Kisi Bible © Bible Society in Liberia, 2015.

Sɔ̄ɔ̍ŋ le̍bo̍llo̍ŋ
Sɔ̄ɔ̍ŋ Lu̍kū po̍o̍nyi̍a̍a̍ o̍ yāu̍ Yōōŋgū Kɛ̄ndɛ̍ Mɛ̄lɛ̄ka̍ o̍ po̍o̍nyi̍a̍a̍ wo̍ ni᷄ŋ ndo̍ŋ a̍ mu̍ŋ o̍kɔ̄ɔ̄ o̍ hi̍o̍ū mu᷅ŋ lāchī a̍ pōōnyīa̍a̍ o̍ yāu̍wo̍ ho̍ō ni᷄ŋ ni̍. Le̍ sa̍bū kpe̍e̍kpe̍i̍ Lu̍kū po̍o̍nyi̍a̍a̍ yāu̍wo̍ ho̍ō wo̍ cho̍ ni̍ māā ndu̍ o̍o̍ hɛ̍na̍ŋ mbō chɔ᷄m wāŋnda̍ mɛ̄ɛ̍ wānāā lāāla᷄ŋa̍a̍ tāsi̍a̍a̍ ā tōsa̍ mi̍ Yōōŋgū Kɛ̄ndɛ̍ Mɛ̄lɛ̄ka̍a̍ a̍ Chi̍i̍sū o̍kɔ̄ɔ̄ o̍ ti̍ū bā o̍ bā fe̍e̍ sa̍na̍a̍ a̍ māla̍ Nyi̍na̍ Mɛ̄lɛ̄ka̍a̍ yɛ̍. Yāu̍wo̍ ho̍ō, ō chō māchūāā īsɔ̄ɔ̍ chɔ᷅m a̍ Ki̍li̍sīɔ̄ŋnde̍ŋ o̍kɔ̄ɔ̄, a̍ mɛ̄ɛ̍ le̍ ka̍ndu̍ŋ Chu̍ūwa̍ tɛ̄ɛ̄ŋ ha̍a̍a̍ mbo̍ lō o̍ ko̍ŋ mi̍ lē sīmnu᷄ŋ su̍ɛ̍i̍ chi̍e̍ēŋndo̍ kpo̍u̍ yɛ̍. Lu̍kū ndu̍ o̍o̍ hɛ̍na̍ŋ vɛ̍lɛ̄ mī ndu̍ o̍o̍ di̍mu̍l wāŋnda̍ māā Ki̍li̍sīɔ̄ŋnda̍ ā ve̍ ku̍nda̍ ki̍ndi̍ le̍ chīēī le̍ Lu̍o̍ma᷅ŋnda̍ pīɔ̄lɔ̄ɔ̄ o̍ lēmāsā le̍. Mbo̍ chɔ̄m vɛ̄lɛ̄ māā nɛ̄i̍ Mɛ̄lɛ̄ka̍ chɔ᷄m Chu̍ūwa̍ le̍ ndu̍ pīɛ̄īyo̍ lēchōo̍ wo̍ māā bōllē ndɔ̄le̍ŋ sōlīo̍o̍ le̍ cho̍ Ki̍li̍sīɔ̄ŋnde̍ŋ ni̍.
Wānā pi̍ɔ̍ū ya̍u̍ Wa̍lta̍ Wānāa̍ Chi̍i̍sūa̍a̍ sālā yāa̍. 1) Mɛ̄ɛ̍ Ki̍li̍sīɔ̄ŋnde̍ŋ lē kāndu̍ŋ Chūlu̍sɛ̄lɛ̄m yɛ̍ chɔ̍ŋ a̍ bōōndi̍i̍ Chi̍i̍sū mi̍i̍ŋgu̍ o̍ ɛ̄chɛ̍nɛ̄ ve̍. 2) Mɛ̄ɛ̍ o̍ si̍o̍u̍ ti̍u̍ o̍ lɛ̄ŋndē Pālēsi̍tīŋnde̍ŋ ni᷄ŋ yɛ̍. 3) Mɛ̄ɛ̍ o̍ fu̍u̍lu̍u̍ o̍ lɛ̄ŋīi̍ ho̍lnu̍ŋ pe̍e̍ mɛ̄ŋmā īhɛ᷄l nɔ̍ dīōla̍ŋ āā Mɛ̄dītālu̍e̍e̍nīāā ndo̍ ve̍ ni᷄ŋ, mbo̍ fūūlūū Lu̍o̍m chi̍e̍e̍ di̍ka̍ yɛ̍.
Sūɛ̍i̍ le̍bo̍līī kpe̍e̍kpe̍i̍ cho̍ a̍ yāu̍wo̍ ho̍ō o̍kɔ̄ɔ̄ ve̍ ndi̍ cho̍ wa̍lta̍ Nyi̍na̍ Mɛ̄lɛ̄ka̍a̍ ō tōsa̍ o̍ ku̍ndā wānāā lāāla᷄ŋ kīla̍ŋndo̍ ni᷄ŋ nda̍ŋ ni̍. Ō kāndu̍ŋ o̍ pāa̍le̍ Pɛ̍ŋti̍kɔ̍ɔ̍sīle̍ŋ chōo̍, pāa̍le̍ Nyi̍na̍ Mɛ̄lɛ̄ka̍a̍ tōl wānāā lāāla᷄ŋnda̍ kɔ̄ɔ̄lī ta̍u̍ le̍ŋ. Chɔ̍ŋ ni᷅ŋ a̍ bōōndi̍i̍ ke̍ŋ, mi̍ Nyi̍na̍ Mɛ̄lɛ̄ka̍a̍ hīāū lāchī a̍ ku̍ndā wānāā lāāla᷄ŋnda̍, a̍ wānāa̍ cho̍ nda̍ chīla̍ŋ nda̍ nɛ̄īyo̍ chɔ̄mndo̍, a̍ nda̍ dīāllūŋ kāla᷄ŋ kīo̍o̍ o̍ sɔ̄ɔ̍ŋ nda̍ kēēku̍ lēni᷄ŋ mi̍ ŋ̄ wā ŋ̄ pōōnyīāā o̍ yāu̍wo̍ ho̍ō ni᷄ŋ ndo̍ŋ fa̍ū.
Yōōŋgu̍ Mɛ̄lɛ̄ka̍ wānāā lāāla᷄ŋa̍a̍ tāsi̍a̍a̍ ā bālu̍ dīmīo̍o̍ mi̍ dīōmndā lāŋ lā wā lā pōōnyīāā o̍ yāu̍wo̍ ho̍ō ni᷄ŋ nda̍ŋ, a̍ sɔ̄ɔ̍ŋ yɔ̍nu̍ŋ ndo̍ŋ, ŋ̄ chɔ᷄m a̍ mɛ̄ɛ̍ Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō nɔ̄ kpāāyāa̍ yɛ̍. Kpāāya̍ yōōŋgōo̍ ho̍ō ō wa̍ ō chɔ̄mna᷄ŋ a̍ mɛ̄ɛ̍ o̍ ma̍ŋga̍la̍ yōōmūlā wānāā lāāla᷄ŋnda̍ yɛ̍, o̍ ko̍ŋ kɔ̍ɔ̍lī, a̍ dīōm pīlɛ̍ wa̍ nda̍ tɛ̄ɛ̄ŋ ndo̍.
Būŋgāŋ lēbōllo̍ŋ
Bɛ̄ɛ̄ndīa̍ŋndo̍ le̍ se̍i̍le̍ŋ (1:1-26)
a. A̍ dīōmndā mɛ̄ɛ̄lāā lā Chi̍i̍sū so̍ō la̍ŋ o̍kɔ̄ɔ̄ ndu̍yɛ̍ a̍ būŋgɛ̄ī o̍ chu̍a̍ ve̍ (1:1-14)
b. A̍ wāna̍ mi̍i̍ŋgu̍ o̍ fo̍nda᷄ŋ Chu̍dā wo̍ wo̍ o̍kɔ̄ɔ̄ (1:15-26)
A̍ se̍i̍le̍ tɛ̍nda̍ŋ Chūlu̍sɛ̄lɛ̄m nde̍ŋ o̍kɔ̄ɔ̄ (2:1–8:3)
A̍ se̍i̍le̍ tɛ̍nda̍ŋ Chūdi̍a̍ā a̍ Sāme̍e̍līāāle̍ŋ o̍kɔ̄ɔ̄ (8:4–12:25)
A̍ wa̍li̍ Mɛ̄lɛ̄ka̍ Pɔ̍ɔ̍l to̍sa̍ wo̍ o̍kɔ̄ɔ̄ (13:1–28:31)
a. A̍ bālɔ̄ɔ̄ tāse̍ Pɔ̍ɔ̍l wo̍ le̍ dīo̍m Mɛ̄lɛ̄ka̍a̍ dīmīo̍o̍ (13:1–14:28)
b. A̍ bɔ̄ŋa᷅ŋ bɛ̄ndu̍ bi̍i̍nu᷄ŋ Chūlu̍sɛ̄lɛ̄m ndo̍ o̍kɔ̄ɔ̄ (15:1-35)
c. A̍ bālɔ̄ɔ̄ ndīi̍ŋ ndɔ̍ Pɔ̍ɔ̍l wo̍ le̍ dīo̍m Mɛ̄lɛ̄ka̍a̍ dīmīo̍o̍ o̍kɔ̄ɔ̄ (15:36–18:22)
d. A̍ bālɔ̄ɔ̄ ya̍a̍ ndɔ̍ Pɔ̍ɔ̍l wo̍ le̍ dīo̍m Mɛ̄lɛ̄ka̍a̍ dīmīo̍o̍ o̍kɔ̄ɔ̄ (18:23–21:16)
e. A̍ wōū nda̍ wōu̍ Pɔ̍ɔ̍l o̍ chīɛ̄ī mānyūmndo̍ Chūlu̍sɛ̄lɛ̄m, a̍ Sāsālu̍i̍yā, a̍ Lu̍o̍m ndo̍ o̍kɔ̄ɔ̄ (21:17–28:31)

Lalela Wa̍lta̍ Wānāa̍ Chi̍i̍sūa̍a̍ Sɔ̄ɔ̍ŋ le̍bo̍llo̍ŋ