Mateo 7
7
Utsibo icsambuen chuishunenda
(Duc. 6.37-38, 41-42)
1Naden Esusën chuibampanëdash: Aidën icsambuen naic, quequin utsibo chienda. Mimbi adosho Nuquin Papan: Icsambo icquid mibi nec, queshun mibi cuidnushe. 2Utsibo: Icsambocquid nec, cainda. Adembidi Nuquin Papan: Mibi icsambocquid nec, canushe. Utsibon icsambuen naiduidi chiec tabadenda. 3-4Mibi bëctsiadaid bëchish nua bëuequid ¿bëbedadabi icquimbida min utsi pictsëc bëchish bëuequid chuiquin: Mibi bëctsiadaque. Bëbednu, mimbi capatsia? Padenquio. 5Bëdambocquid danmianquido mibitedi neque. Mibi bëctsiadaid mibia bëbedadshun: Mibitsen bëbednu, quetiadquidi mibi nec. Adembidi utsin icsambuen naid abentsëc icnubi mimbi icsambuen naid utsi utsiec icnuc ¿atotsi queshun: Mimbi icsambuen naid ënta, quequin mimbi utsi chuipe? quequin Esusën chuipanëdash. 6Adshumbic padpiden chiec: Mimbi Nuquin Papan Chiaid bëdambuen chianniaqui tantienquio icsho chuidonenda. Nuquin Papan Chiaid chuibudaqui tantiatiapimbo icquin niacniacsho issun chuidonenda. Opan abi pemequidi piacbimbuen mibi chieshëntsiashe. Adembidi chanchon aton icbon dashcute paëdacsho bëchish uaquin tintincacbimbuen Nuquin Papan Chiaid niac niactsiashe. Adquid chuidonenda, quepanëdash Esus.
Ënenquio icquin Nuquin Papa chiannete chiaid
(Duc. 11.9-13; 6.31)
7-8Nuquin Papa ënenquio icquin chuidoneta. Aden chuidoniac tantiashun Nuquin Papan mibi menendac. Adembidi: Ubi bëdambuen name, Papa, mimbi cacpadombuen mibi namendac. Adembidi: Ubi nashunta, Papa, quequin chuidoniac tantiashun Nuquin Papan mibi nashunendac.#7.7-8 M.I.Ch. 4.29bëta Ede. 29.13 nëid bimbuec icpec. Aid ista.
9Aton madon: Pan penu. Bec cho, papa, ¿cacta cuënotembo menepadic? Padenquio. 10¿Adembidi aton madon: Nuëcquid chenu. Bec cho, papa, cacta nisimbo menepadic? Padenquio. 11Adquid yec mibitedi icsambuen naquido icquimbi min bacuëbo tantiaquin bëdambocquid mimbi menec. Adombuembidi Nuquin Papa abuc tabadquid icquin: Ubi nashunta, Papa, quequin abi chuisho tantiashun mibi nashuntsiashe. Nuquin Papa chianneta, quequin Esusën chuipanëdash.
Utsibo nashunaid
(Duc. 6.31)
12Nuquin Papa tantiaquido icquin utsibo tantiaquin bëdambuen nashunta. Utsibo caic: Aidon ubi nashumpashun, quequin mimbibi otacquio tantiacpadombuembidi utsibotsen nashunta. Aden Nuquin Papan Ambi Chiaid Moises dada uamiampidbëta ambi oncamiaidon dada uaquin chiampicpadombuen mimbi natsiaque. Aden utsibo nashunta, quequin Esusën chuipanëdash.
Shëcuë pictsëcquidën puduedte chiaid
(Duc. 13.24)
13-14Adshumbic Esusën naden chuipanëdash: Nuquin Papabëd tabadnuec aid tantiec bëdambuec tabadta. Shëcuë pictsëcquidën matses abentse abentsec puduedacbimbuec abentse abentsec Nuquin Papa yacno puduedtequid iquendac. Padnuen antied tapan abi maisi nidacbimbuec matses dadpenquioshë abi tantiesabo yec Nuquin Papan icsambuen naquido cuidquin chian annëdënquequid nësecacno nidmendac, quepanëdash Esus.
Icsambuen naquid nec, quequin tantiate chiaid
(Duc. 6.43-44)
15Adshumbic abi macuësh tapa poctse tsadquin naden Esusën chuipanëdash: Utsibo: Nuquin Papan Chiaidquio chuibanquid nebi, quec bëdambocquid danmianec muaquidombo iquendac. Adquido choshon Nuquin Papan Chiaid niac niacmequin mibitedi icsamete bunendac. Aido bëdi dapa nëish iua pete bunquiacbimbuec mibitedi icsamete bunquieque. Icsamenda.#7.15 Ese. 22.27 bimbuec Esusën chiaid iquec. 16¿Mitsipadembimbi: Muaquid nec, quequin tantiapatsia? ¿quecta mibitedi ique? Ambi naid issun: Muaquid nec, quequin mimbi tantiendac. Adembidi chetequid issun cute dada matsesën tantiec. Aden tantiec nisanquidën bacuë bësho isash: Dadainën bacuë nec, quesa matses nec. Adecbidi echon bacuë bësho isash: Bata nec, quesa matses neuaic. 17Cute bëdan bacuë adquiobidi bacuë bëdambo iquec. Cute icsan bacuë adquiobidi bacuë icsambo icuaic. 18Cute bëdan bacuë chetemaid ictiapimbo iquec. Cute icsan bacuë chetequid ictiapimbo iquec. 19-20Chetemaidbimbuec muaquido bëdambo ictiapimbo iquec. Nuquin Papan Chiaid niac niaquec icsambuec tabadsho issun: Muaquid nec, quequin mibitedishun tantiendac. Adquidën chuisho tantienda. Aido cute bacuëesa icsho icbon dëdshun teteshun tsindoshon nëdëncacbimbuen Nuquin Papan ambi icsambuen naquido cuidacno nësecaindac, quepanëdash Esus.
Nuquin Papan namiacno puduednu, quequin chiaid
(Duc. 13.25-27)
21Utsitsen Esusën naden chuipanëdash: Ubi caic: Icbo, Icbo, Cun Icbo mibi nec. Mibi tantiaquid nebique. Mibi yacno ubi puduedme, Icbo ¿quequidtedida Nuquin Papan namiacno puduedpatsiash? Padenquio. Cun Pa abucquidën chiacpadombuen naquidoen aid yacno puduedendac. 22Nuquin Papan matses abitedi cuidte uëshën matses dadpenshun ubi chuiquin: Icbo, Icbo, Cun Icbo mibi nec. Mibi caquin: Aidën namiaidquio nebi, quequin dadpen naombi. Nuquin Papan Chiaid chuiquinc, podobitsi icsabo matses dapuduedaido cuenmequinc dadpen nadatiambocquin naquinc caombique. Ubi puduedme, Icbo, 23quequid Cun Pan chiacpadec bëdambuec tabadabi icsho: Umbi isacmaidquio mibi neque. Baded cuenta. Icsambuec tabadquid mibitedi neque, caindambi, quepanëdash Esus.
Shubu uaquidbimbuecquid chiaid
(Madc. 1.22; Duc. 6.47-49)
24Adshumbic Esusën padpiden naden chuipanëdash: Umbi chuibambued tantiashun umbi chiacpadombuen nata. Aden nabanquid yec shubu uaquin bëdambuen tantiaquidbimbuec mibi ictsiaque. Tantia. Chuinu. Bëdambuen tantiaquidënquio mannanënquio buintad tabëcshun shubu uaquid nendac. 25Aden bëdambuen shubu uan ue sequec acte cubudnubi cunquequid tapa choquin shubu ishcunac chimeshadenquio icnubi shubu nuntan anchiuidenquio icquid. 26Utsibic umbi chuibambued tantiashun umbi chiacpadombuen naisa iquendac. Aden naisa yec nadquidbimbuecquid nec. Shubu uaquin tantiesa icquin acte cuëmanquiobi badedi uënëstsëcquidquio cueste tabëcshun shubu uaic. 27Aden shubu uan ue dapabëd cunquequid tapa choquin shubu chimeshquin icsa uashunendac. Adembidi acte cubudtoquidën shubu nuntan mauanquin icsa uashunendac nacnentiapimbocnoc, quequin chuipanëdash Esusën.
28-29Aden ënquin chuibansho tantiash tantiadempambo yec tabadec: Tantiaquidënquio chuibanacpadombuembien Esusën chuibampec. Ma Moisesën chiampid tantiamequidon adombuen chuibanenquio icpaboc, quecuededpanëdash matses dadpenquio.
© 2023, Wycliffe Bible Translators, Inc. All rights reserved.