John 9
9
Jesus‑em Naallghuskanga Ayaakaq Yuuk
1Jesus‑em igleghutkelluku esghaqaa yuuk ayaangaghmi allgeqaq. 2Maligsaaghtengan aaptekaa, “Apeghtughista, kitum seghleghqellghan una yuuk ayaangaghmi allgeghtestagu, ellngan seghleghqellghaan nalighmeng angayuqagkenka?” 3Jesus‑em kiimsiqii, “Uum yugem nalighmeng angayuqagkenka seghleghqellghita ayaangasneghitaa. Una yuuk ayaangaghmi allgeqaaguq esghiisqelluku Kiyaghneghem aghtughyaghqaanghillgha ellngakun. 4Nagneghutepestaaghyaghqaqaput qepghaqii Kayagtistema paninang aghneghuluku. Unugyaghtughaa, kina alngunak qepghaghnaanghituq unugmi. 5Paninang nunamellunga nighukaanga nunam yugan.” 6Tawaten pitkelluku nunakun qesighluni sunameng akumluku angighhegkakek yugem iiskek. 7Taagken yuuk pikaa, “Naayvaghaghmun Siloam‑emun aghmigyaghtaa.” (Siloam whaten pisiilghii, “Tuyuqaq”.) Enkaam yuuk aghmigyaghtughluni tagiyalghiimi esghaasagulluni.
8Uvilighneghitallu ilangitallu awen esghaghaqegkangat taana yuuk tungsighralghii enkaam aapqughaaghutkat, “Unangunghitaa yuuk aqumluni tungsighraghaqsalghii?” 9Ilangi pikat, “Aa‑a taananguuq.” Iwernga ilangi pikat, “Nakaa, allanguuq, kinanguuq ellngasugnilnguq.” Enkaam ayaangayalghiim pikii, “Taananguunga.” 10Aaptekaat, “Naten esghaasagusin?” 11Kiimsiqii, “Yugem aatqelghiim Jesus‑meng qesighluni sunameng akumluku angighllukek iyegka aghmigyaghtiisqaanga Siloam‑emun. Enkaam aghmiglunga esghaasagutunga.” 12Aaptekaat, “Naagu taana yuuk?” Yugem kiimsiqii, “Saa, nallukaqa!”
Pharisees‑et Aapqughaaqangat Ayaangayalghii
13Taagken ayaangayalghii yuget aglaatkaat Pharisees‑enun. 14(Tawani aghneghmi Sabbath‑ngulghii Jesus‑em qesighluni sunameng akumluku esghaasagutestaqngamigu yuuk.) 15Pharisees‑et aaptekaat yuuk, “Naten esghaghyagusin?” Kiimsiqii, “Yugem angighllukek sunameng iyegka, aghmigyalghiinga esghaghtunga.” 16Ilangi Pharisees‑et pikat, “Una yuuk Kiyaghneghmeng pingunghituq, qayughllak qaatkigatii Liilightuusat Sabbath‑meng ayuqelghiit.” Iwernga ilangi pikat, “Yuuk seghleghqesta, allaaghlluwhaghtilaghnaanghituq tawatelngughmeng.” Aaghtiiraaghutkat.
17Alla aaptekaat yuuk, “Ellngan esghaghtestaaten. Sameng pinayaghsigu?” Yugem kiimsiqii, “Uuknaliqistenguuq.” 18Jews‑et igleghutistengita ugpequmangilkangat ayaangayaatangallu, esghaghyagutellghallu, enkaam aqfastekagket angayuqakek. 19Aaptekagket, “Una ighneqestegnegu? Ayaangaghmi allgeghumanikesek, naten esghaghyaguta?” 20Angayuqagkenka kiimsiqii, “Liisimakaghpung ighneqaghpung. Liisimakaghpung ayaangaghmi allgeqaaguq, 21iwernga nallukaghpung naten esghaghyagusimatanga. Talwa nallukaghpung kitum esghaghyagutestellgha. Aapteggu yugughtekaaguq, kiimsighnaaghiisi ellmineng.” 22Angayuqakek tawaten pikak alinglutek Jews‑et igleghutistengitneng. Igleghutistet ataasiightengngwaaqat kitum alngunak ugpeqnikagu Jesus, Christ‑anguniluku iqitesaghqaaluku synagogue‑nneng. 23Taana apalluqluku angayuqakek whaten pikak, “Yugughtekaaguq, aapteggu.”
24Enkaam Jews‑et igleghutistengita tuqlunqiglluku ayaangayalghii yuuk, pikaat, “Usuqigu Kiyaghneq. Liisimakaghput taana yuuk, Jesus, seghleghqestenguuq.” 25Pikii, “Nallukaqa seghleghqestengutanga, iwernga liisimakngwaaghaqa ayaangayalghiinga whaa esghaghyagutunga.” 26Jews‑et igleghutistengita aaptekaat, “Saaten? Naten esghaghyagutestaten?” 27Kiimsiqii, “Ungipaatngwaaghamsi, iwernga nagasugigataghpesinga. Sangan alla nagasugesteggu? Elpesillu maligsaaghtengughsugetsii ellnganun?” 28Taagken ugumiyagulluku pikaat, “Elpek maligsaaghtekaaten. Whangkuta Moses‑em maligsaaghtekiinkut. 29Liisimakaghput Kiyaghneghem aleghquqaqaa Moses. Iwernga taana yuuk, Jesus, nallukaghput naken pingutanga.” 30Yugem pikii, “Kii! Elpesi igleghutisteni nallukumasteggu naken tagikaatanga, naqamllu ellngan esghaghyagutestaanga. 31Qamaglluta liisimakngwaaghaghput Kiyaghneghem nagasigatii seghleghqestet. Iwernga Kiyaghneghem nagatkayuwaa kina alngunak maniguullghii, qaatkullghii ellminun. 32Ima nuna piinlighyuwhaallghaneng kitum alngunak nagaqiigataa kina alngunak esghaghtestiniluku ayaangaghmi allgeqameng. 33Taana yuuk Kiyaghneghmeng pingunghisaqumi sanayanghituq.” 34Pikaat, “Seghleghqestenguuten ima allgenghaghhaategpeneng, sanganꞌngam whangkuta apeghtughnaqutkesikut?” Taagken aanestestekaat synagogue‑meng.
Jesus‑em Akuzitkegkanga Ayaangalleq
35Jesus‑em nagaquqaa ayaangayalghii yuuk aanesimaniluku synagogue‑meng. Enkaam ivaghluku naalkesamigu pikaa, “Ugpeqsigu Ighnegha Yugem?” 36Yugem aaptekaa, “Yuguniiq, kingangaawa Ighnegha Yugem? Ungipaatinga enkaam ugpeqlakun.” 37Jesus‑em pikaa, “Esghamaan, aleghqughaqaaten.” 38Yugem pikaa, “Aa‑a, Ataneq, ugpeghtunga.” Taagken segesqughlluni maniguqaa Jesus.
39Jesus pikaq, “Taginguunga nunamun aafqughnaluki yuget, tamaakut esghiigasalghiit esghiisqelluki, tamaakut esghaqayuget ayaasnaluki.” 40Ilangita Pharisees‑et tunganganilnguut Jesus‑em nagalluku aaptekaat, “Sameng pizin? Whangkutallu ayaanganizikuut?” 41Jesus‑em kiimsiqii, “Ayaangayaqufsi Kiyaghneghem pinayanghitiisi seghleghqestengunilusi. Iwernga whaten pikaategpesineng, ‘Esghaqayuguukut’ tamaaken apalluqluku Kiyaghneghem piiqiisi seghleghqestengunilusi.”
© 2018, Wycliffe Bible Translators, Inc. All rights reserved.