Mata 8
8
Membəl ta nda meskwelme
(Mar 1.40-44; Luk 5.12-14)
1Dapa masa Yesu e bəreŋgek da yaŋ ŋguɗa sə, miya hay gaa ac ka cəpaw. 2Nda meskwelme ana ɓa ka ŋgucafa vaw, ke kekəred fəma tata, ka gwaɗa, gege: «Bay Mazlakava, daha ka waya sə, ka zlafa mepeneyey avəda.» 3Yesu ka talana ha, ka pafa ha, ka gwaɗa, gege: «Ya ka walaw, panaɗay!» Faŋga faŋga ana, ka səɗata dapa meskwelme tata! 4Yesu ka gwaɗa, gege: «Pə leŋgesl, ka ta gwaɗan ma ana kwa kad ndana bay. Amaa daɗ ŋguzdan yaŋ takaa kad ndaakwas ta Zlavay, ŋguzdan jə ta kwakwas masa ma majawa ta Muyiz te gweɗey. Faŋga ac ta ŋgat matə yaw da yaŋ kaa, ka masəɗa dapa meskwelme takaa cay.»
Makəsparav ta mazlakava ta kafaraŋ hay
(Luk 7.1-10; Zaŋ 4.46-54)
5Dapa masa Yesu e sehw kad pe berne ta Kafarnahum sə, mazlakava ta kafaraŋ hay temere ka ŋgucafa vaw, ka ŋgana mbahw, 6gege: «Bay Mazlakava, nda maŋga mezlərey aɗaw ɓa aŋga manaha da wunam, aŋga mahahalɓa, a sə marga elehey.» 7Yesu ka vahan, gege: «Yey sə, ya ta daɗ ka ta mbəliya.» 8Mazlakava ta kafaraŋ hay sə, a vahan, gege: «Bay Mazlakava, ya husa masa ke de sehw a way aɗaw sə, aabay, gweɗ ma pal amta war, ara nesey nda maŋga mezlərey aɗaw ana a ta mbəlata. 9Yey ava yaŋ taaɗaw ana, kafaraŋ hay ɓa masa ac bay da yaŋ yey, ye cənecen ma. Yey may, kafaraŋ hay mekele ɓa masa ya bay da yaŋ eceŋ, aca cənawa ma. Daha ye gweɗ kad nda amta: “Daɗay” sə, e dey. Daha ye gweɗ kad nda leŋgeɗey: “Dekey” sə, e dekey. Daha ye gweɗ kad ɓeley aɗaw: “Ŋgə mezlər nesey” sə, a ŋgiya.» 10Masa Yesu a cəna ma ana hay nesey, ka rəzlata macəkuma bay, ke gweɗec ndah macəpiya, gege: «Ya gwaɗakwar, kwa ya ka ŋgat tərsam ta makəsparav ara nesey da vara nda Isreyel ana sə, aabay. 11Ya gwaɗakwar, ndana hay gaa ec te dek jaka bəlam va jaka ma ta wudam ka ta ndə ɗaf ta macunam ava Abəraham, Izak va Zakwab dapa Wunam ta bay da baymaləvaŋ hay. 12Amaa ta ndah masa aca wulakiya ma ta cama Wunam ta bay eceŋ sə, ac te kezleɗec a vəda pa ləvaŋ meɓekɓek ana. Faŋga sə, makuɗa hay va mapaɗ zleŋ hay.» 13Yesu ka gwaɗa bay ta kafaraŋ hay temere sə, gege: «Daɗ kad a wunam! E de ŋgey ara masa ka ta kəsiya dapa rav takaa.» Faŋga faŋga ana, nda maŋga mezlər sə, ka mbəlata.
Membəl ta mamaŋ ta ŋgwaz te Piyer
(Mar 1.29-31; Luk 4.38-39)
14Ara masa Yesu e sehw kad way te Piyer, a wala mamaŋ ta ŋgwaza manaha, kwakwaw fa vaw. 15Ka pafa ha fa ha tata, kwakwaw sə, həl! A həla ma, ŋgwaz sə, ke zleftek, ka vana jə ta manday.
Membəl mehecey hay va mambas damkwaw hay
(Mar 1.32-34; Luk 4.40-41)
16Ta fakwaɗ ana ŋgesey, ac ka hwadana ndana hay mabay masa ac ava damkwaw hay dapa yaŋ. Ka mbas mesfen hay ava ma tata masa aŋga ta gwaɗiya va membəl ndah gwabay hay fakwanay, 17afa a da ŋgata ara masa Izay, nda mehwedek ma zleezle ke gweɗ, gege: «Ka kəsa vaw tandakwa maməca avəda, ka zəɓa mehecey tandakwa hay avəda.»
Macəp Yesu sə, gwagumaw
(Luk 9.57-60)
18Masa Yesu a wala miya mabay da cak tata sə, ke və cəv kad ndah masasəraka jene tata ta madaɓa kad a luwa leŋgeɗey te təker mazlakava. 19Nda amta deveŋ ndah mesesərekecen ma majawa kad ndana hay ɓa, ka ŋgucafa vaw, ka gwaɗa, gege: «Nda masasəraka nda, ya ta cəpakaa kwa pa slam wula wula masa ke te dey.» 20Yesu ka gwaɗa, gege: «Gwebegwebekw hay ac ava veɗ teceŋ, ɗiyak hay da baymaləvaŋ ac ava way teceŋ. Amaa Wut ta nda sə, kwa slam kusetke kad aŋga ta masasak vaw sə, aabay.» 21Nda mekele amta deveŋ ndah masasəraka jene tata ka gwaɗa, gege: «Bay Mazlakava, viyey cəv ye te pəsehek papa avəda ɗagay.» 22Amaa Yesu ka gwaɗa, gege: «Cəpiyey, gərdec ndah maməca aca ra pəsah ndah tec maməca.»
Yesu a zlac bərgadaŋ
(Mar 4.31-41; Luk 8.23-25)
23Yesu ke tep pa kaslkaslah, ndah masasəraka jene tata ac ka cəpaw. 24Dapa masa ece dey, bərgadaŋ mazlakava ana ke ŋgə da yaŋ yam mafayakfayak ana, meŋgeŋgel ta yam hay ec ke beŋgeɗey kad yaŋ kaslkaslah ana kasl pa masəratiya. Dapa ŋgesey ana, Yesu a njawaŋ. 25Ndah masasəraka jene tata ac ka ŋgucafa vaw, ac ka pəraka eve megweɗey: «Bay Mazlakava, mbəlandakwa avəda, bəna anda zakwa.» 26Yesu gege: «Akwa lel sə, mafay te mey, akwar ndah masa makəsparav pahata?» Ara nesey, ke zleftek, ke ɓeɓəcec memeɗ hay va yam. Faŋga faŋga ana, jene hay fakwanay ec ke njehec teete. 27Ndana hay ec ke rəzleceŋ, ec ke gweɗ, gege: «Gwalaha! Nda ana na aŋga wa, afa kwa memeɗ hay va yam aca cənan ma?»
Gederen hay ecew masa ac ava damkwaw hay
(Mar 5.1-20; Luk 8.26-39)
28Ara masa a husa a luwa leŋgeɗey te təker mazlakava, pa vavara te Gederen hay, ndana hay ɓa ecew ac ava damkwaw hay dapa yaŋ, ece dek kad a vəda dapa jəv hay kad vara vaw. Aca ŋgə zidaw kad ndana macəkuma bay, kwa ndana mazlafa medə jaka pe cəvey ana ŋga aabay. 29Aca cə lalaw, gege: «Ka wal fandaw mey, Wut ta Zlavay? Ke dek kad fana sə, ka ta ŋgadandaw marga wagaa pas ana e de husek geyey?» 30Faŋga ana, bakw te vetem hay mabay ɓa, ac zəŋgaɗa eve eceŋ, ac dapa manday. 31Damkwaw hay sə, ac ka ŋgana mbahw Yesu, gege: «Daha ka wal mambəsandaw sə, zləraɗandaw pa bakw te vetem hay antisey.» 32Yesu gege: «Madaɗay!» Ec ke dec a vəda, ec ke sehwec pe vetem hay. Ara nesey, bakw te vetem hay sə, ec ke tetelem da ma ta mazaŋgalaŋ kad pa yam mafayakfayak ana, ec ke zec dapa yam ana. 33Gwala vetem hay mahway kad pe berne, ece kərecen maɗay da yaŋ vetem hay ana fakwan kad ndana hay va ma da yaŋ ndah masa ac ava damkwaw hay dapa yaŋ. 34Ara nesey, ndah dapa berne sə, ece dek kad vara Yesu. Masa aca wala sə, aca ŋgana mbahw da daɓa dapa vavara teceŋ.
© 2022 CABTAL