Matayo 16
16
eBafarisayo ne'Basandukayo béma Yesu echisomerano
(Mar 8:11-13; Luk 12:54-56)
1Lusuku luuma eBafarisayo* ne'Basandukayo* baíkiraa Yesu. Bábaa báhonda bamuéreke. Bera kumwěma mbu abaíriraa chisomerano chiuma cha chálosa kanangana kwa ebuashi bwai bùtengire kwa nguba.
2Yesu era kubǎkula mbu: «Ebihangi bye'luolo-olo, mwénde mwáteta mbu: ‹Mwa chanya mùli bwange, mishangya bungácha kubuya.› 3Ne'bihangi bye'mishangya-shangya, mwénde mwáteta mbu: ‹Enguba yenyíre, lwarero emvula ingátowa.›
«Mango mwénde mwátumbikisa kwa nguba, mwénde mwa ményerera ebihangi bya bingába. Rero bine bihangi mùli'mo, kute mùtangabimenyerera? 4Ebandu be'sine suku bàli babi, kanji bàtatunjire Ongo! Bénjire béma echisomerano, si cha bangálosibwa chináli cha cha murebi* Yona oshâo.» Chasinda, Yesu era kubareka na áchěndera.
Echachu che'Bafarisayo ne'Basandukayo
(Mar 8:14-21)
5Mango ebanafunzi* ba Yesu bábaa bera bàhabukaa enyanja, bábaa bébirire kwêka emikati. 6Yesu era kubabura mbu: «Mundaa mwáchilanga kwa chachu* #16:6 Chachu: bùli bufumu bwa bwénde bwáimbya emikati, kanji bénde bákoresa'bo kwa kuisa emafu. che'Bafarisayo* ne'che'Basandukayo*.»
7Abu banafunzi*, bera kutangirisa báburana mbu: «Àtechire bacha, bushi tùtarechire emikati.»
8Ebi bábaa báburana bacha, Yesu era kubimenyerera. Bushi no'ku, era kubabura mbu: «Munáli bandu ba bwemeresi bueke! Chi chátuma mwáchitetembya mbu mutéte mikati? 9Mùtanasa kumenyerera? Mùtachikengere ba bandu byumbi bitano kwa bèutaa era mikati etano, na bitonga binga bi mwàlunda-lundaa bya byàshibaa? 10Nesi mùtachikengere ba banji bandu byumbi bine nabo, kwa bèutaa era mikati erinda, na bitonga binga bi mwàlunda-lundaa bya byàshibaa? 11Rero, chi chátuma mwáanyisa mbu bya náteta byerékere emikati? Nábabura kwa mundaa mwáchilanga ne'chachu* che'Bafarisayo* ne'Basandukayo*.»
12Ebanafunzi* bera kwire bámenyerera kwa kasi Yesu abáa átateta era luulu se'kuchilanga era luulu se'chachu*, si abáa ábabura kwa béndaa báchilanga ne'myasi ye'Bafarisayo* ne'Basandukayo*.
Petero áteta kwa Yesu i'Mwana wa Ongo
(Mar 8:27-30; Luk 9:18-21)
13Era nyuma se'bi, Yesu era kuya mwa bimbi bye'Kaisariya Firipi. Era kubusa ebanafunzi* bai mbu: «Ewashe, ebandu bénjire báteta mbu nyi Mwana we'Mundu, nyi nde?» 14Nabo mbu: «Bauma bénjire báteta mbu u'Yowani Mubatisayi, ne'banji mbu u'Eliya, ne'banji mbu u'Yeremiya, nesi mbu ùli muuma mwa banji barebi* bo'kwa mira.»
15Yesu kukwera kubabusa mbu: «Nenyu mwénjire mwáteta mbu nyìri nde?» 16Simoni Petero era kumwǎkula mbu: «Woyo, u'Kirisito*! Mwana wa Ongo we'kalamo.» 17Yesu era kumubura mbu: «Simoni mwenyi Yona, waáhanyirwe. Bushi oyu mwasi kutáli mundu ola wàkulosise'o, si Tata ola ulí kwa nguba. 18Nanyi nera nákubura kwa woyo u'Petero, kukuteta mbu ekoi. Na kwe'line koi, ku'nyingáimba eluhu lwanyi. No'lu luhu, ebuashi bwe'kusimu butákaluime chiro na hicha. 19Kanji nyingákweresa efunguro se'Bwami bo'kwa nguba. Byoshi bya ukénde wánana muno butala, Ongo nai akénde ánabinana. Na byoshi bya ukénde wêmerera muno butala, Ongo nai akénde ánabyemerera.»
20Chasinda, Yesu era kubura ebanafunzi* bai mbu bàtaburaa mundu asibya kwa i'Kirisito*.
Yesu áteta era luulu se'kufa ne'kwômoka kwai
(Mar 8:31–9:1; Luk 9:22-27)
21Kutengera mwa'mu mango, Yesu era kutangirisa ábura ebanafunzi* bai busira kubabisha, kwa bimwémire áye eYerusalemu. Ne'yi, ebashamuka be'Bayuta, ne'bakulukulu be'bakuhanyi*, ne'bakangirisi be'Mwaso* bangámulibusa busese. Chasinda, angêchibwa, no'kwa lusuku lwa kahatu angômwoka.
22Petero kukwera kumweka ala musike, na átangirisa ámubura na bute bunene mbu: «Enawetu! Ongo àkuimiraa ebyera, bìtakuikiraa chiro na hicha!» 23Si Yesu kuna kubinduka, na ámubura mbu: «E u'Musimu! Tèngaa mwa meho manyi! Kunyiteya ku wányiteya, bushi emianyisa yao itátenga era mwa Ongo, si ináli ya mundu.»
24Yesu kukwéra kubura ebanafunzi* bai mbu: «Akaba emundu áhonda kunyikulikira, arekaa kunde áanyisa era luulu sai yeine, ěmire kwêka emusalaba wai, anyíkulikire. 25Bushi, emundu ola wáhonda kulamya ekalamo kai, angákaesa. Si ola ungâna ekalamo kai bushi nanyi, yeke angáhuba kukabona. 26Mutoloke muchiye ola mundu àngabona mwa kuata ebindu byoshi byo'mwa butala, àesise ne'kalamo kai? Na chiye chi emundu àngahuba kwâna kwa kununula ekalamo kai?
27«Nàtechire bacha, bushi nyi Mwana we'Mundu nyikábaha mwa bulangare bwa Tata ala'uma ne'bamalaika* bai. Kanji nyikêmba chira mundu kukulikana ne'mikorere yai. #16:27 Somaa Saburi 62:13. 28Kubinali, nábabura kwa mwa'bano bandu bàli anola, mùli bauma ba batákafe bàtasa kulola kwa nyi Mwana we'Mundu náika nga Mwami.»
© 2017 Wycliffe Bible Translators, Inc.