Kisi Bible © Bible Society in Liberia, 2015.

Sɔ̄ɔ̍ŋ le̍bo̍llo̍ŋ
Yāu̍wo̍ ho̍ō tɛ̄ɛ̄sīāā ndɔ̄ɔ̍ cho̍ ni̍ āā, “Kāndɔ᷄ŋ Chi̍e̍ēŋndo̍.” Yāu̍wo̍ ho̍ō ndu̍ chɔ̍m a̍ mɛ̄ɛ̍ Mɛ̄lɛ̄ka̍ tōōsi̍a̍a̍ nyɛ̄ o̍ nyɛ̄ fe̍e̍ o̍ ka̍ndɔ᷄ŋndo̍ yɛ̍ ni̍. Ndu̍ chɔ̍m a̍ mɛ̄ɛ̍ Mɛ̄lɛ̄ka̍ tōōsi̍a̍a̍ sīndɛ̄ chi̍e̍ēŋndo̍ yɛ̍ ni̍. Ndu̍ chɔ̍m a̍ mɛ̄ɛ̍ Mɛ̄lɛ̄ka̍ tōōsi̍a̍a̍ wāŋndā chīe̍e̍ya̍a̍ tāsi̍a̍a̍ yɛ̍ ni̍. O̍ ko̍ŋ kɔ̍ɔ̍lī, mbo̍ chɔ̄m a̍ mɛ̄ɛ̍ yɔ̄ŋ wɔ̍ɔ̍ŋndo̍ a̍ dɛ̍nɛ̍ pa̍lāa̍ ō hīŋ o̍ chi̍e̍ēŋndo̍ chōo̍ yɛ̍. Mbo̍ chɔ̄m vɛ̄lɛ̄ nɛ̄i̍ Mɛ̄lɛ̄ka̍ bīī wa᷅ŋndā chīe̍e̍ya̍ wo̍.
Yāu̍wo̍ ho̍ō wānā pi̍ɔ̍ū ndu̍ pɛ᷄lta̍ bɛ̄ŋnda̍ŋ sālā tīɔ̍ɔ̍ŋ. Pɛ᷄l tāso̍o̍ chɛ̍ŋ o̍ bōllē tāse̍le̍ŋ mbo̍ kūā o̍ bōlle̍ tɔ̍ a̍ lē pīlɛ̍ ni̍ (1–11). O̍ pɛ᷄l tāse̍ ko̍ŋ ni᷅ŋ ko̍na̍a̍ chō a̍ mɛ̄ɛ̍ Mɛ̄lɛ̄ka̍ tōōsi̍a̍a̍ chi̍e̍ēŋndo̍ yɛ̍ ni̍. Lo̍ŋ ko̍na̍a̍ chō a̍ wāŋndā chi̍e̍ēya̍ o̍kɔ̄ɔ̍ ni̍ mɛ̄ɛ̍ nda̍ wa̍ o̍ tāse̍la̍ ndɔ̄ɔ̍ yɛ̍. O̍ pɛ᷄l tāso̍o̍ ho̍ō ni᷅ŋ ko̍na̍a̍ chō a̍ A̍dām nda̍ I̍fī o̍kɔ̄ɔ̄ ni̍, a̍ Ke᷅ŋ, a̍ E̍bɛ̄ɛ̄l, a̍ Nu̍u̍wā. Lo̍ŋ ko̍na̍a̍ chō a̍ tāŋgūl vīlɛ̄ī bɛ̄ndū wāŋnda̍ wa̍ Ba̍bɛ̄ɛ̄l chi̍e̍e̍ wo̍ ni̍. Pɛ᷄l di̍i̍ŋ ndɔ̄ɔ̍ kāndu̍ŋ o̍ bōlle̍ tɔ̍ a̍ ī ŋīi̍ŋ mbo̍ kūā o̍ bōlīī be̍le̍-ŋu̍ɛ̍ɛ̍nu̍ ve̍ (12–50).
Lo̍ŋ ko̍na̍a̍ chō a̍ I̍sɔ̄lūɛ̍i̍ya̍ fi̍nyāā ndāā ma̍māā tāsi̍a̍a̍ o̍kɔ̄ɔ̄ ni̍. Fi̍nyā ndā ma̍māa̍ E̍bīlāha᷅m, ndu̍ he̍l tɔ̍ɔ̍ le̍ tīīnda᷄ŋ bɛ̍ndū ndu̍ o̍o̍ dɔ̍ū o̍ Mɛ̄lɛ̄ka̍ ni᷄ŋ ndo̍ ni̍. O̍ pɛ᷄l di̍i̍ŋ ndɔ̄ kōŋ ni᷄ŋ ko̍na̍a̍ chō a̍ po̍ E̍bīlāha᷅mndo̍ Āa̍se̍ o̍kɔ̄ɔ̄ ni̍, a̍ po̍ ma̍ma̍ E̍bīlāha᷅mndo̍ Che̍kɔ̍pū. Che̍kɔ̍pū nɔ̍ vɛ̄lɛ̄ dīōla̍ŋ ni̍ āā, I̍sɔ̄lūɛ̄ī. Lo̍ŋ wānā sa̍a̍lūŋ vɛ̍lɛ̄ ko̍na̍a̍ a̍ Che̍kɔ̍pū pūa̍a̍ ndūāā tɔ̍ a̍ ā ŋīɔ̍ɔ̍ŋ nda̍ o̍kɔ̄ɔ̄ ni̍. O̍ nda̍ ni̍ŋ yu̍ŋgu̍la̍ tɔ̍ a̍ lā tīɔ̍ɔ̍ŋnda̍ŋ I̍sɔ̄lūɛ̄ī la̍ fu̍la̍ ni̍. Mi̍ pɛ᷄l di̍i̍ŋ ndɔ̄ɔ̍ ho̍ō ō yīsīlā sūɛ̍i̍ a̍ Che̍kɔ̍pū pūa̍a̍ ndūa̍a̍ o̍kɔ̄ɔ̄. Chōo̍sɛ̍ ni̍, a̍ pūa̍a̍ ŋ̍wa᷅ŋ tɔ̍ a̍ wānā pi᷅li̍a̍a̍ Che̍kɔ̍pū wa̍ ā tūa̍a̍. Nda̍ hi̍ŋ a̍ Che̍kɔ̍pū a̍ yu̍ŋgu̍la̍ ndāla̍ŋ lā tɔ̄la̍ŋ I̍chi̍pī ni̍. Mi̍ chē bɛ̍ɛ̍ mi̍ yāu̍wo̍ ho̍ō ō sūāā a̍ wāŋndā chīe̍e̍ya̍ o̍kɔ̄ɔ̄ ni̍, kɛ̍ ndu̍yɛ̍, sūɛ̍i̍ le̍bo̍lle̍ lēni᷄ŋ ndi̍ cho̍ ko̍na̍a̍ a̍ sɔ̄ɔ̍ŋ Mɛ̄lɛ̄ka̍ tōsa̍ wo̍ŋ o̍kɔ̄ɔ̄ ni̍. Ō kāndu̍ fɛ̍lɛ̍ŋ a̍ chɔ̄mndo̍ mɛ̄ɛ̍ chi̍e̍ēŋndo̍ lōōku̍ wā yɛ̍, māā Mɛ̄lɛ̄ka̍ to̍o̍si̍a̍a̍ chi̍e̍ēŋndo̍ lɛ̄ŋ a̍ chōo̍ cho̍o̍ ni̍. Mi̍ yāu̍wo̍ ho̍ō mɛ̄ɛ̄lū īsɔ̄ɔ̍ a̍ būŋgɛ̄ī Mɛ̄lɛ̄ka̍ chūe̍l ŋ̄wāŋndā chīe̍e̍ māā ō chō hīōūwɔ̄ɔ̄ lāchī a̍ nda̍ māndāa̍ ve̍. Chɔ̍ŋ o̍ kāndɔ᷄ŋndo̍ mbo̍ fūūlūū o̍ mɛ̄ɛ̄lu̍la̍ŋ, mi̍ yāu̍wo̍ ho̍ō chɔ̄m a̍ Mɛ̄lɛ̄ka̍ o̍kɔ̄ɔ̄ māā ndu̍ cho̍ yāma̍nɔ̄ɔ̍ o̍ ki̍lūl wa̍nāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ yāmɛ̍i̍, o̍ ko̍ŋ kɔ̍ɔ̍lī, mbō tūsi̍ nda̍ nyɛ̄ pālāa̍ chōo̍ wo̍ ni̍. Mi̍ yāu̍wo̍ ho̍ō chɔ̄m māā Mɛ̄lɛ̄ka̍ chō wānāā ndūa̍a̍ I̍sɔ̄lūɛ̄ī wā kɔ̄ɔ̄lī, ndu̍yɛ̍, mbō māla̍ nda̍. Mbo̍ chɔ̄m māā ndu̍ Mɛ̍lɛ̄ka̍ ndu̍ cho̍ I̍sɔ̄lūɛ̍i̍ya̍ bɛ̄ɛ̄ndīāā a̍ mɛ̄ɛ̍ nda̍ nɔ̄ le̍ wāa̍ o̍ sīɔ̄dīi̍ lāchīo̍o̍ ni᷄ŋ yɛ̍ ni̍. Yāu̍ ma̍si̍ndɛ̄ si̍ndɔ̄ɔ̍ ho̍ō, ō pōōnyi̍a̍ŋ le̍ chɔ̄mndo̍ a̍ tīīnda᷄ŋ I̍sɔ̄lūɛ̍i̍ya̍ dɔ̄ū o̍ Mɛ̄lɛ̄ka̍ ni᷄ŋ ndo̍, ndu̍yɛ̍ mbō māla̍ ŋ̄wāŋndā chīe̍e̍ a̍ mɛ̄ɛ̍ nda̍ hīāū la̍chi̍ a̍ tīīnda᷄ŋ wa̍ā le̍nde̍ dɔ̍u̍wɔ̄ɔ̍ o̍ Mɛ̄lɛ̄ka̍ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ yɛ̍.
Būŋgāŋ lēbōllo̍ŋ
A̍ mɛ̄ɛ̍ Mɛ̄lɛ̄ka̍ tōōsi̍a̍a̍ chi̍e̍ēŋndo̍ a̍ wāŋndā chi̍e̍e̍ya̍ yɛ̍ o̍kɔ̄ɔ̄ (1:1–2:25)
A̍ mɛ̄ɛ̍ yɔ̄ŋ wɔ̍ɔ̍ŋndo̍ a̍ sāŋgāa̍ ō kāndu̍ŋ yɛ̍ o̍kɔ̄ɔ̄ (3:1-24)
Chɔ̍ŋ a̍ A̍dām mbo̍ kūā a̍ Nu̍u̍wā (4:1–5:32)
Nu̍u̍wā a̍ mɛ̄ŋmā hūna᷄ŋ (6:1–10:32)
A̍ chīɛ̄ī vīlɛ̄ī bɛ̄ndōo̍ Ba̍bi̍lɔ̄ŋ o̍kɔ̄ɔ̄ (11:1-9)
Chɔ̍ŋ a̍ Si̍ɛ̄m mbo̍ kūā a̍ E̍bīlām (11:10-32)
Chūāūwāā kpe̍e̍kpe̍i̍ya̍: E̍bīlāha᷅m, Āa̍se̍, a̍ Che̍kɔ̍pū (12:1–35:29)
A̍ wānāa̍ fu̍la̍ o̍ pūlāle̍ I̍sɔ̄le̍ŋ chōo̍ wa̍ o̍kɔ̄ɔ̄ (36:1-43)
A̍ Chōo̍sɛ̍ nda̍ bɛ̄ndāā ndūa̍a̍ o̍kɔ̄ɔ̄ (37:1–45:28)
A̍ I̍sɔ̄lūɛ̍i̍ya̍a̍ wa̍ I̍chi̍pī wa̍ o̍kɔ̄ɔ̄ (46:1–50:26)

Lalela Chɛ̄nɛ̍se̍ē Sɔ̄ɔ̍ŋ le̍bo̍llo̍ŋ