Hecho 12
12
Pedro eda jɨ̃a nɨbada awara wãna
1Mãɨ ewaride chi poro jũra jɨ̃parí jɨ̃ bɨ Herodepa ũpẽarã chi eda waapẽarã jitapik'ari mĩapisima.#12:1 Mãɨ Herode «Agripa chi naapema» apatama. Abapuru nãɨ Hecho capítulo 12de bɨ bɨma. Herode chi Choma bɨ ãichae pasima. Judiorã tuadepema poro jũra jɨ̃parí jɨ̃ bɨ pasima ãyo 41nepa waa 44dea. Ichi warra ichiaba «Agripa» t'ɨ̃ jarapachidama. Mãɨ Agripa bɨ bɨma Hecho 25:13—26:32. 2Juan ũpẽa Santiago k'ĩruuparí nek'opa peapisima.#12:2 Santiago ichiaba «Jacobo» apatama. Marco 10:35-40. 3Herodepa unusima judiorã mãɨ k'orea arapaasidat'a. Mãɨpuru Pedro sida jitapisima. Mãɨya oosima p'ana ooropiparí newẽa k'opataɨ ewaride.#Éxodo 12:1-27. 4Pedro jitapik'ari eda jɨ̃a nɨbɨpisima. Maapae papaká berã diecisei k'ik'imãria bɨk'ari, Pedro pia ak'ɨpisima. Herodepa k'ɨ̃risia basima ãareaɨrã k'ĩrari Pedro nepɨra ak'ɨit'a, judiorã Egitodepa wãnana k'ɨ̃risiapataɨ jõru ewaride. 5Pedro jɨ̃a uru p'anɨmisa ũpẽarãpa Tachi Ak'õrea minachia ɨt'aa chiidi p'anasidama ichi k'aripamẽrá.
6Herodepa Pedro nepɨra ak'ɨi naena, ara mãɨ teamasi papaká berã ume p'anɨ mãɨ esa k'ãi basima. K'ãnena ume bɨpa jɨ̃ basima. Chi jɨ̃a nɨbɨpataɨ tede eda wãpataɨmá chi eda waapẽarã papaká berãpa ot'ea p'anasidama. 7Mãɨya bɨde Tachi Chiparipa ɨt'aripa peedapa Pedroa unupisima. Mãɨpa chi jɨ̃a nɨbadamá eda ɨnaa nɨbeepisima. Pedro orromá totomĩak'ari, ɨ̃rɨmapik'ari jarasima: «Ɨbɨa p'irabarise».
Mãɨya bɨde chi k'ãnena ichi jua jɨ̃ bada ẽreechoa wãsidama. 8Maapae chi Tachi Ak'õrepa ɨt'aripa peedapa jarasima:
—Neet'á jɨ̃se mãɨnepa pɨchi jĩrune jɨ̃parí jɨ̃se.
Pedropa mãɨya ook'ari chi Tachi Ak'õrepa ɨt'aripa peedapa jarasima:
—Pɨ neet'á ɨ̃rɨ jɨ̃parí jɨ̃k'ari mɨ k'aade chese.
9Ara mãɨne Pedro Tachi Ak'õrepa ɨt'aripa peeda k'aade wãsima, maamina k'awaé pasima Tachi Ak'õrepa ɨt'aripa peedapa piarã mãɨya oo bɨt'a. Mãɨ k'ãmok'araa jĩra k'ɨ̃risia basima. 10Mãɨya bɨde papaká berã chi naa ot'ea p'anɨ mãɨnepa chi k'aadea ot'ea p'anɨ mãɨ p'asa wãsidama. Mãɨ p'asa wãnak'ari chi eda wãpataɨ jiorro oodamá pasidama. Mãɨne chi eda wãpataɨ jiorro ooda itu ewa wãsima. Maapae wãsidama. Mãɨ awara ãpia wawá wãutade, ara mãɨne Tachi Ak'õrepa ɨt'aripa peeda Pedro ome bada wẽpasima.
11Maapaepuru Pedropa k'awasima ichi k'amok'araaé pasit'a. Ichi tuaba jarasima: «Naapae mɨa k'awasima Tachi Chiparipa piarã Tachi Ak'õrepa ɨt'aripa peeda peek'ari mɨ Herode juadepema k'ẽet'aasit'a. Ichiaba chi judiorãpa mɨ piawẽa oodai k'ɨ̃risia p'anananepema piarã k'ẽet'aasima».
12Pedropa mãɨ k'awaside Juan nae María temá wãsima. Mãɨ Juan, chi ɨ̃ana t'ɨ̃ Marco pasima. María tede ũpẽarã minachia ará Tachi Ak'õrea ɨt'aa chiidimaa p'anasima. 13Mãɨne Pedropa tajatariipa t'ɨ̃side, chi María pae mimiaparí ãwẽra Rode apataɨpa ak'ɨde wãsima mãɨ k'aipa t'ɨ̃ bɨ k'awai k'orea. 14Rodepa Pedro pedea k'awaside arapaasima. Maamina chi eda wãpataɨ ewaé pasima. Mãɨpari eda p'ira wãk'ari ũpẽarã́ jarasima Pedro tajata bɨt'a. 15Mãɨne ãareaɨrãpa Rodea jarasidama:
—Pɨ k'ĩra piawẽa bɨma.
Maamina ichia piarãane asima. Mãɨne ãchia jarasidama:
—Mãɨya bɨpɨra chi Tachi Ak'õrepa ɨt'aripa peeda mãɨ Pedrodepɨ.#12:15 Chi eda waapẽarã judiorãpa k'ɨ̃risiasidama ãareaɨrãpa ara ãchi Tachi Ak'õrepa ɨt'aripa peeda uru bet'a. Chi ẽpẽra piuk'aripuru, chi Tachi Ak'õrepa ɨt'aripa peeda unupiparima. Mãɨ ara chi ẽpẽra k'ĩra jĩra bɨt'a k'ɨ̃risiasidama.
16Mãɨya p'anɨne Pedropa tajatariipa waa t'ɨ̃ basima. Mãɨ ewasidaɨde ãchia unusidama piarã Pedrot'a mãɨya bɨt'a. Mãɨya k'awa k'ɨ̃risiadaé pasima. 17Maamina Pedropa juapa jarasima k'ĩup'eadamẽrá. Maapae jõma nepɨrɨsima sãmaasã́ Tachi Chiparipa ichi jɨ̃a nɨbɨpataɨ tedepema k'ẽet'aapisit'a. Ãarea nepɨrɨk'ari jarasima:
—Mãɨ ãarea Santiagoa mãɨnepa chi waapẽarã ũpẽarã́ jarat'ɨ.#12:17 Mãɨ Santiago Jesú ũpẽapɨ. Santiago ichiaba «Jacobo» apatama. Chi k'art'a Santiago apataɨ mãɨ Santiagopa bɨsima.
Maapae Pedro mãmãɨpa ãyá wãsima.
18Mãɨ ewariside papaká berãpa minachia k'awa k'ɨ̃risiadaé pasima mãɨnepa ne wap'easidama, Pedro sãmá wãsit'a k'awadawẽ pẽra. 19Herodepa ichi jɨrɨpisima, maamina chi papaká berãpa ununaé pasima. Herodepa ãchiá mãɨ k'orea minachia idik'ari ãarea k'enapade asima. Mãɨya nak'ari Herode Judeadepa Cesarea p'uurudea wãk'ari mãma beesima.
Herode piuda
20Mãɨ ewaride mãɨ poro jũra jɨ̃parí jɨ̃ bɨ Herode k'ĩruu basima Tirodepemarã ome mãɨnepa Sidonepemarã ome. Ãchi ichi ome sõpiadayá oo p'anasima, mãɨ ichi tuadepuru chik'o atapachida pẽra. Mãɨpuru ãchi pedea audak'ari ará wãsidama ichi ome pia pedeadai k'orea. Naa Blasto apataɨmá wãsidama. Mãɨ Blasto Herode pae mimiaparí chi atepe bɨ pasima. Mãɨya Blasto ome sõpia p'aneenak'ari, ichidepa chi Herodea chichupuria idisidama pia pedeadai k'orea.
21Herodepa bɨda ewaride, ichi neet'á pia jɨ̃k'ari, ichi poro jũra jɨ̃parí jɨ̃ bɨ suak'a beeparide suak'abari beesima. Maapae chi ichi p'uurudepemarã́ pedeasima. 22Mãɨya bɨde ãchia jĩk'ua jarapachidama: «¡Cha pedea bɨ ẽpẽrawẽma, mãɨpari Tachi Ak'õrepɨ!»
23Maamina Herodepa Tachi Ak'õrea pia pedeaé pasima. Ara mãɨne chi Tachi Chiparipa ɨt'aripa peedapa ichi k'ɨdade beepisima. Maapae ichi p'ip'it'apa k'ok'ari, piusima.
24Chi Tachi Chipari pedea t'ɨmɨa jaratea wãsidama,#12:24 Tachi Chipari Pedea. Griego pedeade nãɨya bɨ bɨma: Tachi Ak'õre pedea. mãɨnepa minachia p'anɨrãpa mãɨne ĩjãasidama.
25Bernabepa mãɨnepa Saulopa Jerusalene chi erreara ũpẽarã pae teadak'ari jĩitea wãsidama. Juan chi ɨ̃ana t'ɨ̃ Marco apataɨ ateewãsidama.
© (Active), Wycliffe Bible Translators, Inc. All rights reserved.