Salmos 26
26
Salmo 26
Ñayii sa'a ja va'a ja ndaa ma chi iyo va'a i nuu Su'si ma
1Iya Tátnuni, ndaka'an ndakachi maa ni naxe iyo sa nuu ni a,
vaa saña chi ni‑yu'u ni‑ini sa ndikin ña'a sa,
te ñatuu nde jani uu jani uni ini sa,
vaa nuu maa ni kúkanu ini sa.
2Iya Tátnuni, konde'ya vava'a ni ini anua sa ya,
te kototnuni ña'a ni naxe iyo ini anua sa ya,
te ndaka'an ndakachi maa ni
nú ja va'a kúu ndaka ja jani ini sa a.
3Vaa saña chi ndimaa ñu'u ini sa ja maa ni
chi iya nda'vi ini kúu ni,
te chukan kúu ja nde kua'an nde vee sa
chi ndimaa sa'a sa sukan kúni ni ma.
4Vaa ñatuu nde kétna'a ini sa ji'in ñayii masu inundija i
ja ka ka'an i ma,
te ni masu nde ndikin sa i,
vaa masu ka sa'a i sukan ka ka'an i ma.
5Chukan kúu ja ûni ñatuu játna ini sa
ja koo sa nuu ka ndatna'a i ma,
vaa ndimaa ja u'vi ka sa'a i,
te ni masu nama uun ni yo nukoo kaa sa ji'in i
ja jin kaa sa xita,
vaa masu ka sa'a i sukan játna ini ni ma.
6Ndakate sa nda'a sa ya,
ja kúni ka'an ja masu na ja u'vi ni yo sa'a sa,
te sukan, te kuu ki'in kii sa nuu altar ni ma,
vi Su'si Iya Tátnuni,
7sukan‑va'a ndakuan‑ta'vi sa nuu maa ni,
te ndaka'an ndakachi sa sukan vii sukan luu sa'a ni, vi Su'si.
8Iya Tátnuni, játna ini xeen sa
ja koo sa veñu'u nuu iyo ni a,
vaa yukan kúu nuu iyo jayiñu'u ni ma.
9Kivi kûu sa ma, máko jin xsia'a ni anua sa ya
nuu ka ñu'u anua ñayii ni ka yo sa'a nanimaa ja u'vi ma,
ni a nuu ka ñu'u anua ñayii ni ka ja'ni i in‑ka ñayii ma,
10ni a nuu ka ñu'u anua ñayii ja ndimaa ja u'vi
ni ka yo sa'a i ma,
te ni ka yo kundee i ni ka yo xnda'vi i in‑ka ñayii ma,
te ni ka yo ni'i i ja ka kuni i ma.
11Kovaa saña chi ni‑yu'u ni‑ini sa kondikin ña'a sa,
te kunda'vi ini ña'a ni,
te chindee ña'a ni ja na kaku sa nuu ja u'vi ma.
12Vaa saña chi jâ ka iyo ja'a sa a ichi maa ni a
nuu kuu konukuiñi va'a sa a,
te chukan kúu ja nuu ka ndatna'a ñayii
ka kandija ña'a maa ni ma,
yukan koo sa, te ndachiñu'u ña'a sa, vi Iya Tátnuni.
© 2013, Wycliffe Bible Translators, Inc. All rights reserved.