Tegagia 7
7
Uwoi lolowi
7:1-24
1Mepau Iramo i Ue ndi Noho, ”Pewinsomo a larobangka atuu, omue ka luwuno ihino rahamu, hangano omuemo anu mentee a pongkita-Ku i olodo mia tempo andio. 2Inso a luwuno kondehora anu nahi upali asalakono ka u'alao opitu pasa, lakino ka pasano, sine inso a ngkondehora anu upali, asa pasa, lakino ka pasano, 3inso mbo'u a manu-manu anu i laro meene opitu pasa, lakino ka waino, ka ikongko tuwu inuleno i asa wawontolino. 4Hangano opitu oleopo mbo'u, Aku mompotii usa i wawontolino i larono pato pulu oleo pato pulu wongi, ka Aku mokotampulao inso i wawontolino luwuno anu tuwu, anu pinokogagi-Ku atuu.” 5Ka i'amba i Noho weweuo luwuno kona ntu'u kana peparenta-Do i Ue ndi onae. 6Tinuwuno i Noho nomo etu nta'u tempono uwoi lolowi sumampuo tolino. 7#Mat. 24:38-39; Luk. 17:27I Noho mewinso a laro bangka atuu saru luwuno anano, kombiano ka kombiado luwuno anano hangano uwoi lolowi atuu. 8Inso a kondehora anu nahi upali ka anu upali, inso a luwuno manu-manu ka inso a luwuno anu melele i wawontolino, 9mehawe nte'o'asa pasa ndi Noho a laro bangka atuu, lakino ka waino, kana peparenta-Do Ue Ala ndi Noho.
10Mansano opitu oleo, tolino isampuomo lolowi. 11#2Pet. 3:6Tempono tinuwuno i Noho nomo etu nta'u, a wula ko'orua, a oleo ko hopulu ka opitu wula atuu, a oleo atuu tebosiomo luwuno mata uwoi i ondaloano anu mongkokodoito i totono tolino, ka te'ungkahiomo luwuno pentangoa i langi. 12Ka i'amba metiiomo usa marombo i wawontolino i larono pato pulu oleo pato pulu wongi. 13A oleomo atuu i Noho mewinso saru i Semu, i Hami ka i Yapeti, luwuno anano i Noho, ka beineno i Noho saru otolu ira beinedo anano, a laro bangka atuu, 14meronga saru mbo'u ondae luwuno rupano kondehora mo'ila, luwuno rupano pinotuwu, luwuno rupano kondehora anu melele i tolino ka luwuno rupano manu-manu, luwuno manu-manu ka luwuno anu mepani. 15Luwuno anu tuwu anu hinao penaano mehawe nte'o'asa pasa ndi Noho a laro bangka atuu. 16Luwuno anu mehawe atuu, mpewinso, lakino ka waino inso a luwuno anu tuwu, kana peparenta-Do Ue Ala ndi Noho. Ka Do'amba i Ue tumondoo pewowano bangka. 17Ilarono pato pulu oleo lolowi sumampuo tolino. Uwoi atuu mewuatako ka tumandeo bangka atuu, ranta ka itetande mantande inso i tolino. 18Tempono uwoi koteti-tetiangino ka mewuatako tedoa mongkokodoito i wawontolino, melonto-lontoomo bangka atuu a wawo uwoi. 19Uwoi atuu tetiangi tedoa mongkokodoito sumampuo tolino ka tumutuwio luwuno torukuno mantande itotono langi. 20Uwoi atuu koteti-tetiangino hawe hopulu ka olima hiku i wawono luwuno ntorukuno, ranta ka itutuwio. 21Ka i'amba memate iramo luwuno anu tuwu, anu melelu i tolino, luwuno manu-manu, pinotuwu, ka kondehora mo'ila ka luwuno kondehora anu mpenggowo i tolino, saru luwuno mia. 22Luwuno anu hinao penaa tuwu a laro engeno, luwuno anu mo'ia a wita memate luwu. 23Kanandiomo Dopokotampulao Ue Ala luwuno anu tuwu i wawontolino, moiko mia maupo pinotuwu, kondehora melele ka luwuno manu-manu i laro meene, ranta luwuno atuu pinokotampula inso i wawontolino; anu tola butu i Noho ka luwuno anu meronga saru onae a laro bangka atuu. 24Uwoi atuu koteti-tetiangino i wawontolino, i larono asa etu ka lima pulu oleo.
LAI 2021