Juan 2
2
So naronaxac maye huaña ye Caná maye huaigui ye 'alhua Galilea
1Qaq co'ollaq mashe inoxoore'c soua tres na'axa'te, nache huo'o so naronaxac huaña ye Caná huaigui ye 'alhua le'enaxat Galilea. Qaq aso late'e So Jesús nache hueta'a yemaye. 2Nache So Jesús qataq soua lapaxaguenataqa, soomaye nataqa'e'n qaicoyegue'n da yaqto' ỹalectraua'a se'eso naronaxac. 3Qaq co'ollaq imeuo so lataxa, nache aso late'e So Jesús 'enapega Somaye, 'eeta':
–Mashe imeuo so lataxa.
4Nache So Jesús 'enapega asomaye, 'eeta':
–'Am ỹate'e, ¿ta'ainco' ye qonetec de'era da Aỹem qonapega? Ye Aỹem saxanaxa da ivita ye laloqo' da ñachaxan.
5Qalaxaye asomaye 'enapega som huetapecpi, 'eeta':
–Qauo'oche qome 'enauac cam 'enapec Damaye.
6Qaq huo'oi soua seis naco'oña coma' maye laỹe' naxa na 'etaxat maye lỹoxonaxat na judiopi da ỹo'ot da maiche lataxac naxa da nỹoxoc. Qaq añi 'oonole se'esoua naco'oña, huo'o ana ivi' ochenta litro na le'ec 'etaxat, qataq huo'o ana ivi' cien. 7Nache So Jesús 'enapego' som huetacpi, 'eeta':
–Qauỹoqoiguilo na 'etaxat ñi'iñiua naco'oña.
Nache soomaye iỹoxoguilo, ỹataqta nlaxatchiguilo. 8Nache So Jesús qataq 'enapegalo soomaye, 'eeta':
–Nagui, nache huo'o ca qanqacheesheguem na 'etaxat. Ime, nache qaroiua'a ñim ilotague' ne'ena naronaxac, yaqto' ỹe'eguen.
Nache soomaye ỹo'o't da 'enapec So Jesús. 9Nache se'eso ilotague' so naronaxac co'ollaq ỹe'eguen se'eso 'etaxat maye nañigui na lataxa, nache ỹataqta ỹe'elaq, cha'aye sa ỹaỹaten ca chegaqa'ague so lataxa. Qalaxaye som huetacpi somayepi ỹaỹaten. Nache se'eso ilotague' so naronaxac sa ỹaỹaloxon da iỹaxana som cheta'ague da huaron. 10Nache 'enapega, 'eeta':
–'Enauac na shiỹaxauapi ỹa'auaxaachiguiñi naxa da nỹomaxangui na no'on lataxa na namaxasoxoic, qaq da mashe qaỹoqtegue da nỹomaxac, nache qaltaq qanỹomaxangui na lataxa maye saqallegueme da no'on. Qalaxaye 'am 'aupa'axaatec da 'aumenec na no'on lataxa.
11Qaq de'era ỹo'ot So Jesús co'ollaq huaña ye nỹecpi ye Caná maye huaigui ye 'alhua Galilea. Damaye, nachera da hua'auchiguiñi nam ỹo'otpi na'anec maye sa qaỹauanapega co'ollaq ỹachaxan da llo'oxoyec. Nache soua lapaxaguenataqa ỹataqta ỹa'amaqte'n Somaye.
12Qaq co'ollaq ime de'era, nache So Jesús taỹa ye nỹecpi ye Cafarnaúm, lỹatac aso late'e, nataqa'en soua lqaỹa't qataq soua lapaxaguenataqa. Nache ỹataqta huo'oi soua na'axa'te da hueta'a yemaye.
So Jesús do'otaxaalec aso no'onaxanaxaqui late'erai
(Mateo 21.12-13; Marcos 11.15-18; Lucas 19.45-46)
13Qaq co'ollaq mashe saqaỹapeque so laponaxac na judiopi maye le'enaxat da Lapascua,#2.13 Na'a'q maye huetoigui da qaiuennate so na'a'q co'ollaq qanayeca'ai ye Egipto. nache So Jesús nqo'oneua'a ye Jerusalén. 14Qaq co'ollaq ivireua'a ye nqasoxoc aso no'onaxanaxaqui late'erai, nache ilalec na imeetac na huacapi qataq ana qaguetapi qataq na qoto'pi. Nataqa'en ilalec na shiỹaxauapi nso'ootañipi, datatalec na nmenaxala'pi, nmenaxanaxaatega't ana alom na shiỹaxauapi. 15Qaq co'ollaq ilalec ne'enapi, nache So Jesús ỹacona so nañec da ỹauo'o lalashenaxanaxat. Nache ỹo'orauec 'enauac na nmenaxaicpi, lỹaueegue' naqa'en ana lmena qaguetapi, qataq na huacapi. Qataq icorec ana alom na nmenaxanaxaatega't ana alom na shiỹaxauapi, qataq ỹamaxañi na nmenaxala'pi. 16Nache 'enapega na imeetac na qoto'pi, 'eeta':
–¡Qanqacheeuec 'enauac ne'enapi! ¡Saishet da qauo'ochec na lma' Ñim Ita'a da menaqa'!
17Nache soua lapaxaguenataqa iuennate naua nanettraleguete ana nere maye huetalec na la'aqtacpi Ñim Lo'onatac 'Enauacna, maye 'eeta': «Da ỹauoche ñi 'arma', ỹataqta 'eco' 'eroigui naqa'en da sheeta.»
18Nache so lataxala'pi na judiopi inattac Somaye, 'eeta':
–¿Negue't ca na'anec qomi' 'auachaxanalo, da yaqto' ishet da 'am sa'amaqtenaq da ỹoqta 'eesa da huo'o ca qonec da 'auo'ot de'era?
19Nache So Jesús 'enapeco':
–Qomye qanlaxachiiñi ana no'onaxanaxaqui late'erai, nache Aỹem qaltaq ño'oxoosheguem qome; tres na'axa'te, nache qaltaq semat.
20Nache som lataxala'pi na judiopi 'enapeco':
–Ivi', naua cuarenta y seis vi'iye da qano'oxootapiguisheguem ana'ana no'onaxanaxaqui, nache qaimat. ¿Qalaq 'am qonapec ye tres na'axa'te, nache 'aumat da 'ano'oxoosheguem?
21Qalaxaye aso no'onaxanaxaqui maye detaqtega So Jesús, nachera da maiche lalamaxat lo'ocỹaxac. 22Qaq ỹoqo'oye So Jesús co'ollaq mashe qaltaq nca'alec, nache soua lapaxaguenataqa tachigui lauel de'era la'aqtac Somaye. Huaña, nache ỹataqta ỹa'amaqte'n naua nanettralec ana nere maye huetalec na la'aqtacpi Ñim Lo'onatac 'Enauacna, qataq naua la'aqtaqa So Jesús.
So Jesús ỹauatto'n naua lhuennataxaco na shiỹaxauapi
23So Jesús co'ollaq ñaq hueta'a ye Jerusalén da ỹalectaua'alo soua na'axa'te maye laloxoqui' da qaiuennate so na'a'q maye le'enaxat da Lapascua, nache ỹataqta qalota na ỹa'amaqten Somaye, souaxat da ỹauaachigui na ỹo'otpi na'anecpi maye sa qaỹauanapega. 24Qalaxaye So Jesús saishet da ỹoqta ỹa'amaqten somayepi, cha'aye ỹaỹaten na lhuennataxac 'enauac somayepi. 25Qaq saishet da iuen da huo'otaq huo'o ca da'aqtaxanem Somaye da lataxac so shiỹaxauapi, cha'aye Somaye maiche ỹaỹateetac da lquiyaqteỹaxac so shiỹaxauapi.
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.