Matyo 6

Yeso tee mbɔʼ é ndɛʼ ala ebe bɔ ndzaŋa

1“Ke fwɛʼ afwɛʼ Ngwe a njikɛ é le kpe bɔ zɔ aŋu ngwo ma le ngɛ bo. Mala ngwo tee abwa zɔnɔ a njikɛ̀, tsɛʼ ǹtsara deʼ ngwo ma nu ebe Àtɛ ngwɛ ezob bo. 2Éngɛ ma ngwo ndɛʼɛ ala deʼ ebe egho wɛ è ma ke ala yɛ ngɛ, ke sa kwɔrɔ ene etsa na aŋu bàndooro aghɔɔ ma le efwɔ ndɔ tsaʼra Ngwe bɔ Israel mane etonji ngɛ bo. E na le éngɛ kpe shi bɔ zɔ sa bɔ̀nɔ̀ angɔ. Mmɛ ga éŋwaʼa endɔn, angɔ shi nu ǹtsara àmɔ̀ gimkpaʼ. 3Bɛʼngɛ, mala ngwo kpede gho deʼ wɛ è ma ke ekpede ngɛ, le ene aghɛʼnji yɛ esɔrɔ etaa ngwɛ ma ka nɛɛ ngɛ. 4Éngɛ è ya ngo mwɔ ǹtsèbè bɔ fyee, ngwo mane egho wɛ ngwo a kpede ngɛ. Àtɛ ngɔn wɛ ma zɔ abwa nɛŋɛ gimkpaʼ ngɛ wa ngo nɛ̀rɛ̀ awɛ.”

Yeso tee mbɔʼ atsaʼra Ngwe

(Luk 11:2-4)

5“Ngwo sa tsàʼrà Ngwe, ke mwɔ na bàndooro aghɔɔ nɔ bo. Angɔ be doʼo é tamma ekere a ndɔ tsaʼra Ngwe bɔ Israel mane etonji mbɔʼtye gho ŋwàʼaŋwàʼ zɔ angɔ. Mmɛ ga éŋwaʼa endɔn, angɔ shi nu ǹtsara àmɔ̀ gimkpaʼ. 6Bɛʼngɛ, ngwo ma tsàʼrà Ngwe, nyii efwɔ atwɔndɔ njɛ, gwɔb enduʼndɔ, è ga ebe Àtɛ ngwɛ wɛ gho deʼ ne ma zɔ eghɔɔ bo ngɛ. Àtɛ ngwɛ wɛ è ma zɔ abwa ngwo ma le efwɔ kɔ ngɛ wa nɛ̀rɛ̀ awɛ. 7Ngwo ma tsàʼrà Ngwe, ke ntɛɛntɛ̀ɛ, è ga entanɔʼ na bɔ ke bɛrɛ Ngwe byɛ e ma zhuŋu kpe ngwere ntsɔɔ na zo atsaʼra mbɔʼnga a me dɔɔ ngɛ bo. 8Keʼ, ngà ke mwɔ na angɔ nɔ bo. Àtɛ ngɔn à shi nɛɛ ala mbɔn ma ke ngɛ ka mbɔn sa biiri ebe engɔ. 9Mbɔn tsaʼra ene aghɛʼ zɔnɔ,

‘Àtɛ ngbɛɛ wɛ è mwɔ ekere ngɛ.

Eghɔ mwɔ ene ekumu pɛ ngwɛ

10Ebwa M̀fɔ̀ Ngwɛ zeʼe.

Le abɔ a chwâ sa fwɛʼ ebwa ngwo ma ke na angɔ ekere ngɛ.

11Ndɛʼɛ angbɛɛ ende wɛ e me koʼro endyɛɛ ànchwɔ̀ ngɛ.

12Dzɛrɛ abwa bɔɔbɔɔ njɛ

na mbyɛɛ gɛrɛ ma dzɛrɛ abwa bɔɔbɔɔ yɛ abɔ tsɛrɛ ma le akwa njɛɛ ngɛ.

13Ke bɛrɛ mbyɛɛ nyii efwɔ akwa̧ʼra bo.

Bɛʼngɛ, chi angbɛɛ eblabwo Dɛbli.’ ”

14“Mala mbɔn dzɛrɛ abwa bɔɔbɔɔ yɛ abɔ deʼ me le ekwa ngɔn ngɛ, Àtɛ ngɔn ekere wa dzɛ̀d andzɔn. 15Mala mbɔn ne dzɛrɛ abwa bɔɔbɔɔ abɔ abê bo, Àtɛ ngɔn ekere ke ma ngo dzɛ̀d andzɔn bo.”

Yeso tee mbɔʼ chwɔ atsaʼra Ngwe

16“Mala mbɔn ma tsɔmɔ ene chwɔ atsaʼra Ngwe, mbɔn ke kɔʼ tɔnɔtɔnɔ na bɔ ndooro aghɔɔ nɔ bo. E ba tsɔmɔ me juju mbɔʼtye gho deʼ ma zɔ kpe e ba tsɔmɔ ene chwɔ atsaʼra Ngwe. Mmɛ ga éŋwaʼa endɔn, angɔ shi le ǹtsara àmɔ̀ gimkpaʼ. 17Mbɔn ma tsɔmɔ ene chwɔ atsaʼra Ngwe, mbɔn so afaara ndzɔn, zhwaʼ, gɛ̀rɛ̀ sɛ̀ʼ eto mbɔn. 18Mbɔn le énde mbɔʼtye abɔ tsɛrɛ ne nɛɛ kpe mbɔn be tsɔmɔ ene chwɔ atsaʼra Ngwe bo, à tye Àtɛ ngɔn wɛ gho deʼ ne ma zɔ bo ngɛ ma nɛɛ. Éngɛ Àtɛ ngɔn wɛ ma zɔ abwa nɛŋɛ gimkpaʼ yɛ ngwo ma le ngɛ a ma ngo nɛ̀rɛ̀ angɔn.”

Yeso tee mbɔʼ àfɔ̀n ekere

(Luk 12:33-34)

19Mbɔn ka àfɔ̀n deʼ a chwâ anɔ ene egha ndzɔn shi, esɔʼ mane ńgam ba tsɔŋɔ, àjii ba toʼ ndɔ è ji. 20Ankɔmɔ éngɛ, mbɔn shi àfɔ̀n ngɔn ezob ene afwɔ yɛ esɔʼ mane ńgam ke né tsɔŋɔ bo, àjii gɛrɛ ne me né ji bo ngɛ. 21Mbɔʼnga etaa gho na afwɔ yɛ àfɔ̀n mɔ mwɔ ngɛ.

Yeso tee mbɔʼ ala yɛ a ma ndɛʼ ekɛʼ ebe ekwa ngɛ

(Luk 11:34-36)

22Aghɔɔ ne mwɔ na anâm ebe gho nɔ, mala aghɔɔ njɛ mwɔ ànchwɔ̀, ekwa ngwɛ gimkpaʼ me le ekɛʼ efwɔ. 23Bɛʼngɛ mala aghɔɔ njɛ ne mwɔ ene ǹchwɔ̀ bo, ekwa ngwɛ wa ngo me shwe ene adi̧iri. Éngɛ mala ala yɛ à ma pɛɛ awɛ efwɔ ekwa ngɛ ma adi̧iri, shi adi̧iri ya ngo me ghɛʼ.

Yeso tee mbɔʼ Ngwe mane ela efwɔ ese

(Luk 16:13; 12:22-31)

24Gho deʼ ke ne mwɔ gho afwɛʼ ebe bɔ fyee ekyɛ ŋwaʼ ene etaa mɔ gimkpaʼ bo, è wa ngo doʼ egho bi gɛ̀rɛ̀ gwè êwè, e wa ngo shi etaa mɔ ene egho ebi, è bɛ̀ʼrɛ̀ êwè. Ngwo ke ne fwɛʼ ebe Ngwe mane ekɛb ekyɛ ŋwaʼ bo. 25Ne ǹji yɛ mmɛ ga endɔn kpe mbɔn ke nyii angɔn kpe mbɔn ba nde ayɛ kà ŋwɔ ayɛ é tsɔmɔ àkɔʼɔ bo, kà nyìi angɔn mbɔʼ ǹdiri é ge ekwa bo. Ke me éŋwaʼa kpe é tsɔmɔ ekɔʼɔ we fɔɔ énde bo? Gɛrɛ ne mwɔ éŋwaʼa kpe ekwa ngwɛ we fɔɔ ǹdiri bo? 26Mbɔn kede ènɔ̀n ekere, è ke ma kɔrɔ elankɔn bo, e gɛrɛ ke ma dzà ela à shi efwɔ ètɛ bo. Àtɛ ngɔn ekere à dama ndee angɔ. Mbɔn ke nɛɛ kpe mbɔn be fɔɔ ènɔ̀n bo? 27Gho deʼ abwaʼ ndzɔn we né zhiiri ampiʼ endzobo é mwɔ ekɔʼɔ mbɔʼnga engɔ ma nyìi amɔ anyi? 28“Mbɔn gɛrɛ na nyìi angɔn mbɔʼ ǹdiri kpe ayɛ? Mbɔn kede na aŋu sɔʼrɔ egɛ ma tɛ̀bɛ ngɛ. E ke ma fwɛʼ kà ndèerè ǹdiri àmɔ̀ bo. 29Bɛʼngɛ mmɛ ga endɔn kpe, ka de mwɔ m̀fɔ̀ Saramu nè àfɔ̀n mɔ, à ke le ǹdiri e ma nara na sɔʼrɔ agɛ tsɔnɔ adeʼ nɔ bo. 30Na Ngwe a ma ge ǹdiri ekwa egɛ ngɛ bɔnɔ byɛ e ma jùdù ànchwɔ̀, enchwe e zɔm, e twɔn edzɔ ngɛ. Ngwe ke ma ngo gè ǹdiri akwa ndzɔn fɔɔ bo? Chaʼ ebɛrɛtaa ndzɔn ne kpɛɛ nɔ ene!” 31“Éngɛ mbɔn ke sa nyìi angɔn kpe ‘Ntsɔ ba ngo nde ayɛ, ntsɔ ba ngo ŋwɔ ayɛ kà ntsɔ ba ngo ge ayɛ bo.’ 32Ne ela byɛ bɔ kenɛɛ Ngwe ma nyìi àmɔ̀ anyi akyɛ gimkpaʼ ngɛ. Àtɛ ngɔn ekere we nɛɛ kpe mbɔn ba ke ela bɔnɔ. 33Ankɔmɔ ngɛ mbɔn dye zɛʼ ela ebwa m̀fɔ̀ Ngwe mane ebwa wɛ Ngwe ma ke kpe mbɔn le ngɛ. Engɔ gɛrɛ wa ngo ndɛʼ ela bɔnɔ endɔn. 34Éngɛ mbɔn ke nyii angɔn mbɔʼ enchwe bo. Nchwe ya ngo le emɔ ǹgoʼ yɛ e me koʼo ebe engɔ ngɛ. Anji ŋwaʼaŋwaʼ ye le emɔ ǹgoʼ yɛ e me koʼo ebe engɔ ngɛ.”

目前選定：

Matyo 6: nbt

醒目顯示

複製

想要在所有設備上保存你的醒目顯示嗎？註冊或登入

了解更多關於 Aŋwɛʼrɛ Ebuumu Fe Nè Ngwe 的詳情

Matyo 6

Matyo 6
的熱門經文

聖經:

Ngwo

譯本: Aŋwɛʼrɛ Ebuumu Fe Nè Ngwe - nbt

Matyo 6

Matyo 6

Matyo 6 的熱門經文

聖經:

Ngwo

譯本: Aŋwɛʼrɛ Ebuumu Fe Nè Ngwe - nbt

Matyo 6

Matyo 6
的熱門經文