Lûk 11
11
Njisə̀s ə zaʼle kə ke se tsə̀m
(Matyò 6.9-13; 7.7-11)
1Ə̀ tè nyi tuʼ fîfe, Njisə̀s e tsə̂mə̀ elùʼ vîve. Ə pə̀ kə è mɨ̀sè, chùmtè èpàm ə̀ vəyn zhîzè èmɔ̀ʼ ə pìə se vəyn nə, “Pɛ̂pɛ, zaʼle ghàs kə tsə̂mə̀, kè kə Njɔyn tè zaʼle chùmtè èpàm sə vəynse. 2Njisə̀s ə pìə se ghənə nə, ghàyn piə tsə̂mə̀ ndò ghàyn piə nə: Pɛ̂, nə ə ghɨ ghe ə kɔʼsə̂ è zə zɛ nə ə fe fɔ̂yn vɛ ve 3Pfɨte ghàs ndâyn ə pfɨte ghàs tuʼmè m̀kɨ̂m. 4Lɛ̀se fo ghɛ ghàs ghepiə pɔ̀msə ghàs lɛ̀sə fo nâʼàpî ndè vɛ ə è nə̀yn pi sê ghàs. Kə ò nə̂ za nə mɔ̂mè pəyn sê ghàs.”
5È və fɨnə piə sê ghənə nə, “Wùə ə ghayn ə fètəyn kàʼa ə è ndo ndù ə so vəyn ə ndɛ əfètəyn etuʼ ə è pi sê vəyn nə, ‘Soyn vɨ̂mè, fo mi è luʼ fə mpfɨ̀ŋfè, 6kûmə̀ nə wùə soyn vɨ̂mè ə pə̀yn ə mìə ndɛ tsɛ̂ ndùə ekwî, m kyi va fɨae zhiəke se fo sê vəyn.’ 7Soyn vɛ nə vɛ ə ke pə̀ynsə̀ kə əfètə̂ ndɛ nə, ‘Kə ò fɨyn fo ngəʼ sê mi. Mə fà ndɛ zɨ̂mè, ghâsè ghɔyn ghɨmghe ə nyîŋə̀, mə m vâyn kàʼa m fɨyn ndwi se fo afɨa sê ghò,’ 8ə ò ghayn ghe? M tsâ sê ghàyn nə, ə è va naʼapi se ndwi se fo afɨa sê gho kûmə̀ èsoyn, ə è nə ndwî fo naʼapi ghè kə ò kyiŋə kûmə̀ nə ò tyəm ke fumə chyatə̂ kə ndò vəyn. 9Kûmə̀ nyi ə mə piə sê ghàyn nə, ghàyn e pfɨfə kə ndò, kə ə nə̂ fo sê ghàyn, kyiŋə kə ndò, kə ghàyn nə̂ fe, ngɔʼtə̂ kə ndò ndɛ, kə ə nə̂ chwi sê ghàyn. 10Kûmə̀ nə ə̀ pfɨfə pîndè sê Zhə̀fè ə è nə̂ kyi, ə kyiŋə pîndè ə è nə̂ fe. Nâʼà pîndè vɛ ə è ngɔʼte chondɛve, ə Zhə̀fè nə̂ chwie sè vəyn. 11Ə̀ nyi pɨ̀a vayn è kwə̀ ə ghàyn ə fètəyn ə è kàʼa ə è fo mbam sê vayn, ezhoghɛ ə è pfɨf mbwɔ̀kè ə, 12ə nyi vɨ̂yn ə è kàʼa ə è fo kəm ekwua sê vayn, ezhoghɛ è pfɨf ghomze ə? 13Ə ghɨə piə nyiə kə ghàyn nyiə se ke se fo efɨa echûŋvè sê ghɔyn ghaynghe, ə nâʼà Pɨ̀a vâyn vɛ ə è nyi ekwùtwəyn faŋ zayn se fo sezuʼ se Ŋwaʼase sê ghɨ ghɛ ə ghe pfɨf sê vəyn ə?”
Njisə̀s ə wàmnè kûmə̀ èfɔ̂yn ə sezuʼ se pise
(Matyò 12.22-30; Mâk 3.20-27)
14Ə̀ tè nyi tuʼfîfe Njisə̀s e chûmə̀ fɨsə èpamə̂ ə satàynzè ə wùə ewiyn, ə nyi za, se nə̂ nə wùə təyn ə nyi akwùʼ. Kə è chùm zâ, ze ə fɨə naʼapî ashìŋə̀ àkè, wùə təyn ə zhə̀tə̀ se wàmnè. Nɔ̂yn ə ghɨ kɛ ə ke tè nyi fu tè nyi è kayn. 15Pîza ghɨə mɔ̀ʼɔ ghe ə̀ piə nə, “È chûmə̀ fɨsə tèpamə̂ tə satàyntè atyaʼ ə Peelzepùlkè, ə fɔ̀yn ə̀ tèpamə̂ tə satàyntè.”
16Ghɨ mɔʼɔghe, kèpi anɔ̀yn nə kɛ e sè kyiŋə endom se ko Njisə̀s ətəyn sè piə nə è nəyn ghɛe kayntə zhize sə chwiə se tyəyn nə tyaʼ ə vəynke ndò kè nâʼà sê Zhə̀fè. 17Njisə̀s ə kê tèkwâʼtè tə ghənə̂tè ə piə sê ghənə nə, “Ə̀ chyâsè pî ndaʼ èkè ewiyn, ə ndaʼ nə zɛmə pfɨ. Sas ə ndɛ zɛ ə ze ndamə va choze emɔ̀ʼ, ə ze saŋne. 18Ə satàyn sè nô ngɨŋ ə vəyn, ə ze ə tyə̂nə̀ nə è fɨyn kyi va tyaʼke etuə efɨa vɛ ə è saʼa. M piə nyi kûmə̀ nə ghàyn piə nə m chûmə̀ fɨsə̂ tèpamə̂ tə satàyntè è tyaʼke mə ə̀ fo Peelzepùl. 19M nyiə sè chûmə̀ fɨsə zuʼ se pise è tyaʼa, mə fo Peelzepùl, ghɨ ghaynghe tè chûmə̀ fɨsə̂, mə ə̀ fo ndè tyaʼ ətəynke ə? Ə̀ nə̀ tyə̂nə̀ kə əghɨ ghayn nə ghɨyn nə ə wamə ndò mə mə piə səmɔʼ ə. 20Ə̀ fo Fèzhə̀ è tyaʼa nə mə chûmə̀ fɨsə̂ tèpamə̂ tə satàyn nə tɨ̂yn. E za tyə̀nə̀ nə fɔ̂yn ə Fezhə̀vè ə pə̀yn sê ghàyn.
21Ə̀ nyi ezhoghɛ wùə atyaʼ fɛte fɨa eghɔ̀ŋ ə vəynve, tsɨ̂ŋnə̀ àpɨəyn ə vəynke, ə fɨa ə vəynve ekɨ̂m zhiə tua. 22Wùə tyaʼ ə mɔ̀ʼɔ ə ke pə̀yn, tɛ tsɛ̂ vəyn ə nò zhiə vəyn, ə è komte fɨa eghɔ̀ŋ ə vəyn nə vɛ ə è vâ zaʼnə ətəyn se paʼse è vɛ ə è tè fi sə atyaʼ sê ghɨə mɔ̀ʼɔ̂, ə è ndù chyâtè sê ngwàʼ ə̀ vəyn.
23Ə̂ nyiə va pi ndè pamze emɔ̀ʼ ghasè vəyn, ə ze ə tyə̂nə̀ nə è nò mi Ə̂ nyiə tsâmtə̀ va pi ndè è mi sə̂ zûŋtə̀ əghɨə Fezhə̀, ə ze ə nyi nə è sàsə̀ mâʼà ndò.
(Matyò 12.43-45)
24Ə̀ nə̂ nyi ashìŋə̀ kɛ ə zuʼ se pise fɨ ə wùə ewiyn, sə ndùə kwiə ka kə achi ezomke àkɨ̂m, kyiŋə eluʼ se zɨ̀tè, ə se tàʼa fe, sə piə kə sə səynse ə ngɨŋ nə, ‘M kɛsə̂ ndùə kə ə ndɛ zɛ ə ma fɨ ətəyn.’ 25Sə piə za ə kɛsə̂ ndùə ə ndɛ ətəyn, mə ə fɨyn fɛtê zəs ə pɨaʼtə̂ efɨa ə əfètə̂ təyn, 26ə se kɛse ndu nji pəyn sèzuʼ se pi sə mɔ̀ʼɔ̂ se sɛ̀mbɛ, se kwûəmnə̀ tsɛ̂ səynse, ə se nji ə sə ndamə ə wùə nə vɛ ewiyn. Ə̂ ze kyâyn nyi, ə wùə təyn ə kwûəmnə̀ tsɛ̂ kə è va nyi sə shi.”
Njisə̀s ə zaʼle ghɛe kûmə̀ èsaŋne səmɔʼze
27Kə Njisə̀s pa wàmnə̀ ghɛ nə ghɨ̂yn, wùzhɔyn viu əfètə̂ ànɔ̀yn nə kɛ ə pɨa piə nə, “Chùŋ nyi sê wùzhɔyn vɛ ə è tè piə gho ə nyɔŋsə̂ ghò!”
28Njisə̀s ə pə̀ynsə̀ nə, “Chùŋ pɨl nyi sê ghɨ ghɛ ə ghe zɨə ghɛ Fezhə̀e, nə̂ kə̂ ze piə!”
Ghɨ tè kyiŋə se fe chwiə
(Matyò 12.38-42)
29Nɔ̂yn ə ghɨ̀kè tè tsɨ̀ə kwəynsə pə̀ kə ndò ə Njisə̀s ə ngwùŋ, è və piə nə, “Ngwàʼ zɨnə nyi ke nâʼà ngwàʼ èpi È kyiŋə se fe chwiə sê mi. È nə̀ fe va chwiə zhizè, ə tsɛ̂ kəva zə Njonà. 30Va Wùə nə̀ nə̂ ə è və pɔŋ nyi chwiə sê ngwàʼ zɨ̂yn kèpi eghɨ kə Njonà tè nyi chwiə sê ghɨə Ninevìghè. 31Ə̀ tə nə̂ ə̂ nyi etuʼ ə saʼ ə Fezhə̀vè, ə nyiə fɔ̀yn, mə za nyi wùə vɛ ə è saʼa ndaʼa eghàŋ ə mbie, ə apàs ə etyə̀ke, ə è tyəm ə è və kwânə̀ ngwàʼ nə zɨ̂yn, kûmə̀ nə è və tə ndò ə vəyn endaʼ ə kwi aghaf atyâkè ə pə̀ se zɨtə ezaʼlê etɔfə ə fɔ̀yn Sòlomùyn. Pîza, ngwàʼ zɨ̂nə̀ se kyi ndò wùə zôyn, è tsɛ̂ Sòlomùyn, pîza zɨtə va zaʼle əvəyn. 32Ə̀ tə pə̀ ə nyi etuʼ e saʼ ə Fezhə̀e, ə ghɨə Ninevìə tyəm ə kwânə̀ ngwàʼ zɨ̂nə̀ kûmə̀ nə ghənə tə zɨte zaʼlê ə Njonàe ə pə̀ynsə̀ ətəm ə ghənə sepise ə zà endam ə epi ə ghənəè. Ngwàʼ zɨ̂nə e sè kyi wùə zôyn, è tsɛ̂ Njonà, pîza pə̀ynsə̀ va təmə ghənə sê pi.”
(Matyò 5.15; 6.22-23)
33Njisə̀s ə fɨnə piə sê ghənə nə, “Wùə pâʼà tyəmə̂ tyànə̀ lâm ə ndə̀tə̀ elùʼ kɨ̀sə è pfɨse etîə àkɛ̀. È tyànə̀, è və tɔmə elùʼ e ngaŋtəu kə ə nji naʼapi ndè, ə è və fe èpayn ətəyn. 34Shi ghɛ nyi kə lâm sê wiyn vɛve. Ə shi ghɛ nyi achûŋ, ə wiyn vɛve ekɨ̂m ə nyi epayn Pîza ə shi ghɛ fòf, ə wiyn vɛve ə nyi əfètə̂ àlɨm. 35Ghàyn e tɔ̂ʼnə̀ nə kə payn zɛ ə ghàyn kyi kɛse sə alɨm. 36Ə wiyn vɛve ekɨ̂m se kyi èpayn, luʼ alɨmve e va ətəyn, ə ve ə panə kepî kə̂ lâm ezhoghɛ ə tyâyn, è kyâʼsə̀ ghò.”
Njisə̀s ə kwàyn ghɨə Falàsîə è tyə̀ynsè sə alàŋsè
(Matyò 23.1-36; Mâk 12.38-40)
37Ə tè se nyi kə Njisə̀s wàmnè mɨ̂sè, wùə Falàsî viu ə ndàmə̀ vəyn nə è pə̀yn zhi ə və apɨəyn. È və ndò ə ndùə elùʼ e zhiəu. 38Wùə Falàsî nə vɛ e nyi è kâyn se fe nə Njisə̀s ə zhi ndɔ̀ʼɔ è shu gho. 39Pɛ̂pɛ ə piə sê vəyn nə, “Ghàyn ghɨ Falàsîə ghɨ̂yn, ghàyn njiə ekwaŋ vaynve è wà saynse, ghà tɔ̀ʼɔ̀ shùə kə setsɨm, pîza təm ghaynghe nyi mə ghe lwiyn kê è shiə fɨə è ghɛ piə mɔ̀ʼɔ. 40Ghàyn nyi ke nâʼà èngo efɨae səndô! Ghàyn kwàʼtə̀ kə nə Zhə̀fè tè fɛte ke sètsɨm ə tàʼa fɛtə m̀təyn mə? 41Ghàyn pɨlə fo fɨsə efɨa vayn vɛ ə ghàyn kyi sê ghɨafɨfə è təm e chûŋə̀, kə naʼapi ghè ə nyi è zoe sê ghàyn.
42Ngəʼ èghaʼâ nyi sê ghàyn, ghɨə Falàsîə, kûmə̀ nə ghàyn njiə mfɨà mə èlɨ̀mtə̂ mɛ ə m̀ fɨə ə ghàyn ə mfùʼ, ghà chyâtè luʼ teghɨm, ə fo elùʼ emɔ̀ʼ sê Zhə̀fè, pîza nə̂ va ghɛ ghɛ ə ghe nyi chichi sê ghɨə mɔʼɔ, kyi va kɔ̂ŋ sê Zhə̀fè. Ghàyn fè nyi sə̂ nə̂ əghɛ nə ghɨyn, tsas ə va zhize.
43Ngəʼ èghaʼâ nyi sê ghàyn, ghɨə Falàsîə, kûmə̀ nə ghàyn kɔ̀ŋɔ̀ sə̂ ndùə ə sendɛ sə atsɨ̀yntese, kɔʼɔ tsɨsə̂ kə əshi, fɨnə fɨə ndùə afàf, kɔ̂ŋɔ̀ nə ghɨghe ə nyɨŋə pə̀ tɔŋtə̂ ghàyn. 44Ngəʼ èghaʼâ nyi sê ghàyn ghɛ ə ghàyn nyi kə teshyə̂ tɛ ə pfɨ̂mə̀ ghɨghe ətəyn, ə tàʼa ndə̀mə chwiə, ghɨghe ekwiə tsɛ̂ etu ətəyn, ke va.”
45Tyə̀ynsè alâŋ vîvè ə piə sê Njisə̀s nə, “Tyə̀ynsè, ò piə əghɛ ghɨ̀nə̀ nyi, sôylə̀ kepî ghàs.”
46Njisə̀s ə piə sê ghənə nə, “Ngəʼ èghaʼâ nyi kepî sê ghàyn, ə tyə̀ynsè sə alàŋsè, kûmə̀ nə ghàyn tɔ̀ʼɔ̀ nə ghɨghe ə nə̂ əghɛ, ghe tɛ ghaʼa ghənə, nyi kə apɨàʼa, ke tɨ̂lə̀ kə nyi, kɔ̂ŋɔ̀ va se tsàmtè nâʼà səkɔs. 47Ngəʼ èghaʼâ nyi sê ghàyn ghɛ ə ghàyn pomə shyə̂ teghaʼâ tə sèfɨ̀aʼtè sɛ ə pɨ̀a ghanə tè zhwite. 48E tyə̂nə̀ kə nâʼà nə ghàyn tɔ̀ʼɔ̀ eghɛ zɛ ə pɨ̀a ghanə tè nə̀yn kûmə̀ nə ghənə ə tə zhwite fɨ̀aʼtè nə sɛmə, ghàyn e pomə teshyə̂ teghaʼâ tə ghənə̂tè. 49Kûmə̀ nyi, zɛ ə tɔŋtə nə, ‹Tɔf eghaʼâ ə Fezhə̀zè› pi nə, ‹M nə̀ tomə sèfɨ̀aʼtè seghaʼâsè è ndùətomse sê ghənə, ə ghənə zhwite ghəmɔ̀ʼɔ, ə fo ngəʼ sê ghəmɔ̀ʼɔ.› 50Kûmə̀ zɨnə mə, ngwàʼ zɨnə tə tsâ ècho ə ghənə̂zè kûmə̀ m̀ndəm mə sèfɨ̀aʼtè se ghaʼa sè sekɨ̂m ə tè zhwite se zhə̀tè kè kə ə tè pom mbi, 51se zhə̀tə̀ kə è Apɛ̀l se kɔʼɔ tàyn ə Sàkàlyâ kə ə tè zhwi ə sefɨayle sə alaŋ efo ə ndɛ̂ Fèzhə̀kè. M piə sê ghàyn nə ngwàʼ nə zɨnə mə tə tsâ echo əghənəe sê Zhə̀fè.
52Ngəʼ èghaʼâ nyi sê ghàyn ə tyə̀ynsè sə alàŋsè, kûmə̀ nə ghàyn ndə̀tə̀ àchɔʼ kɛ ə ke chɔʼɔ cho ndɛ etɔfe, nâʼà ghàyn e njiə va ətəyn, fɨnə tâmtə̀ ə ghɨ ghɛ ə ghe kyiŋə se nji ə ndɛ etɔf nə zɨ̂yn.”
53Ə tè se nyi kə Njisə̀s ndò fɨ fuə ndɛ, tyə̀ynsè sə alàŋsè yî ghɨə Falàsîə ə zhə̀tə̀ se tsəfsê vəyn, pfɨftə̂ əghɛ e tsɨə, 54tamə ètwɔm, lɨmtə se ko kyə̀ vəyn, se kyiə vəyn.
©2022 CABTAL