लूका 1
1
लुकै रीक्च सेहेच समाचार
1आदरणीय थियोफिलस ज्यू,
ढलीङ भर्मीकोइ कानुङ बीचाङ येशूवो जीबनाङ छान्च घटनौ बारेयाङ रीका। 2होसोको चहीन्या सुरुइङ होडा प्रत्यक्ष मेक्कुल्हुङ मीमीके डाङ्च सेवकको लेया, होसोकोइ इसै कुरा कानकोके सेटाका। 3ङै सुरुइङ होडा ज ढलीङ होसियार छान्म जम्मै कुराको ङापाङ हटै नाकुङ लागि इसै जम्मै कुरौ काट विवरण रीक्के ठीक लक्डीसा। 4अब इसै कीटाब पढीस्प्याक नाकोके टेच कुराको कुडीक सत्य ले टेम नाकोइ वार्ढनी।
बप्तिस्मा याहाच यूहन्ना फुन्च बारेयाङ भविष्यवाणी
5यहुदिया प्रदेशो राजा हेरोदो बेलाङ जकरिया म्यार्मीन लेच काट पुजाहारी लेया। होसै अबिया टेच पुजाहारीकुङ समुहौ भर्मी लेया। होच्यौ मीमाझौ म्यार्मीन एलीशिबा लेया हटै होसै चहीन्या हारुन खलको पुजाहारीयो माझा मीजा लेया। 6होसोको न्हीसवान परमेश्वरो नजराङ धर्मी लेया हटै परमेश्वरे टेच पट्ट कुराको माम्ह्याक्म मन्डीवला। 7एलीशिबा बाँझी लेच कारणे होसोकुङ मीजा मालेया हटै होसोको न्हीसवान ढलीङ बुढास्के भ्यामलेया।
8काचोटी जकरिया मेनो समुहौ पालोवाङ परमेश्वरो अघेर पुजाहारी काम जाट्म मुमलेया। 9जब पूजाहारीकुङ चलन अनुसार होलाङ जाट्के परीस्च कामो लागि चिठ्ठा लैडीया तब जकरियाके परमप्रभुवो मन्दिराङ पहीस्म धूप जुर्हच पालो परीसा। 10हटै होचे धूप जुर्हच बखटाङ बहीरीङ पट्टी जम्मा छान्च ढलीङ भर्मीकोइ प्रार्थना जाट्म मुमलेया। 11परमप्रभुवो काट स्वर्गदूत धूप जुर्हच ठाउँवो डोरलाक टोरोस्स डाङा। 12स्वर्गदूतके डाङ्म जकरिया ढलीङ अट्टडीस्म बीरीया। 13बाकी र स्वर्गदूते होस्के टेया, “ए जकरिया नाबीरीन! हीके टेहाङ नोङो प्रार्थना परमप्रभुये सेमलेको। अब नोङो माझा एलीशिबै नाङ्के काट लेन्जा मीजा फुन्म याहाले, हटै नेङे होसै जजौ म्यार्मीन यूहन्ना डौ। 14नाङ मराङ्म खुशी छान्मलेडल। हटै बाबुजा फुन्नाङ ढलीङ भर्मीको मराङ्ले।
15हीके टेहाङ होसै परमप्रभुवो नजराङ कराहाङ्च छान्ने। होचे अंगुरो हान हटै अरु म्होरोक्च कुराको ही र मागाले। होसै मेनो बोयो मीटुकाङ लेनइङ होडा ज पवित्र आत्मै भरिपुर्ण छान्ने। 16होचे ढलीङ इस्राएलीकोके मेक्कुङ प्रभु परमेश्वरलाक ल्हेस्स जाट्म याहाले। 17होसै आत्मा हटै शक्तियाङ एलिया लख ज छान्म परमप्रभुवो अघेर राम्हो भर्मीकोके होस्कुङ लागि तयार जाट्ले। होस्कोइ बोइ-बाबैकुङ मीगीन मेनो मीजाकोलाक हटै परमेश्वरे टेच मामन्डीच भर्मीकोके धर्मीकुङ बुद्धीलाक डोरडीले।”
18तब जकरियै स्वर्गदूतके टेया, “इसै कुरा कुलाङ छान्के हेक्ले? हीके टेहाङ ङा बुढास्के भ्यामन, हटै ङौ माझा घनीङ बुढीस्के भ्यामले।”
19स्वर्गदूते जकरियाके टेया, “ङा परमेश्वरो अघेर टोङ्म मुच गब्रिएल आला। नाङर कठा कुरा जाट्के हटै इसै सेहेच समाचार सेटाक्के ङाके परमेश्वरे बीरीन्च आला। 20ङै टेच कुरा नेङे विश्वास माजाट्च कारणे अब नाङ इसै कुरा पुरा माछान्टार सम्मन नाङ ङाक्के माहेक्डल। बाकी र इसै कुरा ठीक समयाङ पुरा छान्ने।”
21बहीरीङ भर्मीको जकरियै हीके ढिलो जाटा टेम अचम्म परीस्म रुङ्म मुमलेया। 22जकरिया बहीरीङ ख्यौम राहानाङ बहीरीङ रुङ्म मुच भर्मीकोर कठा ङाक्के ज माहेका हटै होचे ङाक्के माहेक्नाङ मीहुटे इसारा जाटा हटै होसोकोइ परमेश्वरो मन्दिराङ दर्शन डाङ्लीसा टेम वारा।
23हटै जकरियौ परमेश्वरके सेवा जाट्के परीस्च समय डुम्हा र मेनो इमाङ नुङा। 24हटै न्हुनीङ होच्यौ माझा एलीशिबा मीजा फुन्के लेच छाना हटै पाँच महिना सम्मन कुलाक र मानुङ्म इमाङ ज मुवा। 25एलीशिबै टेया, “प्रभुये ङाके दया जाट्मलेको, हीके टेहाङ अब ङाके मीजा माफुन्च टेम भर्मीकोइ मारेट्ले।”
स्वर्गदूते येशू फुन्च बारेयाङ टेया
26एलीशिबा मीजा फुन्के लेच छ महीना छान्नाङ परमेश्वरे गब्रिएल स्वर्गदूतके गालील जिल्लौ नासरत लाङ्घाङ बीरीन्काङ। 27स्वर्गदूत मरियम टेच कन्याटुङ आना। होच्यौ दाऊद राजौ खलकावो योसेफ कठा विवाह छान्के पक्का छान्म लेया। 28स्वर्गदूते होस्के टेया, “झोर्ले! परमप्रभुये नाङ्के ढलीङ रोह जाट्मलेको हटै होस्को नाङ्र कठा लेको।”
29बाकी र स्वर्गदूते टेच इसै कुरा सेनीसीङ मरियम अचम्म परीसा हटै अलमल्ल छाना। 30हटै स्वर्गदूते टेया, “ए मरियम, नाबीरीन! हीके टेहाङ परमेश्वरे नाङ्के ढलीङ रोह जाट्लेको। 31इलाङ सेउ, नेङे काट लेन्जा मीजा फुन्डल। होच्यौ म्यार्मीन येशू डौ है। 32होस्को पट्ट टेनाङ कराहाङ्च छान्नेको, हटै होस्कोके पट्ट टेनाङ कराहाङ्च परमेश्वरो मीजा टेले। हटै प्रभु परमेश्वरे होस्कोके होस्कुङ पुर्खा दाऊदके लख ज राजा जाट्लेको। 33हटै होस्कोइ इस्राएलाङ सधैँ भरी राज्य जाट्लेको। परमेश्वरो राज्य सेन्ड माडुम्ले।”
34बाकी र मरियमे स्वर्गदूतके, “इसै कुट छान्के हेक्ले हीके टेहाङ ङा कन्या ज लेन?” टेम गीना।
35स्वर्गदूते होस्के टेया, “पवित्र आत्मा नाङटुङ राहालेको। हटै पट्ट टेनाङ कराहाङ्च परमेश्वरो शक्तिये नाङ्टाक काम जाट्लेको। होट छान्नाङ नेङे फुन्च बाबुजा पवित्र लेले हटै परमेश्वरो मीजा टेले। 36ङोसो, नोङो आफन्त परीस्स एलीशिबा ढरु बुढीस्स ले। होसै इन्नाङ मीजा फुन्के लेच छ महीना छान्मले, भर्मीकोइ होच्यौ मीजा माछान्ने टेमलेया। 37होट छान्नाङ परमेश्वरे जाट्के माहेक्च काम ही र न माले।”
38हटै मरियमे टेया, “ङा प्रभुवो सेविका आला। नाकोइ टेच लख ज ङाके अटछाने।” होस न्हुनीङ स्वर्गदूत आना।
मरियम एलीशिबाके डुप्के आना
39हटै होस न्हुनीङ मरियम झोस्मन-झोस्म यहूदा क्षेत्रौ पहाडी लाङ्घाङ नुङा। 40हटै होलाङ जकरियौ इमाङ आन्नीसीङ मरियमे एलीशिबाके झोरा। 41जब मरियमे एलीशिबाके झोरा तब एलीशिबौ मीटुकाङ लेच मीजा काखीनीङ केसा। हटै होसै बेला ज एलीशिबा पवित्र आत्मै पीङ्म 42कराहाङ्च स्वराङ टेया, “नाङ माझाको भराङ आशिषित आला, हटै नेङे फुन्च बाबुजा घनीङ धन्यवो आले। 43ङा ही आला र? नाङ च प्रभुवो बोइ आला। टेहाङ र ङाके डुप्के नाराहा, इसै ङाके ढलीङ आशिषो कुरा आले। 44नेङे ङाके झोर्च सेच डीक्को ङौ मीटुकाङ लेच बाबुजा मराङ्म केसा। 45नाङ पट्टको टेनाङ आशिषित आला, हीके टेहाङ परमेश्वरे नोङो जीबनाङ छान्ने टेच कुरा नेङे विश्वास नाजाटा।”
परमेश्वरो लागी मरियमो प्रशंसा ल्हीङ
46हटै मरियमे टेया,
“ङै ङौ मीगीनीङ परमेश्वरो प्रशंसा जाट्लाङ,
47हटै ङौ मुक्तिदाता परमेश्वराङ ङा मराङ्मनङ।
48हीके टेहाङ होस्कोइ ङा ढीन्च माहार्च डुख्ह्याके ङोस्मलेको।
अब इन्न्हीङहोडा पट्ट पुस्तौ भर्मीकोइ ङाके धन्यवो टेले।
49हीके टेहाङ पट्ट टेनाङ शक्तिशाली परमेश्वरे ङौ लागी कराहाङ्च कामको जाट्म याहामलेको।
परमेश्वरो म्यार्मीन पवित्र ले।
50हटै होस्कोके मन्डीच
पट्ट पुस्ताकोके होस्कोइ दया जाट्लेको।
51होस्कुङ शक्तिये होस्कोइ इढीन्च काम जाट्मलेको की
पट्ट घमण्डीकोके छरपस्ट जाट्म याहामलेको।
52होस्कोइ शक्तिशाली भर्मीकोके होस्कुङ पदीङ झलाक्म याहामलेको,
बाकी र डुख्ह्याकोके ढेनाम सोट्मलेको।
53होस्कोइ रन्छीचकोके सेहेच कुराको याहामलेको,
र धनीकोके मर्ल्ह्याङ मीहुट ज ल्हेट्म याहामलेको।
54होस्कोइ दया जाट्च प्रतिज्ञा आर्मीट्म
होस्कुङ सेवक इस्राएलके डुस्मलेको,
55होस्कोइ कानुङ पुर्खाकोके जाट्लाङ टेच कुरा माम्ह्याक्म,
अब्राहाम हटै होस्कुङ सन्तानकोके सधैँ रोलेको।”
56मरियम सोम महीना लख एलीशिबाकठा मुवा हटै मेनो इमाङ ल्हेसा।
बप्तिस्मा याहाच यूहन्ना फुन्च
57हटै एलीशिबै मीजा फुन्च बेला राहा र काट मीजा फुना। 58हटै होच्यौ लाङ्घालीको र मेनोको होस्के परमेश्वरे कराहाङ्च दया जाट्च डाङ्नीसीङ पट्टको होसर कठा मराङा।
59हटै आठ याकाङ होलाङो भर्मीको होस मीजौ खतना जाट्के राहा हटै होच्यौ म्यार्मीन मेनो बाबैयो ढीन्च ज जकरिया डाके पा। 60बाकी र होच्यौ मेनो बोइये टेया, “माला! इच्यौ म्यार्मीन च यूहन्ना डाके परीस्ले।”
61होसोकोइ एलीशिबाके टेया, “नोङो मेनोकोवाङ इन्च म्यार्मीन लेच कुस ड माले!” 62हटै होसोकोइ जकरियाके मीहुटे इसारा जाट्म टेया, “नेङे इच्यौ म्यार्मीन ही डाके विचार जाट्मनाले?”
63हटै होचे रीक्के पाटी ङीहा र, “इच्यौ म्यार्मीन यूहन्ना आला” टेम रीक्म याहा। हटै होसोको छक्क परीसा। 64हटै होसै बखटाङ ज जकरिया तुरुन्तै ङाक्के हेक्च छाना र परमेश्वरो प्रशंसा जाट्के ठाला। 65इसै पट्ट कुराको डाङ्म होसोकुङ लाङ्घालीको छक्क परीस्म बीरीया। हटै इसै कुरा यहुदियावो पहाडी लाङ्घा भरी फैलडीसा। 66इसै कुरा सेच पट्ट भर्मीकोइ इसै बाबुजा न्हुनीङ कुन्च छान्चले टेम मीमन-मीमनाङ टेया। हीके टेहाङ परमेश्वरो शक्ति होस्टाक परीस्म लेया।
जकरियौ स्तुति ल्हीङ
67यूहन्नौ बाबै जकरिया पवित्र आत्मै भरिपुर्ण छान्म परमेश्वरे टेच कुराको सेटाक्के ठाला।
68“परमप्रभु इस्राएलो परमेश्वरो प्रशंसा अटछाने,
हीके टेहाङ होस्कोइ होस्कुङ भर्मीकोके सुरक्षा जाट्म उद्दार-मुक्ती याहामलेको।
69होस्कोइ मेकुङ सेवक दाऊदो इमीङ काट सन्तान खडा जाट्म
पापीङ बचडीके शक्तिशाली मुक्तिदाता खडा जाट्मलेको,
70जसरी परमेश्वरे ढलीङ पहीलीङ होडा ज मेकुङ पवित्र अगमवक्ताकोटुइङ टेम लेकाङ।
71इसै सन्ताने ज कानुङ शत्रुकोटुइङ हटै कान्के माजाक्चको टुइङ कान्के जोगडीलेको।
72परमेश्वरे इसै सन्तानीङ ज कानुङ पिता-पुर्खाकोर कठा जाट्च वाचा आर्मीट्म
कान्के दया जाट्लेको।
73परमेश्वरे होसै सन्तानीङ ज कानुङ पुर्खा अब्राहाम कठा ङै साच्चै प्रतिज्ञा पुरा जाट्लाङ टेम वाचा जाट्काङ,
74की कानकोके शत्रुकोटुइङ जोगडीलेको
75हटै कान्के माबीरीम पवित्र जीबन जीवाम र सेहेच कामको जाट्म होस्कोके सेवा जाट्के टेम आला।
76जकरियै मेनो बाबुजाके टेया,
‘ए ङौ बाबुजा, भर्मीकोइ नाङ्के पट्ट टेनाङ कराहाङ्च परमेश्वरो अगमवक्ता टेले।
हीके टेहाङ नेङे प्रभुवो लाम खास्के नाङ होस्कुङ अघेर-अघेर नुङ्डल।
77होस्कुङ भर्मीकोके कुट पापीङ बच्डीस्के टेम नेङे पाहाटाक्डल हटै पापीङ कुट क्षमा डीहीन्के टेम टेडल।’
78हटै कानुङ परमेश्वर दयालु र मायालु लेको।
होस कारणे शान्तीयो ज्योति कानकोटुङ बीरीन्नेको,
79हटै पापो अन्धकाराङ लेचकोके र सीचवो मीबीरीसाङ लेचकोके ज्योति याहालेको
र सेहेच लामाङ ह्वास्लेको।”
80हटै बाबुजा यूहन्ना आत्मा र शरीराङ होर्मो आना। बाकी र इस्राएलीकुङ बीचाङ प्रचार सुरु माजाट्टार होस उजाड ठावाङ ज मुवा।
Currently Selected:
लूका 1: WMGR
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
