Mixteco, Metlatónoc

Te kuni ka kukava xaꞌa ña yuuvi yoꞌo, ra xa iyoo va ra kuu tuꞌun. Ra ra kuu tuꞌun kan kuvi ra xa iyoo xiꞌin Ndioxi te yachi vi. Ra suvi mii ra kuu tuꞌun kan kuvi tu ra kuu Ndioxi va. Ra xa xiꞌin mii Ndioxi ke, xa iyoo va ra kuu tuꞌun kan ndia te kii xaꞌa vi. Ra iin ndiakua íin ra kan saa ke kuvaꞌa takundiꞌi ñaꞌa ña iyoo, chi tu köo ra kan, saa ra ndia nii ñaꞌa ke kuväꞌa vi. Ra ra kan kuvi ra ^taxi ña tiaku yuvi, ra ña tiaku kan kuvi ñùꞌù ña ^ndatuun nuu takundiꞌi na yuuvi yoꞌo va. Ra ñùꞌù kan kuvi ña tuun nuu ña ñaa, ña kuu ña väꞌa; ra ña ñaa ña kuu ña väꞌa kan, ra kuchüun vi ña ndaꞌva ña ñuꞌu ña tuun kan.
Ndixiyo iin tiaa ra xinani Juan, ra ra kan kuvi ra tiꞌvi Ndioxi kixi nuu ña yuuvi yoꞌo, ña na ndakuiin ra xaꞌa ra kuu ñuꞌu ña tuun kan, ra ndatuꞌun tu ra xiꞌin yuvi va, ña vaꞌa na kandixa na ra kuu ñuꞌu kan. Ndi su süvi mii ra Juan kan kuvi ra kuu ñùꞌù, chi takua ra kixi ndatuꞌun va kuvi ra xaꞌa ra kuu ñùꞌù kan. Ra ra kuu ñùꞌù ña ndixa ña tuun nuu takundiꞌi yuvi, ra xa kixi va ra nuu ña yuuvi yoꞌo.
Ra nuu ña yuuvi yoꞌo ke xa ndixika va ra, ra ndiakua ndixiin va ra te xavaꞌa Ndioxi ña yuuvi yoꞌo, ndi su na yuuvi yoꞌo, ra nindükuni na ra. Ra nuu mii na ñuu ra ke kixi va ra, ndi su na ñuu ra ra nindakïꞌin mani na ra. Ra takundiꞌi na ndakiꞌin mani ñaꞌa, ra ^kandixa na kivi ra, ra taxi ra ndiayu ndaꞌa na ña ^kuu na seꞌe Ndioxi. Ra na yoꞌo, ra süvi ña ndikusii ini yuvi xiꞌin taꞌan na ke ninduu na seꞌe Ndioxi, chi ña kuni mii Ndioxi va ke nduu na seꞌe ra.
Ra ña kuu tuꞌun kan ke nduu iin tiaa va, ra ra kan kuvi ra kixi ndixiyo nuu ña yuuvi yoꞌo va. Ra xini nuu va ndi ndiee ña taxi iva ra ndaꞌa ra, ña kuu ra ra mituꞌun, ra ndañaꞌa ra mii ra nuu ndi ña kuu ra ra ndaa, ra kuꞌvi ni ini ra xini ra yoo. Ra suꞌva ke kachi ra Juan ndikaꞌan ra xaꞌa ra kuu tuꞌun kan:
―Ra yoꞌo ku ra ndikaꞌan yu xaꞌa xiꞌin ndo, te ndikaꞌan yu kachi yu suꞌva: “Tiaa ra ndikun vaxi chi sata yuꞌu, ra ra kaꞌnu ni ka va kuvi ra kan nuu yuꞌu, saa chi xa yachi vi ke iyoo ra kan nuu yuꞌu” ―kachi ra Juan.
Ra xaꞌa ña kuaꞌa ni ña vaꞌa iyoo nuu ra kuvi ña ^ndakiꞌin takundiꞌi va yo ña vaꞌa ^xa ra, ra viꞌi ni ña ^taxi ra ndaꞌa yo ta iin iin kii. Ra ña kuu ndiayu mii Ndioxi, ra ndaꞌa ra Moisés va ke taxi ra ña, ra ra kan kuvi ra ndañaꞌa ña nuu yoo va, ndi su ña ndaa, ña ku mii Ndioxi xiꞌin ña kuꞌvi ni ini ra xini ra yoo, ra Jesucristo va kuvi ra ndañaꞌa ña kan nuu yo. Ndioxi ra ndia nii na täan kuni ñaꞌa ra seꞌe ra, ra mituꞌun, ra íin xiꞌin ra ndiꞌi kii va kuvi ra ^ndañaꞌa ra kuu iva ra nuu yo.

Ra saa kuu iin kii, ra ndakutaꞌan ndia sutu kunaꞌnu nuu na judío na ndee ñuu Jerusalén ra tiꞌvi ndia sava ndia sutu xiꞌin ndia levita ña ndixaꞌan ndia nindakatuꞌun ndia ra Juan ra sakuchi yuvi, kachi ndia saa:
―¿Ndia chiñu ke ^xa kun nuu Ndioxi? ―*kachi ndia xiꞌin ra.
Ra saa ndakani ra Juan mii ña ndaa va nuu ndia kachi ra saa:
―Süvi yuꞌu kuvi ra kuu Cristo, ra xaa sakaku ndoꞌo ―kachi ra xiꞌin ndia.
Ra saa ndindakatuꞌun tuku va ndia ra kachi ndia saa:
―¿Yoo kuvi yoꞌo, tu saa? ¿A ra Elías, ra ndikaꞌan tuꞌun yuꞌu Ndioxi xinaꞌa kuvi kun? ―kachi ndia xiꞌin ra.
Ra saa ndakuiin ra Juan kachi ra saa:
―Süvi yu ―kachi ra.
Ra saa ndindakatuꞌun tuku va ndia ra kachi ndia saa:
―¿A yoꞌo kuvi ra iyoo tuꞌun xaꞌa kixi kaꞌan ndoso tuꞌun yuꞌu Ndioxi? ―kachi ndia xiꞌin ra.
Ra saa ndakuiin ra kachi ra saa:
―Süvi yuꞌu kuvi ra ―kachi tuku va ra.
Ra saa ndikaꞌan ndia xiꞌin ra kachi ndia saa:
―¿Yoo va kuvi yoꞌo, tu saa? Chi xiniñuꞌu kundaa ini ndi, ra saa ke vaꞌa niꞌi ndi tuꞌun ndakani ndi nuu na ^tiꞌvi nduꞌu vaxi ndi. ¿Ra ni ke kachi kun xaꞌa mii kun? ―kachi ndia xiꞌin ra.
Saa ndakuiin ra Juan kachi ra saa:
―Yuꞌu kuvi ra tiꞌvi Ndioxi vaxi iku iyu, ra ^kaꞌan yu xiꞌin ndo kachi yu saa: “Ndasandaku ndo nima ndo nuu Ndioxi”, ta kuꞌva kachi ra Isaías ra ndikaꞌan tuꞌun yuꞌu Ndioxi xinaꞌa ―*kachi ra xiꞌin ndia.
Ra ndia ndixaꞌan nuu ra Juan, ra ndia fariseo va kuvi ndia tiꞌvi ñaꞌa. Ra ndindakatuꞌun ndia ra kachi ndia saa:
―¿Nichuun ^sakuchi kun yu̱vi tu süvi Cristo kuvi kun, ra nii süvi tu ra Elías kuvi kun, ra nii süvi tu ra ka̱ꞌa̱n tuꞌun yuꞌu Ndioxi kuvi va kun? ―kachi ndia xiꞌin ra.
Ra saa ndakuiin ra Juan, kachi ra saa xiꞌin ndia:
―Yuꞌu, ra takua xiꞌin tiakuii va ke ^sakuchi yu yuvi, ndi su xa maꞌñu ndo yoꞌo va ndichi iin tiaa, ra xïni ndo ra. Ra ra kan kuvi ra ndikun vaxi sata yuꞌu, ra xa ta yachi vi ke iyoo ra kan nuu yuꞌu. Ra yuꞌu, ra ndia nii ñii ndixan vi ra ke köo ndiayu yu ndaxi yu ―kachi ra xiꞌin ndia.
Ra takundiꞌi ña yoꞌo, ra chi ñuu ña nani Betábara ña ndikaa chi inka xiyo yuꞌu itia Jordán nuu ^sakuchi ra Juan yu̱vi ke kuu ña.

Saa kuu ndiyaꞌa iin kii, ra xini ra Juan ña kuyachin Jesús kuaꞌan ra nuu íin ra. Ra saa ndikaꞌan ra kachi ra saa:
―Kutoꞌni ndo, chi ra yoꞌo kuvi ra kuu ndikachi loꞌo ra kuu kuenda Ndioxi, ra ra yoꞌo kuvi ra sandiꞌi xaꞌa kuachi na yuuvi yoꞌo. Ra xaꞌa ra yoꞌo ke xa ndikaꞌan yu xiꞌin ndo, te kachi yu suꞌva: “Vaxi iin tiaa chi sata yu, ra ra kaꞌnu ni ka va kuvi ra kan nuu yuꞌu, saa chi xa yachi vi ke iyoo ra”, kachi yu xiꞌin ndo. Ra nii yuꞌu kuvi ra xïni ñaꞌa vi; ra ña vaꞌa na kundaa ini na ñuu Israel yoo kuvi ra, ña kan ke ^vaxi yu sakuchi yu na xiꞌin tiakuii, ―kachi ra Juan.
Ra saa ndakani ka ra Juan nuu na kachi ra saa:
―Yuꞌu kuvi ra xini Tachi Yii Ndioxi ña kee ña ndiví, ra ta kaa iin paloma, saa kaa ña, ra nduxinu ña xika ña sata ra. Ra nii yuꞌu ndikundäa ini yoo kuvi ra, ndi su ra tiꞌvi yuꞌu vaxi yu, ña ^sakuchi yu yu̱vi xiꞌin tiakuii kuvi ra ndikaꞌan xiꞌin yu, kachi ra saa: “Ra kuni kun nduxínu̱ Tachi Yii sata ra kukoo ña xiꞌin ra, ra ra kan kuvi ra ^sakuchi yuvi xiꞌin Tachi Yii”, kachi ra xiꞌin yu. Ra xa xini va yu ra, ña kan ke ^ndakuiin yu xaꞌa ra ña ndixa ke kúú va ra Seꞌe Ndioxi ―*kachi ra Juan.

Ra saa kuu inka tuku kii, ra íin tuku va ra Juan nuu sakuchi ra yuvi xiꞌin uvi ndia itaꞌan xiꞌin ra. Ra saa xini ra Juan ña xika Jesús ika̱n, ra saa ndikaꞌan ra xiꞌin ndia itaꞌan xiꞌin ra, kachi ra saa:
―Kutoꞌni ndo, chi ra kaa kuvi ra kuu ndikachi loꞌo ra kuu kuenda Ndioxi ―kachi ra xiꞌin ndia.
Ra te xini soꞌo ndia uvi kan ña kachi ra Juan saa, saa ra ndikun ndakundikun ndia kuaꞌan ndia sata Jesús va. Ra saa ndikokuiin Jesús ndakutoꞌni ra, ra xini ra ña ndikun ndia kuaꞌan ndia sata ra, ra saa ndindakatuꞌun ra ndia kachi ra saa:
―¿Ni ke ^ndanduku ndo? ―kachi ra xiꞌin ndia.
Ra saa ndakuiin ndia kachi ndia saa:
―Rabí, ¿ndia mii ke iyoo kun? ―kachi ndia xiꞌin ra. Tuꞌun “Rabí” yoꞌo, ra “maestro” va ke kachi ña. Ra saa ndikaꞌan Jesús xiꞌin ndia, kachi ra saa:
―Naꞌa ndo, na kuꞌun yo xiꞌin yu ra kuni ndo ―kachi ra.
Ra saa ndakiꞌin ndia ndixaꞌan ndia xiꞌin ra, ra xini ndia nuu kanduꞌu ra; ra ndia kan kuachi ndia xiꞌin va ra kii kan, saa chi xa kaa kumi xikuaa va ke ndixaa ndia xiꞌin ra nuu kanduꞌu ra.
Iin ndia uvi, ndia xini soꞌo ña ndikaꞌan ra Juan xaꞌa Jesús, ra ndakundikun ndia ra kuvi ra Andrés ñani ra Simón Pedro. Ra ra Andrés yoꞌo, ra nu̱ú ni ka va ra Simón ñani ra kuvi ra nanduku ra, ra ndikaꞌan ra xiꞌin ra kachi ra saa:
―Xa ndaniꞌi va ndi ra kuu Mesías ―kachi ra xiꞌin ra. Tuꞌun Mesías yoꞌo, ra “Ra ndikaxin Ndioxi sakaku na yuuvi yoꞌo” va ke kachi ña.
Ra saa ndiaka ra Andrés ra Simón ñani ra ndixaa ra nuu Jesús. Ra ta xini Jesús ra Simón, ra saa ndikaꞌan ra xiꞌin ra kachi ra saa:
―Yoꞌo kuvi Simón, seꞌe ra Jonás, ra vichin ndakunani kun Cefas ―kachi ra xiꞌin ra. Ra tuꞌun Cefas yoꞌo, ra Pedro va ke kachi ña.

Ra ta ndituvi inka kii ndakani ini Jesús ña kuꞌun ra chi ñuu ña ndikun ndiaa Galilea. Ra saa ndakiꞌin ra kuaꞌan va ra, ra ikan ndakutaꞌan ra xiꞌin ra Felipe ra ndikaꞌan ra xiꞌin ra, kachi ra saa:
―Kundikun yuꞌu ―kachi ra xiꞌin ra.
Ra ra Felipe yoꞌo, ra ra ñuu Betsaida va kuvi ra, ra suvi ra ñuu kan ku tu ra Andrés xiꞌin ra Pedro va. Ra saa ndixaꞌan ra Felipe nanduku ra ra Natanael ra ndikaꞌan ra xiꞌin ra kachi ra saa:
―Xa ndaniꞌi va ndi tia̱à ra tiaa ra Moisés xaꞌa, ra suvi xaꞌa ra kan ke ndikaꞌan tu na ndikaꞌan tuꞌun yuꞌu Ndioxi xinaꞌa va. Ra ra kan kuvi Jesús, seꞌe ra José ra ñuu Nazaret va ―kachi ra xiꞌin ra.
Ra saa ndakuiin ra Natanael kachi ra saa:
―¿A kuvi vi tan kanata iin tiaa ra vaꞌa ñuu Nazaret? ―kachi ra.
Ra saa ndakuiin ra Felipe kachi ra saa xiꞌin ra:
―Na koꞌo, ra kuni kun ―kachi ra xiꞌin ra.
Ra ta xini Jesús ña ^kuyachin ra Natanael kuaꞌan ra nuu ra, ra saa ndikaꞌan ra kachi ra saa:
―Ra ^vaxi yoꞌo ra mii ra ñuu Israel ndixa kuvi ra, saa chi köo ña maña nuu ra ―*kachi ra.
Ra saa ndindakatuꞌun ra Natanael Jesús kachi ra saa:
―¿Nichuun vaꞌa xíni̱ kun yuꞌu? ―kachi ra xiꞌin ra.
Ra saa ndakuiin Jesús kachi ra saa xiꞌin ra:
―Ta kumani ka kaꞌan ra Felipe xiꞌin kun, ra xa xini va yu yoꞌo ña ^nduꞌu kun xaꞌa itun koxi ―kachi ra xiꞌin ra.
Ra saa ndikaꞌan ra Natanael kachi ra saa xiꞌin Jesús:
―Maestro, yoꞌo kuvi ndixa va ra kuu Seꞌe Ndioxi, ra yoꞌo kuvi tu ra kuu Rey na ñuu Israel va ―kachi ra xiꞌin ra.
Ra saa ndikaꞌan Jesús kachi ra saa xiꞌin ra:
―¿A xaꞌa ña ndikaꞌan yu xiꞌin kun ña xa xini yu yoꞌo, ña ^nduꞌu kun xaꞌa itun koxi ke kandixa kun yuꞌu? Ndi su vichin ra kuaꞌa ni ka va ña xituꞌun kuni kun ―kachi ra xiꞌin ra.
Ra saa ndikaꞌan ka Jesús xiꞌin ra kachi ra saa:
―Ña ndixa ke ^kaꞌan yu xiꞌin ndo, saa chi vaxi kii, ra kuni ndo ña nuña ndivi, ra kuni tu ndo ndia tatun Ndioxi ña kuanda̱a ndia chi ndivi, ra vaxi nuu ndia sata yuꞌu ra xaa yoꞌo vichin ―kachi Jesús xiꞌin ndia.

Lalela San Juan 1