Simuluho 10
10
Masika a bana ba Nuwe
(1 Lita 1.5-23)
1Masika a bana ba Nuwe, bo Sema, Kama ni Jafeta, ili ba ba pepilwe mwamulaho wa muunda ki a.
2Bana ba Jafeta ne li Gomere, Magogo, Madai, Javani, Tubali, Mesheki ni Tirasi. 3Bana ba Gomere ne li Ashikenazi, Rifati ni Togarema. 4Bana ba Javani ne li Elisha, Tareshishi, Kitimi ni Dodanimi. 5Ki ku bona ko ku simuluhile masika a n'a yahile fa minanga ni mwa lioli za mawate. Bao, ki bona ba lusika lwa Jafeta ba ba ne ba pila mwa mishobo i sili ni manaha a fapani, mi sitopa ni sitopa ne si bulela puo ya sona.
6Bana ba Kama n'e li Kushi, Miziraimi, Puti ni Kanana. 7Bana ba Kushi ne li Seba, Havila, Sabita, Raama ni Sabiteka. Bana ba Raama ne li Sheba ni Dedani. 8Kushi n'a na ni mwana, ya n'a bizwa Nimirodi, ya bile ndwalume yo mutuna wa pili mwa lifasi. 9Hape ne li sizumi se situna hahulu fapil'a Mulimu, mi kikabakaleo batu ha ba ize, “Sizumi se situna ike Nimirodi.” 10U kalezi ku busa kwa Babele, ni Ereki, ni Akadi ili mabaka a mwa naha ya Shinari kaufel'a ona. 11H'a tuta mwa naha yeo ku ya mwa Siria a y'o yaha minzi ya Ninive ni Rehoboto ni Kala. 12A yaha ni Reseni o mwahal'a Ninive ni munzi o mutuna wa Kala.
13Miziraimi a pepa batu ba Maludini, Maanamimi, Malehabimi, Manafutuhimi, 14Maputurusimi, Makafitorimi, ni Makasuluhimi, mi ki ku bona bao ko ku simuluhile Mafilisita.
15Kanana a pepa mweli wa hae, yena Sidoni, ni Heti. 16A simulula Majebusi, Maamori, Magiregashi, 17Mahivi, Maariki, Masini, 18Maarevadi, Masemari ni Mahamati. Mwamulaho a bao kihona mishobo ya Makanana i hasana. 19I hasani ku fitela milulwani ya Makanana ye simuluha fa Sidoni ku liba kwa Gerari ku y'o fita kwa Gaza ni ku liba kwa Sodoma ni Gomora ni Adima ni Seboimi, mane ku y'o fita kwa Lasha. 20Ba, ki bona bana ba Kama, ba mishobo ni manaha a sili, ba ba bulela lipuo ze fapahana.
21Sema, ya n'a li mushemi wa bana kaufela ba Hebere, mi hape ya n'a li muhulwan'a Jafeta, ni yena a pepa bana. 22Bana ba Sema n'e li Elami, Ashuri, Aripakasadi, Laudi ni Arami. 23Bana ba Arami n'e li Uzi, Huli, Geteri ni Masha. 24Aripakasadi a pepa Shela, mi Shela yena a pepa Hebere. 25Hebere a pepa bana ba babeli. Yo muñwi n'a bizwa Pelegi, kakuli ka nako ya hae batu ba lifasi ne ba kauhani. Libizo la munyan'a hae n'e li Joketani. 26Joketani a pepa Alimodadi, Shelefe, Hazaramaveti, Jera, 27Hadorami, Uzali, Dikali, 28Obali, Abimaele, Sheba, 29Ofire, Havilani, ni Jobabi. Bao kaufela n'e li bana ba Joketani. 30Naha mo ne ba yahile ne i kalela kwa Mesha, mane i y'o fita kwa malundu a Sefari a li kwa upa. 31Lo, ki lona lusika lwa Sema, lo lu ne lu pila ka limba ni manaha a fapani, ni lipuo li sili.
32Ao kaufela ki ona masika a simuluhile ku Nuwe, ka limba ze kauhani, ni ka mishobo. Mwamulaho a muunda, mishobo kaufela ye li teñi mwa lifasi i simuluhile ku bona bana ba Nuwe bao.
Lozi Interconfessional Bible, Catholic Edition © Bible Society of Zambia, 2009.