर खे़न् नासाॽमा नु नसाःन्‍निन् आभे़ल्‍ले़ आभे़ल्‍ले़ थारिक्‍साङ् कुहिङ्‌वे़त् हे़क्‍के वाॽर के़लॽबा निङ्‌सेःक्‍ले़ उन्‍छोन् उन्‍छोन् कन् साप्‍पन्‍निन् साप्‍ते़बारो॥
ताङ्‌बा थामिङ्
काक् इक्‍सादिङ् खाम्‍बेःक्‍मान् नु मे़न्‍छाम् याप्‍मिरे़ नावागे़न् चइःत् पोःक्‍खे़बा १:१–२:२५
लायो लासोत् नु तुक्‍खे लाक्‍खेरे़ कुहेःक्‍सिङ्‌मा ३:१-२४
आदम्‍माङ्‌धो नुह थारिक् ४:१–५:३२
नुह नु वदप्‍मा ६:१–१०:३२
बाबेलबा चङ्‌हिम् ११:१-९
सेमआङ्‌धो अब्राहाम थारिक् ११:१०-३२
सुधे़बा थाःक्‍थे़बाहाॽ—अब्राहाम, इसहाक नु याकुब १२:१–३५:२९
एसाबरे़ कुस्‍सा कुएहाॽ ३६:१-४३
युसुफ नु कुम्‍भुॽ कुन्‍साॽहाॽ ३७:१–४५:२८
इस्राइलिहाॽ मिस्र लाजेॽओ ४६:१–५०:२६

Lalela तोलिङ्‌सोमु साप्‍पन् निसुम्