SAN MATEO 9
9
E kꞌanj jun xjal tuꞌn Jesús min yucchtl t-xumlal
(Mr. 2:1-12; Lc. 5:17-26)
1Bix ocx Jesús tuj barc, bix iyꞌx jlajxe tnijabel aꞌ, bix e ponxin tuj jtnom jaaꞌ e najanaxin.
2Tejtzen tponxin tuj ttanemxin te Capernaum, ul jun cloj xjal iken jun yaab twiꞌ jun wetbil. Mintiiꞌ tanem t-xumlal. Tej tzunj toc tcyeꞌyenxin kꞌuklec cycꞌuꞌj xjal tiꞌjxin, e xiꞌ tkbaꞌnxin tej xin yaab:
—Ncwal, nimsam tcꞌuꞌja. Ma najset tila―tz̈ixin.
3Tejtzen cybinte ke txꞌolbal ley ja yol ka otk najset til yaab tuꞌn Jesús, akꞌkexin yolel cyxolxxin:
—Ja xjal lu n-oc tkꞌon tiib te Dios. Ncub t-xniyꞌbeꞌnxin ka Diosxin―tz̈ikexin.
4Pero el tniyꞌ Jesús tiꞌj jkaꞌ iyꞌ tuj cycꞌuꞌjxin, bix e xiꞌ tkanenxin:
—¿Tikentzen nxiꞌ cyximana tuj cyanema kaꞌ kena bix mlay bint wuꞌna tuꞌn tnajset cyil xjal? 5Tuj cywitza, ¿alcyej yol mas secy tyol jilj tuꞌn t-xiꞌ nkbaꞌna tej yaaba, japaj “Ma najset tila,” bix ma jaj “Weꞌwetzen tey bix cutxetzen tjay”? 6Te weya, junx taꞌ. Tuꞌn tel cyniꞌya tiꞌj at wipemala tuꞌn tcub nnajsaꞌna cyil xjal, cwel nkꞌanena ja yaab lu―tz̈i Jesús cye txꞌolbal ley.
Bix e xiꞌ tkbaꞌnxin te yaab:
—Weꞌwetzen tey, kꞌinx twetbila, bix cutxetzen tjay―tz̈ixin.
7Bix e jaw weꞌ yaab, bix e jaw tiiꞌn twetbil, bix aj tja. 8Yaltzen kej xjal otk chi chmet tiꞌjxin, tej cylonte ti e baj, nimxsen e jaw kleeꞌke, bix e jaw cynimsaꞌn tbi Dios, cuma otk tzaj tkꞌoꞌnxin tipemalxin te jun xjal tuꞌn tbint jlu tuꞌn.
Tej ttzaj txquet Mateo tuꞌn Jesús
(Mr. 2:13-17; Lc. 5:27-32)
9Tbajlenxittzen juꞌwa, bix e xiꞌ tbeten Jesús juntl tkiyꞌ. Bix tej texxin twitz jun jaaꞌ jaaꞌ eteꞌcꞌa kej xin chmol chojentj, e xiꞌ tcyeꞌyenxin tunwen kꞌuklecx jxin Mateo. Bix e xiꞌ tkbaꞌnxin te Mateo:
—Lpetz tey wiꞌja, tuꞌntzen toca te nxnakꞌatza.
Bix e jaw weꞌ Mateo, bix oc lpe tiꞌjxin.
10Mas yaj, tej tcub ke Jesús cyuya t-xnakꞌatz lepch tiꞌjxin tiꞌ mes tuj tja Mateo, jax nim chmol alcabala bix nim xjal yaaꞌn baꞌn tuj cywitz aj fariseo e pon te waaꞌl cyuyaxin. 11Tej toc cycyeꞌyen fariseo nwaaꞌncx Jesús cyuya kej xjal yuwin tuj cywitz fariseo, e xiꞌ cykanenxin cye t-xnakꞌatzxin:
—¿Tikentzen nwaaꞌncx jxin xnakꞌtzal cyey cyuyaj chmol alcabala bix tuya mastl aj il?―tz̈ikexin.
12Pero e tbi Jesús ja yol lu, bix e xiꞌ tkbaꞌnxin cye fariseo:
—Kej xjal baꞌn min cheꞌxcye tuya kꞌanel. Nuk oꞌcx kej xjal yaab ncheꞌx tuya kꞌanel. 13At jun tyol Dios tzin tkbaꞌn cyjulu: “Waja tuꞌn toc kꞌakꞌen cycꞌuꞌja cyiꞌ xjal, yaaꞌn nuk oꞌcx cyoybila,” tz̈i Dios tuj tyol. Kꞌoꞌnc cyipena tiꞌj tuꞌn tel cyniꞌya tiꞌj ti japenina ja yol lu, cuma min ma chin ul weya te txcolte cyej xjal mintiiꞌ cyil tuj cywitz, sino te cyej xjal aj il tuj cywitz tuꞌn cymeltzꞌaj―tz̈ixin cye fariseo.
Jun kanbil tiꞌj epaj weyaj
(Mr. 2:18-22; Lc. 5:33-39)
14Yajcꞌatl, bix e pon tuya Jesús cab xjal lepchec tiꞌj Juan Bautista, bix e xiꞌ cykbaꞌnxin texin:
—Ncub kpaꞌna weyaj bix ncub cypaꞌn aj fariseo weyaj. Pero kej tey t-xnakꞌatza, ¿tikentzen min ncub cypaꞌn weyaj?―tz̈ikexin.
15Bix aj ttzakꞌbeꞌn Jesús:
—Oj nchi pon xjal tiꞌ mejoblenel, ¿cwelpa cypaꞌn weyaj? Min, cuma tumel tuꞌn cyiyꞌsan xjal tuya chmilbaj. Juꞌtzen cye nxnakꞌatza. Tisen nchi tzalaj ke xjal tuya chmilbaj, juꞌxse nchi tzalaj ke nxnakꞌatza wuyena, cuma ntiina cyuya. Mas yaj, oj wel kꞌiꞌna cyiꞌj, chi cyjeltzen tuj bis, bix cweltzele cypaꞌn weyaj. 16Min-al jun xjal jacꞌa jatz tiiꞌn jun tkiyꞌ remyent tiꞌ jun acꞌaj xbalen tuꞌn tcuꞌx te remyent tiꞌ jun xbalen kꞌanak, cuma mas qꞌuelex rotj kꞌanak tuꞌn acꞌaj oj toc yutꞌpaj. 17Jax min-al jun xjal cwel tkꞌoꞌn vino acꞌaj tuj jun tzꞌuꞌn kꞌanak, cuma ka ma cub tkꞌoꞌn juꞌwa, qꞌuelel rotj tzꞌuꞌn tuꞌn vino oj tel ipcꞌaj, bix qꞌuelel kojl vino, bix cxeꞌl tzꞌuꞌn tuj il. Cwel cykꞌeysaꞌn xjal acꞌaj vino tuj acꞌaj tzꞌuꞌn, tuꞌntzen miꞌn tzꞌex rotj tzꞌuꞌn, bix tuꞌn miꞌn tzꞌel koj vino. Jaxse juꞌx weya nxnakꞌtzbila. Acꞌaj nxnakꞌtzbila, bix mlay tzꞌocx kꞌanak xnakꞌtzbil te ootxa tuj―tz̈i Jesús.
Tej tjatz itzꞌj jun txin tuj cyamecy tuꞌn tyol Jesús
(Mr. 5:21-43; Lc. 8:40-56)
18Mitknaꞌx tbaj yolen Jesús tej tpon twitz junxin xjal cawel cyxolj xjal e chmet tuj camon jaaꞌ xnakꞌtzbil tyol Dios. E cub mejtzꞌajxin twitz Jesús, bix e xiꞌ tkbaꞌnxin te:
—Jaꞌlecuwe xcyim nmeela. Najsama, quixta wuyena bix kꞌaꞌcꞌa tkꞌaba tibajtxin tuꞌn titzꞌjtltxin―tz̈ixin.
19Bix e tcuya Jesús bix oc lpe tiꞌj cawel cyuya t-xnakꞌatzxin. 20Pero jeyꞌ, at junxuj xuuj e pon lkꞌe tzaltiꞌjxin, bix oc tmocoꞌnxuj ttxaꞌn t-xbalenxin. Otk bint cablaaj jnabkꞌi takꞌlenxuj tuꞌn cyak aꞌ tiꞌjxuj. 21Bix iyꞌ tuj tcꞌuꞌjxuj:
—Nuketle oj toc nmocoꞌna t-xbalenxin, ya tzultzen nnaabla―tz̈i tzunxuj.
22Pero aj meltzꞌaj Jesús, bix e xiꞌ tcyeꞌyenxin jaxuj, bix e xiꞌ tkbaꞌnxin texuj:
—Tey xuuj, nimsam tcꞌuꞌja. Tuꞌnj s-oc ke tcꞌuꞌja wiꞌja, ma tzul tnaabla―tz̈i tzunxin. Bix texsen hora e weꞌtl tyabelxuj.
23Tejtzen tocx Jesús tuj tja cawel tuj camon jaaꞌ, bix tej t-xiꞌ tcyeꞌyenxin n-oc xux cyuꞌn xjal bix nim ookꞌel nbaj, 24e xiꞌ tkbaꞌnxin cye xjal:
—Cyexa, cuma min ma cyim tej txin cwala. Nuk nwutantxin―tz̈ixin.
Bix e jaw tzeꞌn ke xjal tiꞌjxin, cuma el cyniyꞌ tiꞌj otk cyimtxin. 25Pero tej cyetz lojoꞌn xjal peꞌn, ocxxin tuj cwart jaaꞌ tocxe neeꞌ, bix e tzaj ttzyuꞌnxin tkꞌabtxin, bix e jaw twaꞌbaxin jatxin. 26Bix eltzen tpocbal jlu tuj cykil lugar.
Tej tkꞌanj tbakꞌ cywitz caꞌba mos̈
27Tejtzen tex Jesús tuj ja jaaꞌ lu, oc lpe caꞌba xjal mos̈ tiꞌjxin. Bix e jaw s̈iꞌnke:
—¡Jay tiyꞌjil jrey David, kꞌakꞌentz tcꞌuꞌja kiꞌja!
28Bix ocx Jesús tuj jun jaaꞌ, bix oc lpekexin tuyaxin tunwen. Bix e xiꞌ tkbaꞌnxin cyexin:
—¿Mapa tzꞌoc ke cycꞌuꞌja wiꞌja ka baꞌn wuꞌna tuꞌn tcub nkꞌanena ejeeꞌy?
Bix aj cytzakꞌbeꞌnxin:
—Ma tzꞌoc ke kcꞌuꞌja tiꞌja, Taat.
29Octzen tmocoꞌnxin tbakꞌ cywitzxin, bix e xiꞌ tkbaꞌnxin:
—Chi kꞌanxita tuꞌnj n-oc ke cycꞌuꞌja wiꞌja―tz̈i Jesús.
30Bix ul tnaabl tbakꞌ cywitzxin. Bix tuya cyiw yol e xiꞌ tkbaꞌnxin cyexin:
—Ten cycwenta tiꞌj tuꞌn miꞌn cybi xjal ti ma baj cyiꞌja―tz̈ixin.
31Pero tej cyexxin tuj jaaꞌ, el cykꞌumenxin tuj cykil lugar tpocbal ti otk bint tuꞌn Jesús cyiꞌjxin.
Tej tbintl tyolen men tuꞌn Jesús
32Matkxsen cyexlen caꞌba mos̈, tpon kꞌiꞌn jun xjal men twitz Jesús. Min bintl tyolen tuꞌnj biman otk tzꞌoc tiꞌj. 33Tej tel tlojoꞌn Jesús biman tiꞌ xjal men, nbintltzen tyolen xinak. Bix e jawxsen kleeꞌ cykilca xjal tiꞌj, bix e xiꞌ cykbaꞌn:
—Bajxsen tzꞌoca kcyeꞌyen jun maj tisenj lu kxol aj Israel―tz̈ikexin.
34Pero ejeeꞌtzen kej xjal fariseo e xiꞌ cykbaꞌn:
—Tipemal jxjal luwe tuꞌn tel tlojoꞌn biman yaaꞌn te Dios, sino o kꞌoj te tuꞌn cawel cye biman―tz̈i ke fariseo.
Nimxsen twitz awal
35E baj tbete Jesús tuj cykilca tnom bix aldea, bix e xiꞌ tkꞌoꞌnxin t-xnakꞌtzbil cyuj camon jaaꞌ bix e xiꞌ tkꞌumenxin jtbanel tpocbal tcawbil Dios. Bix jaaꞌxja e ponaxin, e cub tkꞌanexin cykilca wik cyyabel xjal bix nuk alcyexja qꞌuixcꞌaj toc cyiꞌj. 36Tuj cykil lugar, tej toc tcyeꞌyenxin ke xjal, oc kꞌaꞌben tcꞌuꞌjxin cyiꞌj, cuma cyiw taꞌ cychunkꞌlal bix mintiiꞌ onbil cye, tisen jun cloj carnel min-al cylel cye. 37Bix e xiꞌ tkbaꞌnxin cye t-xnakꞌatzxin:
—Jtaakꞌen Dios cyiꞌ xjal tisen jun jaatxꞌen. Nimxsen jaatxꞌen, pero yaaꞌn nimxix akꞌanal at te chmolte. 38Juꞌ tzunj, cykanenx te Taaw akꞌuntl tuꞌn t-xiꞌ tsmaꞌnxin akꞌanal te chmolte twitz awal―tz̈i Jesús.
© 2000, Wycliffe Bible Translators, Inc. All rights reserved.