Hecho 9
9
Saulopa Jesude ĩjãana
1-2Mãɨ ewaride Saulopa wapida chi Tachi Chiparide ĩjãapataɨrã peak'oayade a bapachima. P'aare minachia k'awa bɨmá wãk'ari idisima k'art'a teamẽrá. Mãɨ k'art'a Damasco p'uurude judiorã ará pedeapataɨ techa ateei k'ɨ̃risia basima. K'art'ade bɨ basima ãchi t'ãena Jesú Ode nipada ɨmɨk'ĩrarã mãɨnepa wẽrarã sida jitak'ari Jerusalenea ãarea ateewãi bɨt'a. 3Mãɨ k'art'a jitak'ari wãsima. Ode Damasco p'uuru k'ait'a paside mãɨya bɨde pajãnepa ichik'á urua jũra jẽrat'ĩusima. 4Mãɨpa Saulo jeeda baepisima. Mãɨne pedea ũrisima. Mãɨ pedeapa jarasima:
—Saulo, Saulo, ¿k'ãre k'orea mɨ ẽp'ẽ bɨma?
5Mãɨne Saulopa idisima:
—Mɨ chipari, ¿pɨ k'aima?
Chi pedeapa p'anoosima:
—Mɨ Jesupɨ, chi pɨa ẽp'ẽ bɨpɨ. Chi k'umia bɨmá t'ɨarude, ara pɨchi tuaba p'uaparima.#9:5 Chi k'umia bɨmá t'ɨarude, ara pɨchi tuaba p'uaparima. Mãɨ k'art'a minachia griego pedeade bɨdaadade mãɨ newẽma. 6P'irabarik'ari Damasco p'uurudea wãse.#9:6 Chi eda waapẽarã k'art'ade nãɨya bɨ bɨma: Maapae ne wap'eapa k'ak'ua ore nɨbɨpa Saulopa jarasima: Mɨ Chipari, pɨa ¿k'ãre k'ɨ̃ria bɨma mɨa ooit'a? Mãɨne Tachi Chiparipa jarasima... Maamina mãɨ griego pedeade newẽma. Jãma jaraipɨ pɨa k'ãre ooi bɨt'a.
7Chi Saulo ome wãuta minachia p'erasidama. Ãchia pedea ũrisidamina abaɨ pida ununaé pasima. 8Saulo ĩjũanepema bai nɨbeek'ari, ya maapae tau uruak'ari, mãɨne ne aba pida unué pasima. Maapae chi ichi ome wãutapa ichi juade jitadak'ari Damasco p'uurudea ateewãsidama. 9Mãma ewari ũpea p'ue unuwẽa basima, nek'owẽa basima mãɨnepa ne towẽa basima.
10Damasco p'uurude ẽpẽra Anania apataɨ basima. Mãɨ Ananiapa Jesucristode ĩjãa basima.#9:10 Ak'ɨse chi k'irude bɨ bɨ ek'ari Hecho 5:1. K'ãmok'araa jĩra ichia unusima Tachi Chiparipa nãɨya jararut'a:
—¡Anania!
Ichia p'anoosima:
—Mɨ nãma bɨma, mɨ Chipari.
11Tachi Chiparipa jarasima:
—P'irabarik'ari Juda tedea wãse. Mãɨ te O Jĩp'a Bɨ apataɨde bɨma. Cherude jarase pɨa ẽpẽra Saulo Tarso p'uurudepema ak'ɨde che bɨt'a. Ara nãɨyana ichia Tachi Ak'õrea ɨt'aa chiidi bɨma. 12Ichia k'ãmok'araa jĩra unusima ɨmɨk'ĩra Anania apataɨ ichimá chek'ari ichi ɨ̃rɨ jua bɨrut'a ya mãicha ichi taupa unumẽrá.
13Mãɨne Ananiapa p'anoosima:
—Mɨ Chipari, mɨa jãɨ ẽpẽra k'orea ũri bɨma. Minachia jarapatama Jerusalene ichia pɨ ẽpẽerã minachia mĩapi bɨt'a. 14Mãɨ awara p'aarerã chi mãɨrã chaarearã t'ɨ̃nepa nãɨ p'uurudea che bɨma pɨde ĩjãapataɨrã jõma jita ateei k'orea.
15Maamina Tachi Chiparipa jarasima:
—Wãse. Mɨa ichi jɨrɨ atasima mɨ k'orea pedeamẽrá judiorãwẽmá, ãchi poro jũra jɨ̃parí jɨ̃pataɨrã́ mãɨnepa israel ĩjũanepemarã́. 16Mɨa ichiá k'awapiipɨ sãmaasã́ mĩai bɨt'a mɨnepema pedeai k'orea.
17Ara mãɨne Anania Saulo bɨmá wãsima. Chi tede eda wãk'ari ichi jua Saulo ɨ̃rɨ bɨk'ari jarasima: «Ũpẽa Saulo, Tachi Chipari Jesú chi pɨmá ode unupidapa mɨ chepisima mãicha pɨ taupa unumẽrá mãɨnepa Tachi Ak'õre Jaoredepa beemẽrá».
18Ara mãɨne Saulo taudepa beta ek'ama jĩra baedak'ari, mãicha unu beesima. Mãɨne p'irabarik'ari porochoapisima. 19Maapae nek'ok'ari k'ak'ua ɨbɨasima.
Saulo Damasco p'uurude bada
Saulo Damasco p'uurude chi Jesude ĩjãapataɨrã paara ewari k'ak'o tãaraawẽa basima. 20Mãɨne judiorã ará pedeapataɨ te p'anɨrãmá wãrune ichia jaratea beesima Jesú piarã Tachi Ak'õre Warra k'orea. 21Ãarea mãɨ ũriutapa k'awa k'ɨ̃risiadaé pasima. Ãchia nãɨya idi tuanasidama: «¿Nãɨwẽk'ãra chi Jerusalene Jesude ĩjãapataɨrã jõpi k'ɨ̃ria badat'a? ¿Nãma che bɨwẽk'ãra ãchi p'aarerã chi mãɨrã chaarearãmá jɨ̃a nɨbɨyá ateewãyá k'ɨ̃ria badat'a?»
22Maamina Saulopa ewaricha pia k'awapipachima Jesú piarã Tachi Ak'õrepa Tachi K'aripaparí teai jaradat'a. Mãɨpa Damasco p'uurudepema judiorãpa k'awa k'ɨ̃risiadawẽa p'anasima.
Saulo mĩruwãna
23Ewari minachia padak'ari judiorã Damasco p'uurudepemarãpa Saulo peadai k'orea pedea ausidama. 24Mãɨ k'orea ãsã mãɨnepa teamasi chi p'uurude eda wãpataɨmá ot'ea p'anasidama. Maamina ãchia k'ɨ̃risia p'anɨt'a Saulopa k'awasima. 25Mãɨpuru teamasi Jesude ĩjãapataɨrãpa Saulo jabara nepalade eda bɨdak'ari maapae chi p'uuru ik'idá jũk'a bɨ uriade ɨ̃rɨpa edá jira peesidama. Mãɨya mĩruwãsima.
Saulo Jerusalenea wãna
26Saulo jĩitea Jerusalenea wãside chi Jesude ĩjãapataɨrã ome bee k'ɨ̃ria basima.#9:26 Saulo Jerusalenea jĩitea wãi naena ãyo ũpea tãaraasima. Gálata 1:17-19. Maamina ichi wap'ea p'anasidama. Ãchia ĩjãanawẽa p'anasidama ichia piarã Jesude ĩjãa bɨt'a. 27Maamina Bernabepa Saulo ateewãsima Jesupa peedaɨrãmá. Maapae ichia nepɨrɨsima sãmaasã́ Saulopa Tachi Chipari ode unusit'a, Tachi Chipari ichi ome pedeadat'a mãɨnepa sãmaasã́ Saulopa Damasco p'uurude Jesú k'orea ne wap'eawẽa pedeapachit'a. 28Mãɨya Saulo ãchi ome beesima. Mãɨne Jerusalene Tachi Chipari Jesú k'orea ne wap'eawẽa pedea nipapachima. 29Judiorã chi griego pedeade pedeapataɨrã ome Jesú k'orea pedeapachima maamina ichi pea k'ɨ̃ria p'anasidama. 30Ũpẽarãpa mãɨ k'awasidaɨde Saulo Cesarea p'uurudea ateewãsidama. Mãmãɨpa ichi p'uuru Tarsodea peesidama.
31Mãɨmisa Judea tuade, Galilea tuade mãɨnepa Samaria tuade ũpẽarã nek'ĩramariwẽa tuanasidama mãɨnepa ne minachia k'awapodosidama. Tachi Chipari wap'ea p'anɨnepa nipasidama mãɨnepa Tachi Ak'õre Jaore chi jua chaareadepa waripodosidama.
Ẽpẽra Enea apataɨ jɨpa beeda
32Mãɨ ewaride Pedro chi Tachi Ak'õreneerã ak'ɨde wãpachima mãɨ tua ãarea. Mãɨne ũpẽarã Lida p'uurude berã ak'ɨde wãsima. 33Mãma ẽpẽra Enea apataɨ unusima. Mãɨ ẽpẽra sorek'ea bɨ pẽra ocho ãyo k'ɨdade basima. 34Mãɨne Pedropa jarasima:
—Enea, Jesucristopa pɨ jɨpa beepisima. ¡P'it'ɨk'ari, pɨchi k'ɨda jitase!
Ara mãɨne Enea p'it'ɨsima. 35Lida p'uurudepemarã mãɨnepa Sarón ĩjũanepemarã ãareaɨrãpa Enea jɨpa beepida ununak'ari Tachi Chiparide ĩjãasidama.
Dorca chok'ae p'irabarida
36Mãɨ ewaride Jesude ĩjãa bɨ wẽra Tabita apataɨ Jope p'uurude basima. Griego pedeade ichi t'ɨ̃ Dorca apachidama.#9:36 Tabita. Mãɨ t'ɨ̃ arameo pedeade mãɨnepa Dorca griego pedeade jara k'ɨ̃ria p'anɨma «bii». Mãɨ ũpẽawẽrapa nepia be oo bapachima. Chi nenea k'ede minachia k'aripapachima. 37Ewariaba Dorca k'ɨdade bak'ari k'ĩrawẽasima. Maapae chi k'ak'ua sɨɨdak'ari chi te ɨt'aride aba k'ãipataɨmá bɨsidama. 38Jope p'uuru Lida k'ait'a basima. Chi Jesude ĩjãapataɨrãpa ũrisidama Pedro Lidade bɨt'a. Mãɨpuru ẽpẽra ume ichimá peesidama nãɨya chichupuria ididamẽrá: «Taimá isapea chese».
39Ara mãɨne Pedro ãchi ome wãsima. Chesidaɨde ichi chi te ɨt'aride aba k'ãipataɨmá ateewãsidama. Mãma p'ẽtãarã ãarea jẽa tuanasidama. Ãchia Pedroa chi Dorcapa p'aru k'osak'oa bada ak'ɨpisidama. 40Mãɨne Pedropa ãareaɨrã tajatá wãpisima. Sĩraporode k'obeek'ari Tachi Ak'õrea ɨt'aa chiidisima Dorca chok'ae p'irabaripimẽrá. Ɨt'aa chiidik'ari chi piudamá ak'ɨrude jarasima:
—Tabita ¡p'irabarise!
Ara mãɨne ichi tau uruasima. Pedro unuk'ari suak'abari beesima. 41Pedropa ichi juade jitak'ari bai nɨbeepisima. Maapae ũpẽarã mãɨnepa p'ẽtãarã t'ɨ̃k'oak'ari Dorca chok'ae p'irabarida ak'ɨpisima. 42Ãarea Jope p'uurude mãɨ k'orea k'awasidama. Mãɨya minachia p'anɨrãpa Tachi Chiparide ĩjãasidama. 43Maapae Pedro Jope p'uurude tãaraasima ẽpẽra Simón apataɨmá. Mãɨ Simonpa ãnimara e p'oapiparí pasima.
© (Active), Wycliffe Bible Translators, Inc. All rights reserved.