Ruuta 2
2
Guŋun ŋga Rutə da Bowaz
2.1—3.18
Rutə asəkərə ga Bowaz
1Ma Na'omi, tə'i ki da əndə agi duurə ŋga Elimelek, ŋgurii. Əndə gəna, da məghərəvən nə cə, Bowaz nə ləməkəy. 2Ma ka əndə'i uusəra, kə bii Rutə mitə Mo'abətə ka Na'omi: «Taku, kaa nya dzə aa bilə, ka aalə mondiin. Ka nə'un nə nyi ba'ə ŋga əndətə na ɗa ka nyi pwapon.» Əŋki Na'omi ka ki: «Dzuu ɗii uuzənaaki.»
3Kya palə, kya dzə ka aalə mondiin daba'ə ənjə slən cifan. Ma gi səkəy ka ɗan, asəkərə ga Bowaz, duurə ŋga Elimelek gi ki ka alə mondiitə yadə shiinatə. 4Ma daba'əkəy, Bowaz a maɗə də Bayitilaama ca dzə aahakəy aasəkərə. Ca nəhəpaa ənjə slənaakəy, ca ba ka tii: «Wa Yaawe a ndzaa ləɓə don!» Təya jikə ka cə: «wa Yaawe a ɗa ka hə barəkaan!» 5Bowaz a ləgwa ka matakuŋwan ŋga ənjə slənaakəy əŋki cə: «Ŋga wu da nə kadəməna?» 6Matakuŋwaatə a jikə ka cə: «Ma kadəmətsa, əndə Mo'ab nə ki. Atsaa Na'omi shi ki daga an hanyin ŋga Mo'ab. 7Kə ləgwii ki amaki, kaa nya vii ka ki rəgwa ŋga dzən ka alə mondiin ŋga aləkəmaarə agi əpwan daba'ə ənjə sləna. Tsəɗakə pəderən mbu'ya ki aahan. Dəŋ əndzə'i ma'ə ki ma əpim səka, maɗaam gi'u ndzaacii ki.» 8Wata Bowaz a ba ka Rutə: «Uuzənaaki, fawə! Gaha dzə ka alə mondiin ka əndə'i ra, gaha dzəggi gan asəkərə. Ndzaawə gan, slənəm da makkiinə ca slən ka nyi. 9Tsaamətə rəgwatə cə təya slən dadavə, ha nə'u makkiitə ca tsəkə mbiinəkəy. Kə dzaləpaa nyi ənjə slənaaki ga təya ure ka hə. Maɗa kə ɗii megiirən tə hə, duu, ha sa ma'in ka gəriitə nə ənjə slənaaki a naanatə.»
10Rutə a gərə'waan, kya dəlsəgi nətə aapan atsa səɗə Bowaz, kya ba ka cə: «Mi saŋ ɗii liwə hə tə nyi ŋga'ə, ha ɗa ka nyi pwapon, nyi ənə məshipətə ənda?» 11Bowaz a ba ka ki: «Kə dzəgunəgi ənjə ka nyi sət ɗii hə ka sərəhwaaku daba'ə əntən ŋga ŋgurəku. Kə bwase hə ka i duu da muu da yi gon da hanyinaaku ha shi ka ndzaan agi ənjətə ma shim ha shii tə tii ŋga ŋukə. 12Wa Yaawe a ki'i ka hə shikwa ŋga slənaaku pat. Ma Yaawe, Əntaŋfə ŋga Isərayiila, ənə hwaya hə ka umbən aatsaa səɗəki, cə na ki'itə ka hə sən ɗii hə.»
13Rutə a ba ka cə: «Slandanəkya! Kə upaa nyi pwapon akuŋwaciiku, kə puutəpaa hə tə nyi. Kə dədəkəpaa waɓənaaku tə nyi, nyi mavaaku, yo mambu'um nyi makə taa rəŋwə agi makki slənaaku.»
14Makə ɗii saa'i ŋga zəmən, Bowaz a ba ka Rutə: «Əncahawə, nda adaam zəma. Ŋgəruu burodya, ha ndəmwə də dzəguɗa#2.14 Dzəguɗa: Ma dzəguɗa, cə sət nji ənjə a adə də burodya waato mahwarəkin..» Rutə a ndzaan a taŋgala ənjə sləna, Bowaz a vii ka ki mataala hi'u uushə'in ŋga ra, kya tsəɓə kə əburi ki ha'ə kə mbəɗaan. 15Wata kya ənə, ka maɗətən kya dzə ka alə mondiin ŋga aləkəmaara. Bowaz a ba ka ənjə slənaaki: «Bwasem ka ki, kya alə mondiin ka hatə mwayi ki. Gona ɗa də ki də uushə. 16Dzəm də bwaasen ka hara aləkəmaara kaa kya shii shin ka fəəɗəənən. Gona ɗa də ki də uushə.»
17Kə ali ki mondiin ŋga aləkəmaarə davə asəkərə ca'ə kədəwan, kya dəgəgi sət upaa ki pat, ka ɗan reta ŋga buha. 18Makə uugi ki, kya ŋgərəvə aanətə, kya pyalyagi aasəkə vəran. Kə ne sərəhwatə ka sət upaa ki. Ma daba'əkəy, kya ŋgiragi mataalakəy ətə mbəɗaan aciitə, kya vii ka ki. 19Əŋki sərəhwatə ka ki: «Da daa nji hə ka alə mondiin ənshina? Ka ŋgutə rə slənyi hə da? Wa Əntaŋfə a ɗa barəkaan ka əndətə ɗii ka hə ŋga'əətsa.»
Wata kya dzəgunəgi ka sərəhwatə hatə nji ki ka slənən, kya ba ka ki: «Bowaz nə ləm ŋga slanda rətə slənyi nyi gakəy ənshin.»
20Wata Na'omi a ba ka maɗanatə: «Əndə barəkaan nə Yaawe, acii Poshə cə bwase ka ɗa ŋga'əən ka ənjətə da'i əpin da ka ənjətə məətəgi.» Na'omi a tsakə ban, əŋki ki: «Ma əndətsa, duurə gaam nə cə, maluwə gaam nə cə.»
21Rutə mitə Mo'abətə a ba: «Kə bii cə ka nyi tuu'in: ndzaan da ənjə slənaaki ca'ə ka saa'itə nə təya uudəpaa slən ka nyi cifan pat.» 22Na'omi a ba ka maɗanatə Rutə: «Ŋga'ə ha'ə, uuzənaaki, tsaku ɗa gazhə'waan ŋga dzən da makki slənaakəy ka sləna. Gaha dzə ka əndə'i rə acii ga ənja lapaa tə hə davə.» 23Wata Rutə a ndzaa da makki slən ŋga Bowaz ka slən cifan ŋga matsakətsakə aləkəmaara da ŋga aləkamaara ca'ə ka muudin ŋga slənəkəy. Kə cakə ki ndzaan da sərəhwatə Na'omi əs.
All rights reserved