San Mateo 8
8
Si̱ndaꞌa Jesús iin ra ndóꞌo kueꞌe táꞌi ñii
(Mr. 1:40-45; Lc. 5:12-16)
1Tá ndi̱ko koo Jesús vaxi ra nuu xiki ikán, ta kuaꞌa ni naꞌa ndíkun kuaꞌan sata ra. 2Saa ku̱yati iin taa kúu mií kueꞌe táꞌi ñii, si̱kusiti ra nuu ra, saa xa̱á ra káꞌan ra xiꞌin ra, káchi ra saa:
―Tata, tá kúni un ta vaꞌa sindaꞌa un yeꞌe xaꞌa kueꞌe ya ndóꞌo i ―káchi ra xiꞌin Jesús.
3Saa si̱ndikaa ndaꞌa Jesús ta ti̱ndaa ñaꞌa ra, ndi̱kaꞌan ra xiꞌin ra, káchi ra saa:
―Kúni i sindaꞌa i yóꞌo̱, ná nduvaꞌa un ―káchi ra xiꞌin ra.
Tá ndi̱kaꞌan soꞌva ra xiꞌin ra, ta ndikun ndu̱vaꞌa ra. 4Saa ndi̱kaꞌan Jesús xiꞌin ra, káchi ra saa:
―Kuáꞌan, ta koto un käꞌan un xiꞌin nda iin naꞌa. Kuáꞌan nuu sutu ta kuniꞌi un ndiꞌi ñaꞌa ya káꞌan ley Ndioxi ta̱a ra Moisés, taxi un ya ndaꞌa sutu ya ná kundaa ini ndiꞌi naꞌa ya ndu̱vaꞌa un ―káchi Jesús xiꞌin ra.
Síndaꞌa Jesús ra xáa chiñu nuu ra xáꞌnda chiñu nuu nda lapa ñuu Roma
(Lc. 7:1-10)
5Saa ndi̱kiꞌvi Jesús ñuu Capernaum. Ñaa ndi̱xaa iin ra lapa ndíso chiñu xiꞌin iin ciento nda lapa ñuu Roma nuu ra. Saa xáku ndaꞌvi ra nuu ra, 6káchi ra saa:
―Tata, íyo iin ra xáa chiñu nuu i, ta ndee ni ndee ndóꞌo ra, ni küvi kanda ra, iin kúꞌvi níí ra ―káchi ra.
7Saa ndi̱kaꞌan Jesús xiꞌin ra, káchi ra saa:
―Vaꞌa kuꞌun i xiꞌin un veꞌe un sindaꞌa i ra ―káchi Jesús xiꞌin ra.
8Saa ndi̱kuiin ra ndíso chiñu nuu nda lapa, káchi ra saa:
―Tata, ra ndee ni nuu i kúu un, yakan ni köo kúu mií i ichí kiꞌvi un veꞌe i. Takua iin tuꞌun loꞌo kaꞌan un ta nduvaꞌa va moso i. 9Saa chi saa tu yeꞌe va íyo na xáꞌnda chiñu nuu i, ta yeꞌe xáꞌnda chiñu i nuu inka nda lapa. Tá káꞌan i xiꞌin nda kuꞌun nda, ta kuaꞌan nda, tá kána i nda kixi nda, ta vaxi nda. Ta ra xáa chiñu nuu i káꞌan i xiꞌin ra ikan ra ndá ka ñaꞌa káꞌan i xiꞌin ra, ta íkan ra ya ―káchi ra ikán xiꞌin Jesús.
10Saa tá xi̱ni soꞌo Jesús ya ndi̱kaꞌan ra ikán ta ndi̱kanda ni ini ra. Saa ndi̱kaꞌan ra xiꞌin na ndíkun sata ra, káchi ra saa:
―Ya ndaa káꞌan i xiꞌin ndo, ndiꞌi saa ñuu Jerusalén, ta täꞌan nditaꞌan i iin taa ra kándixa ni Ndioxi tá kuꞌva kándixa ra yóꞌó, ta ni süvi ra Israel ku ra. 11Ta ndixa káꞌan i xiꞌin ndo, ndixa ni kuaꞌa naꞌa kuꞌun koo kuxi nuu xáꞌnda chiñu Ndioxi, koo na kixi nuu kétá ñu̱ꞌù tin nuu kéta ya, koo na kuxi na xiꞌin ra Abraham tin ra Isaac xiꞌin ra Jacob. 12Ta na chi̱tuni Ndioxi koo xiꞌin ra nuu xáꞌnda chiñu ra ku na judío, sundi kuaꞌa ni na ikán köo xíin kandixa ñaꞌa. Xaꞌa ya ikán kua kuꞌun na kee na nuu naá ni, ta kuaku ni na xaꞌa ya tixuꞌvi na, saa ndakua ndikaxi nuꞌu na ―káchi Jesús xiꞌin naꞌa.
13Saa ndi̱kaꞌan ka Jesús xiꞌin ra ndíso chiñu xiꞌin nda lapa ikán, káchi ra saa:
―Vaꞌa ndiko koo un nuꞌu un veꞌe un. Xa ndu̱vaꞌa ra xáa chiñu nuu un xaꞌa ya kándixa un yeꞌe ―káchi Jesús xiꞌin ra.
Ta mi hora ikán ndu̱vaꞌa ra xáa chiñu nuu ra.
Síndaꞌa Jesús yá siso ra Pedro
(Mr. 1:29-34; Lc. 4:38-41)
14Tá ndi̱xaa Jesús veꞌe ra Pedro saa xi̱ni ra índuꞌu yá siso ra nuu xito, ndee ni ndítuvi ya xiꞌin yá. 15Saa ti̱in ndaa ra ndaꞌa yá, ta sa̱ña ya ndítuvi ya xiꞌin yá, ndu̱vaꞌa yá. Ñaa ndi̱koo yá xáa vií yá kuxi nda.
16Tá ku̱ñuu ta ndi̱xaa kuaꞌa ni naꞌa xiꞌin na kúu mií tachi nduvaꞌa. Saa ndi̱kaꞌan Jesús tuꞌun xa̱ꞌnda chiñu ra nuu tachi nduvaꞌa ikán ya ná kee ya kuꞌun ya, ta ke̱e ya kuaꞌan ya. Saa si̱ndaꞌa ra ndiꞌi na kúꞌvi. 17Ikán ku nuu ndi̱xinu ya ndi̱kaꞌan ra profeta Isaías xinaꞌa, ka̱chi ra saa: “Ndi̱kuiso ndiꞌi Ndioxi kueꞌe ndóꞌo yo, saa si̱ndaꞌa ra yoo xaꞌa ndiꞌi kueꞌe kúu mií yo”, káchi ya ta̱a ra ikán xinaꞌa.
Na kúni kundikun sata Jesús
(Lc. 9:57-62)
18Saa xi̱ni Jesús kuaꞌa ni naꞌa xi̱nuu nduu nuu ra, ñaa xa̱ꞌnda ra chiñu nuu nda ítaꞌan xiꞌin ra ya ná koo tuꞌva nda xiꞌin barco ya kuchiñu yaꞌa ra xiꞌin nda kuꞌun nda inka ñaꞌñu yuꞌu nduta ñûꞌu Galilea. 19Saa ndi̱xaa iin ra sínaꞌa ley ya ta̱a ra Moisés ndi̱kaꞌan ra xiꞌin ra, káchi ra saa:
―Tata Maestro, kuꞌun i xiꞌin un ndá ka mií nuu kuaꞌan un ―káchi ra xiꞌin Jesús.
20Saa ndi̱kuiin Jesús, káchi ra saa:
―Kiti ikuii ta íyo kava nuu kíxi ri, saa tu kiti sàà va, íyo chiꞌyo nuu kíxi ri, sundi yeꞌe, Taa ra xa̱a ñuu ivi yóꞌó ta köo nuu kusun i ―káchi Jesús xiꞌin ra.
21Saa ndi̱kaꞌan inka ra ítaꞌan xiꞌin Jesús, káchi ra saa:
―Tata, taxi un ná kuꞌun i sinduxin i tata i, sindiꞌi saa kixi i kundikun i yóꞌo̱ ―káchi ra xiꞌin Jesús.
22Saa ndi̱kuiin Jesús, káchi ra saa:
―Naꞌa, kuꞌun un xiꞌin i. Vaꞌa na ndíi, ná sinduxin taꞌan mií va na ―káchi Jesús xiꞌin ra.
Síyaa Jesús tachi ìꞌná xiꞌin tikuii.
(Mr. 4:35-41; Lc. 8:22-25)
23Saa ndi̱kiꞌvi Jesús ini tun barco xiꞌin nda ítaꞌan xiꞌin ra, ndi̱kiꞌin nda kuaꞌan nda. 24Ñaa xa̱a ndinuni loꞌo xíka tachi íꞌná, ndakua ndíkuita nuu tikuii, xa̱a rá kuakee rá ini tun barco. Ta saa ndi̱naa ini Jesús kíxi ra ini nu. 25Saa ndi̱xaꞌan nda ítaꞌan xiꞌin ra si̱ndikoo nda ra, káchi nda saa:
―Tata, ¡Sikaku un ndeꞌe! ¡Koto ka kaꞌan ndaa ndiꞌi yo xiꞌin tikuii chi kuaketa tun barco ini tikuii! ―káchi nda xiꞌin ra.
26Saa ndi̱kuiin Jesús káchi ra saa:
―¿Ndachu íꞌvi ni ndo? ¿Án köo kándixa ndo yeꞌe ya sikaku i ndóꞌo̱? ―káchi ra xiꞌin nda.
Saa ndi̱koo ra ndi̱kaꞌan ra xiꞌin tachi tin tikuii. Ñaa si̱yaa tachi tin tikuiin, iin taxiin ku̱u. 27Saa iin ndi̱kanda ini nda, káchi nda saa:
―¿Ndá taa ku ra yóꞌó, yakan vaꞌa xíni soꞌo tachi tin tikuii tuꞌun káꞌan ra? ―káchi nda.
Nda taa ñuu Gadara kúu mií tachi nduvaꞌa
(Mr. 5:1-20; Lc. 8:26-39)
28Saa ndi̱xaa Jesús inka ñaꞌñu yuꞌu nduta ñûꞌu nuu ndóo na Gadara. Ta ikán ka̱na koo uvi nda taa nda kúu mií tachi nduvaꞌa, ta kini ka vi íin nda, kueꞌe ni nda. Nda iin naꞌa küvi yaꞌa nuu íyo nda, ta íyo nda kava nuu ndúxin naꞌa. Saa ndi̱xaa uvi saa nda nuu Jesús. 29Ñaa iin ndi̱ndaꞌi koꞌo uvi saa nda, káchi nda saa:
―¿Unkua kúni un ikan un xiꞌin nde, Jesús? Kïꞌvi un xiꞌin nde saa chi Seꞌe Ndioxi ku yóꞌo̱. ¿Án xa̱a un ya xaa nduvaꞌa un xiꞌin nde, yachi ka tá täꞌan tindaa tiempo? ―káchi nda xiꞌin Jesús.
30Ta yati ñúꞌu iin tiꞌvi chee kini xíxi ri. 31Saa ndi̱xikan tachi nduvaꞌa ya mani nuu Jesús, káchi ya saa:
―Tá ná tava un ndeꞌe kuꞌun nde, ta taxi un kee nde ini kiti kini kaá ―káchi ya xiꞌin Jesús.
32Saa ndi̱kaꞌan Jesús xiꞌin ya, káchi ra saa:
―Vaꞌa kiꞌvi ndo ini ri ―káchi ra.
Saa ndi̱kiꞌvi tachi nduvaꞌa ini kiti kini, ta ndinuni loꞌo si̱xinu ya ri kuaꞌan ri ndika nuu kini káá. Ñaa si̱koyo ya ri ini nduta ñûꞌu, saa ndi̱kaꞌan ndaa ndiꞌi ri tikuii ta ndi̱xiꞌi ri. 33Tá xi̱ni nda ndáa ri ya ndo̱ꞌo ri, saa ka̱na koo nda xínu nda ndi̱xaa nda ñuu. Saa ndi̱tuꞌun ndiꞌi nda xiꞌin na, unkua ndo̱ꞌo kini tin nda kúu mií tachi nduvaꞌa. 34Ñaa ka̱na koo ndiꞌi na ñuu, ke̱e na kuaꞌan na koto na Jesús, saa ndi̱xikan na ya mani nuu ra ná keta ra kuꞌun ra inka ñaꞌñu.
Active: ©Wycliffe Bible Translators, Inc. All rights reserved.