लुका 1
1
परिचय
1हम्मर बिचमे होइल घटनक इतिहास ढेरे जनें लिखना कोसिस करले आहें।
2इ घटना अपना आँखिलइक देखके येसुके बारेम सुसमाचार परचार करइयाभर बतइले आहें। 3माननिय थियोफिलस, मइ सुरुतिति होसियारसँघ सब चिझ ढुन्हले आहुँ। 4तभिकमारे तुम्हर सिखल सब बातभर सहि आहें कहिके तुम फेक पता पाउ कहिके तुम्हर तहन करमस एकठोर इतिहास लिखना मोहके बरहिया लागल।
बप्तिस्मा दिबइया युहन्नाके जलमके भबिस्यबानि
5यहुदिया इलाकामे हेरोद राजा सासन करल बखतमे अबिया कहना पुजारि समुहमे एक जनें जकरिया नाउँ रहल पुजारि रेहें। उनका मेहरुवक नाउँ एलिसिबा रेहे आउर उ हारुन कुलके पुजारिक लउँरिया रेहें। 6ओइनें दुनु जनें परमेस्वरके नजरमे जा बरहिया रेहे उहि करें, आउर परमेस्वरके सब आग्याँ आउर धारमिक बिधान होसियारसँघ पालन करें। 7पर ओइन कुइ सन्तान नाइरेहें, काहिक्कि एलिसिबा बाँझि रेहें, आउर उ दुनु जनें बुरहाइ गेल रेहें।
8जब अबिया समुहक मन्दिरमे पुजारि काम करना पाला रेहे, तउके जकरिया फेक परमेस्वरके सेबा करेक तहन ओइनसँघे उपस्थित होइल रेहें। 9तउके पुजारिक सेबाके चलुन ढार गोटि डरनेंत परमपरभुके मन्दिर भित्तर जाक धुप पजरना काम जकरियकेहें परल। 10जकरिया मन्दिरभित्तर धुप पजारे बखतमे मनइभरिनके सब भिर बाहिर पराथ्ना करत रेहें। 11उहिबखत जकरियाके आगे परमपरभुके एकठोर स्वरगदुत धुप पजरना बेदिक दक्खिन पाँजर ठरहेल देखा परनें। 12स्वरगदुतकेहें देखके जकरिया चहुँकगिनें, आउर बहुत जोरति डरइनें। 13पर स्वरगदुत उनके कहनें, “नाडराउ जकरिया, काहिक्कि परमेस्वर तुम्हर पराथ्ना सुनले आहें। अब तुम्हर मेहरुवा एलिसिबा एकठोर लउँरा हुबइहें, आउर तुम उनका नाउँ युहन्ना धरियो।#१ इति २४:१० 14उनका जलम तोइन आनन्द आउर खुसि दिहि, आउर ढेरे जनें उनका जलममे रमइहें। 15काहिक्कि उ परमपरभुके नजरमे महान हुइहें। उ अङ्गुरके मध या कुइ मेलक मतबार लगना चिझ कबु फेक नाइपिहें आउर अपना दाइक पेटमहति पबित्र आत्मालइक भरपुर हुइहें।#गन्ति ६:३ 16तउके उ ढेरे इस्राइलिभरिन परमपरभु ओइन परमेस्वरतिरा लइहें। 17उ एलिया अगम्जानि ढार अधिकार आउर सक्तिलइक भरपुर होक मनइभरिनके मन तयार करें कहिके परभुके आगे जइहें। उ बाबा आउर लउँरालउँरियाभरिनके बिचमे मिलाप लइहें आउर आग्याँपालन नाइकरइया मनइभरिन परमेस्वरके गियान रहल धरमि मनइभरिनतिरा डुरिहें।” 18उ बात सुनके जकरिया स्वरगदुतकेहें कहनें, “मइ इ बात कइसे बिस्वास करुँ? मइ बुरहाइ गिनु, आउर मोर मेहरुवा फेक बुरहाइ गेल आहें।”#मला ४:५-६
19तउ स्वरगदुत कहनें, “मोर नाउँ गबरिएल आहे, मइ परमेस्वरके आगे ठरहेल रहतुँ। तुम्हिन इ खुसिक खबर सुनाइक परमेस्वर मोहके पठइले आहें। 20मोर कहल बात ठिक बखतमे पुरा होइ। पर देखो, तुम मोर कहल बातकेहें बिस्वास नाइकरलकेमारे इ बात पुरा नाइहोइततक तुम मन्के नाइसिक्बो।”#दान ८:१६; ९:२१ 21उहिबखत मनइभर मन्दिरके बाहिर जकरियकेहें असरा लागत रेहें, पर जकरिया मन्दिरमे बहुत देर करलकेमारे मनइभर अचम मन्नें। 22जब जकरिया बाहिर अइनें, उ कुहिकसँघ मन्के नाइसिक्नें। उहिकमारे मनइभर उ दरसन पइनें कहिके जन्नें। पर उ मन्के नाइसिक्के मन्दिर बाहिर असरा लागल मनइभरिन हाथके इसारालइक केल बतइनें। 23जकरियाके पुजारिक काम उराइल आउर उ अपना घरे गिनें। 24कुछ रोजपाछुक उनका मेहरुवा एलिसिबा गरहुजिउक हुइनें, आउर पाँच महिनातक लुकके बइठनें। 25एलिसिबा कहनें, “मनइभरिनके आगे मोर बाँझिपनके कलङ्ककेहें मिटाइक तहन अब परमपरभु मोर उप्पर अइसे दया करले आहें।”
येसुके जलमके अगम्बानि
26एलिसिबा गरहुजिउ होइलके छे महिनामे परमेस्वर गबरिएल स्वरगदुतकेहें गालिल इलाकक् नासरत सहरमे बइठया एकठोर कन्या लउँरियकतिरा पठइनें। 27उ कन्या लउँरियक नाउँ मरियम रेहे आउर उनका मँगनि दाउद राजक कुलमे जल्मल योसेफ नाउँ रहल मनइकसँघ होइल रेहे। 28स्वरगदुत गबरिएल उनकातिरा जाक कहनें, “मरियम दुवासलाम! परमपरभु तुम्हिन ढेरे दया करले आहें, उ तुम्हरसँघ आहें।”#मत्ति १:१८
29पर मरियम स्वरगदुतके बात सुनके अचम मन्ति इ कइसन मेलके दुवासलाम आहे कहिके सोंचे लगनें। 30तउके स्वरगदुत उनके कहनें, “नाडराउ, मरियम, काहिक्कि तुम परमेस्वरति ढेरे दया पइले बाटो। 31देखो, तुम गरहुजिउक हुइबो आउर एकठोर लउँरा हुबइबो आउर तुम उनका नाउँ येसु धरियो।#मत्ति १:२१ 32उ महान हुइहें, आउर उनके महान परमेस्वरके लउँरा कहलजाइ। परमपरभु परमेस्वर उनके उनका पुरखा दाउद राजा ढार राजा बनइहें। 33उ इस्राइल उप्पर सदा राज करहें आउर उनका राज्य कबु फेक नाइउराइ।”#२ समु ७:१२-१३,१६; यसइ ९:७
34उ सुनके मरियम स्वरगदुतकेहें कहनें, “इ कइसे होइ सिकि? काहिक्कि मइ एक कन्या लउँरिया आहुँ।”
35तउके स्वरगदुत मरियमकेहें जबाफ दहति कहनें, “पबित्र आत्मा तुम्हरमे अइहें, आउर महान परमेस्वरके सक्तिलइक तुम गरहुजिउक हुइबो। उहिकमारे हुइना सन्तान पबित्र रहिहें आउर परमेस्वरके लउँरा कहलइहें। 36देखो, तुम्हर नात परना एलिसिबा फेक बुरहाइलमे गरहुजिउक होइल आहें आउर उनका पेटमे लरका आहे। मनइभर उनके बाँझि केहें, पर उ गरहुजिउक होइलके छे महिना हुइगेल आहे। 37काहिक्कि परमेस्वरके तहन कुछु काम असम्भब नाइआहे।”#उत १८:१४
38मरियम कहनें, “मइ परमपरभुके दासि आहुँ, मोहके तुम्हर कहल ढार होबे।” ओहकापाछुक स्वरगदुत हुँवाँति चलगिनें।
मरियम आउर एलिसिबक भेंट
39ओहकापाछुक मरियम यहुदिया इलाकक् डिङ्गम रहल जकरियाके गाउँमे हदबदाइत गिनें। 40उ जकरियाके घरे जाक एलिसिबाकेहें दुवासलाम करनें। 41जब एलिसिबा मरियमके दुवासलाम सुन्नें उहिबखत उनका पेटके लरका चाल करल, आउर एलिसिबा पबित्र आत्मालइक भरपुर होक, 42बहुत जोरति कहनें, “मेहरुवाभरिनमे तुम ढेरे आसिस पाइल मेहरुवा बाटो आउर तुम्हर पेटके लरकाकेहें परमेस्वर खास आसिस दिहें। 43मइ कउन आहुँ जो तुम मोर परभुके दाइ होक फेक मोरतिरा अइलो? 44मइ तुम्हर दुवासलाम सुन्ति केल मोर पेटमे लरका खुसिलइक चाल करल। 45तुम परमेस्वरन कहल बात पुरा होइ कहिके बिस्वास करलकेमारे परमेस्वर तुम्हिन आसिस दहले आहें।”
मरियम परमेस्वरके परसन्सा करनें
46मरियम कहनें,
“मइ मोर सारा परानति परमेस्वरके परसन्सा करतुँ,
47आउर मोर आत्मा मोहके मुक्ति दिबइया परमेस्वरसँघ आनन्द मनइता,
48काहिक्कि परभु मोर जइसन नम्र बुकरहिकेहें सम्खनें,
अबतिति उइसे मनइभर मोहके आसिस पाइल कहिहें।
49काहिक्कि सक्तिसालि परमेस्वर मोर तहन महान काम करदहले आहें।
उनका नाउँ पबित्र आहे।
50आउर परभुके आदर करइयाभरिनके तहन
परभुके दया पुस्तउँ-पुस्तातक रिहि।
51उ अपना सक्तिलइक महान काम करले आहें,
आउर अपना सोंचमे घमन्ड करइयाभरिन छिदिरबिदिर पारदहले आहें।#१ समु १:११
52उ घमन्डि राजाभरिन राजगद्दिमहति हटइले आहें,
पर मनमे अपनकेहें चुन्नि सम्खइयाकेहें उप्पर उठाके इज्जत दहले आहें।#अय्यु ५:११; १२:१९
53उ भुँखाइलभरिन बरहिया चिझ दइक भरिभराउ करले आहें,
पर धनिभरिन छुच्छे हाथ पठइले आहें।
54परमेस्वर हम्मर पिता पुरखासँघ करल बाचा पुरा करलकेमारे,
अपना दास हम्हिन इस्राइलिभरिन मदत करले आहें।
55परमेस्वर हम्मर पुरखा अब्राहाम आउर उनका सन्तानभरिन,
सदक तहन दया दिखइले आहें।”#उत १७:७ #१ समु २:१-१०
56उ बखत मरियम एलिसिबकसँघ तिन महिना बइठके अपना घर अइनें।
बप्तिस्मा दिबइया युहन्नाके जलम
57एलिसिबक लरका जल्मइना दिन पुगल, आउर उ एकठोर लउँरा जल्मइनें। 58परमपरभु उनकाउप्पर महान दया करले आहें कहना बात ओइन नात-पात आउर परोसिभर सुन्नें तउके ओइनें फेक ओइनसँघे रमइनें।
59लरका जल्मल अठँमा रोजमे यहुदि चलुन ढार लरकक खतना करेक तहन आउर नाउँ धरेक तहन ओइन नात-पात आउर परोसिभर अइनें। ओइनें लरकक नाउँ उनका बाबक नाउँ ढार जकरिया धरइये रेहें। 60पर उनका दाइ कहनें, “नाइ, येहका नाउँ युहन्ना धरेकपरि।”#लेबि १२:३
61ओइनें एलिसिबाकेहें कहनें, “तोइन बन्समे इ नाउँ कुहिक फेक नाहे ते।” 62तउके ओइनें लरकक बाबाकेहें इसारालइक पुछनें “तुम लरकक नाउँ का धरेक चहतो?”
63जकरिया लिखेक तहन एकठोर पाटि मँगनें, “येहका नाउँ युहन्ना आहे” कहिके लिखदहनें। इ देखके सब जनें अचम परनें। 64उहिबखत जकरिया मन्के सिक्ना हुइगिनें आउर परमेस्वरके परसन्सा करे लगनें। 65इ देखके ओइन सब अरोसपरोसमे परमेस्वरके डर होइल आउर इ बातके खबर यहुदिया इलाकक् सक्कु पहारि इलाकाभर फइलगेल। 66इ बात सुनइयाभर “इ लरका पाछुक कइसन होइ” कहिके अपना मनमे सुच्नें, काहिक्कि ओइनें परमपरभुके सक्ति उनकाउप्पर रहल पता पइनें।
जकरिया परमेस्वरके परसन्सा करनें
67तउके उ लरकक बाबा जकरिया पबित्र आत्मालइक भरपुर होक अगम्बानि बुलनें,
68“इस्राइलिभरिनके परभु परमेस्वरके परसन्सा होबे,
काहिक्कि उ अपना मनइभरिन मदत करके ओइन सतरुभरिनति छुटकारा दहले आहें।
69उ अपना सेबक दाउदके बन्सति
एकठोर सक्तिसालि मुक्ति दिबइया पठइले आहें।
70परमेस्वर बहुत पहिले पबित्र अगम्जानिभरिनके मुहति बाचा करनें,
71कि उ हम्मर दुस्मन आउर हम्हिन घिरना करइयाभरिनके
सक्तिति छुटकारा दिहें।
72उ हम्मर पुरखाभरिन उनका दया दिखाइक तहन
आउर ओइनसँघे करल पबित्र बाचा पुरा करेक तहन हम्मर बिचमे इ काम करनें।
73परमेस्वर कसम खाक,
हम्मर पुरखा अब्राहामसँघ बाचा करले रेहें कि,
74उ हम्मर दुस्मनति छुटकारा दहतियाँ,
ताकि हमरे नाइडराक
75परभुके आगे पबित्र
आउर धरमिक जिन्दगि जिति,
जिन्दगिभर उनका सेबा करे सिकि।
76हे मोर लउँरा, तुम महान परमेस्वरके अगम्जानि कहलइबो,
काहिक्कि तुम परभुके तहन डगर तयार करे,
उनकाति आगे जइबो।#मला ३:१
77तउके तुम परमेस्वर कइसे अपना मनइ, इस्राइलिभरिन ओइन पाप माफ करके,
उद्धार दिहें कहना बात ओइन बतइबो।
78हम्मर परमेस्वर ढेरे दयालु होइलके मारे
स्वरगमहति खिरिस्टकेहें भिन्हिके चम्कना उजियर ढार हम्मरतिरा पठादिहें,
79आउर परमेस्वरकेहें नाइचिन्हके पापमे हिराइलभर आउर मिरतुक लिग्घे रहबइयाभर उजियर पइहें।
उहि उजियर हम्हिन सान्तिलइक जिना डगर दिखइहें।”#यसइ ९:२
80अइसे जकरियाके लउँरा बरह्ति आउर परमेस्वरके बिस्वासमे बलगर हुइति गिनें। उ इस्राइलिभरिनके बिचमे खुल्लम-खुल्ला परचार सुरु नाइकरततक उजार जगम बइठनें।
Currently Selected:
लुका 1: KTHR
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
