Matayo 24
24
eLuhu lwa Ongo lungáhandulibwa
(Mar 13:1-2; Luk 21:5-6)
1Mango Yesu ábaa era átenga mwa Luhu lwa Ongo*, ebanafunzi* bai bera kumuíkira chasiya bamulóse olu Luhu kwa luímbirwe. 2Si Yesu era kubǎkula mbu: «Kubinali, nábabura kwa ebi byoshi muséne'ko anola, kutáli chiro ne'koi lya likáshiba era luulu sa lirikabo. Byoshi bingáhandulibwa!»
Bya bikába mwa suku se'businda
(Mar 13:3-13; Luk 21:7-19)
3Mango Yesu ábaa ékese kwa ndulungu ye'Miseituni, ebanafunzi* bai bera kumuíkira ala ábaa àli yeine. Bera kumubusa mbu: «Enawetu, utúburaa mangochi ei myasi ikába, na chi chikátulosa ebihangi bye'kuika kwao, ne'bye'businda bwe'butala!»
4Yesu nai mbu: «Muményaa! Kùtabaa mundu asibya ola ukábengeera, 5bushi bandu banene bakábaha mwe'sina lyanyi. Abu bandu, bakénde báchitonga mbu: ‹Nyono nyi Kirisito*!› Bakêngéera na bandu banene. 6Mwe'si suku, mukômva ebandu báteteresa era luulu se'bita mwa bisiki byoshi. Si mùtobaa bushi ebi byoshi kwěmire biíke. Si ebyera, bikába bìtatechire mbu ebusinda bwe'butala bwaíkire. 7Chio chiuma chikáya kutabalira echinji. Na bwami buuma bukáya kutabalira ebunji. Bio binene bikáika mu'bulio, ne'musisi akénde árenga mubi. 8Ei myasi yoshi, ikánaba nga ndangiriso ya mukero.
9«Ebandu bakábahomba bushi nanyi. Bakénde bábana chasiya mulíbusibwe busese munêchibwe. 10Mwe'si suku, bandu banene bakáreka ebwemeresi bwabo. Ebandu beine kwa beine, bakénde barénganyana na kuhombana. 11Barebi* banene ba bisha bakáulukira. Abu barebi bakêngéera bandu banene. 12Kanji bushi ne'mabi kuendekera máluwa busese, enzii ya bandu banene ikândáalira. 13Si ola ukásesa emuchima kuikira kwa businda, akánunulibwa. 14Rero, ono Mwasi Mubuya-buya we'Bwami bo'kwa nguba, akáhubanganyisibwa mwa butala boshi, búbe bubei kwa bandu be'mbaa soshi. Chasinda, ebusinda bwánere bwáika.»
Emalibuko masibu
(Mar 13:14-23; Luk 21:20-24)
15«Mwe'si suku, mukálola kwo'la bénde bérika mbu "Mubalasi wa kuhandula"#24:15 Somaa Tanyeri 9:27; 11:31; 12:11. àli mwa Chisiki Chibuya-buya. Oyu murenda, i'murebi* Tanyeri ábaa átechire'ko mira. (Ola wasoma ene myasi, aményereraa kwa ìtechire.)
16«Rero, ebandu ba bakába bàli eYuteya, baháiraa mwa miruko. 17Eri emundu akába àli kwa ngangamo se'nyumba, àtachândaaliraa mwa ndanda kutola kandu kasibya. 18Ne'ri akába àli mwe'hwa, àtachifulukaa kwa musi mbu áya kutola eluchimba lwai.
19«Mwe'si suku, bukába buanya kwa bakasi ba bakába bète makure ne'ba bakába bônza! 20Mwémaa Ongo, oku kuhaa kwenyu kutabáa mwa suku se'mvula nesi lusuku lwa Sabato*. 21Bushi esi suku sikába sa malibuko manene busese ma matàfuraa kuba kutengera ekubumbwa kwe'butala kuikira lwarero. Kanji emalibuko ma màli nga'ma matákachibe. 22Esi suku, akaba Ongo àtangasiírire sieke, kutáli chiro na mundu asibya ola ùnganunulibwe. Si ásiirire sieke, bushi ne'bandu bai ba áchilóndorere.
23«Mwe'si suku, akaba mundu murebe àngababura mbu: ‹Mulólaa! Kirisito* yono ùli wano!› nesi mbu: ‹Yola ulí wála!› oyu mundu, mùtamwêmereraa, 24bushi kukaulukira bandu ba bakénde báfula bisha mbu bu bera Kirisito* ala'uma na barebi ba bisha. Abu boshi, bakénde báira bisomerano binene, chasiya akaba bìngaalikana běngéere ebandu ba Ongo álondwere. 25Muményaa! Nàbabwirire ei myasi yoshi era muhondo iíke.
26«Bushi no'ku, akaba emundu àngababura mbu: ‹Mulólaa! Rero Kirisito* yola ulí mwa buyeye*!›, mùtayaa'yi. Nesi akábabura mbu: ‹Yono uchíbishire mwa chumba!›, mùtamwêmereraa. 27Bushi ekubaha kwanyi nyi Mwana we'Mundu, kukába ngo'kwa kalimya-limya kénde kálomeka mwa chanya choshi.
28«Chira chisiki cha chìri mu chirunda, che'nzu sénde sáya kuchilunda'mo.»
Ekubaha kwe'Mwana we'Mundu
(Mar 13:24-27; Luk 21:25-28)
29«Era nyuma se'malibuko me'si suku,
esuba likáhuba musimya,
ne'mwesi atákachikole,
engununu nasi sikátowanga kwa nguba.
Na byoshi bya byète ebuashi kwa nguba, bikálingitana. #24:29 Somaa Isaya 13:10; 34:4.
30«Chasinda, ekalorero ke'kubaha kwanyi nyi Mwana we'Mundu, kakálorekana'ko kwa nguba. Ne'bandu be'mbaa soshi so'mwa butala, bakába mwa malira. Bakálola kwa nyi Mwana we'Mundu nátenga kwa nguba nyìri mwa lumbumbu ne'buashi na bulangare bunene. 31Ekaperere kanene kakábanjibwa'mo. Chasinda, nyikátuma ebamalaika* banyi báye kwa nyinda soshi se'butala, kubuanyanya ebandu banyi ba nálondalaa.»
Emuanyi we'muchi we'tini
(Mar 13:28-31; Luk 21:29-33)
32«Muchikángirisaa kurèngera emuanyi we'muchi we'tini. Oyu muchi, mango ematabi mao ménde mátanganyika ne'bichi byao byatábaana, mwénde mwáteta mbu echianyiro chibuya chìri ofu. 33Rero, mango mukálola kwe'i myasi yoshi, mwánamenyerera kwa nyi Mwana we'Mundu, nera nyìri kwa chiso. 34Kubinali, nábabura kwe'bandu be'sine suku batáfe boshi era muhondo ei myasi yoshi ìtasa kuba. 35Enguba ne'butala bikárenga, si ebinwa byanyi byeke bitákarenge chiro na hicha.
Ongo yeine i'unêshi elusuku lwe'businda
(Mar 13:32-37; Luk 17:26-30, 34-36)
36«Si kutáli mundu asibya ola wìshi olu lusuku nesi echihangi che'i myasi ikába. Anabe ne'bamalaika* bo'kwa nguba, nanyi nyi Mwana we'Mundu tùtanêshi, si Tata yeine i'unêshi. 37Kwa byábaa mwa suku sa Nowa, ku'bikánaba kanji kwa lusuku lwe'kuika kwanyi nyi Mwana we'Mundu. 38Bushi era muhondo se'suku se'mwihuso, ebandu bábaa bénjire bálya ne'kumwa, bábaa bénjire báhwera ne'kuhweribwa, kuikira elusuku lwa Nowa êngiriraa mwa bwato. 39Abu bandu, batámenyaa cha chingába kuikira mango oyu mwihuso áikaa kubasikya boshi.
«Kubikanahuba kuba bacha mango nyi Mwana we'Mundu nyikáfuluka. 40Mwa'mu mango, bandu babiri bakába bàli mwe'hwa, muuma àkêkibwa, ne'unji akárekibwa. 41Bakasi babiri bakába báshera ku'lusho luuma, muuma àkêkibwa ne'unji akárekibwa.
42«Bushi no'ku, muchilángaa, bushi mùteshi elusuku lwa Enawenyu akáfuluka. 43Mǔmvirisaa ene myasi kubuya: Ena enyumba akaba àngamenyire bihangi bichiye butufu bye'mwisi angáika kwîba, àtangaonjire chasiya alánge enyumba yai bangesha kuitula. 44Nenyu mundaa mwékala mwàchikunganyise, bushi nyi Mwana we'Mundu nyikábaha mwa chihangi cha mùteshi.»
Emukosi ola ùngachinyiirwa no'la ùtangachinyiirwa
(Luk 12:41-48)
45«Nde i'mukosi mwenge ola enawabo àchinyiire, ola àngaira kuba mwimangisi wa balikabo, chasiya énde êresa'bo ebiryo kwa bihangi bikomire? 46Oyu mukosi, aáhanyirwe akaba enawabo àngafuluka mwa lubalamo, ánamubuana anáchiri ákola oyu mulimo. 47Kubinali, nábabura kwo'yu enawabo àngamuira kuba mwimangisi we'bikulo byai byoshi. 48Si akaba oyu mukosi àngaba mubi, na kuchitetera mbu: ‹Aaye! Enawetu êramire busese.› 49Chasinda, ánere átangirisa kunde ápunda bakosi balikabo, na kunde álya ne'kumwa ne'batamisi. 50Rero, enawabo akáfuluka elusuku ne'chihangi cha àteshi. 51Bushi no'ku, enawabo akámupunda busese na kumuchinjibusa ngo'kwa bénde báchinjibusa ebatebanyi. Chasinda, akámuuma mwa chisiki cha akálirira'mo na kulola kwa kasibu.»
© 2017 Wycliffe Bible Translators, Inc.